សាលាឧទ្ធរណ៍ក្រុងភ្នំពេញនឹងបើកសវនាការលើសំណុំរឿងថ្មីរបស់អនុប្រធានគណបក្សភ្លើងទៀន លោក ថាច់ សេដ្ឋា ដែលរងនូវការចោទប្រកាន់ពីបទ «ញុះញង់បង្កឱ្យមានភាពវឹកវរធ្ងន់ធ្ងរដល់សន្តិសុខសង្គម និងបទញុះញង់ឱ្យមានការរើសអើង» នៅថ្ងៃទី១៥ ខែឧសភា ឆ្នាំ២០២៣ នៅវេលាម៉ោង ២រសៀលជាកំហិត។
សាលាឧទ្ធរណ៍ក្រុងភ្នំពេញបានចេញលិខិតអញ្ជើញមេធាវីការពារក្តីលោក ថាច់ សេដ្ឋា គឺលោក ជូង ជូងី ឱ្យចូលមកក្នុងបន្ទប់សវនាការទី២ ដែលតុលាការនឹងធ្វើការពិភាក្សាដេញដោលលើសំណុំរឿងថ្មីរបស់លោក ថាច់ សេដ្ឋា ពីបទញុះញង់បង្កឱ្យមានភាពវឹកវរធ្ងន់ធ្ងរដល់សន្តិសុខសង្គម និងបទញុះញង់ឱ្យមានការរើសអើង ដែលបានប្រព្រឹត្តនៅប្រទេសកម្ពុជា និងទីកន្លែងផ្សេងទៀតតាមមាត្រា៤៩៤ និងមាត្រា៤៩៥ នៃក្រមព្រហ្មទណ្ឌ កាលពីអំឡុងខែមករា ឆ្នាំ២០២៣ កន្លងទៅនេះ។
សំណុំរឿងថ្មីនេះត្រូវតុលាការសាកសួរដេញដោលលោក ថាច់ សេដ្ឋា ម្តងរួចមកហើយកាលពីថ្ងៃទី១០ ខែឧសភា ឆ្នាំ២០២៣ បន្ទាប់ពីលោកត្រូវបានតុលាការកាត់ឱ្យចាញ់ក្តីសុំនៅក្រៅឃុំលើសំណុំរឿងចេញសែកស្អុយរបស់លោក កាលពីដើមខែឧសភា កន្លងទៅនេះ។
កាលពីចុងខែមេសា ឆ្នាំ២០២៣ តុលាការក្រុងភ្នំពេញបានចោទប្រកាន់អនុប្រធានគណបក្សភ្លើងទៀន លោក ថាច់ សេដ្ឋា នូវបទល្មើសចំនួនពីរបន្ថែមទៀត គឺបទ «ញុះញង់បង្កឱ្យមានភាពវឹកវរធ្ងន់ធ្ងរដល់សន្តិសុខសង្គម និងបទញុះញង់ឱ្យមានការរើសអើង» បន្ថែមពីលើសំណុំរឿងចាស់ដែលលោកត្រូវបានចោទប្រកាន់ពីបទចេញសែកស្អុយ និងត្រូវបានសមត្ថកិច្ចចាប់ឃុំខ្លួនកាលពីថ្ងៃទី១៦ ខែមករា ឆ្នាំ២០២៣ កន្លងទៅ។
ទាក់ទិននឹងបញ្ហានេះ កាលពីថ្ងៃទី១០ ខែឧសភា ឆ្នាំ២០២៣ ក្នុងសវនាការដែលតុលាការដេញដោលលើបទចោទថ្មីនេះ អនុប្រធានគណបក្សភ្លើងទៀន លោក ថាច់ សេដ្ឋា បានស្នើទៅតុលាការក្រុងភ្នំពេញឱ្យទម្លាក់បទចោទទាំងនេះ ដោយលោកអះអាងថា លោកមិនបានប្រព្រឹត្តដូចការចោទប្រកាន់នោះឡើយ។ ជាងនេះទៀត ក្រោយសវនាការកាលពីថ្ងៃទី១០ ខែឧសភា ឆ្នាំ២០២៣ ភរិយារបស់លោក ថាច់ សេដ្ឋា គឺអ្នកស្រី ថាច់ សុខបូរ៉ានី បានលើកឡើងថា អ្នកស្រីមិនអាចទទួលយកការចោទប្រកាន់បទចោទរបស់តុលាការលើប្ដីរបស់អ្នកស្រីបានទេ។
អ្នកស្រីអះអាងថា ប្ដីអ្នកស្រីជាអ្នកនយោបាយ ដូច្នេះអ្នកនយោបាយគឺនិយាយតែការពិតប៉ុណ្ណោះ តែមិននិយាយញុះញង់ដូចតុលាការចោទប្រកាន់ឡើយ។
ការចោទប្រកាន់ពីបទញុះញង់បង្កឱ្យមានភាពវឹកវរធ្ងន់ធ្ងរដល់សន្តិសុខសង្គម និងបទញុះញង់ឱ្យមានការរើសអើងនេះ ធ្វើឡើងជុំវិញការលើកឡើងរបស់លោក ថាច់ សេដ្ឋា អំឡុងពេលដែលលោកទៅបំពេញបេសកកម្មជួបអ្នកគាំទ្រនៅប្រទេសជប៉ុន កាលពីចុងឆ្នាំ២០២២ និងនៅប្រទេសកូរ៉េខាងត្បូង កាលពីដើមឆ្នាំ២០២៣ កន្លងទៅនេះ។
កាលពីអំឡុងខែមករា ឆ្នាំ២០២៣ លោក ថាច់ សេដ្ឋា ធ្លាប់បានលើកឡើងនៅមុខអ្នកគាំទ្ររបស់ខ្លួននៅប្រទេសកូរ៉េខាងត្បូង ថា ប្រទេសដែលដឹកនាំដដែលយូរឆ្នាំមិនបានធ្វើឱ្យជាតិរីកចម្រើនឡើយ។ ជាងនេះទៀត លោកក៏ទាមទារឱ្យមានការធ្វើច្បាប់កំណត់អាណត្តិនាយករដ្ឋមន្ត្រី និងកែទម្រង់ប្រព័ន្ធតុលាការកម្ពុជាផងដែរ។
គិតមកទល់នឹងថ្ងៃទី១២ ខែឧសភា ឆ្នាំ២០២៣ នេះ លោក ថាច់ សេដ្ឋា ត្រូវបានឃុំនៅពន្ធនាគារព្រៃស (ម១) អស់រយៈពេល ១១៦ថ្ងៃ ឬជាង ៤ខែហើយ ប៉ុន្តែប្រសិនបើតុលាការសម្រេចផ្ដន្ទាទោសលោកលើសំណុំរឿងថ្មីនេះ នោះអនុប្រធានគណបក្សភ្លើងទៀនរូបនេះនឹងត្រូវប្រឈមមុខជាប់ពន្ធនាគារពី ០៦ខែទៅ ២ឆ្នាំឯណោះ។
យ៉ាងណាក៏ដោយ ក្រោយពីចេញពីបន្ទប់សវនាការកាលពីថ្ងៃទី១០ ខែឧសភា ឆ្នាំ២០២៣ លោក ថាច់ សេដ្ឋា បានប្ដេជ្ញាថា លោកនៅតែបន្តឆន្ទៈជាមួយគណបក្សភ្លើងទៀនដដែល ទោះត្រូវស្ថិតក្នុងកាលៈទេសៈដូចពេលនេះក៏ដោយ៕