កម្លាំងសមត្ថកិច្ចចម្រុះខេត្តព្រះវិហារ អះអាងថារឹបអូសបានឈើបានជិត ១០ម៉ែត្រគូបកាលពីថ្ងៃព្រហស្បតិ៍ ទី១១ ឧសភា នៅក្នុងទីតាំងផ្ទុកឈើខុសច្បាប់ចំនួន២ ស្ថិតក្នុងចំណុចណាំសាម ក្នុងភូមិខាំកឺត ឃុំកំពង់ស្រឡៅមួយ ស្រុកឆែប ខេត្តព្រះវិហារ បន្ទាប់ពីពលរដ្ឋរកស៊ីដងជ័រទឹករាយការណ៍ទៅសមត្ថកិច្ច និងឈើខុសច្បាប់ជាច្រើនត្រូវឈ្មួញរកស៊ីឈើខុសច្បាប់កំពុងដឹកចេញតាមរថយន្តដឹកដំឡូងប្រមាណជា ៥គ្រឿងក្នុងមួយសប្តាហ៍។
កម្លាំងសមត្ថកិច្ចចម្រុះខេត្តព្រះវិហារ បានចុះបង្ក្រាបទីតាំងផ្ទុកឈើខុសច្បាប់ចំនួន ២ទីតាំងស្ថិតក្នុងចំណុចណាំសាម ក្នុងភូមិខាំកឺត ឃុំកំពង់ស្រឡៅមួយ ស្រុកឆែប ខេត្តព្រះវិហារ មានចំនួន ៧ម៉ែត្រគូប ដែលគរទុកក្រោយប៉ុស្តិ៍នគរបាលការពារព្រំដែនគោកណាំសាម ប្រហែល ១០០ម៉ែត្រ បន្ទាប់មកកម្លាំងចម្រុះដើរល្បាតដល់ចំណុចព្រីងចាស់ ក៏បានប្រទះឃើញឈើប្រភេទផ្ចឹកចំនួន ២,៤ម៉ែត្រគូបបន្ថែមទៀត។
ប្រភពដដែលបញ្ជាក់ថា បច្ចុប្បន្នឈើខុសច្បាប់ទាំងពីរទីតាំងនោះ ត្រូវបានកម្លាំងសមត្ថកិច្ចចម្រុះដឹកយកទៅរក្សាទុកនៅស្នាក់ការអូកាប៉ុក និងស្នាក់ការភ្នំសង្កែ ជាបណ្ដោះអាសន្ន ប៉ុន្តែលោកមេប៉ុស្តិ៍ណាំសាម បានអះអាងថា ឈើដែលកម្លាំងចម្រុះបានរឹបអូសយកទាំងនេះ គឺជាឈើដែលត្រូវរក្សាទុកដើម្បីធ្វើផ្ទះជូនកងកម្លាំងដែលឈរជើងនៅតំបន់នោះប៉ុណ្ណោះ មិនមែនជាឈើខុសច្បាប់សម្រាប់ធ្វើអាជីវកម្មនោះឡើយ។
កាលពីថ្ងៃទី២៦ ខែមេសា ឆ្នាំ២០២៣ ប្រធានគណៈកម្មការជាតិទប់ស្កាត់ និងបង្ក្រាបបទល្មើសធនធានធម្មជាតិ លោក សៅ សុខា បានចោទថា បទល្មើសព្រៃឈើដែលតែងតែកើតមាននៅកម្ពុជាទប់ស្កាត់មិនបាន គឺដោយសារតែមន្ត្រីមូលដ្ឋានជាអ្នកបើកដៃឱ្យឈ្មួញពីខាងក្រៅតែប៉ុណ្ណោះ។
លោក សៅ សុខា អះអាងថា មន្ត្រីជំនាញតែងផ្ដេកផ្ដួលចំពោះបញ្ហានេះ ព្រោះថាឈើដឹកតែលើផ្លូវ មិនដែលដឹកខុសពីលើផ្លូវទេ ហើយស្នាក់ការរដ្ឋបាលព្រៃឈើក៏នៅលើផ្លូវ ស្នាក់ការបរិស្ថានក៏នៅលើផ្លូវដែរ ដូច្នេះបើមន្ត្រីទាំងនោះមិនផ្សំគំនិតគ្នាទេ បទល្មើសព្រៃឈើក៏មិនកើតឡើងដែរ។ លោកសង្កត់ធ្ងន់ថា បើនៅតែបែបនេះទៀត ប្រទេសកម្ពុជានឹងរលាយហិនហោចជាមិនខាន។
