សាធារណជន និងអ្នកប្រើប្រាស់បណ្ដាញសង្គម សម្ដែងការកោតសរសើរ និងចាត់ទុកការលាលែងពីតួនាទីរបស់លោក សៅ សុខា ពីប្រធានសហព័ន្ធកីឡាបាល់ទាត់កម្ពុជាថាជាការបង្ហាញនូវស្មារតីទទួលខុសត្រូវក្នុងនាមជាអ្នកថ្នាក់ដឹកនាំ បន្ទាប់ពីបរាជ័យក្នុងការប្រកួតកីឡាបាល់ទាត់បុរស U22 ជាមួយមីយ៉ាន់ម៉ា ក្នុងពូល A នៃព្រឹត្តិការណ៍ sea games។
បើតាមហ្វេសប៊ុកឈ្មោះ G Sao Sokha បានសរសេរកាលពីថ្ងៃទី៧ ខែឧសភា ថា ការលាលែងពីតួនាទីជាការគោរពនូវការសន្យាដើម្បីបង្ហាញនូវស្មារតីទទួលខុសត្រូវរបស់លោកជាមួយអ្នកគាំទ្រ ឬអ្នកទស្សនាកីឡាបាល់ទាត់ដែលបានដាក់ក្ដីសង្ឃឹមចំពោះការប្រកួតកីឡាបាល់ទាត់បុរស U22 កាលពីយប់ថ្ងៃទី៧ ខែឧសភា ក្នុងព្រឹត្តិការណ៍ Sea Games។
ប្រភពដដែលបានលើកឡើងថា តំណែងប្រធានសហព័ន្ធកីឡាបាល់ទាត់កម្ពុជាលោកប្រគល់ទៅឲ្យលោក ខៀវ សាម៉េត ដែលជាអនុប្រធាន ស.ប.ក ជាប្រធានស្តីទីចាប់ពីថ្ងៃទី០៧ ខែឧសភា ឆ្នាំ២០២៣ តទៅ បន្ទាប់ពីកម្ពុជាប្រកួតបាល់ទាត់ចាញ់មីយ៉ាន់ម៉ាក្នុងលទ្ធផល ២ទល់នឹង ០។
ក្រៅពីលាលែងពីតំណែងលោក សៅ សុខា ក៏បានសូមអភ័យទោស និងបង្ហាញការសោកស្ដាយដែលលោកមិនអាចនាំកិត្តិយសជូនប្រទេសជាតិបានតាមរយៈការប្រកួតបាល់ទាត់ក្នុងព្រឹត្តិការណ៍ sea games ដែលកម្ពុជាធ្វើជាម្ចាស់ផ្ទះ។
ការលាលែងនេះ ត្រូវបានសកម្មជនបរិស្ថាន លោក ម៉ា ចិត្រា ចាត់ទុកថាជាគំរូល្អ ខណៈអ្នកប្រើប្រាស់បណ្ដាញសង្គមហ្វេសប៊ុកផ្សេងទៀតបានហៅការលាលែងនេះថាជាមេដឹកនាំល្អ ហ៊ាននិយាយហ៊ានធ្វើ ប្រកាន់នូវពាក្យ «សច្ចៈវាចា»។ ចំណែកអ្នកខ្លះទៀតបានជំរុញឲ្យថ្នាក់ដឹកនាំ និងមន្ត្រីផ្សេងៗត្រូវបន្តយកគំរូបនេះផងដែរ។
បើតាមលោក សៅ សុខា ប្រាប់សារព័ត៌មានក្នុងស្រុកថា រូបលោកបានដឹកនាំសហព័ន្ធកីឡាបាល់ទាត់រយៈពេលជាង ១០ឆ្នាំគិតមកដល់បច្ចុប្បន្ន ដូច្នេះបើលោកដឹកនាំវិស័យនេះមិនល្អ ហើយលោកត្រូវដឹងខ្លួនឯងដោយហ៊ានលាឈប់ពីតំណែងប្រធានសហព័ន្ធកីឡាបាល់ទាត់កម្ពុជា ដើម្បីទុកឱកាសដល់អ្នកមានសមត្ថភាព និងវិធីសាស្ត្រដឹកនាំសហព័ន្ធកីឡាបាល់ទាត់កម្ពុជាឲ្យកាន់តែរីកចម្រើន និងជឿនលឿនជាងពេលបច្ចុប្បន្ន។
