អតីតអ្នកតស៊ូមតិនៅក្រៅស្រុកដ៏សកម្មម្នាក់ អំពាវនាវឲ្យពលរដ្ឋខ្មែរបោះឆ្នោតជូនគណបក្សប្រជាជនកម្ពុជា ដើម្បីឲ្យលោក ហ៊ុន សែន ធ្វើជាមេដឹកនាំរបស់ប្រទេសកម្ពុជាតទៅថ្ងៃមុខទៀត ព្រោះលោកជាមេដឹកនាំដែលមានបទពិសោធន៍គ្រប់គ្រាន់ក្នុងការដឹកនាំប្រទេសជាតិ ដើម្បីរក្សាសន្តិភាពជូនពលរដ្ឋខ្មែរ និងដើម្បីឲ្យបេក្ខជនអនាគតនាយករដ្ឋមន្ត្រី លោក ហ៊ុន ម៉ាណែត អាចបន្តកាន់កាប់អំណាចពីលោក ហ៊ុន សែន ទៅថ្ងៃមុខ។
លោក ទូច វិបុល បានចេញញត្តិគាំទ្រគណបក្សប្រជាជនកម្ពុជា នៅថ្ងៃទី៨ ខែឧសភា ឆ្នាំ២០២៣ នេះថា លោកគាំទ្រឲ្យលោក ហ៊ុន សែន ធ្វើជានាយករដ្ឋមន្ត្រីបក្សកាន់អំណាច និងគាំទ្រលោក ហ៊ុន ម៉ាណែត ជាបេក្ខជនអនាគតនាយករដ្ឋមន្ត្រីបក្សនេះផងដែរ ក្រោមហេតុផលថា លោក ហ៊ុន សែន គឺជាមេដឹកនាំដែលមានបទពិសោធន៍គ្រប់គ្រាន់ក្នុងការដឹកនាំប្រទេសជាតិដើម្បីរក្សាសន្តិភាពជូនពលរដ្ឋខ្មែរទៅថ្ងៃមុខ។
លោក ទូច វិបុល លើកឡើងថា កម្ពុជាបច្ចុប្បន្នគឺជាប្រទេសដ៏រឹងមាំ និងមានអធិបតេយ្យភាពពេញលេញ អាចទំនាក់ទំនងជាមួយប្រទេសដទៃដោយស្មើភាព និងធ្វើការសម្រេចចិត្តដោយឯករាជ្យទាក់ទងនឹងគោលនយោបាយក្នុងស្រុក និងក្រៅប្រទេស ដោយឈរលើគោលនយោបាយអព្យាក្រឹតភាពអចិន្ត្រៃយ៍ និងមិនចូលបក្សសម្ព័ន្ធ ជាពិសេសក្នុងវិស័យពាណិជ្ជកម្ម ការវិនិយោគ សន្តិសុខ និងវិស័យការពារជាតិ ជាដើម។
លោកបញ្ជាក់ថា ពលរដ្ឋខ្មែរពិតជាមានភ័ព្វសំណាង និងមោទកភាពណាស់ដែលមានលោក ហ៊ុន សែន ជាអ្នកដឹកនាំប្រទេសជាតិ ហើយលោកមានជំនឿយ៉ាងមុតមាំលើឥទ្ធិពលនៃមគ្គទេសក៍ភាពរបស់លោក ហ៊ុន សែន យ៉ាងខ្លាំង ថាជាកត្តាដ៏មានសារសំខាន់បំផុត និងមិនអាចខ្វះបានសម្រាប់សុខសន្តិភាពនៃសង្គមជាតិ សុខុមាលភាពរបស់ប្រជាជន និងការអភិវឌ្ឍទៅថ្ងៃមុខ។
ការអះអាងនេះ ធ្វើឡើងស្របពេលដែលមានការរិះគន់ជុំទិសពីការដឹកនាំប្រទេសរបស់លោក ហ៊ុន សែន ជាង ៤០ឆ្នាំមកនេះ ថាពោរពេញដោយការគាបសង្កត់ និងការបំបិទសិទ្ធិសេរីភាពរបស់ពលរដ្ឋខ្មែរសព្វថ្ងៃនេះ។
លោក ទូច វិបុល បានប្រាប់សារព័ត៌មាន The Cambodia Daily ថា ញត្តិរបស់លោកគ្រាន់តែជាការគាំទ្រប៉ុណ្ណោះ ប៉ុន្តែមិនមែនជាការចុះចូលនោះទេ។
អតីតអ្នកទោសនយោបាយ និងជាមន្ត្រីជាន់ខ្ពស់គណបក្សសង្គ្រោះជាតិ លោក មាជ សុវណ្ណារ៉ា ប្រាប់សារព័ត៌មាន The Cambodia Daily នៅថ្ងៃទី៨ ឧសភា នេះថា ការរត់ចូលពីគណបក្សមួយទៅគណបក្សមួយ ជាពិសេសការប្រកាសចូលរួមជីវភាពនយោបាយជាមួយគណបក្សប្រជាជនកម្ពុជា មិនមែនជារឿងថ្មី ឬជារឿងចម្លែកនោះទេនៅមុនរដូវកាលនៃការបោះឆ្នោតជិតចូលមកដល់បែបនេះ ហើយការចុះចូលនេះ ក៏ជាបំណងរបស់បក្សកាន់អំណាចដែលចង់ឲ្យក្រុមអ្នកដែលធ្លាប់ប្រឆាំងនឹងខ្លួនពីមុនមកធ្វើបែបនេះដែរ។
លោក មាជ សុវណ្ណារ៉ា លើកឡើងថា ការចុះចូលជាមួយបក្សកាន់អំណាចពិតមែនតែមិនខុសនឹងច្បាប់ ប៉ុន្តែការអះអាងរបស់អ្នកដែលប្រកាសចុះចូលខ្លះដែលលើកឡើងថា ដើម្បីបម្រើជាតិកន្លងមកនោះ ក៏មិនបានធ្វើឲ្យពលរដ្ឋជឿជាក់នោះដែរ ព្រោះថាអ្នកដែលចុះចូលជាមួយបក្សកាន់អំណាចដើម្បីតែបុណ្យស័ក្តិ ឬដើម្បីជាតិ ពលរដ្ឋម្ចាស់ឆ្នោតនឹងដឹងតាមរយៈនៃសកម្មភាពរបស់ពួកគេនៅថ្ងៃណាមួយជាមិនខាន។
អតីតអ្នកទោសនយោបាយរូបនេះបញ្ជាក់ថា ក្នុងដំណាក់កាលដែលអ្នកប្រជាធិបតេយ្យកំពុងរងនូវការគាបសង្កត់ និងបិទសិទ្ធិសេរីភាពគ្រប់បែបយ៉ាងដូចសព្វថ្ងៃនេះ ច្បាស់ជាមានអ្នកអស់សង្ឃឹមនឹងចូលរួមស្ដារលទ្ធិប្រជាធិបតេយ្យ ហើយបែរទៅចុះចូលជាមួយបក្សកាន់អំណាចមិនខានឡើយ ប៉ុន្តែពួកគេភ្លេចគិតថា សកម្មភាពរបស់ពួកគេបែបនេះគឺជាទង្វើរុញអ្នកប្រជាធិបតេយ្យ និងពលរដ្ឋខ្មែរដែលចង់បានការផ្លាស់ប្ដូរដ៏ត្រឹមត្រូវ ទៅក្នុងរណ្តៅដ៏ជ្រៅទៅវិញ។
ចំណែកអនុប្រធានវេទិកាពលរដ្ឋ លោក ម៉ែន ណាត ធ្លាប់ព្រមានកាលពីពេលថ្មីៗនេះថា ការចុះចូលជាមួយបក្សកាន់អំណាចរបស់លោក ហ៊ុន សែន គឺជាគុណវិបត្តិធ្ងន់ធ្ងរសម្រាប់ប្រទេសជាតិ មិនមែនជាគុណសម្បត្តិឡើយ ព្រោះថាទង្វើបែបនេះគ្រាន់តែជាទង្វើគាំទ្រនយោបាយទុច្ចរិតរបស់លោក ហ៊ុន សែន ប៉ុណ្ណោះ។
លោក ម៉ែន ណាត អះអាងថា គណបក្សប្រជាជនកម្ពុជាតាំងពីបង្កើតមក និងផែនការរៀបចំទៅថ្ងៃអនាគត មិនមែនដើម្បីលទ្ធិប្រជាធិបតេយ្យសម្រាប់ប្រទេសកម្ពុជានោះទេ ត្បិតទង្វើជាក់ស្តែងដែលបក្សនេះបានធ្វើកន្លងមក គឺតាមកម្ទេចអ្នកប្រជាធិបតេយ្យ និងបង្កើតការដឹកនាំតាមបែបក្រុមគ្រួសារនិយមប៉ុណ្ណោះ។
ក្នុងរយៈពេលចុងក្រោយនេះ សកម្មជន និងមន្ត្រីបក្សក្រៅរដ្ឋាភិបាលបាននាំគ្នាប្រកាសចុះចូលជាមួយបក្សកាន់អំណាចជាបន្តបន្ទាប់ ក្នុងនោះអ្នកខ្លះទទួលបានតំណែងក្នុងជួររដ្ឋាភិបាលឯកបក្សរបស់លោក ហ៊ុន សែន ដូចជារដ្ឋលេខាធិការ អនុរដ្ឋលេខាធិការ និងជាមន្ត្រីបក្សកាន់អំណាចប្រចាំការនៅតាមខេត្ត ជាដើម៕