27 C
Phnom Penh

ព្រះ​ភិក្ខុ​វជីរប្បញ្ញោ សាន សុជា សម្រេច​ចិត្ត​សឹក​ជា​គ្រហស្ថ​ក្រោយ​សាង​ផ្នួស​អស់​៣១​ឆ្នាំ

ដោយ ឌឹ ខេមបូឌា ដេលី

បទវិភាគ

ព្រះ​ភិក្ខុ​វជីរប្បញ្ញោ សាន សុជា បាន​សម្រេច​ចិត្ត​លាចាក​ផ្នួស​ភេទ​ជា​ព្រះ​ភិក្ខុសង្ឃ​ហើយ​កាលពី​ថ្ងៃ​អាទិត្យ នៅ​ប្រទេស​អូស្ត្រាលី បន្ទាប់ពី​បាន​សាង​ផ្នួស​ក្នុង​ព្រះពុទ្ធ​សាសនា​អស់​រយៈពេល ៣១​ឆ្នាំ ដែល​ធ្វើ​ឲ្យ​ពុទ្ធបរិស័ទ​ជាច្រើន​ធ្លាប់តែ​តាមដាន​ស្តាប់​ការ​បង្រៀន​ធម៌​របស់​ព្រះ​ភិក្ខុ​អង្គ​នេះ​មាន​ការ​សោកស្តាយ​ជា​ពន់ពេក។

ព្រះ​ភិក្ខុ​វជីរប្បញ្ញោ សាន សុជា ដែល​ជា​ព្រះសង្ឃ​ក្នុង​ព្រះពុទ្ធ​សាសនា​ដ៏​ល្បីល្បាញ​មួយ​ព្រះអង្គ​ក្នុង​ការ​បង្រៀន​ព្រះ​អភិធម្ម បាន​ធ្វើ​ការ​ផ្សាយ​លើ​គណនី​ហ្វេសប៊ុក​របស់​ព្រះអង្គ​ក្នុង​ភេទ​ជា​បព្វជិត​ជា​លើក​ចុងក្រោយ​កាលពី​ថ្ងៃទី​២១ ខែ​ឧសភា ឆ្នាំ​២០២៣ នេះ​ថា ចាប់​ពេលនេះ​តទៅ លោក​នឹង​លែង​ជា​ព្រះ​ភិក្ខុសង្ឃ​តទៅទៀត​ហើយ។

ព្រះ​ភិក្ខុ​អង្គ​នេះ​លើកឡើង​ថា ចាប់​ពេលនេះ​តទៅ រាល់​វីដេអូ​នានា​ដែល​ត្រូវ​បាន​ផ្សព្វផ្សាយ​លើ​បណ្ដាញ​សង្គម​ទំនាក់ទំនង​ក្នុង​ភេទ​ជា​ព្រះសង្ឃ គ្រាន់តែ​វីដេអូ​ចាស់ៗ​របស់​ព្រះអង្គ​តែប៉ុណ្ណោះ ព្រោះ​ថា​ចាប់ពី​ពេលនេះ​តទៅ លោក​នឹង​មិនមែន​ជា​អ្នក​បួស​តទៅទៀត​នោះ​ឡើយ គឺ​គ្រាន់តែ​ជា​ឧបាសក​ក្នុង​ព្រះពុទ្ធ​សាសនា​មួយ​រូប​ប៉ុណ្ណោះ។

ព្រះ​ភិក្ខុ សាន សុជា បញ្ជាក់​ថា ការ​សម្រេច​ចិត្ត​លាចាក​សិក្ខាបទ​នៅ​ពេលនេះ គឺ​គោលការណ៍​នៃ​ដំណើរ​ជីវិត​ផ្ទាល់ខ្លួន​របស់​ព្រះអង្គ​តែប៉ុណ្ណោះ។

ព្រះ​ភិក្ខុ​វជីរប្បញ្ញោ សាន សុជា កើត​នៅ​ថ្ងៃទី​១៤ ខែ​ធ្នូ ឆ្នាំ​១៩៧៦ ស្ថិត​ក្នុង​ភូមិ​ទួលតាអុក ឃុំ​កំពង់យោល ស្រុក​ទ្រាំង ខេត្ត​តាកែវ និង​បាន​ចូល​បួស​ជា​សាមណេរ​ក្នុង​ព្រះពុទ្ធ​សាសនា​នៅ​ថ្ងៃទី​២២ ខែ​មេសា ឆ្នាំ​១៩៩២ ក្នុង​វ័យ ១៦​ឆ្នាំ។

ក្រោយ​ចូល​បួស​ក្នុង​ព្រះពុទ្ធ​សាសនា និង​ការ​ខិតខំ​រៀនសូត្រ សាមណេរ សាន សុជា បាន​ប្រឡង​ជាប់​វិញ្ញាបនបត្រ​នៃ​សាលា​ពុទ្ធិកបឋមសិក្សា​នៅ​ថ្ងៃទី​៥ ខែ​មេសា ឆ្នាំ​១៩៩៤ រហូត​ដល់​ឆ្នាំ​១៩៩៧ ព្រះអង្គ​ក៏​បាន​ប្រឡង​ជាប់​វិញ្ញាបនបត្រ​មធ្យមសិក្សា​បឋមភូមិ​នៃ​ពុទ្ធិកវិទ្យាល័យ​សិក្សា​ព្រះសុរាម្រិត ម្តង​ទៀត ប៉ុន្តែ​លោក​ត្រូវ​ផ្អាក​ការ​សិក្សា​ដោយ​ខ្លួនឯង ព្រោះ​តែ​ចង់​បដិបត្តិ​តាម​ធម៌​របស់​ព្រះសម្មាសម្ពុទ្ធ​ច្រើន​ជាង​ការ​សិក្សា​នៅ​ឯ​សាលារៀន។

នៅ​ថ្ងៃទី​២១ ខែ​មេសា ឆ្នាំ​១៩៩៧ សាមណេរ សាន សុជា បាន​ចាប់ផ្តើម​បង្រៀន​ព្រះសង្ឃ​ដទៃ​ទៀត​ក្នុង​វត្ត​ពោធិមន្ត្រី ស្ថិត​ក្នុង​ភូមិ​គោកពោធិ៍ ស្រុក​បូរីជលសារ ខេត្ត​តាកែវ ដែល​ជា​ស្រុកកំណើត​របស់​ព្រះអង្គ​នៅ​ឆ្នាំ​១៩៩៩ ផង​ដែរ។ ក្រោយ​បង្រៀន​បាន​មួយ​រយៈ អតីត​ភិក្ខុសង្ឃ​អង្គ​នេះ​បាន​ប្រឡង​ជាប់​ជា​គ្រូ​កម្រិត​ពុទ្ធិកបឋមសិក្សា​ពេញ​សិទ្ធិ​ជា​ផ្លូវការ​របស់​ក្រសួង​ធម្មការ និង​សាសនា​តែម្តង។

បន្ទាប់ពី​ប្រឡង​ជាប់​ជា​គ្រូ​បាន ៣​ឆ្នាំ ព្រះ​ភិក្ខុ​វជីរប្បញ្ញោ សាន សុជា បាន​ចេញ​ទៅ​បង្រៀន​ព្រះសង្ឃ​នៅ​សាលា​ពុទ្ធិកបឋមសិក្សា​វត្ត​ពាលញែក ក្នុង​ខេត្ត​ពោធិ៍សាត់ ប៉ុន្តែ​នៅ​អំឡុង​ឆ្នាំ​២០០១ ព្រះ​ភិក្ខុ​អង្គ​នេះ​ក៏​បាន​ត្រឡប់​ទៅ​បង្រៀន​ព្រះសង្ឃ​នៅ​វត្ត​កែវសុវណ្ណ វិញ ប៉ុន្តែ​ស្ថិត​ក្នុង​ទឹកដី​ខេត្ត​ពោធិ៍សាត់ ដដែល។

ក្រោយ​ធ្វើ​ជា​គ្រូបង្រៀន​នៅ​វត្ត​កែវសុវណ្ណ បាន​មួយ​រយៈ នៅ​ថ្ងៃទី​១៧ ខែ​មេសា ឆ្នាំ​២០០១ ព្រះ​ភិក្ខុ សាន សុជា បាន​បង្កើត​កន្លែង​សិក្សា​ធម៌​មួយ​ឈ្មោះ​មជ្ឈមណ្ឌល​សិក្សា​អប់រំ​ព្រះពុទ្ធ​សាសនា ដែល​មាន​ទីតាំង​នៅ​ក្នុង​វត្ត​កែវសុវណ្ណ ដដែល សម្រាប់​បង្រៀន​ព្រះ​អភិធម្ម​ដល់​ឧបាសក​ឧបាសិកា​នៅ​ទីនោះ។

បន្ទាប់ពី​មាន​ការ​គាំទ្រ​ពី​ពុទ្ធបរិស័ទ​កាន់តែ​ច្រើន​ឡើងៗ នៅ​ថ្ងៃទី​១ ខែ​តុលា ឆ្នាំ​២០០១ មជ្ឈមណ្ឌល​សិក្សា​អប់រំ​ព្រះពុទ្ធ​សាសនា​ត្រូវ​ផ្លាស់ប្ដូរ​ទៅ​កសាង​នៅ​ទីតាំង​ថ្មី ស្ថិត​ក្នុង​ខេត្ត​ពោធិ៍សាត់ ដដែល ប៉ុន្តែ​បាន​ប្តូរ​ឈ្មោះ​ទៅ​ជា​ពុទ្ធ​សាសនមណ្ឌល​មុនីរត្ន វិញ ដែល​ត្រូវ​ដាក់​ឲ្យ​ស្ថិត​នៅ​ក្នុង​បរិវេណ​វត្ត​មណីរត្ន ដែល​ត្រូវ​បាន​បង្កើត​ឡើង​នៅ​ពេល​ជាមួយ​គ្នា​នោះ។

ប៉ុន្តែ​ក្រោយ​មក ពុទ្ធ​សាសនមណ្ឌល​មុនីរត្ន ក៏​បាន​ប្តូរ​ឈ្មោះ​ម្តង​ទៀត គឺ​ប្តូរ​ទៅ​ជា​មណ្ឌល​សិក្សា​ព្រះពុទ្ធ​សាសនា​មណីរត្ន រហូត​ដល់​សព្វថ្ងៃ​នេះ ហើយ​ព្រះ​ភិក្ខុ​វជីរប្បញ្ញោ សាន សុជា ក៏​បាន​ធ្វើ​ជា​ព្រះ​គ្រូ​ចៅអធិការ​វត្ត​នៅ​វត្ត​នោះ​រហូត​មក​ដល់​ពេល​ដែល​លោក​បាន​លាចាក​សិក្ខាបទ​នៅ​ពេលនេះ​ផង​ដែរ ដែល​មាន​រយៈពេល​ប្រមាណ​ជា ២២​ឆ្នាំ​ហើយ បើ​គិត​មក​ទល់​នឹង​ពេលនេះ៕

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស