អតីតអគ្គទីប្រឹក្សាស្ថានទូតខ្មែរប្រចាំប្រទេសឥណ្ឌូនេស៊ី អះអាងថា ការបាត់បង់ទឹកដីមួយផ្នែកទៅប្រទេសវៀតណាម ដូចជាព្រំដែនគោក និងព្រំដែនទឹកដែលមានកោះត្រល់ ជាដើម គឺបានបាត់បង់នៅជំនាន់សម្តេចព្រះនរោត្តម សីហនុ បន្ទាប់ពីព្រះអង្គប្រកាសទទួលស្គាល់ខ្សែបន្ទាត់ព្រំដែនប្រេវីយេជាឯកតោភាគីកាលពីសម័យសង្គមរាស្ត្រនិយម។
អតីតអគ្គទីប្រឹក្សាស្ថានទូតខ្មែរប្រចាំប្រទេសឥណ្ឌូនេស៊ី បណ្ឌិត សូ ណារ៉ូ បានលើកឡើងក្នុងកិច្ចសម្ភាសន៍ពិសេសនៃសារព័ត៌មាន The Cambodia Daily កាលពីរាត្រីថ្ងៃទី៩ ឧសភា បន្ទាប់ពីព្រះមហាក្សត្រប្រកាសទទួលស្គាល់អតីតភាពការងារកាលពីមុន និងតែងតាំងលោកជាឧត្តមមន្ត្រីក្នុងជួររាជរដ្ឋាភិបាលកម្ពុជាដូចដើមវិញថា នៅពេលដែលអតីតព្រះមហាក្សត្រខ្មែរប្រកាសទទួលស្គាល់ខ្សែបន្ទាត់ព្រំដែនប្រេវីយេនោះ គឺកោះត្រល់ក៏ត្រូវបាត់បង់ដោយចៀសពុំរួចឡើយ។
បណ្ឌិត សូ ណារ៉ូ បញ្ជាក់ថា រឿងព្រំដែនជារឿងដែលពាក់ព័ន្ធនឹងផ្លូវច្បាប់វែងឆ្ងាយណាស់ ដូច្នេះបើភាគីដែលមានទំនាស់ព្រំដែនទាំងសងខាងចង់ឱ្យបញ្ហារបស់ខ្លួនដាច់ស្រេច គឺមានតែប្តឹងទៅតុលាការអន្តរជាតិឱ្យរកយុត្តិធម៌ឱ្យប៉ុណ្ណោះ ព្រោះថាតុលាការអន្តរជាតិអាចផ្តល់យុត្តិធម៌ឱ្យបានដោយសារតែពួកគេមានឯកសារគ្រប់គ្រាន់ជុំវិញរឿងនេះ។
នៅថ្ងៃទី១០ ខែឧសភា ឆ្នាំ២០២៣ នេះ អ្នកវិភាគឯករាជ្យ និងជាប្រធានវេទិកាពលរដ្ឋ លោក គឹម សុខ បានសរសេរលើគណនីហ្វេសប៊ុករបស់លោកថា សម្ដេចព្រះនរោត្តម សីហនុ ទ្រង់មិនធ្លាប់មានបន្ទូលទទួលស្គាល់ខ្សែបន្ទាត់ប្រេវីយេរវាងកម្ពុជា និងវៀតណាម ដូចបណ្ឌិត សូ ណារ៉ូ បានអះអាងក្នុងកិច្ចសម្ភាសន៍ជាមួយសារព័ត៌មាន The Cambodia Daily កាលពីថ្ងៃទី៩ ឧសភា នោះទេ។
លោក គឹម សុខ លើកឡើងថា ព្រះអង្គធ្លាប់មានបន្ទូលច្បាស់ថា បារាំងកាត់ទឹកដីកូសាំងស៊ីន (ឬទឹកដីកម្ពុជាក្រោម) របស់កម្ពុជរដ្ឋឲ្យអាណ្ណាម (ឬវៀតណាមសព្វថ្ងៃ) គ្រប់គ្រងយ៉ាងអយុត្តិធម៌ ដែលប្រជាជាតិខ្មែរមិនអាចទទួលស្គាល់បានទេ ហើយព្រះអង្គសង្កត់ធ្ងន់ថា កូនខ្មែរគ្រប់ជំនាន់ត្រូវតែទាមទារកូសាំងស៊ីន (ឬទឹកដីខ្មែរកម្ពុជាក្រោម) និងកោះត្រល់មកជាកម្មសិទ្ធិរបស់ខ្មែរវិញនៅថ្ងៃអនាគត។
អ្នកវិភាគឯករាជ្យរូបនេះបញ្ជាក់ថា អតីតព្រះមហាក្សត្រ ព្រះករុណា សម្ដេចព្រះនរោត្តម សីហនុ មានព្រះបន្ទូលបែបនេះនៅចំពោះមុខមេដឹកនាំវៀតណាមខាងត្បូង លោក ង៉ោ ឌិញយៀម។ ដូច្នេះ កូនខ្មែរត្រូវតែតស៊ូទាមទារទឹកដីដូនតាខ្មែរជាកម្មសិទ្ធិរបស់ខ្មែរមកវិញ។
បន្ទាប់ពីការលើកឡើងរបស់លោក គឹម សុខ បណ្ឌិត សូ ណារ៉ូ បានឆ្លើយតបក្នុងប្រអប់បញ្ចេញមតិនៃគណនីហ្វេសប៊ុករបស់អ្នកវិភាគឯករាជ្យរូបនេះថា លោក គឹម សុខ និយាយចំណុចនេះមិនខុសទេ គឺពិតជាត្រឹមត្រូវ។ តែលោក ង៉ោ ឌិញយៀម ត្រូវរដ្ឋប្រហារសម្លាប់ឆ្នាំ១៩៦៣ បាត់ទៅហើយ។ លោក សូ ណារ៉ូ អះអាងថា ចំណុចដែលលោក គឹម សុខ បាននិយាយ គឺជារឿងក្រោយដែលលោក ង៉ោ ឌិញយៀម ស្លាប់បានប៉ុន្មានឆ្នាំដែលមានឯកសារផ្លូវការបញ្ជាក់នៅសម័យនោះតែប៉ុណ្ណោះ។
បណ្ឌិត សូ ណារ៉ូ បានបង្ហាញថតឯកសារដាក់ចូលប្រអប់បញ្ចេញមតិពីរផ្សេងគ្នា គឺទី១ មានខ្លឹមសារថា ជំនួបរវាងសម្តេចព្រះនរោត្តម សីហនុ និងលោក ផាំ វ៉ាន់ដុង នៅទីក្រុងប៉េកាំង នាថ្ងៃទី២៩ ខែកញ្ញា ឆ្នាំ១៩៦៤ សម្តេចព្រះនរោត្តម សីហនុ បានបញ្ជាក់ពីគោលជំហរកម្ពុជាស្ដីពីបញ្ហាព្រំដែនថា ចំពោះអ្វីដែលជាបញ្ហាវិវាទទឹកដី យើងមិនចង់ធ្វើឱ្យក្លាយជាបញ្ហាស្មុគស្មាញទេ ព្រះអង្គសូមបញ្ជាក់ថា ទ្រង់មិនទាមទារយកកោះភូកុក (កោះត្រល់) និងកោះដទៃទៀត ដូចជាកោះថូជូ ពូលូពិនហ្សាង ដែលបានកាន់កាប់ដោយវៀតណាមនោះឡើយ។
ចំណែកឯកសារទី២ មានខ្លឹមសារថា រាល់កោះទាំងឡាយដែលនៅខាងត្បូងខ្សែប្រេវីយេ រាប់ទាំងកោះត្រល់ផង ត្រូវស្ថិតនៅក្រោមការគ្រប់គ្រងរដ្ឋបាលរបស់កូសាំងស៊ីន និងរាល់កោះទាំងឡាយណាដែលនៅខាងជើងខ្សែប្រេវីយេ ត្រូវស្ថិតនៅក្រោមការគ្រប់គ្រងរបស់កម្ពុជា។
ទោះជាយ៉ាងណាក៏ដោយ ប្រធានវេទិកាពលរដ្ឋ លោក គឹម សុខ បានទាមទារឲ្យបណ្ឌិត សូ ណារ៉ូ បង្ហាញឯកសារទាំងស្រុង ព្រោះថាអត្ថបទកាត់ខ្លីៗខាងលើមិនបង្ហាញពីការអះអាងរបស់សម្ដេចព្រះនរោត្តម សីហនុ ទេ ហើយក៏មិនអាចបញ្ជាក់ថាជាឯកសាររបស់រដ្ឋាភិបាលសង្គមរាស្ត្រនិយមបានដែរ។ លោកបន្ថែមថា ឯកសារគ្មានប្រភពខាងលើនោះគ្រាន់តែជាការនិយាយរបស់អនុប្រធានកិច្ចការព្រំដែន គឺអ្នកស្រី កុយ ពិសី ដែលជាមន្ត្រីនៃរដ្ឋាភិបាលលោក ហ៊ុន សែន ប៉ុណ្ណោះ។
ព្រះរាជសារអតីតព្រះមហាក្សត្រ នរោត្តម សីហនុ ចុះថ្ងៃទី១៦ ខែតុលា ឆ្នាំ២០០៤ បានធ្វើឡើងពីរថ្ងៃក្រោយបន្ទាប់ពីព្រះរាជបុត្ររបស់ព្រះអង្គ គឺសម្តេចព្រះនរោត្តម សីហមុនី ឡើងគ្រងរាជ្យ។ សម្តេចព្រះនរោត្តម សីហនុ បានរំលឹកឡើងវិញអំពីទឹកដីកម្ពុជាក្រោម និងកោះត្រល់ថាជារបស់ខ្មែរដែលព្រះអង្គបានបញ្ជាក់ថា ព្រះអង្គមិនដែលសុខចិត្តផ្ទេរកម្ពុជាក្រោម កោះត្រល់ ឲ្យទៅបារាំង និងវៀតណាមម្តងណាឡើយ។
សម្តេចព្រះនរោត្តម សីហនុ បញ្ជាក់ក្នុងព្រះរាជសារនោះថា កើតមកជាខ្មែរ គ្មានអ្នកណាម្នាក់ដែលមិនស្រឡាញ់ជាតិ ស្រឡាញ់កម្ពុជាក្រោម និងកោះត្រល់នោះទេ។ ព្រះអង្គមិនដែលបានចោទប្រកាន់អ្នកណាម្នាក់ថាមិនចេះស្រឡាញ់ជាតិនោះដែរ៕