លោកថា លោកបានដឹកនាំជាង ១០ឆ្នាំហើយ ប៉ុន្តែនៅតែមិនអាចនាំលទ្ធផលល្អជូនជាតិបាន ទើបលោកចុះចេញពីតំណែង ហើយការចាកចេញនេះ លោកថាវាមិនបានធ្វើឲ្យប្រទេសជាតិខាតបង់ឡើយ។
ទោះបីជាលោក សៅ សុខា បានលាលែងពីតំណែងហើយក៏ដោយ ប៉ុន្តែលោក ហ៊ុន សែន នៅរសៀលថ្ងៃទី០៨ ខែឧសភា ឆ្នាំ២០២៣ នេះ បានផ្ញើសារសំឡេងអំពាវនាវសុំឲ្យនាយឧត្តមសេនីយ៍ សៅ សុខា ឲ្យបន្តដឹកនាំការងារនេះតទៅមុខទៀត។
លោក ហ៊ុន សែន បន្តថា បន្ទាប់ពីលោក សៅ សុខា បានសុំលាលែងចេញពីតំណែង មានមនុស្សជាច្រើនបានបង្ហាញការខកចិត្ត និងបង្ហាញពីការសោកស្ដាយ។
លោកអះអាងទៀតថា សម្រាប់លោកផ្ទាល់លោកសូមសម្ដែងនូវការសោកស្ដាយចំពោះការសម្រេចចិត្តរបស់នាយឧត្តមសេនីយ៍ សៅ សុខា។ លោកបានកត់សម្គាល់ឃើញថា ចាប់តាំងពីនាយឧត្តមសេនីយ៍ សៅ សុខា ទទួលបានតំណែងជាប្រធានសហព័ន្ធកីឡាបាល់ទាត់កម្ពុជា បានធ្វើឲ្យកីឡាបាល់ទាត់កម្ពុជាមានការរីកចម្រើនឈានឡើងជាលំដាប់ បើទោះបីការលេងមានលទ្ធផលមិនទាន់ដូចការចង់បានយ៉ាងណាក្ដី។
លោក ហ៊ុន សែន បន្ថែមទៀតថា បច្ចុប្បន្នកីឡាបាល់ទាត់កម្ពុជាបានដើរចេញឆ្ងាយពីចំណុចដែលមិនទាន់មានកាលពីពេលមុន។
លោក ហ៊ុន សែន ថាមានប្រទេសច្រើនណាស់ដែលកីឡាបាល់ទាត់មិនអាចទទួលបានលទ្ធផលល្អ បើទោះបីប្រទេសនោះមានប្រជាជនដល់ជាង ១ពាន់លាននាក់ រាប់រយលាននាក់ ក៏បាល់ទាត់របស់គេមិនខ្លាំងនោះដែរ ខណៈកម្ពុជាមានប្រជាជនជាង ១៧លាននាក់ យើងធ្វើបានកម្រិតនេះ គឺជាការល្អណាស់ហើយសម្រាប់ប្រជាជនកម្ពុជា។
លោក សៅ សុខា គឺជាមន្ត្រីជាន់ខ្ពស់កីឡាទី១ ដែលបានចេញមុខទទួលខុសត្រូវចំពោះភាពបរាជ័យក្នុងវិស័យកីឡាបាល់ទាត់កម្ពុជា ក្រោមការដឹកនាំរបស់លោកនៅពាក់កណ្តាលទីនៃព្រឹត្តិការណ៍ស៊ីហ្គេមដែលកម្ពុជាកំពុងរៀបចំនោះ៕