ពលរដ្ឋ ១១គ្រួសាររស់នៅឃុំសំឡូត ស្រុកសំឡូត ខេត្តបាត់ដំបង បានចោទអនុប្រធានពន្ធនាគារខេត្តបាត់ដំបងម្នាក់ថាឆបោកប្រាក់ពួកគេជាង ៩ម៉ឺនដុល្លារ ក្រោមលេសថាយកទៅរត់ការដើម្បីជួយកូនៗពួកគេឲ្យចូលក្របខ័ណ្ឌមន្ត្រីនគរបាលជាតិ។
ក្នុងពាក្យបណ្ដឹងមួយចុះថ្ងៃទី០២ ខែឧសភា ឆ្នាំ២០២៣ ភ្ជាប់ជាមួយស្នាមមេដៃ និងឈ្មោះដែលដាក់ទៅក្រសួងមហាផ្ទៃ ឲ្យដឹងថា ពួកគេប្រគល់ប្រាក់ជាង ៩ម៉ឺនដុល្លារទៅអនុប្រធានពន្ធនាគារខេត្តបាត់ដំបង អ្នកស្រី ស៊ឹម សុខុម បន្ទាប់ពីអ្នកស្រីបានសន្យាជួយរត់ការដើម្បីកូនៗរបស់ពួកគាត់បានចូលធ្វើការក្របខ័ណ្ឌនគរបាលជាតិ ប៉ុន្តែបើមិនបាន នឹងប្រគល់ប្រាក់ឲ្យពួកគាត់វិញ។
ប្រភពដដែលអះអាងថា ប្រាក់ជាង ៩ម៉ឺនដុល្លារនេះ ពួកគាត់ទាំង ១១គ្រួសារបានយកទៅឲ្យអ្នកស្រី ស៊ឹម សុខុន ដល់ផ្ទះកាលពីថ្ងៃទី២៨ ខែមីនា ឆ្នាំ២០២១ ដោយមានលោក ម៉ៅ ណាត ហើយលោក ប្រាជ្ញ សុវណ្ណមន្នី និងលោក ម៉ៅ សំរេច ជាអ្នកបានឃើញ និងដឹងឮចំពោះរឿងនេះ។
លិខិតដដែលបានសរសេរថា នៅពេលប្រគល់ប្រាក់ហើយ បែរជាអ្នកស្រី ស៊ឹម សុខុន បានប្រាប់មកពួកគាត់វិញថា ក្របខ័ណ្ឌមន្ត្រីនគរបាលជាតិនេះ គឺគេរើសយុវជនចេញពីក្នុងគណបក្សប្រជាជនកម្ពុជា។
បើតាមការអះអាងរបស់ក្រុមប្រជាពលរដ្ឋក្នុងវីដេអូឃ្លីបថា ទោះបីជាអ្នកស្រី ស៊ឹម សុខុន មិនបានជួយកូនៗរបស់ពួកគាត់ចូលក្របខ័ណ្ឌដូចសន្យា ប៉ុន្តែប្រាក់ឲ្យជាង ៩ម៉ឺនដុល្លារដែលអនុប្រធានពន្ធនាគាររូបនេះយកពីពួកគាត់ ក៏មិនបានប្រគល់មកវិញតាមការសន្យាដែរចាប់តាំងពីខែមីនា ឆ្នាំ២០២១ ដល់ខែឧសភា ឆ្នាំ២០២៣។
ក្រៅពីពាក្យបណ្ដឹងដែលប្ដឹងទៅក្រសួងមហាផ្ទៃ ក៏មានការបង្ហាញវីដេអូឃ្លីបជាង ៤នាទីដែលក្រុមប្រជាពលរដ្ឋយកប្រាក់ទៅឲ្យអនុប្រធានពន្ធនាគារខេត្តបាត់ដំបង អ្នកស្រី ស៊ឹម សុខុន ដែរ ដោយវីដេអូនេះត្រូវគេចែករំលែកតៗគ្នានៅលើបណ្ដាញសង្គម។
