 លុបឈ្មោះលោក រ៉ុង ឈុន និងទាមទារឲ្យគណបក្សភ្លើងទៀនដាក់បេក្ខភាពថ្មីឈរឈ្មោះនៅមណ្ឌលខេត្តកណ្ដាលជំនួសលោក រ៉ុង ឈុន ស្របពេលបក្សនយោបាយដែលដាក់បេក្ខជនឈរឈ្មោះបោះឆ្នោត គឺ គ.ជ.ប ទទួលស្គាល់ជាផ្លូវការសរុប ១១គណបក្ស។){kind=link}
គណៈកម្មាធិការជាតិរៀបចំការបោះឆ្នោត (គ.ជ.ប) លុបឈ្មោះលោក រ៉ុង ឈុន និងទាមទារឲ្យគណបក្សភ្លើងទៀនដាក់បេក្ខភាពថ្មីឈរឈ្មោះនៅមណ្ឌលខេត្តកណ្ដាលជំនួសលោក រ៉ុង ឈុន ស្របពេលបក្សនយោបាយដែលដាក់បេក្ខជនឈរឈ្មោះបោះឆ្នោត គឺ គ.ជ.ប ទទួលស្គាល់ជាផ្លូវការសរុប ១១គណបក្ស។
សេចក្ដីជូនដំណឹងរបស់គណៈកម្មាធិការជាតិរៀបចំការបោះឆ្នោត (គ.ជ.ប) ចុះថ្ងៃទី០៩ ខែឧសភា នេះ ឲ្យដឹងថា បក្សភ្លើងទៀនមិនទាន់បានបំពេញលក្ខខណ្ឌគ្រប់គ្រាន់នៅឡើយទេចំពោះការសុំចុះបញ្ជីគណបក្សនយោបាយឈរឈ្មោះបោះឆ្នោត និងបញ្ជីបេក្ខជនឈរឈ្មោះជ្រើសតាំងតំណាងរាស្ត្រនីតិកាលទី៧ ឆ្នាំ២០២៣។
គ.ជ.ប លើកឡើងថា ចំណុចខ្វះខាតដែលគណបក្សភ្លើងទៀនត្រូវបំពេញបន្ថែម ក្នុងនោះសេចក្តីចម្លងលិខិតបញ្ជាក់ការចុះបញ្ជីគណបក្សនយោបាយនៅក្រសួងមហាផ្ទៃ ដែលបញ្ជាក់ពីនីត្យានុកូលកម្មដោយរដ្ឋបាលរាជធានី ខេត្ត ក្រុង ស្រុក ខណ្ឌ ចំនួន ១ (មួយ) ច្បាប់ និងបង្កាន់ដៃបង់ប្រាក់តម្កល់ចំនួន ១៥.០០០.០០០ (ដប់ប្រាំលាន) រៀល ដែលចេញដោយអគ្គនាយកដ្ឋានរតនាគារជាតិ។
ចំពោះបេក្ខជនឈរឈ្មោះវិញ គ.ជ.ប ថាទោះបីជាលោក រ៉ុង ឈុន ត្រូវតុលាការផ្ដន្ទាទោសពីបទមជ្ឈិមក្ដី ប៉ុន្តែលោក រ៉ុង ឈុន ដែលជាបេក្ខជនឈរឈ្មោះលេខរៀងទី១ នៅមណ្ឌលខេត្តកណ្តាល នេះ មិនទាន់មាននីតិសម្បទាឡើងវិញនៅឡើយ។ ករណីនេះ គ.ជ.ប បានទាមទារឲ្យគណបក្សភ្លើងទៀនប្ដូរបេក្ខជនថ្មីជំនួសលោក រ៉ុង ឈុន។
គណៈកម្មាធិការជាតិរៀបចំការបោះឆ្នោត បញ្ជាក់ថា ចំពោះចំណុចខ្វះខាតខាងលើនេះ គ.ជ.ប ទុករយៈពេលយ៉ាងយូរ ៥ (ប្រាំ) ថ្ងៃ ដើម្បីគណបក្សភ្លើងទៀនត្រូវបំពេញបន្ថែម បន្ទាប់ពីថ្ងៃបានទទួលលិខិតជូនដំណឹងរបស់ខ្លួន។
ការច្រានចោលរបស់គណៈកម្មាធិការជាតិរៀបចំការបោះឆ្នោតនេះ ធ្វើឡើងបន្ទាប់ពីសារព័ត៌មានគាំទ្ររដ្ឋាភិបាល Fresh News បានចុះផ្សាយកាលពីល្ងាចថ្ងៃទី៤ ខែឧសភា ថា លោក រ៉ុង ឈុន អាចនឹងត្រូវបានចាប់ខ្លួនដាក់ពន្ធនាគារជាថ្មីវិញ ប្រសិនបើមិនអនុវត្តតាមដីការបស់តុលាការ។
ការសើរើសំណុំរឿងរបស់លោក រ៉ុង ឈុន យកមកចុះផ្សាយនេះ ស្របពេលដែលលោក រ៉ុង ឈុន ឈរឈ្មោះជាបេក្ខជនតំណាងរាស្ត្រលេខរៀងទី១ នៃគណបក្សភ្លើងទៀននៅមណ្ឌលខេត្តកណ្ដាល ដើម្បីប្រកួតប្រជែងជាមួយលោក ហ៊ុន សែន ដែលជាបេក្ខជនលេខរៀងទី១ នៃគណបក្សប្រជាជនកម្ពុជានៅមណ្ឌលខេត្តកណ្ដាល នេះដូចគ្នា។
ស្របពេលដែលគណបក្សនយោបាយកំពុងដាក់បេក្ខជនឈរឈ្មោះ និងចុះបញ្ជីសម្រាប់ការបោះឆ្នោតខែកក្កដា ខាងមុខនេះ កូនស្រីបង្កើតរបស់លោក កឹម សុខា គឺកញ្ញា កឹម មនោវិទ្យា (Monovithya Kem) បានសរសេរនៅលើហ្វេសប៊ុករបស់កញ្ញានៅថ្ងៃទី៩ ឧសភា នេះថា កញ្ញាមានមោទកភាពណាស់ដែលកម្ពុជារៀបចំ និងប្រកួតប្រកបដោយឧត្តមភាពក្នុងកម្មវិធីស៊ីហ្គេម (SEA Games 2023) តែបើកម្ពុជាអាចរៀបចំ និងប្រកួតក្នុងការបោះឆ្នោតជាតិដោយត្រឹមត្រូវតាមស្តង់ដារអន្តរជាតិនាពេលខាងមុខនេះ មិនដឹងថាកម្ពុជានឹងមានមោទកភាពខ្លាំងប៉ុនណាឡើយ។ កញ្ញាបង្ហាញជំនឿថា ខ្មែរអាចធ្វើបាន ដោយងាកមកការចរចាគ្នាដើម្បីផ្សះផ្សាជាតិ។
ចំណែកឯអតីតមេដឹកនាំបក្សប្រឆាំង លោក សម រង្ស៊ី បានសរសេរលើទំព័រហ្វេសប៊ុករបស់លោកកាលពីថ្ងៃទី៧ ខែឧសភា ឆ្នាំ២០២៣ ថា មេដឹកនាំបក្សកាន់អំណាច ហ៊ុន សែន នឹងកម្ចាត់អនុប្រធានគណបក្សភ្លើងទៀន លោក រ៉ុង ឈុន ចេញពីបញ្ជីបេក្ខជនតំណាងរាស្ត្ររបស់បក្សភ្លើងទៀន ក្រោមលេសថា លោក រ៉ុង ឈុន ជាទណ្ឌិតដែលមិនទាន់បានទទួលនីតិសម្បទាពេញលេញឡើងវិញ ដូច្នេះគាត់នឹងមិនអាចឈរឈ្មោះជាបេក្ខជនតំណាងរាស្ត្របានទេ។
អតីតមេដឹកនាំបក្សប្រឆាំងរូបនេះអះអាងថា ការធ្វើបែបនេះ គឺដោយសារតែលោក ហ៊ុន សែន ខ្លាចលោក រ៉ុង ឈុន ដែលឈរឈ្មោះនៅខេត្តកណ្តាលដូចគាត់ដែរសម្រាប់ការបោះឆ្នោតជាតិក្នុងឆ្នាំ២០២៣ នេះ ខណៈលោក រ៉ុង ឈុន មានប្រជាប្រិយភាពខ្ពស់ជាងលោក ហ៊ុន សែន ឆ្ងាយណាស់ ជាពិសេសក្នុងចំណោមកម្មករ មន្ត្រីរាជការ និងគ្រូបង្រៀន។ ជាងនេះទៀត លោក រ៉ុង ឈុន ក៏ធ្លាប់ធ្វើជាប្រធានសហព័ន្ធសហជីពកម្ពុជា ហើយបានចេញមុខការពារបូរណភាពទឹកដីប្រទេសកម្ពុជាថែមទៀត។
បើតាមសេចក្ដីប្រកាសព័ត៌មានរបស់ គ.ជ.ប កាលពីថ្ងៃទី០៨ ខែឧសភា នេះ ឲ្យដឹងថា គណបក្សនយោបាយដែលបានដាក់បេក្ខជនឈរឈ្មោះសម្រាប់ការបោះឆ្នោតនាខែកក្កដា ខាងមុខនេះដែល គ.ជ.ប បានពិនិត្យ និងទទួលស្គាល់ជាផ្លូវការសរុប ១១គណបក្ស។
គណបក្សនយោបាយទាំង ១១ ដែលគណៈកម្មាធិការជាតិរៀបចំការបោះឆ្នោតសម្រេចទទួលស្គាល់ ក្នុងនោះមានគណបក្សប្រជាជនកម្ពុជា គណបក្សហ៊្វុនស៊ិនប៉ិច គណបក្សខ្មែររួបរួមជាតិ គណបក្សសំបុកឃ្មុំសង្គមប្រជាធិបតេយ្យ និងគណបក្សសញ្ជាតិកម្ពុជា ជាដើម។
ចំណែកគណបក្សនយោបាយចំនួន ៩ ទៀត គ.ជ.ប បញ្ជាក់ថា ខ្លួនកំពុងពិនិត្យដោយមិនទាន់សម្រេចទទួលស្គាល់ជាផ្លូវការនៅឡើយ។ គណបក្សនយោបាយទាំង ៩ ដែល គ.ជ.ប កំពុងពិនិត្យ ក្នុងនោះមានគណបក្សភ្លើងទៀន គណបក្សប្រជាធិបតេយ្យមូលដ្ឋាន គណបក្សខ្មែរឈប់ក្រ និងគណបក្សជនជាតិដើមប្រជាធិបតេយ្យ ជាដើម។
ទោះបី គ.ជ.ប ថាបក្សនយោបាយដែលបានចុះបញ្ជី និងដាក់បេក្ខជនសម្រាប់ឈរឈ្មោះបោះឆ្នោតជាង ១០គណបក្សហើយក៏ដោយ ប៉ុន្តែការបោះឆ្នោតជ្រើសតំណាងរាស្ត្រនីតិកាលទី៧ នាថ្ងៃទី២៣ ខែកក្កដា ខាងមុខនេះ ប្រទេសប្រជាធិបតេយ្យមួយចំនួនបានប្រកាសមិនបញ្ជូនអ្នកសង្កេតការណ៍ការបោះឆ្នោត និងផ្តល់ជំនួយដល់ការបោះឆ្នោតនៅកម្ពុជាឡើយ៕