37 C
Phnom Penh

សមាគម​ឧកញ៉ា​កម្ពុជា​តម្រូវ​ឱ្យ​អ្នក​មាន​ងារ​ជា​ឧកញ៉ា​ផ្ដល់​អាសយដ្ឋាន​ដល់​សមាគម

ដោយ ឌឹ ខេមបូឌា ដេលី

បទវិភាគ

សមាគម​ឧកញ៉ា​កម្ពុជា​ទាមទារ​ឲ្យ​អ្នក​មាន​គោរមងារ​ឧកញ៉ា​ចុះឈ្មោះ និង​ផ្ដល់​អាសយដ្ឋាន​ដល់​សមាគម ដោយ​ថា​រហូត​មក​ដល់​ពេលនេះ អ្នក​ដែល​មាន​គោរមងារ​ឧកញ៉ា​ទាំងនោះ​មិន​ទាន់​បង្ហាញ​អាសយដ្ឋាន​របស់​ខ្លួន​នៅឡើយ​ទេ។

ក្នុង​សេចក្ដី​ជូនដំណឹង​ចុះ​ថ្ងៃទី​៣០ ខែ​ឧសភា ឆ្នាំ​២០២៣ អគ្គលេខាធិការ​សមាគម​ឧកញ៉ា​កម្ពុជា លោក ហ៊ុន ឡាក់ លើកឡើង​ថា ការ​ដែល​សមាគម​ឧកញ៉ា​កម្ពុជា​ទាមទារ​បែប​នេះ គឺ​ដើម្បី​ផ្ដល់​នូវ​ភាព​ងាយស្រួល​ក្នុង​ការ​ចូលរួម​ក្នុង​ពិធី។ ដូច្នេះ អ្នក​មាន​គោរមងារ​ជា​ឧកញ៉ា​មួយ​ចំនួន​ដែល​មិន​ទាន់​ឲ្យ​សមាគម​ឧកញ៉ា​កម្ពុជា​ស្គាល់​អាសយដ្ឋាន​នោះ ត្រូវតែ​ផ្ដល់​អាសយដ្ឋាន​របស់​ខ្លួន​ដល់​សមាគម ដោយ​ទំនាក់ទំនង​តាមរយៈ​លេខ​ទូរសព្ទ ឬ​ស្កែន​ចូលរួម​តាម QR Code។

ចំណែក​ឧកញ៉ា​ដែល​បាន​ចុះឈ្មោះ​ចូលរួម​ពិធី​រួច​ហើយ ត្រូវ​ចាត់​បុគ្គលិក ឬ​ជំនួយការ​ទៅ​ទទួល​យក​នូវ​លិខិត​អញ្ជើញ​ផ្លូវការ និង​កាត​សម្រាប់​ពាក់ ដើម្បី​ចូលរួម​ពិធី​នៅ​អគ្គលេខាធិការដ្ឋាន​សមាគម​ឧកញ៉ា​កម្ពុជា ចាប់ពី​ថ្ងៃទី​៣០ ខែ​ឧសភា ដល់​ថ្ងៃទី​០៦ ខែ​មិថុនា ឆ្នាំ​២០២៣។

គួរ​បញ្ជាក់​ផង​ដែរ​ថា ទីស្ដីការ​គណៈរដ្ឋមន្ត្រី​កាលពី​ថ្ងៃទី​២៨ ខែ​មីនា ឆ្នាំ​២០២៣ បាន​ចេញ​សេចក្តី​ជូនដំណឹង​មួយ​ដោយ​ទទួលស្គាល់​សមាគម​ឧកញ៉ា​កម្ពុជា។

លោក​នាយករដ្ឋមន្ត្រី ហ៊ុន សែន ក្នុង​ជំនួប​ជាមួយ​ឧកញ៉ា លី យ៉ុងផាត់ ប្រធាន​សមាគម​ឧកញ៉ា​កម្ពុជា នៅ​ថ្ងៃទី​៦ ខែ​មេសា ឆ្នាំ​២០២៣។