បើតាមក្រុមប្រជាពលរដ្ឋបានឲ្យដឹងថា ពួកគេប្ដឹងអ្នកស្រី ស៊ឹម សុខុន ដោយសារមន្ត្រីរូបនេះមិនប្រគល់ប្រាក់ឲ្យពួកគេវិញ ដោយចេះតែឆ្លើយដោះសាជាមួយពួកគាត់ម្ដងហើយម្ដងទៀត ខណៈប្រាក់ជាង ៩ម៉ឺនដុល្លារ គឺពួកគាត់ខ្ចីពីធនាគារ។
ករណីនេះ ពួកគាត់ស្នើទៅរដ្ឋមន្ត្រីក្រសួងមហាផ្ទៃ លោក ស ខេង ឲ្យជួយអន្តរាគមន៍ដោយចោទថា ឧត្តមសេនីយ៍ត្រីផ្កាយមួយ អ្នកស្រី ស៊ឹម សុខុន បានឆបោកលុយពួកគាត់ជាង ៩ម៉ឺនដុល្លារក្រោមលេសថាយកទៅរត់ការចូលក្របខ័ណ្ឌមន្ត្រីនគរបាលខេត្តបាត់ដំបង។
ពួកគេបានអះអាងថា ការស្វែងរកកិច្ចអន្តរាគមន៍ពីរដ្ឋមន្ត្រីក្រសួងមហាផ្ទៃ លោក ស ខេង ឲ្យជួយបន្ទាប់ពីអាជ្ញាធរខេត្តបាត់ដំបង មិនអាចដោះស្រាយករណីនេះជូនបាន ទោះបីជាពួកគេបានទៅជួបអភិបាលរងខេត្តនេះចំនួន ៣ដងហើយក្ដី។
ពាក់ព័ន្ធនឹងករណីនេះ សារព័ត៌មាន The Cambodia Daily មិនទាន់អាចសុំការឆ្លើយតបពីអ្នកនាំពាក្យក្រសួងមហាផ្ទៃ លោក ខៀវ សុភ័គ បាននៅឡើយទេ។
គួរបញ្ជាក់ផងដែរថា ពាក់ព័ន្ធរឿងរត់ការចូលក្របខ័ណ្ឌរដ្ឋនេះ កាលពីខែសីហា ឆ្នាំ២០២២ រដ្ឋមន្ត្រីក្រសួងមហាផ្ទៃ លោក ស ខេង បានបញ្ចប់មុខតំណែងមន្ត្រីនៅក្រសួងនេះថ្នាក់អនុរដ្ឋលេខាធិការ ក្រោយពីរកឃើញថា មន្ត្រីនោះមានជាប់ពាក់ព័ន្ធនឹងអំពើពុករលួយដើរសន្យាលក់ក្របខ័ណ្ឌនគរបាលជាតិក្នុងតម្លៃចន្លោះពី ១ម៉ឺនទៅ ២ម៉ឺនដុល្លារ។ លោកក៏បានទម្លាយដែរថា អំពើពុករលួយប្រភេទនេះកំពុងកើតមាននៅក្រសួងផ្សេងទៀត តែលោកសុំមិនលូកដៃចូលកិច្ចការផ្ទៃក្នុងរបស់ក្រសួង និងស្ថាប័នពាក់ព័ន្ធទាំងនោះទេ។
បើតាមសន្ទស្សន៍យល់ឃើញពីអំពើពុករលួយឆ្នាំ២០២១ ចេញផ្សាយដោយអង្គការតម្លាភាពអន្តរជាតិ (Transparency International) នៅថ្ងៃទី២៥ ខែមករា ឆ្នាំ២០២២ បង្ហាញថា កម្ពុជាជាប់ចំណាត់ថ្នាក់លេខ១៥៧ ក្នុងចំណោមប្រទេស និងដែនដីចំនួន ១៨០ នៅលើពិភពលោកដែលមានអំពើពុករលួយអាក្រក់ជាងគេបំផុតក្នុងចំណោមប្រទេសទាំង ១០ នៃសមាជិកអាស៊ាន៕