អង្គការអ្នកសារព័ត៌មានគ្មានព្រំដែន រកឃើញថា សេរីភាពសារព័ត៌មាននៅកម្ពុជាក្នុងឆ្នាំ២០២៣ នេះ បានបន្តធ្លាក់ចុះកាន់តែខ្លាំង បន្ទាប់ពីមេដឹកនាំកម្ពុជា លោក ហ៊ុន សែន បញ្ជាឲ្យបិទវិទ្យុ វីអូឌី ខណៈអ្នកសារព័ត៌មានបន្តរងការធ្វើទុក្ខបុកម្នេញ និងគំរាមកំហែង។
ការចេញរបាយការណ៍វាយតម្លៃអំពីសេរីភាពសារព័ត៌មានរបស់អង្គការអ្នកសារព័ត៌មានគ្មានព្រំដែន (Reporters Without Border) ធ្វើឡើងអំឡុងពេលកម្ពុជា និងបណ្ដាប្រទេសផ្សេងទៀតបានរៀបចំអបអរទិវាសេរីភាពសារព័ត៌មានខួបលើកទី៣០ នៅឆ្នាំ២០២៣ នេះ។
បើតាមសន្ទស្សន៍របស់អង្គការអ្នកសារព័ត៌មានគ្មានព្រំដែន (Reporters Without Border) ចេញផ្សាយជាសាធារណៈនៅថ្ងៃទី៣ ខែឧសភា បានចាត់ចំណាត់ថ្នាក់សេរីភាពសារព័ត៌មាននៅកម្ពុជាស្ថិតក្នុងលំដាប់លេខរៀងទី១៤៧ លើ ១៨០ប្រទេសនៅឆ្នាំ២០២៣។
ចំណាត់ថ្នាក់នេះបង្ហាញឲ្យឃើញថា សេរីភាពសារព័ត៌មាននៅកម្ពុជានៅតែស្ថិតក្នុងស្ថានភាពអាក្រក់ដដែល។ ក្នុងឆ្នាំ២០២៣ នេះ ពិន្ទុសេរីភាពសារព័ត៌មាននៅកម្ពុជាបានថយចុះ ១ពិន្ទុវិញ គឺបានតែ ៤២ពិន្ទុ បើប្រៀបធៀបនឹងឆ្នាំ២០២២ កន្លងទៅ កម្ពុជាទទួលបានចំនួន ៤៣ពិន្ទុ។
ការចាត់ចំណាត់ថ្នាក់របស់អង្គការអ្នកសារព័ត៌មានគ្មានព្រំដែនលើសេរីភាពសារព័ត៌មាននៅកម្ពុជានេះ បន្ទាប់ពីលោក ហ៊ុន សែន បានបញ្ជាទៅក្រសួងព័ត៌មាន ឲ្យបិទវិទ្យុសំឡេងប្រជាធិបតេយ្យ វីអូឌី ដែលជាសារព័ត៌មានឯករាជ្យចុងក្រោយគេបង្អស់នៅកម្ពុជាកាលពីថ្ងៃទី១៣ ខែកុម្ភៈ ឆ្នាំ២០២៣ ដោយវិធានការបិទនេះប្រើរយៈពេលមិនដល់ ២៤ម៉ោងឡើយ។
វិធានការបិទវិទ្យុសំឡេងប្រជាធិបតេយ្យ វីអូឌី នាពេលនោះ មិនបានអនុវត្តទៅតាមច្បាប់ស្ដីពីរបបសារព័ត៌មានកម្ពុជា និងរដ្ឋធម្មនុញ្ញនៃព្រះរាជាណាចក្រកម្ពុជាទេ។
ច្បាប់ស្ដីពីរបបសារព័ត៌មានកម្ពុជាមាត្រា១០ ចែងថា មនុស្សមានសិទ្ធិទាមទារឱ្យមានការកែតម្រូវ និងការឆ្លើយតបពីអ្នកផ្សាយព័ត៌មាន នៅពេលដែលពួកគេយល់ថា សេចក្ដីថ្លែងការណ៍មួយមិនត្រឹមត្រូវ ហើយអ្នកផ្សាយព័ត៌មានត្រូវឆ្លើយតបក្នុងសេចក្ដីថ្លែងការណ៍មួយត្រឹមត្រូវ។ អ្នកផ្សាយព័ត៌មានត្រូវឆ្លើយតបក្នុងរយៈពេល ៧ថ្ងៃ។ ពួកគេក៏មានសិទ្ធិផងដែរក្នុងការប្ដឹងទៅតុលាការពីបទបរិហារកេរ្តិ៍ និងបទមួលបង្កាច់។
ចំពោះស្ថានភាពសេរីភាពសារព័ត៌មាននៅកម្ពុជា បានបន្តធ្លាក់ចុះចាប់តាំងពីចុងឆ្នាំ២០១៧ បន្ទាប់ពីរដ្ឋាភិបាលដឹកនាំដោយលោក ហ៊ុន សែន បិទសារព័ត៌មាន ឌឹ ខេមបូឌា ដេលី និងវិទ្យុមួយចំនួនត្រូវបានបិទមុនការបោះឆ្នោតជាតិឆ្នាំ២០១៨។
ចំណែកអ្នកសារព័ត៌មានបានរងការធ្វើទុក្ខបុកម្នេញពីសំណាក់រដ្ឋាភិបាល និងតុលាការកម្ពុជា ក្នុងនោះអតីតអ្នកសារព័ត៌មានអាស៊ីសេរី ២នាក់បានរងការចោទប្រកាន់ ហើយរហូតមកដល់បច្ចុប្បន្ននេះ បទចោទប្រកាន់លើពួកគេមិនទាន់ទម្លាក់ចោលនៅឡើយ។
បើតាមរបាយការណ៍កម្រាស់ ២៥ទំព័រស្ដីពីស្ថានភាពសារព័ត៌មានកម្ពុជា ក្នុងឆ្នាំ២០២២ របស់សមាគមសម្ព័ន្ធអ្នកសារព័ត៌មានកម្ពុជា (Camboja) បានកត់ត្រាករណីនៃការគំរាមកំហែងមានចំនួន ៣៥ករណី ក្នុងនោះការវាយប្រហារលើរាងកាយ ការគំរាមប្រើអំពើហិង្សា ការរើសអើង ការចាប់ខ្លួន ការឃុំខ្លួនក្នុងពន្ធនាគារ និងវិធានការច្បាប់ជាច្រើនទៀត ដើម្បីប្រឆាំងនឹងអ្នកកាសែតចំនួន ៥៤នាក់៕