 ប្រគល់ឲ្យលោកនាយករដ្ឋមន្ត្រី ហ៊ុន សែន គឺក្នុងនាមមេដឹកនាំនៃប្រទេសដែលធ្វើជាម្ចាស់ផ្ទះបើកព្រឹត្តិការណ៍ស៊ីហ្គេម ដើម្បីជាមិត្តភាពកីឡា និងជាការលើកទឹកចិត្តប៉ុណ្ណោះ។){kind=link}
ក្រុមអ្នកវិភាគលើកឡើងថា មេដាយមរតកអូឡាំពិកអន្តរជាតិដែលគណៈកម្មាធិការអូឡាំពិកអន្តរជាតិ International Olympic Committee (IOC) ប្រគល់ឲ្យលោកនាយករដ្ឋមន្ត្រី ហ៊ុន សែន គឺក្នុងនាមមេដឹកនាំនៃប្រទេសដែលធ្វើជាម្ចាស់ផ្ទះបើកព្រឹត្តិការណ៍ស៊ីហ្គេម ដើម្បីជាមិត្តភាពកីឡា និងជាការលើកទឹកចិត្តប៉ុណ្ណោះ។
អ្នកវិភាគនយោបាយ និងជាប្រធានវេទិកាពលរដ្ឋ លោក គឹម សុខ ប្រាប់សារព័ត៌មាន The Cambodia Daily នៅថ្ងៃទី៨ ឧសភា នេះថា មេដឹកនាំដែលធ្វើជាអធិបតីនៃព្រឹត្តិការណ៍ស៊ីហ្គេម តែងទទួលបានមេដាយបែបនេះគ្រប់ៗគ្នា ចំណែកលោក ហ៊ុន សែន ដើម្បីទទួលបានមេដាយនេះក្នុងបំណងលើកមុខមាត់ខ្លួនឯង គាត់ហ៊ានបំពានព្រះរាជតួនាទីរបស់ព្រះមហាក្សត្រដែលត្រូវធ្វើជាអធិបតីក្នុងពិធីប្រកាសបើកព្រឹត្តិការណ៍ស៊ីហ្គេមនៅពេលនេះថែមទៀត។
លោក គឹម សុខ លើកឡើងថា មេដាយនេះកំពុងតែត្រូវបានមន្ត្រីបក្សកាន់អំណាចជាច្រើនផ្សព្វផ្សាយខុសពីខ្លឹមសារពិតដែលត្រឹមតែដើម្បីជាមិត្តភាពកីឡា និងដើម្បីលើកទឹកចិត្តក្នុងបំណងជំរុញចលនាកីឡាអន្តរជាតិឲ្យផុសផុល ប៉ុន្តែពួកគេបែរជានាំគ្នាកុហកថា ព្រោះតែលោក ហ៊ុន សែន ជាមេដឹកនាំដែលគេទទួលស្គាល់ថាជាមេដឹកនាំល្អទើបទទួលបានមេដាយទាំងនេះទៅវិញ ជាពិសេសបំណងរបស់ពួកគេ គឺដើម្បីបោកប្រាស់ពលរដ្ឋខ្មែរនៅក្នុងការបោះឆ្នោតជាតិខាងមុខនេះតែប៉ុណ្ណោះ។
កាលពីថ្ងៃទី៥ ខែឧសភា ឆ្នាំ២០២៣ ក្នុងពិធីប្រកាសបើកព្រឹត្តិការណ៍ស៊ីហ្គេមលើកទី៣២ ដែលកម្ពុជាទទួលធ្វើជាម្ចាស់ផ្ទះ គណៈកម្មាធិការអូឡាំពិកអន្តរជាតិ (IOC) បានប្រគល់មេដាយមរតកអូឡាំពិកអន្តរជាតិដល់លោក ហ៊ុន សែន ដើម្បីលើកទឹកចិត្តក្នុងការចូលរួមលើកស្ទួយវិស័យកីឡា ក៏ដូចជាជំរុញចលនាអូឡាំពិកជាតិ និងចលនាអូឡាំពិកអន្តរជាតិឲ្យផុសផុលរីកចម្រើនទៅថ្ងៃមុខ។
ទាក់ទិននឹងបញ្ហានេះ អគ្គលេខាធិការគណៈកម្មាធិការជាតិរៀបចំការប្រកួតកីឡាស៊ីហ្គេម លោក វ៉ាត់ ចំរើន អះអាងកាលពីពេលថ្មីៗនេះថា មេដាយមរតកអូឡាំពិកអន្តរជាតិដែលត្រូវបានប្រគល់ជូនប្រមុខរាជរដ្ឋាភិបាលកម្ពុជា គឺជាមេដាយដែលខ្ពស់បំផុតរបស់ចលនាអូឡាំពិកអន្តរជាតិ។
លោក វ៉ាត ចំរើន អះអាងថា មេដាយនេះសម្រាប់ផ្ដល់ជូនតែប្រមុខរដ្ឋ ឬប្រមុខរាជរដ្ឋាភិបាលដែលមានស្នាដៃក្នុងការជួយចលនាអូឡាំពិក និងរៀបចំព្រឹត្តិការណ៍កីឡាធំៗប្រកបដោយភាពជោគជ័យ ដើម្បីជាការលើកទឹកចិត្តដល់រដ្ឋាភិបាលដែលរៀបចំ និងធ្វើឲ្យចលនាកីឡាក្នុងប្រទេស ឬចលនាកីឡាអន្តរជាតិឲ្យមានភាពផុសផុលរីកចម្រើនតែប៉ុណ្ណោះ។
លោកបញ្ជាក់ថា មេដាយមរតកអូឡាំពិកនេះមានអត្ថន័យជ្រាលជ្រៅណាស់ ត្បិតមេដាយកម្រិតនេះមិនងាយប្រគល់ជូនថ្នាក់ដឹកនាំនៃរដ្ឋាភិបាលណាមួយនោះទេ។
យ៉ាងណាក៏ដោយ ក្រុមអ្នកសង្កេតការណ៍លើកឡើងថា បើលោក វ៉ាត់ ចំរើន អះអាងថាមេដាយមរតកអូឡាំពិកនេះមិនងាយប្រគល់ជូនថ្នាក់ដឹកនាំនៃរដ្ឋាភិបាលណាផ្សេងនោះ គឺជាការលើកឡើងដែលមិនសមទំនងនោះទេ ព្រោះថាមេដឹកនាំប្រទេសដទៃទៀតក៏ទទួលបានជោគជ័យក្នុងការរៀបចំព្រឹត្តិការណ៍ស៊ីហ្គេមនៅក្នុងប្រទេសរបស់គេដែរ ហើយគេរៀបចំបានជាហូរហែរហូតមក។
ដោយឡែកកម្ពុជាទើបតែរៀបចំជាលើកទីមួយប៉ុណ្ណោះ ក្រោយពីអវត្តមានអស់រយៈពេលជាង ៦០ឆ្នាំមកនេះ ដូច្នេះបើនិយាយថាកម្ពុជាធ្វើឲ្យផុសផុលចលនាកីឡាអន្តរជាតិជាងប្រទេសដទៃ ហើយទទួលបានមេដាយនេះ គឺជារឿងមិនសមហេតុផលទាល់តែសោះ។
ប្រភពដដែលបញ្ជាក់ថា ប្រសិនបើមានតែមេដឹកនាំកម្ពុជាទទួលបានមេដាយនេះ ស្របពេលដែលមេដឹកនាំប្រទេសដទៃមិនទទួលបាន នេះគ្រាន់តែជាការលើកទឹកចិត្តដែលកម្ពុជាខំប្រឹងរៀបចំឲ្យមានព្រឹត្តិការណ៍ស៊ីហ្គេមលើកដំបូងលើទឹកដីរបស់ខ្លួនក្រោយពីខកខានជាង ៦ទសវត្សរ៍ប៉ុណ្ណោះ មិនមែនផ្តល់ឲ្យកម្ពុជាក្នុងបំណងផ្សេងនោះឡើយ។
កាលពីថ្ងៃទី៥ ខែឧសភា ឆ្នាំ២០២៣ មេដឹកនាំបក្សកាន់អំណាចលោក ហ៊ុន សែន បានប្រកាសបើកព្រឹត្តិការណ៍ស៊ីហ្គេមលើកទី៣២ ដែលខ្លួនធ្វើជាម្ចាស់ផ្ទះលើកដំបូងក្រោយអវត្តមានដោយសារសង្គ្រាមអស់រយៈពេល ៦៤ឆ្នាំកន្លងមកនេះ៕