បើ​តាម​ទីស្ដីការ​គណៈរដ្ឋមន្ត្រី​បញ្ជាក់​ពី​លក្ខខណ្ឌ​ក្នុង​លិខិត​របស់​ខ្លួន​ថា សមាគម​ឧកញ៉ា​កម្ពុជា គឺជា​ដៃគូ​របស់​រាជរដ្ឋាភិបាល​ក្នុង​ការ​លើកកម្ពស់​ពាណិជ្ជកម្ម និង​ការ​វិនិយោគ​នានា​នៅ​កម្ពុជា ដែល​ត្រូវ​ដាក់​ឲ្យ​ស្ថិត​នៅ​ក្រោម​អភិបាលកិច្ច​ផ្នែក​បច្ចេកទេស​របស់​ក្រុមប្រឹក្សា​អភិវឌ្ឍន៍​កម្ពុជា ដែល​មាន​លោក ហ៊ុន សែន ជា​ប្រធាន​កិត្តិយស​នៅ​ពេលនេះ។

សមាគម​ឧកញ៉ា​កម្ពុជា​ដែល​ទើប​បង្កើត​ឡើង​ថ្មីៗ​នេះ គឺ​មាន​លោក លី យ៉ុងផាត់ ជា​ប្រធាន​សមាគម។ លោក លី យ៉ុងផាត់ គឺជា​ឧកញ៉ា​ដែល​ល្បីល្បាញ​ខាង​ការ​រកស៊ី​ឈើ​ខុស​ច្បាប់ និង​រំលោភ​ដីធ្លី​របស់​ពលរដ្ឋ​នៅ​ខេត្ត​កោះកុង ដែល​មាន​រហស្សនាម​ថា ស្តេច​កោះកុង (King of Koh Kong) បន្ទាប់ពី​ទទួល​បាន​ងារ​ជា​អ្នកឧកញ៉ា​កាលពី​ចុង​ឆ្នាំ​១៩៩៨។

ក្រុម​អ្នក​សង្កេតការណ៍​និយាយ​ថា ការ​ប្រើប្រាស់​ឥទ្ធិពល​ដោយ​គ្មាន​ការ​ទប់ស្កាត់​នេះ បន្ទាប់ពី​ឧកញ៉ា លី យ៉ុងផាត់ បាន​ជួយ​ឧបត្ថម្ភ​ថវិកា​ដល់​លោក ហ៊ុន សែន រាប់​លាន​ដុល្លារ ដោយ​ថវិកា​ទាំងនោះ​បាន​មកពី​ការ​បំផ្លាញ​ធនធាន​ធម្មជាតិ និង​ការ​រំលោភ​ដីធ្លី​របស់​ពលរដ្ឋ។

ក្រោយ​ទទួល​គោរមងារ​ជា​ឧកញ៉ា និង​ទទួល​បាន​ការ​ពេញចិត្ត​ពេញ​ថ្លើម​ពី​ក្រុម​គ្រួសារ​លោក ហ៊ុន សែន ហើយ ឧកញ៉ា លី យ៉ុងផាត់ បាន​ប្រើ​ឥទ្ធិពល​របស់​ខ្លួន​បញ្ជូន​កម្លាំង​កងរាជអាវុធហត្ថ​ទៅ​ទន្ទ្រាន​ឈូស​ឆាយ​យក​ដីធ្លី​របស់​ពលរដ្ឋ​ខ្មែរ រួច​ដុត​ផល​ដំណាំ និង​បណ្តេញ​អ្នក​ភូមិ​ចេញពី​ផ្ទះ​សម្បែង​ទាំង​បង្ខំ​ក្នុង​រយៈពេល​ប៉ុន្មាន​ឆ្នាំ​ចុងក្រោយ​នេះ៕

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស