26 C
Phnom Penh

លោក គង់ ម៉ាស់ សមាជិក​អតីត​បក្ស​សង្គ្រោះ​ជាតិ​ប្រកាស​ចូលរួម​ជាមួយ​បក្ស​ប្រជាជន​កម្ពុជា

ដោយ ឌឹ ខេមបូឌា ដេលី

បទវិភាគ

សមាជិក​អតីត​គណបក្ស​សង្គ្រោះ​ជាតិ​ប្រចាំ​ខេត្ត​ស្វាយរៀង ដែល​ទើប​នឹង​ចេញពី​ពន្ធនាគារ លោក គង់ ម៉ាស់ ប្រកាស​ចូលរួម​ជីវភាព​នយោបាយ​ជាមួយ​គណបក្ស​ប្រជាជន​កម្ពុជា បន្ទាប់ពី​មាន​ការ​អន្តរាគមន៍​របស់​មេដឹកនាំ​បក្ស​កាន់​អំណាច លោក ហ៊ុន សែន ឲ្យ​លោក​មាន​សេរីភាព​ឡើងវិញ។

លោក គង់ ម៉ាស់ ចេញ​លិខិត​សុំ​ចូលរួម​ជីវភាព​នយោបាយ​ជាមួយ​គណបក្ស​ប្រជាជន​កម្ពុជា​នៅ​ថ្ងៃទី​១០ ខែ​ឧសភា ឆ្នាំ​២០២៣ នេះ​ថា ក្រោយពី​ទទួល​បាន​ការ​លើកលែង​ទោស​ពី​មេដឹកនាំ​បក្ស​កាន់​អំណាច លោក ហ៊ុន សែន ឲ្យ​មាន​សេរីភាព​ឡើងវិញ និង​បាន​ដឹង​នូវ​កំហុស​របស់​ខ្លួន លោក​ក៏​សម្រេច​ចិត្ត​ចូលរួម​ជីវភាព​នយោបាយ​ជាមួយ​បក្ស​កាន់​អំណាច​នៅ​ពេលនេះ​តែម្តង។

លោក គង់ ម៉ាស់ បញ្ជាក់​ថា រយៈពេល​ជាង ១០​ឆ្នាំ​ហើយ​ដែល​លោក​ដើរ​តាម​មនោគមន៍​វិជ្ជា​នយោបាយ​របស់​មេដឹកនាំ​បក្ស​ប្រឆាំង។ លោក​មិន​បាន​ចូលរួម​ធ្វើ​កិច្ចការ​ដើម្បី​បម្រើ​សង្គម​ជាតិ​នោះ​ទេ គឺ​មាន​តែ​នាំ​ឲ្យ​មាន​ភាព​វឹកវរ​ដល់​សង្គម​ជាតិ​ប៉ុណ្ណោះ។

កាលពី​ថ្ងៃទី​០៦ ខែ​ឧសភា ឆ្នាំ​២០២៣ សកម្មជន​គណបក្ស​សង្គ្រោះ​ជាតិ​ចំនួន ១០​នាក់ មាន​ទាំង​លោក គង់ ម៉ាស់ ផង​ដែល​កំពុង​ជាប់​ឃុំ​នៅ​ក្នុង​ពន្ធនាគារ បាន​ចេញ​វីដេអូ​សារភាព​កំហុស និង​ធ្វើ​លិខិត​សុំទោស​លោក ហ៊ុន សែន ដោយ​សំណូមពរ​ឱ្យ​ពួកគេ​បាន​រស់នៅ​ក្រៅ​ឃុំ​ជា​បណ្ដោះអាសន្ន។

ក្រោយពី​ការ​សុំទោស លោក គង់ ម៉ាស់ ត្រូវ​បាន​ដោះលែង​ឲ្យ​រស់នៅ​ក្រៅ​ឃុំ​បណ្ដោះអាសន្ន។ បន្ថែម​ពី​នេះ នៅ​ថ្ងៃទី​០៦ ខែ​ឧសភា ឆ្នាំ​២០២៣ ដដែល​នោះ ព្រះករុណា​ព្រះបាទ សម្តេច​ព្រះ​នរោត្តម សីហមុនី ក៏​បាន​ចេញ​ព្រះរាជក្រឹត្យ​លើកលែង​ទោស​ឱ្យ​លោក គង់ ម៉ាស់ រួច​ផុត​ពី​ការ​ចោទប្រកាន់​ក្នុង​សំណុំរឿង​ព្រហ្មទណ្ឌ​របស់​សាលាដំបូង​រាជធានី​ភ្នំពេញ​ផង​ដែរ។

លោក គង់ ម៉ាស់ ត្រូវ​បាន​សមត្ថកិច្ច​ចាប់​ឃុំ​ខ្លួន​កាលពី​ថ្ងៃទី​៣១ ខែ​ធ្នូ ឆ្នាំ​២០២០ និង​បាន​បញ្ជូន​ទៅ​តុលាការ​ក្រុង​ភ្នំពេញ​ក្រោម​បទ​ចោទ «រួម​គំនិត​ក្បត់»។ ក្រោយ​ឃុំ​ខ្លួន​អស់​រយៈពេល​ប្រមាណ​ជា ២​ឆ្នាំ គឺ​នៅ​ចុង​ខែ​ធ្នូ ឆ្នាំ​២០២២ លោក គង់ ម៉ាស់ ត្រូវ​តុលាការ​ក្រុង​ភ្នំពេញ​សម្រេច​ផ្ដន្ទាទោស​ដាក់​ពន្ធនាគារ​រយៈពេល ៥​ឆ្នាំ​ពី​បទ​រួម​គំនិត​ក្បត់ ជុំវិញ​ការ​ចូលរួម​មាតុភូមិ​និវត្តន៍​របស់​លោក សម រង្ស៊ី កាលពី​ពេល​កន្លងទៅ។

រយៈពេល​ចុងក្រោយ​នេះ គេ​សង្កេត​ឃើញ​ថា សកម្មជន សមាជិក និង​មន្ត្រី​បក្ស​ប្រឆាំង​ទាំង​ភាគី​លោក កឹម សុខា និង​ភាគី​លោក សម រង្ស៊ី បាន​សម្រុក​ចុះចូល​ជាមួយ​គណបក្ស​ប្រជាជន​កម្ពុជា និង​រដ្ឋាភិបាល​ឯក​បក្ស​របស់​លោក ហ៊ុន សែន ជា​បន្តបន្ទាប់ ក្នុង​នោះ​ភាគី​លោក កឹម សុខា រួម​មាន​លោក យឹម ស៊ីណន លោក ហ៊ុន កុសល និង​មនុស្ស​មួយ​ចំនួន​ទៀត។ ចំណែក​ភាគី​លោក សម រង្ស៊ី មាន​ដូចជា​លោក អៀ ចាន់ណា លោក តុ វ៉ាន់ចាន់ និង​លោក គង់ ម៉ាស់ ដែល​សុំ​ចុះចូល​នៅ​ពេលនេះ​ជាដើម។

សមាជិក​ក្រុមប្រឹក្សា​ក្រុង​ឡូវែល លោក នួន វាសនា បាន​លើកឡើង​ក្នុង​កម្មវិធី Idea Talk នៃ​សារព័ត៌មាន The Cambodia Daily កាលពី​រាត្រី​ថ្ងៃទី​៩ ឧសភា ថា អ្នក​ដែល​ចុះចូល​ជាមួយ​បក្ស​កាន់​អំណាច​មួយ​ចំនួន​ធំ មិនមែន​ដោយសារ​ពួកគេ​ស្រឡាញ់​គណបក្ស​ប្រជាជន​កម្ពុជា​ទេ ប៉ុន្តែ​ដោយសារ​ពួកគេ​គ្មាន​ជម្រើស​ដែល​ចង់​បាន​សេរីភាព​សម្រាប់​មើល​ថែ​ក្រុម​គ្រួសារ​របស់​ពួកគេ។

លោក នួន វាសនា បញ្ជាក់​ថា ក្រៅពី​ត្រូវការ​សេរីភាព ពួកគេ​ក៏​មិន​ដឹង​ថា​ទៅ​ពឹង​បក្ស​ណា​ដែរ​ក្នុង​ពេល​បច្ចុប្បន្ន​នេះ ខណៈ​គណបក្ស​សង្គ្រោះ​ជាតិ​ក៏​គ្មាន​សង្ឃឹម​ថា​នឹង​រស់​ឡើងវិញ​ដែរ​នោះ ដូច្នេះ​ជម្រើស​នៅ​ពេលនេះ ពួកគេ​មាន​តែ​ចុះចូល​ជាមួយ​គណបក្ស​កាន់​អំណាច​ជា​បណ្ដោះអាសន្ន​ប៉ុណ្ណោះ ប៉ុន្តែ​ឆន្ទៈ​ដែល​ចង់​បាន​ការ​ផ្លាស់ប្ដូរ​របស់​អ្នក​ទាំងនោះ​គឺ​នៅតែ​មាន​ដដែល។

ទាក់ទិន​នឹង​បញ្ហា​នេះ ក្រុម​អ្នក​សង្កេតការណ៍​លើកឡើង​ថា នៅ​មុន​ការ​បោះឆ្នោត​មក​ដល់ គឺជា​ឱកាស​របស់​សកម្មជន​បក្ស​ប្រឆាំង​ដែល​កំពុង​ជាប់​ឃុំ​ដែល​ចង់​មាន​សេរីភាព​ឡើងវិញ ដូច្នេះ​ពួកគេ​មាន​តែ​សុំ​ចុះចូល​ជាមួយ​បក្ស​កាន់​អំណាច​ប៉ុណ្ណោះ ប៉ុន្តែ​ក៏​ជា​ឱកាស​របស់​លោក ហ៊ុន សែន ដែរ ស្រប​ពេល​ដែល​ការ​បោះឆ្នោត​ខាងមុខ​នេះ​គ្មាន​បក្ស​ប្រឆាំង​គួរ​ឲ្យ​ទុកចិត្ត​ចូលរួម និង​គ្មាន​សហគមន៍​អន្តរជាតិ​ទទួលស្គាល់​ជុំវិញ​ដំណើរការ​នៃ​ការ​បោះឆ្នោត​នេះ​ដែរ​នោះ។

ប្រភព​ដដែល​បញ្ជាក់​ថា អ្នក​ដែល​សុំ​ចុះចូល​ជា​ថ្នូរ​ត្រឡប់​មក​វិញ គឺ​ទទួល​បាន​សេរីភាព និង​តំណែង​តួនាទី​ក្នុង​ជួរ​រដ្ឋាភិបាល​ឯក​បក្ស​របស់​លោក ហ៊ុន សែន ប៉ុន្តែ​ប្រយោជន៍​ដែល​លោក ហ៊ុន សែន ទទួល​បាន​ពី​ការ​ចុះចូល​របស់​ពួកគេ គឺជា​ការ​ជួយ​បិទ​បាំង​ការ​បោះឆ្នោត​មួយ​ដែល​អន្តរជាតិ​មិន​ទទួលស្គាល់ ដើម្បី​បន្ត​ទៅ​រក​ការ​ផ្ទេរ​អំណាច​របស់​គាត់​ដោយ​សុវត្ថិភាព​នៅ​ពេល​ខាងមុខ​នេះ៕

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស