ក្រុមអង្គការសង្គមស៊ីវិលនៅក្រៅស្រុក អំពាវនាវឲ្យសហគមន៍អន្តរជាតិដាក់ទណ្ឌកម្មលើរដ្ឋាភិបាលកម្ពុជា ប្រឆាំងនឹងការបោះឆ្នោតដែលគ្មានតម្លាភាពនៅខែកក្កដា ខាងមុខនេះ ដើម្បីឲ្យមានការកែទម្រង់ការបោះឆ្នោតមួយដែលអាចទទួលយកបានប្រកបដោយសេរី ត្រឹមត្រូវ និងយុត្តិធម៌។
ក្រុមអង្គការសង្គមស៊ីវិលខ្មែរ-អាមេរិកាំងដែលមានមូលដ្ឋាននៅសហរដ្ឋអាមេរិក អំពាវនាវជាសាធារណៈកាលពីថ្ងៃ១ ខែឧសភា ឆ្នាំ២០២៣ នេះ សូមឲ្យអ្នកបោះឆ្នោតដែលកំពុងមានវត្តមាននៅក្នុងប្រទេសកម្ពុជា ធ្វើពហិការការបោះឆ្នោតនៅថ្ងៃទី២៣ ខែកក្កដា ឆ្នាំ២០២៣ ខាងមុខ រហូតទាល់តែរដ្ឋាភិបាលលោក ហ៊ុន សែន អាចរៀបចំឲ្យបានត្រឹមត្រូវនូវការបោះឆ្នោតមួយដោយឈរលើមូលដ្ឋានច្បាប់ពិតប្រាកដ ដើម្បីចៀសវាងនូវការចូលរួមការបោះឆ្នោតមួយដែលរៀបចំដោយបក្សកាន់អំណាចដែលគ្មានតម្លាភាពដូចពេលនេះ។
អង្គការសង្គមស៊ីវិលខាងលើជំរុញឲ្យសហគមន៍ខ្មែរ អ្នកតស៊ូមតិ និងក្រុមសិទ្ធិមនុស្សផ្សេងទៀត ប្រើប្រាស់គ្រប់វេទិកាដែលមានកម្រិតអន្តរជាតិ ដើម្បីប្រកួតប្រជែងយុទ្ធនាការរបស់លោក ហ៊ុន សែន អំពីការរំលោភបំពានសិទ្ធិមនុស្ស នីតិរដ្ឋ និងការប្រើប្រាស់ដំណើរការនយោបាយដោយរំលោភបំពានលើសិទ្ធិមនុស្ស រំលោភច្បាប់ជាតិ និងច្បាប់អន្តរជាតិនៅក្នុងប្រទេសកម្ពុជាសព្វថ្ងៃនេះឲ្យបានគ្រប់ទីកន្លែងទាំងអស់។
ប្រភពដដែលបញ្ជាក់ថា ដំណើរការនៃការប្រកាសលទ្ធផលបោះឆ្នោតជាតិនៅចុងខែកក្កដា ឆ្នាំ២០២៣ ខាងមុខនេះ នឹងមិនមានសុពលភាពទេ បើរដ្ឋាភិបាលលោក ហ៊ុន សែន មិនផ្អាកដំណើរការនៃការរៀបចំការបោះឆ្នោតដែលគ្រប់គ្រងដោយគណបក្សប្រជាជនកម្ពុជា និងងាកមករកការរៀបចំការបោះឆ្នោតមួយដែលអនុវត្តតាមការណែនាំដោយអង្គការសហប្រជាជាតិទេនោះ។
កាលពីថ្ងៃទី៣០ ខែមេសា ឆ្នាំ២០២៣ មេដឹកនាំបក្សកាន់អំណាច លោក ហ៊ុន សែន បានទម្លាយនូវរូបភាព និងឃ្លីបវីដេអូដែលមានប្រវែងជាង ២ម៉ោង អំពីកិច្ចប្រជុំមួយតាមប្រព័ន្ធ zoom របស់ពលរដ្ឋខ្មែរនៅក្រៅប្រទេស ដោយចោទថាពលរដ្ឋខ្មែរក្រៅស្រុកដែលបានចូលរួមកិច្ចប្រជុំទាំងនោះ គឺជាក្រុមជ្រុលនិយមបំផ្លាញជាតិ ព្រោះពួកគេមានចេតនាប្រឆាំងជាមួយការបោះឆ្នោត និងលទ្ធផលបោះឆ្នោតរបស់កម្ពុជាខាងមុខនេះ។
លោក ហ៊ុន សែន សួរថា តើពួកគេចង់បំផ្លាញប្រទេសកម្ពុជាដល់ណាទៀត? ជាងនេះទៀត បុរសខ្លាំងក្រាញអំណាចដែលគំរាមកម្ចាត់ក្រុមប្រឆាំង លោក ហ៊ុន សែន គំរាមថា ពួកគេនឹងពិបាកចូលមកស្រុកខ្មែរនៅពេលក្រោយ ដោយសារតែអ្នកទាំងនោះមានចេតនាផ្តួលរំលំរដ្ឋាភិបាលរបស់លោក។
ទាក់ទិននឹងបញ្ហានេះ ក្រុមអ្នកសង្កេតការណ៍រិះគន់ថា ឲ្យតែមានការលើកឡើងជុំវិញការធ្លាក់ចុះនូវលទ្ធិប្រជាធិបតេយ្យ ធ្លាក់ចុះការគោរពសិទ្ធិមនុស្ស ទោះជាក្រុមណាក៏ដោយ វិធានការមុនដំបូងរបស់លោក ហ៊ុន សែន គឺតែងតែចោទអ្នកទាំងនោះជាក្រុមជ្រុលនិយមក្បត់ជាតិ បន្ទាប់មកទើបគាត់ចាប់ផ្តើមផែនការកម្ចាត់អ្នកទាំងនោះ ទោះជាវិធីរបស់គាត់ត្រូវបំពានច្បាប់ ឬរំលោភសិទ្ធិមនុស្សក៏ដោយ។
កម្ពុជាដែលក្រោមការដឹកនាំរបស់លោក ហ៊ុន សែន ត្រូវគេមើលឃើញថា បានរំលោភច្បាប់ រំលោភសិទ្ធិមនុស្ស ជាន់ឈ្លីលទ្ធិប្រជាធិបតេយ្យធ្ងន់ធ្ងរ ប៉ុន្តែលោក ហ៊ុន សែន តែងចោទប្រកាន់អ្នកដែលប្រឆាំងនឹងការដឹកនាំរបស់លោកថា ពួកគេជាជនក្បត់ជាតិ ឬជាក្រុមជ្រុលនិយមដែលបង្កចលាចលដល់សន្តិសុខសង្គម និងប្រកាសចាប់ខ្លួនអ្នកទាំងនោះយកទៅដាក់គុកទាំងអយុត្តិធម៌យ៉ាងអនាធិបតេយ្យសព្វថ្ងៃនេះ។
ទាក់ទិននឹងការដឹកនាំរបស់លោក ហ៊ុន សែន ជាង ៤០ឆ្នាំមកនេះ អង្គការ Freedom House បានចេញរបាយការណ៍របស់ខ្លួនកាលពីឆ្នាំ២០២២ ថា ប្រព័ន្ធនយោបាយរបស់ប្រទេសកម្ពុជាត្រូវបានលោក ហ៊ុន សែន គ្រប់គ្រងផ្ដាច់មុខទាំងស្រុង ក្នុងនោះគណបក្សប្រឆាំង បណ្ដាញសារព័ត៌មានឯករាជ្យ អ្នកតវ៉ាទាមទារសិទ្ធិសេរីភាព និងប្រជាពលរដ្ឋខ្មែរ កំពុងរស់នៅក្នុងភាពភ័យខ្លាចគ្រប់ៗគ្នា៕