បន្ទាប់ពីលោកនាយករដ្ឋមន្ត្រី ហ៊ុន សែន ទើបតែព្រមានរដ្ឋបរទេសមិនឲ្យលូកដៃបញ្ហាប្រជាធិបតេយ្យនៅកម្ពុជា ក្រសួងការបរទេសអាមេរិកបានចេញមុខមកថ្កោលទោសជាថ្មីទាក់ទងទៅនឹងសំណុំរឿងបិទផ្លូវមិនឲ្យគណបក្សភ្លើងទៀន មានឱកាសចូលរួមការបោះឆ្នោតថ្នាក់ជាតិនាពេលខាងមុខ ថាជាទង្វើដែលគ្មានលក្ខណៈប្រជាធិបតេយ្យនៅមុនការបោះឆ្នោត។
ក្នុងសេចក្តីថ្លែងការណ៍របស់អ្នកនាំពាក្យក្រសួងការបរទេសសហរដ្ឋអាមេរិក លោក Matthew Miller ស្ដីពីទង្វើដែលគ្មានលក្ខណៈប្រជាធិបតេយ្យនៅមុនការបោះឆ្នោតនៅកម្ពុជា ដែលបានចេញនៅថ្ងៃទី២៥ ខែឧសភា ឆ្នាំ២០២៣ ឲ្យដឹងថា សហរដ្ឋអាមេរិកមានកង្វល់ខ្លាំងដែលអាជ្ញាធរកម្ពុជាធ្វើការហាមប្រាមគណបក្សភ្លើងទៀន ដែលជាគណបក្សប្រឆាំងធំជាងគេមិនឲ្យចូលរួមក្នុងការបោះឆ្នោតជាតិនៅខែកក្កដា ឆ្នាំ២០២៣។
សេចក្តីថ្លែងការណ៍ដដែលថា បណ្តឹងបែបប្រឌិត ការគំរាមកំហែង ការយាយី និងបទចោទប្រកាន់ព្រហ្មទណ្ឌដែលមានលក្ខណៈនយោបាយប្រឆាំងនឹងគណបក្សប្រឆាំង សារព័ត៌មានឯករាជ្យ និងសង្គមស៊ីវិល បានបំផ្លាញការប្ដេជ្ញាចិត្តរបស់កម្ពុជាដែលធ្វើជាមួយអន្តរជាតិ ក្នុងការរីកចម្រើនទៅជាប្រទេសប្រជាធិបតេយ្យពហុបក្ស។
សេចក្តីថ្លែងការណ៍របស់អ្នកនាំពាក្យក្រសួងការបរទេសអាមេរិក បានលើកឡើងថា អាមេរិកមិនមានគម្រោងបញ្ជូនមន្ត្រីមកសង្កេតការណ៍ការបោះឆ្នោតនៅខែកក្កដា នេះទេ ដោយសារអ្នកជំនាញឯករាជ្យកម្ពុជា និងអ្នកជំនាញអន្តរជាតិជាច្រើនវាយតម្លៃថា គ្មានភាពសេរី និងយុត្តិធម៌។
គួរបញ្ជាក់ផងដែរថា កាលពីថ្ងៃទី២៣ លោក ហ៊ុន សែន បានព្រមានអង្គទូតលោកសេរីឱ្យរក្សាភាពស្ងៀមស្ងាត់ដោយមិនត្រូវបញ្ចេញប្រតិកម្មជុំវិញរឿងបញ្ហាលទ្ធិប្រជាធិបតេយ្យនៅកម្ពុជាចាប់ពីពេលនេះរហូតដល់ការបោះឆ្នោតជ្រើសតាំងតំណាងរាស្ត្រនៅខែកក្កដា ខាងមុខ។
លោកនាយករដ្ឋមន្ត្រីថា ការគាបសង្កត់កម្ពុជា គឺដូចជាការគាបសង្កត់អាស៊ានអ៊ីចឹងដែរ ព្រោះកម្ពុជាមានសិទ្ធិវេតូ និងជំទាស់រាល់សេចក្ដីសម្រេចណាមួយដែលកម្ពុជាយល់ថាជាការជ្រៀតជ្រែកកិច្ចការផ្ទៃក្នុងរបស់ប្រទេសណាមួយ។
