40.3 C
Phnom Penh

លោក Honda៖ ចង់​ធ្វើ​ឱ្យ​ពលរដ្ឋ​កម្ពុជា​និង​ក្រុម​បាល់ទាត់​ទទួល​បាន​លទ្ធផល​ល្អ ប៉ុន្តែ​មិន​អាច​សម្រេច​បំណង​បាន

ដោយ ឌឹ ខេមបូឌា ដេលី

បទវិភាគ

អ្នក​ចាត់ការ​ទូទៅ​ក្រុម​បាល់ទាត់​ជម្រើស​ជាតិ​កម្ពុជា លោក Keisuke Honda លើកឡើង​ថា គម្រោង​របស់​លោក​ជុំវិញ​ការ​ប្រកួត​ជម្រើស​ជាតិ​កម្ពុជា​ត្រូវ​បាន​បញ្ចប់​ហើយ បើ​ទោះបីជា​លោក​ចង់​ធ្វើ​ឱ្យ​ពលរដ្ឋ​កម្ពុជា និង​ក្រុម​បាល់ទាត់​កាន់តែ​រីករាយ​ជាមួយ​នឹង​លទ្ធផល​កាន់តែ​ប្រសើរ ប៉ុន្តែ​លោក​មិន​អាច​ធ្វើ​បាន​នោះ​ទេ បន្ទាប់ពី​ចាញ់​ការ​ប្រកួត​ជាមួយ​ក្រុម​បាល់ទាត់​ឥណ្ឌូនេស៊ី។

គ្រូបង្វឹក​បាល់ទាត់​កម្ពុជា លោក Keisuke Honda សរសេរ​លើ​គណនី​ហ្វេសប៊ុក​របស់​លោក​នៅ​ថ្ងៃទី​១១ ខែ​ឧសភា នេះ​ថា ក្រុម​កីឡា​បាល់ទាត់​កម្ពុជា​ទាំងអស់ គឺជា​ថាមពល និង​ក្តី​សង្ឃឹម​របស់​លោក ដែល​ជា​មូលហេតុ​ឱ្យ​រូបលោក​បន្ត​ការងារ​អស់​រយៈពេល ៥​ឆ្នាំ​រហូត​ដល់​ទី​បញ្ចប់​នៅ​ពេលនេះ។

លោក Keisuke Honda បាន​ថ្លែង​អំណរគុណ​ដល់​ក្រុម​កីឡាករ​បាល់ទាត់​កម្ពុជា ដោយ​បញ្ជាក់​ថា ក្នុង​រយៈពេល ៥​ឆ្នាំ​ចុងក្រោយ​នេះ កីឡាករ​បាល់ទាត់​កម្ពុជា​គ្រប់​គ្នា​បាន​ផ្តល់​ឱ្យ​រូបលោក​នូវ​អ្វីៗ​គ្រប់​យ៉ាង​ហើយ លោក​ពិត​ជា​មាន​មោទនភាព​ចំពោះ​ពួកគេ​គ្រប់​គ្នា​ខ្លាំង​ណាស់​ចំពោះ​ការ​ខិតខំ​ប្រឹងប្រែង​របស់​កីឡាករ​ទាំងនោះ​កន្លងមក។

ការ​អះអាង​នេះ ធ្វើឡើង​បន្ទាប់ពី​គ្រូបង្វឹក​បាល់ទាត់​កម្ពុជា លោក Keisuke Honda ត្រូវ​បញ្ចប់​កុងត្រា​ដឹកនាំ​ក្រុម​បាល់ទាត់​កម្ពុជា​តាម​កិច្ចសន្យា​ត្រឹម​យប់​ថ្ងៃ​ពុធ ទី​១០ ឧសភា។

លោក Keisuke Honda បាន​មក​ធ្វើ​ជា​អ្នក​ចាត់ការ​ទូទៅ​ក្រុម​បាល់ទាត់​ជម្រើស​ជាតិ​កម្ពុជា​ជាមួយ​គ្រូ​បង្គោល គឺ​លោក Felix G. Dalmas ដែល​ជា​ជនជាតិ​អាហ្សង់ទីន ជា​ផ្លូវការ​កាលពី​ថ្ងៃទី​១២ ខែ​សីហា ឆ្នាំ​២០១៨ និង​បាន​បញ្ចប់​កិច្ចសន្យា​កាលពី​ខែ​សីហា ឆ្នាំ​២០២០ កន្លងទៅ​ផង​ដែរ។

ប៉ុន្តែ​នៅ​ថ្ងៃទី​២៤ ខែ​មីនា ឆ្នាំ​២០២១ សហព័ន្ធ​កីឡា​បាល់ទាត់​កម្ពុជា (FFC) បាន​ប្រកាស​ជា​ផ្លូវការ​ថា សហព័ន្ធ​កីឡា​បាល់ទាត់​កម្ពុជា និង​លោក Keisuke Honda រួម​ជាមួយ​នឹង​សហការី​របស់​លោក បាន​ព្រមព្រៀង​បន្ត​កុងត្រា​ថ្មី ដើម្បី​ឱ្យ​លោក​ដឹកនាំ​ក្រុម​ជម្រើស​ជាតិ​ទាំង​ឈុត​ធំ និង​ក្រុម​យុវជន​អាយុ​ក្រោម ២៣​ឆ្នាំ​ឆ្ពោះ​ទៅ​ស៊ីហ្គេម​លើក​ទី​៣២ ឆ្នាំ​២០២៣ ដែល​កម្ពុជា​ទទួល​ធ្វើ​ជា​ម្ចាស់​ផ្ទះ​បន្ត​ទៀត។

ក្រោយពី​ការ​បង្វឹក​របស់​លោក Keisuke Honda ដើម្បី​ត្រៀម​ប្រកួត​ក្នុង​ព្រឹត្តិការណ៍​ស៊ីហ្គេម​លើក​ទី​៣២ នេះ ក្នុង​ជំនួប​បញ្ចប់​ពូល A រវាង​ក្រុម​ជម្រើស​ជាតិ U22 កម្ពុជា និង​ក្រុម U22 ឥណ្ឌូនេស៊ី បាន​ក្លាយ​ជា​ការ​ប្រកួត​ចុងក្រោយ​របស់​ក្រុម​បាល់ទាត់​កម្ពុជា បន្ទាប់ពី​ក្រុម​គោព្រៃ​ជំទង់​កម្ពុជា​ចាញ់​ក្រុម U22 ឥណ្ឌូនេស៊ី ២ ទល់​នឹង ១ កាលពី​រាត្រី​ថ្ងៃទី​១០ ខែ​ឧសភា ឆ្នាំ​២០២៣។

ទាក់ទិន​នឹង​បញ្ហា​នេះ ការ​ប្រកួត​កីឡា​ស៊ីហ្គេម​លើក​ទី​៣១ នៅ​ប្រទេស​វៀតណាម ក្រុម​ឈុត​ស៊ីហ្គេម​កម្ពុជា​ធ្លាប់​បាន​ធ្លាក់​ត្រឹម​វគ្គ​សន្សំ​ពិន្ទុ​ក្នុង​ពូល A ផង​ដែរ ដែល​រួម​មាន​ម្ចាស់​ផ្ទះ​វៀតណាម ហ្វីលីពីន និង​ឥណ្ឌូនេស៊ី។

៤​ប្រកួត​របស់​ក្រុម​គោព្រៃ​កម្ពុជា ឈ្នះ​ឡាវ ៤ ទល់​នឹង ១ ប៉ុន្តែ​ត្រូវ​ចាញ់​សិង្ហបុរី ១ ទល់​នឹង ០ និង​បន្ត​ចាញ់​ថៃ ៥ ទល់​នឹង ០ រហូត​ដល់​ចុងក្រោយ បាន​ត្រឹម​ស្មើ​ជាមួយ​នឹង​ម៉ាឡេស៊ី ២ ទល់​នឹង ២ ប៉ុណ្ណោះ។

ក្រោយ​ចប់​ការ​ប្រកួត គេ​ឃើញ​មាន​វត្តមាន​ប្រធាន​សហព័ន្ធ​កីឡា​បាល់ទាត់​កម្ពុជា លោក សៅ សុខា ព្រមទាំង​ក្រុម​ការងារ គ្រូបង្វឹក និង​កីឡាករ​ទាំងអស់ បាន​ជួបជុំ និង​លា​គ្នា​ជាមួយ​លោក Keisuke Honda ចំពោះ​មុខ​អ្នកគាំទ្រ​ជាច្រើន​នៅ​ពហុកីឡដ្ឋាន​ជាតិ ខណៈ​បណ្ដា​ក្លឹប និង​អ្នកគាំទ្រ​ជាច្រើន​ក៏​បាន​អរគុណ​បុរស​ជនជាតិ​ជប៉ុន​រូប​នេះ​ផង​ដែរ ដែល​បាន​លះបង់ និង​ខំប្រឹង​ដឹកនាំ​អភិវឌ្ឍ​វិស័យ​កីឡា​បាល់ទាត់​កម្ពុជា​រយៈពេល ៥​ឆ្នាំ​មក​នេះ៕

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស