លោក យុន ប៊ុនកន ដែលត្រូវជាឪពុកបង្កើតរបស់អ្នកស្រី យុន ប៊ុនណារី ចេញមុខបំភ្លឺជុំវិញការចុះផ្សាយថា ប៉ូលិសកាណាដាបានចាប់ខ្លួនលោក និងកូនស្រីរបស់លោកថាជារឿងមិនពិត ដោយលោកក៏កំពុងស្នើឱ្យសារព័ត៌មាន Le Journal de Montréal ធ្វើការកែសម្រួលការចុះផ្សាយរបស់គេផងដែរ។
លោក យុន ប៊ុនកន បានធ្វើការផ្សាយផ្ទាល់លើគណនីហ្វេសប៊ុករបស់លោកដែលមានឈ្មោះ Montreal Meditation កាលពីថ្ងៃទី៩ ខែឧសភា ឆ្នាំ២០២៣ ថា ផ្ទះដែលប៉ូលិសចូលឆែកឆេរ និងបង្កកទ្រព្យសម្បត្តិនោះ គឺជាផ្ទះដែលកូនស្រីរបស់លោកជួលឱ្យអ្នកផ្សេងប៉ុណ្ណោះ មិនមែនជាផ្ទះដែលកូនស្រីរបស់លោករស់នៅនោះទេ ហើយលោកក៏កំពុងស្នើឱ្យសារព័ត៌មាន Le Journal de Montréal កែសម្រួលការចុះផ្សាយរបស់គេដែរនៅពេលនេះ។
លោក យុន ប៊ុនកន បញ្ជាក់ថា អ្នកដែលជួលផ្ទះពីកូនស្រីរបស់គាត់ បានយកផ្ទះនោះទៅប្រព្រឹត្តអំពើខុសច្បាប់ដោយការផលិតគ្រឿងញៀន ហើយក្នុងពេលជាមួយគ្នានោះ ប៉ូលិសក៏បានចុះស្រាវជ្រាវផ្ទះដទៃទៀតក្នុងតំបន់នោះប្រមាណជា ៤០កន្លែងដែរ ដែលមានការសង្ស័យថាបានពាក់ព័ន្ធនឹងការផលិតគ្រឿងញៀនក្នុងខេត្តកេបិច រហូតដល់ខេត្តផ្សេងទៀតក្នុងទីក្រុងម៉ុងរ៉េអាល់ ប្រទេសកាណាដា។
ប្រភពដដែលអះអាងថា ខ្លួនមិនជាប់ពាក់ព័ន្ធនឹងរឿងនោះទេ គ្រាន់តែជាឪពុករបស់អ្នកស្រី យុន ប៊ុនណារី ដែលផ្ទះរបស់គាត់កំពុងជាប់ពាក់ព័ន្ធនឹងបញ្ហាគ្រឿងញៀន ដោយសារតែអ្នកជួលស្នាក់នៅនោះបានប្រព្រឹត្តប៉ុណ្ណោះ។ ជាងនេះទៀត លោកក៏មិនមែនជាសមាជិករបស់គណបក្សប្រជាជនកម្ពុជាប្រចាំទីក្រុងម៉ុងរ៉េអាល់ ក្នុងប្រទេសកាណាដា ដូចការលើកឡើងរបស់មនុស្សមួយចំនួនឡើយ ហើយលោកក៏មិនមែនជាអ្នកគាំទ្របក្សប្រឆាំងដែរ។
លោក យុន ប៊ុនកន បញ្ជាក់ថា ក្នុងរឿងនេះ ផ្ទះកូនស្រីរបស់លោកដែលជាប់ពាក់ព័ន្ធនឹងរឿងគ្រឿងញៀននៅពេលនេះ មិនត្រូវបានប៉ូលិសរឹបអូសទេ គ្រាន់តែបង្កកប៉ុណ្ណោះ ខណៈឡានកូនស្រីរបស់លោកក៏គ្រាន់តែបង្កកដូចគ្នាដែរ ដែលត្រូវរង់ចាំការដោះស្រាយបញ្ហានេះសិន។
លោកបន្ថែមថា ចំណែកភោជនីយដ្ឋានក្នុងអគាររបស់លោកដែលជួលឱ្យជនជាតិវៀតណាមលក់បាញ់ឆែវ មិនមែនជាភោជនីយដ្ឋានរបស់លោកនោះទេ ខណៈការចុះផ្សាយរបស់សារព័ត៌មាន Le Journal de Montréal ថារកឃើញកាំភ្លើងនោះក៏មិនមែនជាការពិតដែរ។
កាលពីចុងខែមេសា ឆ្នាំ២០២៣ សារព័ត៌មានអន្តរជាតិ Le Journal de Montréal បានចុះផ្សាយថា ប៉ូលិសកាណាដា បានស្រាវជ្រាវរកឃើញឧបករណ៍ផលិតគ្រឿងញៀននៅក្នុងផ្ទះរបស់អ្នកស្រី យុន ប៊ុនណារី ដែលមានសមត្ថភាពផលិត ១លានគ្រាប់ក្នុង ១ថ្ងៃ និងបានរកឃើញថ្នាំញៀនជាង ៩សែនគ្រាប់ ព្រមទាំងកាំភ្លើងវែងខ្លីមួយចំនួនផងដែរ។
ប្រភពដដែលបញ្ជាក់ថា ផ្ទះអ្នកស្រី យុន ប៊ុនណារី ពីរកន្លែង និងឡានមួយចំនួន ត្រូវប៉ូលិសយកទៅរក្សាទុកដើម្បីធ្វើការស្រាវជ្រាវបន្ត។
ទាក់ទិននឹងបញ្ហានេះ មានប្រភពមួយចំនួនលើកឡើងថា លោក យុន ប៊ុនកន គឺជាទីប្រឹក្សាលោក ហេង សំរិន និងជាប្រធានគណបក្សប្រជាជនកម្ពុជានៅទីក្រុងម៉ុងរ៉េអាល់ ប្រទេសកាណាដា ហើយក៏ជាឧក្រិដ្ឋជនគ្រឿងញៀន និងការលាងលុយដែរ។ ជាងនេះទៀត លោកក៏ជាមនុស្សជំនិតរបស់លោក ហ៊ុន ម៉ាណែត ថែមទៀត។
យ៉ាងណាក៏ដោយ ក្នុងវីដេអូផ្សាយផ្ទាល់លើគណនីហ្វេសប៊ុករបស់លោកកាលពីថ្ងៃអង្គារ ទី៩ ឧសភា លោកបានច្រានចោលការចោទប្រកាន់នោះទាំងស្រុង ដោយអះអាងថា លោកគ្រាន់តែជាអ្នករកស៊ីធម្មតាប៉ុណ្ណោះ។
ទាក់ទិននឹងបញ្ហានេះ កាលពីថ្ងៃទី៩ ខែតុលា ឆ្នាំ២០១៣ លោក យុន ប៊ុនកន ត្រូវបានព្រះមហាក្សត្រតែងតាំងជាទីប្រឹក្សារបស់ប្រធានរដ្ឋសភាកម្ពុជា លោក ហេង សំរិន ដែលមានឋានៈស្មើនឹងរដ្ឋលេខាធិការផងដែរ៕