ក្រៅពីប្រតិកម្មរបស់ក្រសួងការបរទេសអាមេរិក នៅថ្ងៃព្រហស្បតិ៍ ទី២៥ ឧសភា អ្នកជំនាញអង្គការសហប្រជាជាតិ (UN) បានចេញសេចក្តីថ្លែងការណ៍ពីទីក្រុងហ្សឺណែវ ដោយបានកត់សម្គាល់ថា ចំពោះការសម្រេចដោយ គ.ជ.ប មិនអនុញ្ញាតឲ្យគណបក្សភ្លើងទៀន និងគណបក្សមហាសាមគ្គីជាតិខ្មែរចូលរួមការបោះឆ្នោត គឺ គ.ជ.ប ហាក់ដូចជាមានការរើសអើងប្រឆាំងនឹងគណបក្សនយោបាយសំខាន់មួយ ឬច្រើនរបស់កម្ពុជា។
អតីតអ្នកទោសនយោបាយ និងជាមន្ត្រីជាន់ខ្ពស់អតីតគណបក្សសង្គ្រោះជាតិ លោក មាជ សុវណ្ណារ៉ា ប្រាប់សារព័ត៌មាន The Cambodia Daily ថា គណបក្សភ្លើងទៀនមានចំណុចខ្សោយធំៗមួយចំនួនដែលមិនអាចឲ្យបក្សនេះចូលរួមការបោះឆ្នោតបាន និងមិនអាចប្រមូលកម្លាំងតវ៉ាជំទាស់ទៅនឹងសេចក្តីសម្រេចរបស់ក្រុមប្រឹក្សាធម្មនុញ្ញបានទេ។
មន្ត្រីជាន់ខ្ពស់គណបក្សប្រឆាំងលើកឡើងថា កំហុសទី១ បក្សភ្លើងទៀន គឺមិនបានផ្ទេរឈ្មោះក្នុងលិខិតចុះបញ្ជីគណបក្សនយោបាយនៅក្រសួងមហាផ្ទៃ ពីអតីតមេដឹកនាំបក្សប្រឆាំង លោក សម រង្ស៊ី មកលោក ទាវ វណ្ណុល។
លោក មាជ សុវណ្ណារ៉ា លើកឡើងថា បើឈ្មោះបញ្ជាក់ម្ចាស់កម្មសិទ្ធិនៅលើលិខិតចុះបញ្ជីគណបក្សនយោបាយនៅក្រសួងមហាផ្ទៃ នៅតែជាឈ្មោះរបស់លោក សម រង្ស៊ី ដែលកំពុងមានទោសទណ្ឌតាមផ្លូវតុលាការនៅពេលនេះ គឺមានន័យថា គណបក្សភ្លើងទៀននឹងប្រឈមនឹងផ្លូវច្បាប់នៅពេលដែលគេសើរើលើកករណីនេះ។
អតីតអ្នកទោសនយោបាយរូបនេះបញ្ជាក់ថា ចំណែកឯការប្រកាសប្រមូលមនុស្សតវ៉ាជំទាស់នឹងក្រុមប្រឹក្សាធម្មនុញ្ញ គ្មានសង្ឃឹមថានឹងអាចទៅរួចទេ ព្រោះលោក រ៉ុង ឈុន កំពុងស្ថិតក្នុងការត្រួតពិនិត្យតាមផ្លូវតុលាការនៅឡើយ ខណៈមន្ត្រីបក្សភ្លើងទៀនខ្លះទៀតកំពុងជាប់បណ្តឹងថែមទៀត។
គួរបញ្ជាក់ផងដែរថា ក្នុងសេចក្តីប្រកាសរបស់ក្រុមប្រឹក្សាធម្មនុញ្ញចុះថ្ងៃទី២៥ ខែឧសភា ឆ្នាំ២០២៣ ឲ្យដឹងថា ការមិនអនុញ្ញាតឱ្យគណបក្សភ្លើងទៀន និងគណបក្សមហាសាមគ្គីជាតិខ្មែរចុះបញ្ជីចូលរួមប្រកួតប្រជែងក្នុងការបោះឆ្នោតថ្នាក់ជាតិ ដោយសារខុសនឹងគតិច្បាប់។
សេចក្ដីសម្រេចបដិសេធរបស់ក្រុមប្រឹក្សាធម្មនុញ្ញនេះ ក៏បានបិទផ្លូវតវ៉ាផងដែរ។ ដូច្នេះ ការបោះឆ្នោតជ្រើសតាំងតំណាងរាស្ត្រនីតិកាលទី៧ នៅខែកក្កដា ឆ្នាំ២០២៣ ខាងមុខនេះ មិនមានវត្តមានគណបក្សភ្លើងទៀនចូលរួមប្រកួតប្រជែងឡើយ។
បើតាមគណៈកម្មាធិការជាតិរៀបចំការបោះឆ្នោត ឲ្យដឹងថា គណបក្សនយោបាយដែលបានចុះបញ្ជីទទួលស្គាល់ដោយ គ.ជ.ប សម្រាប់ចូលរួមការបោះឆ្នោតនៅថ្ងៃទី២៣ ខែកក្កដា ឆ្នាំ២០២៣ ខាងមុខនេះមានចំនួន ១៨គណបក្ស៕