ប្រធានាធិបតីអ៊ុយក្រែន វូឡូឌឺមៀ ហ្សេឡេនស្គី ជឿជាក់ថាប្រធានាធិបតីរុស្ស៊ី វ៉្លាឌីមៀរ ពូទីន នឹងត្រូវបាននាំខ្លួនទៅជំនុំជម្រះក្ដីនៅឯតុលាការឧក្រិដ្ឋកម្មសង្គ្រាមអន្តរជាតិនៅពេលដែលអ៊ុយក្រែនឈ្នះសង្គ្រាម គឺពិភពលោកទាំងមូលក៏នឹងទទួលបានយុត្តិធម៌ផងដែរ។
សេចក្ដីថ្លែងការណ៍របស់លោក ហ្សេឡេនស្គី បានបញ្ជាក់ទៀតថា គ្មានសន្តិភាពណាអាចកើតមុនយុត្តិធម៌បានទេ គឺមានន័យថា គ្មានសន្តិភាពដោយគ្មានយុត្តិធម៌។
តាមបណ្ដាញផ្សាយព័ត៌មាន LBC បានចុះផ្សាយនៅថ្ងៃទី៤ ខែឧសភា នេះនៅទីក្រុងឡាអេ ប្រទេសហុឡង់ដ៍ ជាទីស្នាក់ការរបស់តុលាការឧក្រិដ្ឋកម្មអន្តរជាតិ ICC ដែលតុលាការអន្តរជាតិនេះហើយបានចេញដីកាចាប់ខ្លួនលោក ពូទីន ពីបទឧក្រិដ្ឋកម្មសង្គ្រាមទៅលើប្រជាជនអ៊ុយក្រែន។ នៅទីក្រុងឡាអេ លោក ហ្សេឡេនស្គី ថ្លែងថា គេត្រូវតែរកមធ្យោបាយទាំងឡាយណាបង្ខំឲ្យមានការកាត់ទោសលោក ពូទីន ដោយតុលាការអន្តរជាតិមួយនេះ។
ជាមួយគ្នានេះ លោកធានាថា អ៊ុយក្រែននឹងធ្វើឲ្យមានការប្រែប្រួលសង្គ្រាម ហើយអ៊ុយក្រែននឹងឈ្នះសង្គ្រាមឈ្លានពានរបស់រុស្ស៊ី។
ICC ជាតុលាការអន្តរជាតិតែមួយដែលមានសមត្ថកិច្ចលើសំណុំរឿងឧក្រិដ្ឋកម្មអន្តរជាតិ។ តុលាការនេះបានចេញដីកាចាប់ខ្លួនលោក ពូទីន កាលពីថ្ងៃទី១៧ ខែមីនា ឆ្នាំ២០២៣ ពីបទឧក្រិដ្ឋកម្មសង្គ្រាមករណីការចាប់ពង្រត់កុមារនៃប្រជាជនអ៊ុយក្រែន និងអំពើវិនាសកម្មទាំងឡាយទៅលើទឹកដីអ៊ុយក្រែន។
តុលាការ ICC ពុំមានយុត្តាធិការក្នុងការកាត់ទោសរុស្ស៊ីលើកទ័ពឈ្លានពានអ៊ុយក្រែននោះទេ តែតុលាការនេះមានអំណាចតាមច្បាប់របស់ខ្លួនកាត់ទោសទៅលើអ្នកនយោបាយណា បុគ្គលណាដែលត្រូវបានចោទពីបទល្មើសចំនួន ៣ធំៗ គឺឧក្រិដ្ឋកម្មសង្គ្រាម ឧក្រិដ្ឋកម្មប្រឆាំងនឹងមនុស្សជាតិ និងប្រល័យពូជសាសន៍។
លោក ហ្សេឡេនស្គី ដែលបានធ្វើទស្សនកិច្ចនៅប្រទេសហុឡង់ដ៍ ក្នុងបំណងទៅជួបនាយករដ្ឋមន្ត្រីរបស់ប្រទេសនេះ ហើយដែលក្នុងទីក្រុងឡាអេ នៃប្រទេសហុឡង់ដ៍នេះហើយជាទីស្នាក់ការរបស់តុលាការអន្តរជាតិមួយនេះ។ លោក ហ្សេឡេនស្គី ថ្លែងទៀតថា ប្រសិនបើអ៊ុយក្រែនត្រូវការយុត្តិធម៌ពិតៗ គឺអ៊ុយក្រែនត្រូវតែឈ្នះសង្គ្រាម។ បើអ៊ុយក្រែនទទួលយកយុត្តិធម៌ដោយក្លែងក្លាយ និងសន្តិភាពក្លែងក្លាយ មានន័យថាអ៊ុយក្រែន ប្រជាជនអ៊ុយក្រែន គ្មានយុត្តិធម៌របស់ខ្លួនពិតប្រាកដនោះទេ ហើយក៏គ្មានសន្តិភាពរឹងមាំយូរអង្វែងនោះដែរ។
លោកបន្តថា នៅពេលនេះលោកទទូចដល់ប្រទេសទាំងអស់ដែលស្រឡាញ់យុត្តិធម៌ និងសន្តិភាព ត្រូវចូលរួមពង្រឹងអំណាចរបស់ ICC ហើយត្រូវតែឲ្យតុលាការមួយនេះដំណើរការរឿងក្ដីរបស់ខ្លួនដែលកាត់ទោសរដ្ឋភេរវកម្មមួយឈ្លានពានអ៊ុយក្រែន។
លោក ហ្សេឡេនស្គី បានថ្លែងដូចនេះនៅពេលដែលលោកឆ្លើយតបចំពោះទីក្រុងមូស្គូ ដែលចោទទីក្រុងគៀវ ថាបានប្រព្រឹត្តអំពើភេរវកម្មវាយប្រហារដោយដ្រូននៅទីក្រុងមូស្គូ កាលពីថ្ងៃទី៣ ខែឧសភា ដែលលោកថា អ៊ុយក្រែនមិនចាំបាច់ប្រើប្រាស់មធ្យោបាយដ៏គម្រក់នេះទេ ហើយអ៊ុយក្រែនក៏មិនចាំបាច់វាយប្រហារចូលទឹកដីរុស្ស៊ីដែរ។
លោកបន្តទៀតថា អ៊ុយក្រែនត្រឹមតែការពារខ្លួន និងយកទឹកដីដែលអ្នកឈ្លានពានវាយកាន់កាប់យក ឬក៏យកដោយមធ្យោបាយណាក៏ដោយ គឺវាគ្រប់គ្រាន់ណាស់ទៅហើយសម្រាប់អ៊ុយក្រែន។
ក្រសួងការពារជាតិអ៊ុយក្រែន បានប្រកាសថា ដ្រូនរបស់រុស្ស៊ីយ៉ាងតិចបីគ្រឿងនៅព្រឹកព្រលឹមថ្ងៃព្រហស្បតិ៍នេះ បានវាយប្រហារទៅលើតំបន់អូដេសា ជាកំពង់ផែសមុទ្ររបស់ប្រទេសអ៊ុយក្រែន។ លោកថា តើគេអាចចាត់ទុកថាវាជាអំពើភេរវកម្មដែរឬទេចំពោះទីក្រុងមូស្គូ ដែលប្រព្រឹត្តបែបនេះមកលើដែនដីអ៊ុយក្រែន។
លោកថា រយៈពេល ៤ថ្ងៃហើយដែលរុស្ស៊ីបាញ់ប្រហារទាំងគ្រាប់របស់ដ្រូន និងមីស៊ីលបាញ់ចូលទឹកដីអ៊ុយក្រែន ដោយសម្លាប់ប្រជាជនអ៊ុយក្រែនជាច្រើននាក់ ដែលនេះហើយគឺជាអំពើភេរវកម្មរបស់ទីក្រុងមូស្គូ។
លោក ហ្សេឡេនស្គី ត្រូវបានស្វាគមន៍ដោយប្រធានតុលាការប៉ូឡូញ លោក Piort Hofmanski នៅឯខាងក្រៅទីស្នាក់ការតុលាការ ICC នៅទីក្រុងឡាអេ។
លោក ហ្សេឡេនស្គី បានទៅដល់ទីក្រុងឡាអេ ដោយលោកបានលើកទង់ជាតិអ៊ុយក្រែននៅខាងមុខការិយាល័យតុលាការអន្តរជាតិនេះទៀតផង។ ចៅក្រមតុលាការ ICC កាលពីមុន បានប្រកាសថា ភស្តុតាងដែលចោទលោក ពូទីន ពីបទឧក្រិដ្ឋកម្មសង្គ្រាមករណីចាប់ពង្រត់កុមារជនជាតិអ៊ុយក្រែន និងអំពើវិនាសកម្មផ្សេងៗទៀតទៅលើប្រជាជនអ៊ុយក្រែន ត្រូវបានតុលាការនេះកសាងសំណុំរឿងដើម្បីឈានទៅដល់ការជំនុំជម្រះក្ដីសំណុំរឿងប្រធានាធិបតីរុស្ស៊ីរូបនេះ។
បើតាមអ្នកវិភាគ និងអ្នកជំនាញផ្នែកច្បាប់ បានឲ្យដឹងថា ទីក្រុងមូស្គូ ដែលត្រូវបានតុលាការយុត្តិធម៌អន្តរជាតិ ICJ ចេញដីកាបង្គាប់ឲ្យដកទ័ពចេញពីប្រទេសអ៊ុយក្រែន គឺជាបទល្មើសមួយរួចទៅហើយ ដែលយុត្តាធិការ ICJ ផ្អែកទាំងស្រុងទៅលើធម្មនុញ្ញអង្គការសហប្រជាជាតិ។
ទស្សនកិច្ចរបស់លោក ហ្សេឡេនស្គី ទៅកាន់ទីក្រុងឡាអេ បាននាំឲ្យមានចម្ងល់សួរថា តើតុលាការមួយនេះនឹងពន្លឿនសំណុំរឿងរបស់ខ្លួនថែមទៀតដែរឬទេ នៅខណៈដែលលោក ពូទីន អាចនឹងធ្វើទស្សនកិច្ចទៅក្រៅប្រទេសចាប់ពីខែសីហា។
មកដល់ពេលនេះ ប្រទេសប្រមាណជា ៤០ប្រទេសហើយបានសម្រេចជាផ្លូវការរួមគ្នាពង្រឹងអំណាច និងយុត្តាធិការ ICC ក្នុងនោះដឹកមុខដោយសហភាពអឺរ៉ុប និងអង់គ្លេស ព្រមទាំងសហរដ្ឋអាមេរិក៕