រដ្ឋមន្ត្រីក្រសួងមហាផ្ទៃ លោក ស ខេង បានធ្វើតេស្ដរកឃើញវិជ្ជមានជំងឺកូវីដ-១៩ នៅថ្ងៃសុក្រ ទី១២ ឧសភា នេះ ស្របពេលដែលកម្ពុជាកំពុងដំណើរការការប្រកួតកីឡាស៊ីហ្គេម ដែលត្រូវជំរុញឱ្យលោកត្រូវលុបចោលកម្មវិធីនានាដែលលោកត្រូវចូលរួមនៅពេលនេះទាំងអស់។
រដ្ឋមន្ត្រីក្រសួងមហាផ្ទៃ លោក ស ខេង សរសេរលើទំព័រហ្វេសប៊ុករបស់លោកនៅថ្ងៃទី១២ ឧសភា នេះថា បន្ទាប់ពីមានអាការៈសុខភាពខុសប្លែកពីធម្មតា លោកបានធ្វើតេស្ដរកឃើញថាមានវិជ្ជមានជំងឺកូវីដ-១៩។ បន្ទាប់ពីរកឃើញភ្លាម លោកក៏បានណែនាំឲ្យក្រុមគ្រួសារ និងអ្នកនៅជុំវិញខ្លួនរបស់លោកធ្វើតេស្ដ និងតាមដានសុខភាពដូចគ្នាដែរ។
លោក ស ខេង លើកឡើងថា នៅពេលនេះលោកបានអនុវត្តតាមវិធានសុខាភិបាលដោយដាក់ខ្លួននៅដាច់ដោយឡែក និងធ្វើលំហាត់ប្រាណ ប៉ុន្តែលោកនៅតែអាចបំពេញការងារពីបន្ទប់ដាច់ដោយឡែកក្នុងគេហដ្ឋានរបស់លោកដូចធម្មតាដដែល។ យ៉ាងណាក៏ដោយ លោកនឹងត្រូវផ្អាកចូលរួមក្នុងកម្មវិធីការងារនានាមួយរយៈពេលខ្លីផងដែរ។
ការប្រកាសពីឆ្លងជំងឺកូវីដ-១៩ នេះ ធ្វើឡើងស្របពេលប្រទេសកម្ពុជាកំពុងដំណើរការប្រកួតកីឡាស៊ីហ្គេម និងបន្ទាប់ពីលោកនាយករដ្ឋមន្ត្រី ហ៊ុន សែន បានប្រកាសបន្ធូរបន្ថយការអនុវត្តវិធានការសុខាភិបាលខ្លះនៅមុនព្រឹត្តិការណ៍ស៊ីហ្គេមនៅពេលនេះ។
អ្នកវិភាគឯករាជ្យ និងជាប្រធានវេទិកាពលរដ្ឋ លោក គឹម សុខ ប្រាប់សារព័ត៌មាន The Cambodia Daily នៅថ្ងៃទី១២ ឧសភា នេះថា ការប្រកាសឆ្លងជំងឺកូវីដ-១៩ របស់លោក ស ខេង ពិតធ្វើឡើងក្នុងស្ថានភាពដ៏ចម្លែកជាទីបំផុត ដែលទំនងជាលោក ស ខេង មានទិសដៅនយោបាយផ្សេងលើសពីការឆ្លងជំងឺកូវីដ-១៩។
លោកបន្ថែមថា ក្នុងអំឡុងពេលដែលកម្ពុជាកំពុងរៀបចំស៊ីហ្គេមនៅពេលនេះ បើទោះបីជាលោក ស ខេង ឆ្លងជំងឺកូវីដតែម្នាក់ឯងក៏ដោយ ក៏គេត្រូវលាក់ព័ត៌មាននេះដែរ ហើយខំព្យាបាលឲ្យជាសះស្បើយ ដើម្បីកុំឲ្យមានការភ័យខ្លាច ឬការព្រួយបារម្ភណាមួយកើតឡើងអំឡុងពេលស៊ីហ្គេមនេះ ប៉ុន្តែលោក ស ខេង បែរជាប្រកាសជាចំហទៅវិញ។
លោក គឹម សុខ លើកឡើងថា ការប្រកាសឆ្លងជំងឺកូវីដនេះ គឺជារឿងដែលពិបាកជឿជាទីបំផុត ព្រោះក្នុងរយៈពេលថ្មីៗនេះ មុននឹងគាត់ប្រកាសថាឆ្លងកូវីដ-១៩ គាត់បានជួបមន្ត្រីរដ្ឋាភិបាលជាច្រើន រួមទាំងលោក ហ៊ុន សែន ផង ប៉ុន្តែបែរជាប្រកាសឆ្លងកូវីដ-១៩ តែលោក ស ខេង ម្នាក់ឯងទៅវិញ។