យ៉ាងណាក៏ដោយ កាលពីថ្ងៃទី០៤ ខែកញ្ញា ឆ្នាំ២០២២ អ្នកនាំពាក្យក្រសួងបរិស្ថាន លោក នេត្រ ភក្ត្រា បានរិះគន់ថា ការចោទប្រកាន់ថាព្រៃឈើនៅកម្ពុជាកំពុងបន្តរងនូវការកាប់បំផ្លាញ គឺជាចេតនាបង្កប់សារនយោបាយ និងជាយុទ្ធនាការមួយដែលប្រឆាំងនឹងកម្ពុជា ដើម្បីបំភ្លៃ បំផ្លើស និងបំប៉ោងរបស់ក្រុមអ្នកស្រឡាញ់ព្រៃឈើតែសម្បកក្រៅប៉ុណ្ណោះ។
បែបនេះក្តី បន្ទាប់ពីមានបទបញ្ជារបស់លោក សៅ សុខា កម្លាំងអាវុធហត្ថកម្ពុជាបានរឹបអូសឈើជាង ៣០០ម៉ែត្រគូបកាលពីថ្ងៃទី២៧ ខែមេសា ឆ្នាំ២០២៣ ដែលប្រតិបត្តិការនេះធ្វើឡើងក្នុងខេត្តចំនួន៤ រួមមានខេត្តក្រចេះ ស្ទឹងត្រែង កំពង់ធំ និងខេត្តព្រះវិហារ ដែលសុទ្ធសឹងតែជាខេត្តស្ថិតក្នុងតំបន់អភិរក្សសត្វព្រៃព្រៃឡង់ទាំងអស់។
អង្គការឃ្លាំមើលព្រៃឈើពិភពលោក បានចេញរបាយការណ៍របស់ខ្លួនកាលពីអំឡុងឆ្នាំ២០២១ ស្ដីពីឧក្រិដ្ឋកម្មព្រៃឈើនៅកម្ពុជាថា ការវិនាសព្រៃឈើខ្មែរក្នុងដែនជម្រកសត្វព្រៃព្រៃឡង់របស់កម្ពុជាសព្វថ្ងៃនេះ គឺបង្កឡើងដោយក្រុមហ៊ុនមួយចំនួនដែលរកស៊ីកាប់ឈើខុសច្បាប់បច្ចុប្បន្ននេះ ដូចជាក្រុមហ៊ុន Think Biotech ក្រុមហ៊ុន Angkor Plywood ក្រុមហ៊ុន Sam Oeun Sovann ក្រុមហ៊ុន PNT និងក្រុមហ៊ុន Thy Ngan Development ជាដើម។
យ៉ាងណាក៏ដោយ ក្រុមហ៊ុនទាំងអស់ខាងលើនេះត្រូវគេរកឃើញថាមានការជាប់ពាក់ព័ន្ធជាមួយក្រុមហ៊ុន TSMW របស់ឧកញ៉ា ម៉ឹក សុផាន់ណារ៉េត ហៅឧកញ៉ា ជ័យ យ៉ាងខ្លាំង ខណៈឧកញ៉ា ម៉ឹក សុផាន់ណារ៉េត ហៅឧកញ៉ា ជ័យ ត្រូវគេដឹងថាជាអ្នករកស៊ីឈើខុសច្បាប់ប្រមូលលុយឱ្យក្រុមគ្រួសារលោក ហ៊ុន សែន ក្នុងពេលបច្ចុប្បន្ននេះផងដែរ។
ទាក់ទិននឹងបញ្ហានេះ កាលពីថ្ងៃទី២៨ ខែមករា ឆ្នាំ២០២២ អង្គការលើកលែងទោសអន្តរជាតិ (Amnesty International) បានចេញរបាយការណ៍មួយដោយបង្ហាញថា ព្រៃឈើចំនួនជាង ៦ពាន់ហិកតារ (៦២៧១ហិកតារ) ស្ថិតក្នុងដែនជម្រកសត្វព្រៃចំនួនពីរស្ថិតក្នុងខេត្តព្រះវិហារ គឺដែនជម្រកសត្វព្រៃព្រៃឡង់ និងដែនជម្រកសត្វព្រៃព្រះរការ ត្រូវបានកាប់បំផ្លាញយ៉ាងច្រើនសន្ធឹកសន្ធាប់ដែលកើតចេញពីការរកស៊ីឈើខុសច្បាប់សព្វថ្ងៃនេះ៕