បក្សប្រឆាំងធំពីរនៅថៃ សន្យារួមគ្នាផ្ដួលបក្សរបស់ពួកយោធាក្នុងថ្ងៃបោះឆ្នោតសភា កាលពីថ្ងៃអាទិត្យ ទី១៤ ឧសភា នោះ កំពុងក្លាយជាការពិតហើយ។
កាលពីថ្ងៃអាទិត្យ ប្រជាជនថៃ ប្រមាណជា ៨០% នៃចំនួន ៥២លាននាក់ដែលមានឈ្មោះក្នុងបញ្ជីបោះឆ្នោត បានទៅកាន់ការិយាល័យបោះឆ្នោត។ ការបោះឆ្នោតរបស់ប្រជាជននៃរាជាណាចក្រចាស់វស្សាមួយនៅអាស៊ីអាគ្នេយ៍នេះ បានធ្វើឱ្យមានការភ្ញាក់ផ្អើលខ្លាំងដល់អ្នកសង្កេតការណ៍ និងអ្នកនយោបាយក្នុងតំបន់។ ការភ្ញាក់ផ្អើលនោះដោយសារតែបក្សប្រឆាំងទើបបង្កើតឡើងជាបក្សនៃក្រុមយុវជន បានកំពុងដណ្ដើមអាសនៈបានច្រើនជាងគេ។
គណបក្សនេះមានឈ្មោះថា ចលនាឆ្ពោះទៅមុខ ដែលមានអ្នកជំនួញវ័យក្មេងម្នាក់ដឹកនាំ គឺលោក ភិថា លិមចារឿនរ៉ាត់។ បក្សប្រឆាំងចាស់វស្សាមួយទៀតដ៏មានប្រជាប្រិយ គឺគណបក្សភឿថៃ ជាបក្សកេរ្តិ៍តំណែងរបស់អតីតនាយករដ្ឋមន្ត្រី ថាក់ស៊ីន ស៊ីណាវ៉ាត្រា កំពុងស្ថិតវិថីជ័យជម្នះលំដាប់ទី២។
មេដឹកនាំគណបក្សចលនាឆ្ពោះទៅមុខ លោក ភិថា លិមចារឿនរ៉ាត់ បានថ្លែងឱ្យដឹងថា គណបក្សរបស់លោកនឹងបង្កើតរដ្ឋាភិបាលចម្រុះមួយជាមួយគណបក្សភឿថៃ រួមនឹងគណបក្សប្រឆាំងដទៃទៀត តែសន្យាថានឹងមិនចូលរួមជាមួយគណបក្សរបស់យោធានោះទេ។
បន្ទាប់ពីការប្រកាសលទ្ធផលបោះឆ្នោតបណ្ដោះអាសន្នកាលពីយប់ថ្ងៃអាទិត្យ ទី១៤ ខែឧសភា លោក ភិថា លិមចារឿនរ៉ាត់ បានបញ្ជាក់ថា គណបក្សចលនាឆ្ពោះទៅមុខ និងគណបក្សភឿថៃ អាចនឹងប្រមូលបានអាសនៈគ្រប់គ្រាន់នៅក្នុងរដ្ឋសភា ដើម្បីបង្កើតរដ្ឋាភិបាលដែលលោកថានេះជាសញ្ញាវិជ្ជមាន និងជាពេលដែលពលរដ្ឋថៃ ត្រូវការផ្លាស់ប្ដូរប្រព័ន្ធដឹកនាំរបស់ពួកយោធា។
គណបក្សចលនាឆ្ពោះទៅមុខ ទទួលបានអាសនៈនៅក្នុងរដ្ឋសភាចំនួន ១៥១អាសនៈ។ ចំណែកបក្សភឿថៃ បាន ១៤១អាសនៈ ហើយគណបក្សប៉ាល្ល័ងប្រាចារ៉ារ៉ាត់ របស់ពួកយោធាបាន ៤១អាសនៈ និងគណបក្សថៃរួបរួមជាតិដឹកនាំលោក ប្រាយុទ្ធ ចាន់អូចា បាន ៣៦អាសនៈតែប៉ុណ្ណោះ។ ចំណែកឯគណបក្សភូមិចៃថៃ ទទួលបាន ៧១អាសនៈ។
ការផ្ដួលពួកយោធាបាននៅពេលនេះ គឺជាឆន្ទៈរបស់ប្រជាជនថៃ ដែលសម្រុកទៅបោះឆ្នោត។ តាមលទ្ធផលនេះ គឺប្រជាជនថៃ យុវជនថៃ បានផ្ដួលលោក ប្រាយុទ្ធ អតីតមេរដ្ឋប្រហារបានហើយ។
ទោះជាបែបនេះក្ដី លទ្ធផលបោះឆ្នោតនេះមិនទាន់អាចសម្រេចបានថាតើនរណានឹងក្លាយជានាយករដ្ឋមន្ត្រី ហើយបក្សណាអាចនឹងបង្កើតរដ្ឋាភិបាលបាននៅឡើយទេ ពីព្រោះការតែងតាំងនាយករដ្ឋមន្ត្រី ឬការបង្កើតរដ្ឋាភិបាលត្រូវធ្វើឡើងតាមរយៈការបោះឆ្នោតអនុម័តដោយរដ្ឋសភា និងព្រឹទ្ធសភា ដែលអាចនឹងប្រព្រឹត្តទៅនៅខែកក្កដា ខាងមុខ។
ក្រុមអ្នកសង្កេតការណ៍លើកឡើងថា ឧបសគ្គរបស់គណបក្សប្រឆាំងនៅមានចំពោះមុខ ព្រោះសមាជិក ២៥០នៃស្ថាប័នព្រឹទ្ធសភាដែលភាគច្រើនលម្អៀងទៅរកពួកយោធា អាចជារនាំងរាំងខ្ទប់បក្សប្រឆាំងធំពីរក្នុងការរកសំឡេងភាគច្រើន ៣ភាគ៤ នៅក្នុងការបោះឆ្នោតរួមពីសមាជិកសភា និងព្រឹទ្ធសភា។
ដើម្បីមានប្រៀបខ្លាំង បក្សប្រឆាំងទាំងពីរនេះត្រូវរកដៃគូក្រុមចម្រុះពីគណបក្សអតីតសម្ព័ន្ធភាពរបស់ពួកយោធា ដូចជាបក្សភូមិចៃថៃ និងបក្សប្រជាធិបតេយ្យដែលបាន ២៥អាសនៈ ដើម្បីយកមកបំពេញភាពរឹងមាំរបស់ខ្លួន។ ចំណែកឯគណបក្សគាំទ្រដោយយោធាក៏ត្រូវរកដៃគូបង្កើតក្រុមចម្រុះដូចគ្នាដែរ។ តែលើកនេះ មើលទៅពួកយោធាមានសំណាងតិចណាស់ ព្រោះក្នុងអាណត្តិរដ្ឋាភិបាលចម្រុះដែលដឹកនាំដោយលោក ប្រាយុទ្ធ ដោយសារតែមានការបែកបាក់គ្នាទៅហើយ ជាពិសេសបក្សភូមិចៃថៃ និងបក្សប្រជាធិបតេយ្យ សឹងតែដើរចេញពីរដ្ឋាភិបាលនេះក្នុងពេលផ្ទុះភាពតានតឹង។
ការបោះឆ្នោតនៅថ្ងៃអាទិត្យ ទី១៤ ឧសភា នៅក្នុងរាជាណាចក្រថៃ គឺជាការប្រកួតប្រជែងយ៉ាងពិតប្រាកដរវាងប៉ូលនយោបាយដែលមាននិន្នាការប្រជាធិបតេយ្យ និងប៉ូលនយោបាយមាននិន្នាការបែបផ្ដាច់ការ។ តាមរយៈលទ្ធផលនៃការបោះឆ្នោតនេះឃើញថា កម្លាំងអ្នកប្រជាធិបតេយ្យនៅថៃមានសន្ទុះខ្លាំងក្លាដែលអាចផ្ដួលពួកយោធាបាន។
តាមរយៈលទ្ធផលដដែលនេះបង្ហាញថា និន្នាការរាជានិយមរបស់ថៃ មានការធ្លាក់ចុះខ្លាំង ស្របពេលដែលគណបក្សប្រជាធិបតេយ្យជាបក្សមាននិន្នាការទៅរករាជានិយមកន្លងមក បានធ្លាក់ចុះការគាំទ្រយ៉ាងខ្លាំង ដែលបក្សនេះសឹងរកសន្លឹកឆ្នោតរាប់មិនបានទៅហើយនោះ។
គណបក្សចលនាឆ្ពោះទៅមុខដែលដណ្ដើមបានអាសនៈច្រើនជាងគេនៅពេលនេះ ជាគណបក្សកែទម្រង់ដែលកន្លងមកបក្សនេះបានទាមទារឱ្យរុះរើអំណាចរបស់ក្រុមប្រឹក្សារាជបល្ល័ង្គជាមួយនឹងកាត់បន្ថយអំណាចរបស់ព្រះមហាក្សត្រទៀតផង។ បក្សនេះបានដាក់ញត្តិឱ្យលុបចោលមាត្រាមួយចំនួននៃក្រមព្រហ្មទណ្ឌដែលដាក់ទោសធ្ងន់ធ្ងរទៅលើអ្នករិះគន់ក្រុមញាតិវង្ស។
បក្សនេះចេញមុខខ្លាំងជាងគេប្រឆាំងប្រព័ន្ធដឹកនាំបែបផ្ដាច់ការ និងយោធានិយមរហូតដឹកនាំការធ្វើបាតុកម្មអស់រយៈពេលជាង ២ឆ្នាំ តែត្រូវបានពួកយោធា និងរដ្ឋាភិបាលរបស់លោក ប្រាយុទ្ធ វាយបង្ក្រាប និងចាប់ខ្លួនរាប់សិបនាក់ដាក់ពន្ធនាគារ។
ក្រុមអ្នកសង្កេតការណ៍បានហៅជ័យជម្នះក្នុងការផ្ដួលពួកយោធាតាមរយៈសន្លឹកឆ្នោតចេញពីបេះដូងរបស់ប្រជាជនថៃ ជាពិសេសគឺយុវជន វាដូចជាការវាយសំពងពួកយោធាផង ហើយជះឥទ្ធិពលលើអំណាចរបស់រាជបល្ល័ង្គថៃ ផង និងក៏ជាការវាយសំពងមេដឹកនាំក្នុងតំបន់អាស៊ីអាគ្នេយ៍នៃប្រទេសមួយចំនួនដែលមេដឹកនាំប្រទេសទាំងនោះកំពុងអនុវត្តប្រព័ន្ធបែបផ្ដាច់ការផង៕