យុទ្ធនាការឃោសនាបោះឆ្នោតនៅក្នុងរាជាណាចក្រថៃ បិទបញ្ចប់នៅថ្ងៃទី១២ ខែឧសភា នេះ ខណៈការបោះឆ្នោតធ្វើឡើងនៅថ្ងៃអាទិត្យ ទី១៤ ឧសភា។
នេះជាការបោះឆ្នោតសភាអាណត្តិថ្មីទី២ បន្ទាប់ពីរាជាណាចក្រមួយនេះបានបោះឆ្នោតដំបូងកាលពីខែមីនា ឆ្នាំ២០១៩ ក្រោយពីពួកយោធាធ្វើរដ្ឋប្រហារនៅខែឧសភា ឆ្នាំ២០១៤ ដែលជារដ្ឋប្រហាររំលាយគណៈរដ្ឋមន្ត្រីរបស់គណបក្សភឿថៃ។ មានការព្យាករថា បក្សដែលអាចឈ្នះឆ្នោតលើសលប់ គឺបក្សប្រឆាំងធំពីរដែលចងសម្ព័ន្ធភាពនឹងគ្នា គឺបក្សភឿថៃ និងបក្សចលនាឆ្ពោះទៅមុខ។
ក្នុងស្ថានភាពដែលពលរដ្ឋ ជាពិសេសយុវជនថៃត្រៀមខ្លួនដើម្បីចេញទៅបោះឆ្នោតបញ្ចប់ការដឹកនាំរបស់ពួកយោធា នៅថ្ងៃនេះអគ្គមេបញ្ជាការកងទ័ពជើងគោកថៃ ដែលជាស្ថាប័នសន្តិសុខជាតិដ៏មានឥទ្ធិពលនៅក្នុងរាជាណាចក្រនេះបានសន្យាថា ទោះកាលៈទេសៈណាក៏ដោយ លោកមិនដឹកនាំកងទ័ពធ្វើរដ្ឋប្រហារឡើយ។ នេះបើតាមទីភ្នាក់ងារព័ត៌មាន AFP ចុះផ្សាយនៅថ្ងៃសុក្រ ទី១២ ខែឧសភា នេះ។
ប្រមុខកងទ័ពជើងគោកថៃរូបនេះ គឺឧត្តមសេនីយ៍ Narongpan Jitkaewthae។ ការសន្យារបស់កំពូលមេទ័ពថៃ បានធ្វើឡើងខណៈយុទ្ធនាការឃោសនាសម្រាប់ថ្ងៃចុងក្រោយបិទបញ្ចប់នៅថ្ងៃទី១២ ឧសភា នេះ ហើយការបោះឆ្នោតនាថ្ងៃអាទិត្យចុងសប្តាហ៍នេះចាប់ផ្ដើមពីម៉ោង ៧ព្រឹក។ អ្នកសង្កេតការណ៍មើលឃើញថា រដ្ឋាភិបាលបច្ចុប្បន្នរបស់ពួកយោធា នឹងត្រូវបានបោះឆ្នោតទម្លាក់ចេញពីអំណាច។
រដ្ឋាភិបាលរបស់នាយករដ្ឋមន្ត្រី ប្រាយុទ្ធ ចាន់អូចា ដែលជាអតីតអគ្គមេបញ្ជាការកងទ័ពជើងគោកថៃ ហើយជាមេដឹកនាំរដ្ឋប្រហារឆ្នាំ២០១៤ ត្រូវគេរំពឹងថាអាចនឹងបរាជ័យក្នុងការបោះឆ្នោត ជាហេតុនាំឱ្យមានការព្រួយបារម្ភថា យោធាថៃប្រហែលនឹងព្យាយាមនៅបន្តក្រាញអំណាច។
ឆ្លើយតបនឹងសំណួររបស់អ្នកសារព័ត៌មាន លោកឧត្តមសេនីយ៍ Narongpan បានឆ្លើយថានឹងមិនមានការវិលត្រឡប់ទៅរកការដឹកនាំដោយយោធាទៀតឡើយ។ លោកទទួលស្គាល់ថា រដ្ឋប្រហារយោធាដែលបានកើតឡើងកន្លងមក បានធ្វើឱ្យមានការប៉ះពាល់ជាខ្លាំងដល់សង្គមថៃទាំងមូល។
ការបោះឆ្នោតសភាអាណត្តិថ្មីនាថ្ងៃអាទិត្យសប្តាហ៍នេះ ជាការប្រកួតប្រជែងគ្នាជាចម្បងរវាងក្រុមប៉ូលនយោបាយនៃកម្លាំងអ្នកប្រជាធិបតេយ្យដឹកនាំដោយគណបក្សភឿថៃ ដែលមានអ្នកស្រី ភែថងថាន ស៊ីណាវ៉ាត្រា ជាបេក្ខភាពនាយករដ្ឋមន្ត្រីដ៏មានប្រជាប្រិយភាព ហើយនិងក្រុមបក្សគាំទ្រដោយយោធាដឹកនាំដោយលោក ប្រាយុទ្ធ។
អ្នកស្រី ភែថងថាន គឺជាកូនស្រីអាយុ ៣៦ឆ្នាំរបស់អតីតនាយករដ្ឋមន្ត្រីថៃ លោក ថាក់ស៊ីន ស៊ីណាវ៉ាត្រា។
ស្របពេលដែលបក្សភឿថៃ និងបក្សចលនាឆ្ពោះទៅមុខ ទទួលបានសំឡេងគាំទ្រខ្ពស់រហូតមកក្នុងការស្ទង់មតិជាបន្តបន្ទាប់ បាននាំឱ្យមានការបារម្ភពីការបះបោរអាចកើតចេញពីក្រុមជ្រុលនិយមថៃ ដែលគាំទ្រពួកយោធា។ អគ្គមេបញ្ជាការកងទ័ពជើងគោកថៃ ឧត្តមសេនីយ៍ Narongpan បានសន្យាថាគ្មានទេរដ្ឋប្រហារ។ លោកក៏បានអះអាងថា កងទ័ពក៏មិនត្រូវពាក់ព័ន្ធនយោបាយដែរ។
ចាប់តាំងពីប្រទេសនេះបញ្ចប់របបរាជាសក្ដិភូមិនៅឆ្នាំ១៩៣២ រាជាណាចក្រថៃ បានជួបនឹងរដ្ឋប្រហារ ២០លើកមកហើយ។ រដ្ឋប្រហាររបស់ពួកយោធាបាននាំទៅរកការបញ្ចប់រដ្ឋាភិបាលប្រជាធិបតេយ្យ។ រដ្ឋប្រហារចុងក្រោយនេះ គឺជាការបិទបញ្ចប់អំណាចរបស់ត្រកូល ថាក់ស៊ីន។
នៅខែកញ្ញា ឆ្នាំ២០០៦ ជារដ្ឋប្រហារទម្លាក់លោក ថាក់ស៊ីន ពីនាយករដ្ឋមន្ត្រី ដែលខណៈនោះលោក ថាក់ស៊ីន កំពុងស្ថិតក្នុងសាលប្រជុំនៃមហាសន្និបាតអង្គការសហប្រជាជាតិ។
នៅខែឧសភា ឆ្នាំ២០១៤ ជារដ្ឋប្រហារទម្លាក់គណៈរដ្ឋមន្ត្រីរបស់គណបក្សភឿថៃ ដែលអ្នកស្រី យីងឡាក់ ស៊ីណាវ៉ាត្រា ជាប្អូនបង្កើតលោក ថាក់ស៊ីន ត្រូវជាម្តាយមីងរបស់អ្នកស្រី ភែថងថាន ដឹកនាំបក្សនេះ។ រដ្ឋប្រហារឆ្នាំ២០១៤ ដឹកនាំដោយលោក ប្រាយុទ្ធ ខណៈលោក ប្រាយុទ្ធ ជាអគ្គមេបញ្ជាការកងទ័ពជើងគោកថៃ។
យោងតាមរដ្ឋធម្មនុញ្ញថៃ ឆ្នាំ២០១៧ នាយករដ្ឋមន្ត្រីថៃ ត្រូវជ្រើសរើសដោយសមាជិកទាំង ៥០០នាក់នៅក្នុងរដ្ឋសភា ព្រមទាំងសមាជិកព្រឹទ្ធសភា ២៥០រូប ខណៈសមាជិកព្រឹទ្ធសភាទាំងនោះត្រូវបានកើតចេញពីការបង្កើតឡើងដោយអតីតមេរដ្ឋប្រហារ គឺលោក ប្រាយុទ្ធ។ បើស្ថានការណ៍បោះឆ្នោតត្រូវបក្សយោធាដណ្ដើមអាសនៈច្រើនលំដាប់ទី២ ឬទី២ នាយករដ្ឋមន្ត្រីថ្មីអាចត្រូវបានទៅលើក្រុមបក្សរបស់ពួកយោធា។
ដូច្នេះហើយទើបគណបក្សភឿថៃ កំពុងប្រឹងប្រែងអំពាវនាវឱ្យក្រុមគាំទ្រផ្តល់ជ័យជម្នះភ្លូកទឹកភ្លូកដី ដើម្បីកុំឱ្យយោធាអាចនៅរក្សាអំណាចបានតទៅទៀត។
ការបោះឆ្នោតឆ្នាំ២០១៩ លោក ប្រាយុទ្ធ បានក្លាយជានាយករដ្ឋមន្ត្រីដោយសារតែការគាំទ្ររបស់ព្រឹទ្ធសភា ខណៈបក្សបាល័ង្គប្រាចារ៉ាត របស់លោកបានឈ្នះឆ្នោតលំដាប់ទី២ នៅក្នុងសភាបាន ៩៧អាសនៈ ហើយបក្សភឿថៃ បានឈ្នះឆ្នោតលំដាប់ទី១ បាន ១៣៦អាសនៈ ខណៈបក្សឆ្ពោះទៅមុខជាបក្សសម្ព័ន្ធភាពនឹងបក្សភឿថៃ បាន ៨០អាសនៈ។
អ្នកស្រី ភែថងថាន ស៊ីណាវ៉ាត្រា ក្រោយពីសម្រាលបុត្ររួច អ្នកស្រីឆ្លៀតបញ្ចេញជំហរថា គណបក្សសម្ព័ន្ធភាពនៃកម្លាំងអ្នកប្រជាធិបតេយ្យ មិនសម្រេចយកបក្សរបស់ពួកយោធាក្នុងរដ្ឋាភិបាលចម្រុះនោះទេ។ អ្នកស្រីថាគេមិនត្រូវកៀកស្មានឹងពួកយោធាផ្ដាច់ការនោះទេ។
បើយោងតាមសារព័ត៌មាន Bangkok Post នាយករដ្ឋមន្ត្រីថៃ លោក ប្រាយុទ្ធ ចាន់អូចា បានសន្យាថា លោកនឹងលាឈប់ពីឆាកនយោបាយភ្លាម ប្រសិនបើគណបក្សរួមរួបជាតិដែលទើបបង្កើតថ្មីរបស់លោកបរាជ័យមិនទទួលបានអាសនៈច្រើនក្នុងការបោះឆ្នោតនាថ្ងៃអាទិត្យ ទី១៤ ឧសភា នេះ។
ដោយឡែកប្រភពព័ត៌មានថៃមួយចំនួនបានចុះផ្សាយនូវការយល់ឃើញរបស់ពលរដ្ឋថៃ ដែលថារាជាណាចក្រនេះអាចមានរដ្ឋប្រហារជាថ្មីដែលអាចប៉ះពាល់ដល់លទ្ធិប្រជាធិបតេយ្យនៅក្នុងប្រទេសមួយនៅតំបន់អាស៊ីអាគ្នេយ៍នេះ៕