អ្នកវិភាគរូបនេះបញ្ជាក់ថា ការប្រកាសរបស់លោក ស ខេង បែបនេះ អាចជាចេតនារបស់គាត់ប្រឆាំងនឹងលោក ហ៊ុន សែន ដែលបានក្រសោបក្តោបក្តាប់យកមុខមាត់តែម្នាក់ឯងក្នុងព្រឹត្តិការណ៍ស៊ីហ្គេមនៅពេលនេះ ដែលជាចេតនារុញទូកបណ្តោយទឹកមិនចូលរួមធ្វើអ្វីទាំងអស់ ស្របពេលដែលព្រឹត្តិការណ៍ស៊ីហ្គេមនឹងត្រូវប្រកាសបិទបញ្ចប់នៅយប់ថ្ងៃទី១៧ ខែឧសភា ខាងមុខនេះ។
លោកគូសបញ្ជាក់ថា អំឡុងពេលស៊ីហ្គេមនេះ ត្រូវគេមើលឃើញថាមានតែលោក ហ៊ុន សែន រួមទាំងប្រពន្ធ និងកូនៗរបស់គាត់ប៉ុណ្ណោះដែលលេចមុខក្នុងព្រឹត្តិការណ៍ដ៏ធំនេះ។
កាលពីថ្ងៃទី១៩ ខែមេសា ឆ្នាំ២០២៣ ប្រមុខរាជរដ្ឋាភិបាលកម្ពុជា លោក ហ៊ុន សែន បានប្រកាសលើកលែងកាតព្វកិច្ចពាក់ម៉ាស់ និងការធ្វើតេស្ដរហ័សរកមេរោគកូវីដ-១៩ សម្រាប់ការជួបជុំគ្រប់ប្រភេទទាំងអស់នៅទូទាំងប្រទេស ជាពិសេសការចូលរួមទស្សនាព្រឹត្តិការណ៍ស៊ីហ្គេមនាពេលខាងមុខនេះ ក៏មិនតម្រូវឱ្យពាក់ម៉ាស់ និងធ្វើតេស្ដរកជំងឺកូវីដ-១៩ ដែរ។
មេដឹកនាំបក្សកាន់អំណាច លោក ហ៊ុន សែន បញ្ជាក់ថា អ្នកដែលត្រូវចូលរួមក្នុងពិធីណាមួយ មិនតម្រូវឱ្យពាក់ម៉ាស់ទៀតទេ ប៉ុន្តែបុគ្គលម្នាក់ៗអាចពាក់ម៉ាស់តាមភាពចាំបាច់របស់ខ្លួន។ ជាងនេះទៀត ក៏មិនតម្រូវឱ្យធ្វើតេស្ដរហ័សណាមួយទៀតដែរសម្រាប់ការជួបជុំនានា ប៉ុន្តែបុគ្គលម្នាក់ៗអាចធ្វើតេស្ដដោយខ្លួនឯងបាន បើមានលក្ខណៈសង្ស័យណាមួយនោះ។
ទាក់ទិននឹងការឆ្លងជំងឺកូវីដ-១៩ ចាប់តាំងពីដើមខែមករា ឆ្នាំ២០២៣ មក ក្រសួងសុខាភិបាលបានរកឃើញអ្នកឆ្លងជំងឺកូវីដ-១៩តិចតួចបំផុត ទាំងការឆ្លងក្នុងប្រទេស និងការចម្លងមកពីក្រៅប្រទេស ក្នុងនោះថ្ងៃខ្លះរកឃើញត្រឹមតែ ១ករណីទៅ ២ករណីប៉ុណ្ណោះ ប៉ុន្តែភាគច្រើនគឺមិនមានអ្នកឆ្លងថ្មីនោះទេ។
គេហទំព័រតាមដានការរីករាលដាលជំងឺកូវីដ-១៩ លើពិភពលោក WORLDOMETER ចេញរបាយការណ៍របស់ខ្លួនកាលពីថ្ងៃទី១២ ខែឧសភា ឆ្នាំ២០២៣ នេះថា កម្ពុជាមានអ្នកឆ្លងជំងឺកូវីដ-១៩ សរុបជាង ១សែន ៣ម៉ឺននាក់ និងអ្នកស្លាប់ចំនួនជាង ៣ពាន់នាក់ ចំណែកអ្នកដែលជាសះស្បើយឡើងវិញមានចំនួនជាង ១សែន ៣ម៉ឺន ៥ពាន់នាក់ផងដែរ៕