ក្រុមអ្នកវិភាគឯករាជ្យ រិះគន់ថា មេដឹកនាំបក្សកាន់អំណាច លោក ហ៊ុន សែន ប្រមាថព្រះមហាក្សត្រខ្មែរធ្ងន់ធ្ងរនៅចំពោះក្រសែភ្នែកអន្តរជាតិ និងប្រជាពលរដ្ឋនៅក្នុងព្រឹត្តិការណ៍ស៊ីហ្គេម ដែលកម្ពុជាធ្វើជាម្ចាស់ផ្ទះ ដោយសារមិនអនុញ្ញាតឲ្យព្រះប្រមុខរដ្ឋធ្វើជាអធិបតីក្នុងពិធីប្រកាសបើកព្រឹត្តិការណ៍ស៊ីហ្គេម។
អ្នកវិភាគឯករាជ្យ និងជាប្រធានវេទិកាពលរដ្ឋ លោក គឹម សុខ លើកឡើងក្នុងកម្មវិធី Idea Talk នៃសារព័ត៌មាន The Cambodia Daily កាលពីរាត្រីថ្ងៃទី២ ឧសភា ថា ក្នុងព្រឹត្តិការណ៍ធំៗរបស់ប្រទេស ត្រូវតែប្រមុខរដ្ឋធ្វើជាអធិបតីក្នុងពិធីប្រកាសបើក មិនសំខាន់ថាប្រទេសនោះដឹកនាំដោយរបបសភានិយម ឬរបបប្រធានាធិបតីនិយមនោះទេ ព្រោះមានតែប្រមុខរដ្ឋនៃប្រទេសប៉ុណ្ណោះទើបមានកិត្តិយសផ្តល់នូវការប្រកាសបើកព្រឹត្តិការណ៍ធំៗនានា។
លោក គឹម សុខ រៀបរាប់ថា នៅឆ្នាំ២០០៧ រាជទាយាទរបស់ស្តេចថៃ តំណាងព្រះបិតារបស់ទ្រង់ធ្វើជាអធិបតីក្នុងការបើកព្រឹត្តិការណ៍ស៊ីហ្គេមរបស់ខ្លួន ខណៈប្រទេសម៉ាឡេស៊ី ស្តេចម៉ាឡេស៊ី ក៏ទ្រង់គង់ជាអធិបតីប្រកាសបើកព្រឹត្តិការណ៍ស៊ីហ្គេមរបស់ប្រទេសម៉ាឡេស៊ី ដែរ ចំណែកប្រទេសវៀតណាម ព្រឹត្តិការណ៍ស៊ីហ្គេមឆ្នាំ២០២២ ប្រធានាធិបតីវៀតណាម លោក ង្វៀន សួនហ្វុក ធ្វើជាអធិបតីក្នុងការប្រកាសបើកព្រឹត្តិការណ៍ស៊ីហ្គេមនៅពេលនោះ។ ដោយឡែកប្រទេសឡាវ ក៏ប្រធានាធិបតីឡាវ ជាអ្នកប្រកាសបើកព្រឹត្តិការណ៍ស៊ីហ្គេមនៅឆ្នាំ២០០៩ ដែរ មិនមែននាយករដ្ឋមន្ត្រីនោះទេ។
អ្នកវិភាគឯករាជ្យរូបនេះបញ្ជាក់ថា ក្រៅពីហេតុផលខាងលើ លោក ហ៊ុន សែន បានបង្ហាញមហិច្ឆតារបស់គាត់ឱ្យឃើញកាន់តែច្បាស់បន្ថែមទៀត នៅពេលដែលគាត់ជួបជាមួយកីឡាករដែលត្រៀមខ្លួនប្រកួតក្នុងព្រឹត្តិការណ៍ស៊ីហ្គេម ដោយគាត់ហៅខ្លួនឯងថា ជាសម្តេចតា និងសម្តេចពុក ដែលភាសានេះពលរដ្ឋខ្មែរធ្លាប់តែហៅសម្តេចព្រះករុណាព្រះបាទ នរោត្តម សីហនុ កន្លងមកប៉ុណ្ណោះ ហើយទង្វើរបស់លោក ហ៊ុន សែន បែបនេះ គឺប្រមាថព្រះចេស្តាព្រះមហាក្សត្រខ្មែរដែលកំពុងគ្រងរាជ្យ និងជាព្រះប្រមុខរបស់ប្រទេសកម្ពុជាសព្វថ្ងៃនេះយ៉ាងធ្ងន់ធ្ងរ។
កាលពីថ្ងៃទី១ ខែឧសភា ឆ្នាំ២០២៣ លោក ហ៊ុន សែន អះអាងថា ប្រទេសនៅក្នុងតំបន់អាស៊ានមានតែប្រទេស ៣ ប៉ុណ្ណោះ ដែលប្រមុខរដ្ឋប្រកាសបើកព្រឹត្តិការណ៍ស៊ីហ្គេម ដូចជាឥណ្ឌូនេស៊ី ហ្វីលីពីន និងប្រទេសប្រ៊ុយណេ ចំណែកប្រទេសក្រៅពីនោះសុទ្ធតែនាយករដ្ឋមន្ត្រីប្រកាសបើកទាំងអស់។
លោក ហ៊ុន សែន បញ្ជាក់ថា សម្រាប់កម្ពុជា ព្រះមហាក្សត្រព្រះអង្គប្រទានភ្លើងកាលពីចុងខែមីនា រួចហើយ ដូច្នេះការប្រកាសបើកព្រឹត្តិការណ៍ស៊ីហ្គេមនាពេលខាងមុខនេះ គឺជាតួនាទីរបស់នាយករដ្ឋមន្ត្រីប៉ុណ្ណោះ។
លោក ហ៊ុន សែន ចោទថា អ្នកដែលរិះគន់ថាមិនយាងព្រះមហាក្សត្រឱ្យបើកការប្រកួតស៊ីហ្គេម គឺជាចេតនាទុច្ចរិតបំបែកបំបាក់ព្រះមហាក្សត្រ និងរាជរដ្ឋាភិបាលកម្ពុជា។
បែបនេះក្តី លោក គឹម សុខ បញ្ជាក់ថា របបសភានិយម ព្រះមហាក្សត្រជាព្រះប្រមុខរដ្ឋ ចំណែករបបប្រធានាធិបតីនិយម គឺប្រធានាធិបតីជាប្រមុខរដ្ឋ ដូច្នេះឱ្យតែប្រមុខរដ្ឋត្រូវតែផ្តល់កិត្តិយសក្នុងការបើកព្រឹត្តិការណ៍ស៊ីហ្គេមរបស់ប្រទេសទាំងអស់ មិនមែនជានាយករដ្ឋមន្ត្រីទេ។ លោកចាត់ទុកសម្ដីលោក ហ៊ុន សែន ថាជាការនិយាយភូតភរកុហកពលរដ្ឋខ្មែរ។
ការប្រកួតកីឡាស៊ីហ្គេមលើកទី៣២ ដែលកម្ពុជាធ្វើជាម្ចាស់ផ្ទះ នឹងចាប់ផ្តើមឡើងពីថ្ងៃទី៥ ដល់ថ្ងៃទី១៧ ខែឧសភា ឆ្នាំ២០២៣ ខណៈអាស៊ានប៉ារ៉ាហ្គេម នឹងចាប់ផ្តើមពីថ្ងៃទី៣ ដល់ថ្ងៃទី៩ ខែមិថុនា ឆ្នាំ២០២៣ ខាងមុខនេះ៕