អតីតប្រធានចលនានិស្សិតដើម្បីលទ្ធិប្រជាធិបតេយ្យ លោក សារ៉ូ សុវិជ័យ ដែលប្រឆាំងដាច់ខាតនឹងការដឹកនាំមិនត្រឹមត្រូវរបស់លោក ហ៊ុន សែន ប្ដេជ្ញាមិនចុះចូលជាមួយបក្សកាន់អំណាចដែលកំពុងដឹកនាំរដ្ឋាភិបាលដោយប្រើអំណាចរំលោភច្បាប់ រំលោភសិទ្ធិមនុស្ស និងជាន់ឈ្លីលទ្ធិប្រជាធិបតេយ្យដាច់ខាត ដោយសុខចិត្តទៅបួសជាព្រះសង្ឃ បើទោះបីជាសាច់ញាតិ និងមិត្តភ័ក្ដិរបស់ខ្លួនសម្រុកចូលដូចហ្វូងគោក៏ដោយ។
លោក សារ៉ូ សុវិជ័យ សរសេរលើគណនីហ្វេសប៊ុករបស់លោកនៅថ្ងៃទី១៩ ឧសភា នេះថា លោកមិនអាចចុះចូលជាមួយបក្សកាន់អំណាចដែលកំពុងធ្វើបាបប្រជាពលរដ្ឋពេញផ្ទៃប្រទេសដូចសព្វថ្ងៃនេះបានទេ។ លោកបន្ថែមថា លោកសុខចិត្តទៅបួសជាព្រះសង្ឃវិញប្រសើរជាង ព្រោះថាបើលោកចុះចូលជាមួយបក្សកាន់អំណាចទាំងដែលបក្សនេះនៅប្រព្រឹត្តអំពើទុច្ចរិតចំពោះជាតិបែបនេះ លោកច្បាស់ជាវេទនាដូចស្លាប់ទាំងរស់អ៊ីចឹង។
លោក សារ៉ូ សុវិជ័យ បញ្ជាក់ថា លោកមិនខ្ពើមឆ្អើមគណបក្សប្រជាជនកម្ពុជានោះទេ ប៉ុន្តែទង្វើដែលបក្សនេះបានធ្វើ ដូចជាការព្យាយាមទាញប្រទេសកម្ពុជាទៅជាប្រព័ន្ធដឹកនាំផ្ទេរអំណាចពីឪពុកទៅកូន ដោយប្រាសចាកពីដំណើរប្រជាធិបតេយ្យ និងការប្រព្រឹត្តទង្វើទុច្ចរិតរាប់មិនអស់ជាច្រើនទៀត ពិតជាមិនអាចឲ្យលោកចុះចូលជាមួយបក្សនេះបានឡើយ។
អតីតប្រធានចលនានិស្សិតដើម្បីលទ្ធិប្រជាធិបតេយ្យរូបនេះគូសបញ្ជក់ថា តាំងពីលោកនៅជាក្មេងវត្តក្រីក្រគ្មានអ្វីទាំងអស់ ក៏លោកមិនយល់ព្រមចូលបម្រើគណបក្សប្រជាជនកម្ពុជាផង ចុះទម្រាំពេលនេះលោកអាចមានលទ្ធភាពរស់ និងជួយមនុស្សបានខ្លះទៀត តើមានហេតុផលអ្វីឲ្យលោកទៅចុះចូលជាមួយគណបក្សមួយដែលបង្កភាពអយុត្តិធម៌ដល់ប្រជាពលរដ្ឋខ្លួនឯងជាងកន្លះនគរនោះ។
ចាប់តាំងពីចុងឆ្នាំ២០២២ និងដើមខែមករា ឆ្នាំ២០២៣ មក អ្នកគាំទ្របក្សក្រៅរដ្ឋាភិបាលខ្លះ ដូចជាគណបក្សភ្លើងទៀន និងគណបក្សប្រជាធិបតេយ្យមូលដ្ឋាន ជាដើម បាននាំគ្នាចុះចូលជាមួយបក្សកាន់អំណាចជាបន្តបន្ទាប់ បើទោះបីជាមេបក្សកាន់អំណាចលោក ហ៊ុន សែន បានបញ្ជាឲ្យក្រសួងព័ត៌មានបិទអង្គភាពសារព័ត៌មាន វីអូឌី ដែលជាសញ្ញានៃរឹតត្បិតសេរីភាពសារព័ត៌មានក៏ដោយ ក៏ពួកគេនៅតែបន្តការចុះចូលដោយមិនខ្វល់ពីបញ្ហានេះដែរ។
កាន់តែធ្ងន់ធ្ងរជាងនេះទៀតនោះ ក្រោយពីប្រធានគណបក្សសង្គ្រោះជាតិ លោក កឹម សុខា ត្រូវតុលាការផ្ដន្ទាទោសដាក់ពន្ធនាគារនៅដើមខែមីនា ឆ្នាំ២០២៣ ចរន្តនៃការចុះចូលរបស់សកម្មជន និងមន្ត្រីជាន់ខ្ពស់គណបក្សសង្គ្រោះជាតិបានផ្ទុះឡើងយ៉ាងខ្លាំង ក្នុងនោះភាគីលោក កឹម សុខា ដូចជាលោក ហ៊ុន កុសល លោក យឹម ស៊ីណន លោក ប៉ែន ផល្លិកា លោក ជា រដ្ឋា និងលោក សារ៉ូ សុវុឌ្ឍិ ជាដើម បាននាំគ្នាប្រកាសចុះចូលជាមួយលោក ហ៊ុន សែន ព្រោងព្រាត។
ចំណែកភាគីលោក សម រង្ស៊ី ដូចជាលោក អៀ ចាន់ណា លោក តុ វ៉ាន់ចាន់ លោក គង់ ម៉ាស់ និងគណៈកម្មាធិការនាយករបស់គណបក្សសង្គ្រោះជាតិចំនួន ៤នាក់ដែលទើបនឹងចុះចូលកាលពីពេលថ្មីៗនេះ ជាដើម ក៏ប្រកាសផ្ដាច់ខ្លួនពីគណបក្សសង្គ្រោះជាតិ ដើម្បីចុះចូលជាមួយលោក ហ៊ុន សែន ដែរ។
ក្រៅពីមន្ត្រីជាន់ខ្ពស់បក្សប្រឆាំង និងបក្សក្រៅរដ្ឋាភិបាល ដូចជាប្រធានគណបក្សខ្មែរឈ្នះ លោក សួង សុភ័ណ្ឌ ជាដើម ដែលបានប្រកាសចូលរួមជាមួយបក្សកាន់អំណាច ក៏មានអតីតមន្ត្រីជាន់ខ្ពស់របស់អង្គការសង្គមស៊ីវិលដែរ ដូចជាលោក ព្រាប កុល និងប្រធានអង្គការសម្ព័ន្ធខ្មែរអាមេរិកាំង លោក ទូច វិបុល ផងដែរ ក្រោមហេតុផលស្រដៀងៗគ្នាថា គឺដើម្បីចូលទៅជួយកែទម្រង់ការដឹកនាំរបស់បក្សកាន់អំណាច ឬព្រោះតែបក្សនេះមានមេដឹកនាំដែលខ្លាំង ជាដើម។
ទាក់ទិននឹងបញ្ហានេះ អ្នកចុះចូលម្នាក់ៗសុទ្ធតែលើកហេតុផលរបស់ពួកគេរៀងៗខ្លួន ចំណែកអ្នកដែលមិនឯកភាពនឹងការចុះចូលនេះ ក៏មានហេតុផលរិះគន់របស់ពួកគេដែរ។ ជាក់ស្តែង ប្រធានអង្គការសម្ព័ន្ធខ្មែរអាមេរិកាំង លោក ទូច វិបុល ធ្លាប់បានលើកឡើងក្នុងកម្មវិធី Idea Talk នៃសារព័ត៌មាន The Cambodia Daily កាលពីរាត្រីថ្ងៃទី១៦ ខែឧសភា ឆ្នាំ២០២៣ នេះថា ការដែលលោកសម្រេចចិត្តអំពាវនាវឲ្យប្រជាពលរដ្ឋខ្មែរបោះឆ្នោតឲ្យគណបក្សប្រជាជនកម្ពុជា គឺដោយសារលោក ហ៊ុន សែន ជាមេដឹកនាំដែលខ្លាំង និងមានលក្ខណៈសម្បត្តិពេញលេញក្នុងការដឹកនាំប្រទេសកម្ពុជាទៅថ្ងៃមុខ។
យ៉ាងណាក៏ដោយ ប្រធានមជ្ឈមណ្ឌលកម្ពុជាដើម្បីប្រព័ន្ធផ្សព្វផ្សាយឯករាជ្យ (CCIM) លោក ប៉ា ងួនទៀង បានរិះគន់ដែលទំនងជាសំដៅទៅកាន់លោក ទូច វិបុល ថា លោក ទូច វិបុល អះអាងថាគាត់ចូលរួមជាមួយអ្នកនយោបាយបក្សកាន់អំណាចព្រោះមេដឹកនាំគណបក្សប្រជាជនកម្ពុជាជាមេដឹកនាំខ្លាំង ដូច្នេះអាចមានន័យថា បើគាត់ធំដឹងក្តីក្នុងរបបខ្មែរក្រហម គាត់ប្រាកដជាចូលរួមជាមួយមេដឹកនាំរបបប្រល័យពូជសាសន៍ ប៉ុល ពត ដើម្បីជួយសម្លាប់ខ្មែរដែរហើយមើលទៅនោះ។
បែបនេះក្តី សកម្មជនកិច្ចព្រមព្រៀងសន្តិភាពទីក្រុងប៉ារីស លោក ស្រ៊ុន ស្រ៊ន លើកឡើងក្នុងកម្មវិធី Idea Talk នៃសារព័ត៌មាន The Cambodia Daily កាលពីពេលថ្មីៗនេះថា អ្នកចុះចូលជាមួយបក្សកាន់អំណាចទាំងអស់មិនអាចទៅកែការដឹកនាំរបស់គណបក្សប្រជាជនកម្ពុជាបានទេ ព្រោះថារដ្ឋាភិបាលដែលដឹកនាំដោយលោក ហ៊ុន សែន ជាង ៤០ឆ្នាំមកនេះ គ្មាននរណាម្នាក់អាចកែការដឹកនាំរបស់រដ្ឋាភិបាលឯកបក្សនេះបានឡើយ។
លោក ស្រ៊ុន ស្រ៊ន លើកឡើងថា កុំថាឡើយអ្នកចុះចូល ២ ទៅ ៣នាក់ដែលអួតថាចង់កែការដឹកនាំរបស់គណបក្សប្រជាជនកម្ពុជានោះ សូម្បីគណបក្សសង្គ្រោះជាតិដែលមានសមាជិករដ្ឋសភា និងកៅអីក្រុមប្រឹក្សាឃុំ-សង្កាត់រហូតដល់រាប់ពាន់នាក់ ក៏មិនអាចកែគណបក្សប្រជាជនកម្ពុជាបានផង តើពួកគេចាត់ទុកខ្លួនឯងជាអ្វី បើគ្មានកម្លាំងអ្នកគាំទ្រផងនោះ៕