អគារមួយចំនួននៅទីក្រុងមូស្គូ រងការវាយប្រហារដោយយន្តហោះដ្រូនយ៉ាងតិច ៨គ្រឿង ខណៈប៉ុន្មានគ្រឿងទៀតត្រូវបានបាញ់កម្ទេច អំឡុងកំពុងហោះហើរឆ្ពោះទៅរដ្ឋធានីរបស់រុស្ស៊ីមួយនេះ។
ក្រុមមន្ត្រីនៃប្រទេសរុស្ស៊ី បានឱ្យដឹងនៅថ្ងៃអង្គារ ទី៣០ ឧសភា នេះថា យន្តហោះដ្រូនបានហោះធ្វើការវាយប្រហារពីលើអគារមួយចំនួននៅទីក្រុងមូស្គូ បង្កឱ្យមានការខូចខាតតិចតួចប៉ុណ្ណោះ ដោយពុំបានបណ្តាលឱ្យមានមនុស្សរងរបួសឡើយ។ នេះជាការបញ្ជាក់របស់អភិបាលក្រុងមូស្គូ លោក Sergei Sobyanin ដែលស្រង់មកចុះផ្សាយដោយបណ្ដាញផ្សាយព័ត៌មានអង់គ្លេសមួយនៅថ្ងៃទី៣០ ខែឧសភា។
អភិបាលក្រុងមូស្គូ រូបនេះបាននិយាយថា អគារ ២ខ្នងដែលរងការខូចខាតក្នុងការវាយប្រហារ ត្រូវបានជម្លៀសមនុស្សចេញ។
ស្របពេលនេះដែរ លោក Andrei Vorobyov អភិបាលតំបន់មូស្គូ បានឱ្យដឹងថា យន្តហោះដ្រូនចំនួន ៨គ្រឿង ត្រូវបានបាញ់កម្ទេចនៅពេលដែលពួកវាកំពុងហោះលើទីក្រុងមូស្គូ។ តែលោកអភិបាលអះអាងថា វានៅមិនទាន់ច្បាស់ទេថា តើនរណាជាអ្នកនៅពីក្រោយនៃការវាយប្រហារដោយដ្រូនទាំងនោះ តែនេះជាករណីវាយប្រហារលើកទី២ ដែលមានលក្ខណៈទ្រង់ទ្រាយធំនៅទីក្រុងមូស្គូ បន្ទាប់ពីមានដ្រូន ២គ្រឿងបានវាយប្រហារលើវិមានក្រឹមឡាំង ក្នុងសកម្មភាពដែលទីក្រុងមូស្គូ ចាត់ទុកថាជាការប៉ុនប៉ងធ្វើឃាតប្រធានាធិបតីរុស្ស៊ី លោក វ្ល៉ាឌីមៀរ ពូទីន តែត្រូវបានបាញ់ទម្លាក់នៅពេលនោះ។
ក្រោយប៉ុន្មានម៉ោងប៉ុណ្ណោះ ក្រសួងការពារជាតិរុស្ស៊ី បានចោទទៅលើប្រទេសអ៊ុយក្រែន ថាបានប្រព្រឹត្តអំពើភេរវកម្ម។ តែមើលទៅ គឺជាការសងសឹករបស់អ៊ុយក្រែន ព្រោះរុស្ស៊ីបានធ្វើការវាយប្រហារដោយមីស៊ីល និងយន្តហោះចម្បាំងដ្រូនជាប់ៗគ្នារយៈពេល ១៦ថ្ងៃមកនេះ។
មន្ត្រីអ៊ុយក្រែន បានរាយការណ៍ថា ការវាយប្រហារថ្មីៗនេះរបស់រុស្ស៊ី តាមផ្លូវអាកាសលើទីក្រុងគៀវ និងទីក្រុងផ្សេងៗទៀតកើតឡើងជាបន្តបន្ទាប់ ហើយចំពោះទីក្រុងគៀវ មានការវាយប្រហារជាទ្រង់ទ្រាយធំជាច្រើនថ្ងៃជាប់គ្នាមកនេះ។ អភិបាលក្រុងគៀវ លោក Vitali Klitschko បានឱ្យដឹងតាមប្រព័ន្ធ Telegram ថាមានការផ្ទុះកើតឡើងនៅកណ្ដាលទីក្រុងគៀវ និងបានប្រាប់ប្រជាជនឱ្យស្នាក់នៅក្នុងកន្លែងស្នាក់នៅសុវត្ថិភាពបណ្ដោះអាសន្ន។
ការវាយប្រហារកាលពីថ្ងៃចន្ទ ទី២៩ ខែឧសភា ត្រូវបានលោក Klitschko ហៅថាជារាត្រីដ៏លំបាកមួយទៀតមកលើរដ្ឋធានីគៀវ ហើយក្នុងយប់នោះ ប្រជាជនភាគច្រើនរត់ទៅចូលរូងដីនៅតាមខ្សែរថភ្លើង។
លោក Serhiy Popko ប្រធានរដ្ឋបាលយោធាទីក្រុងគៀវ បាននិយាយថា កងទ័ពរុស្ស៊ីបានប្រើមីស៊ីលបាលីស្ទិច និងដ្រូន Shahed ដោយសំដៅលើទីក្រុងគៀវ លើកទី១៥ នៅក្នុងខែឧសភា នេះ។
ការវាយប្រហារតាមអាកាសជាបន្តបន្ទាប់នេះ បានធ្វើឡើងមុនការវាយបករបស់កងទ័ពអ៊ុយក្រែន ដែលត្រូវបានគេរំពឹងថា អ៊ុយក្រែនអាចដណ្ដើមទឹកដីដែលរុស្ស៊ីបានដណ្ដើមយកតាំងពីរុស្ស៊ីបានធ្វើការឈ្លានពានពេញនៅដើមឆ្នាំមុនមកនេះ។
រដ្ឋមន្ត្រីការបរទេសអ៊ុយក្រែន លោក Dmytro Kuleba បានសរសេរនៅលើ Twitter ថា ការវាយប្រហារដោយយន្តហោះដ្រូន និងមីស៊ីលរបស់រុស្ស៊ីមកលើទីក្រុងរបស់អ៊ុយក្រែន គឺមិនអាចចាត់ទុកថាជារឿងធម្មតាបានទេ។ លោកថា ការវាយប្រហារទាំងអស់នេះ គឺជាឧក្រិដ្ឋកម្មសង្គ្រាមដែលត្រូវតែបញ្ឈប់តាមរយៈការពង្រឹងការការពារដែនអាកាសរបស់អ៊ុយក្រែន ដែលក្នុងនោះ អ៊ុយក្រែនត្រូវការយន្តហោះចម្បាំង F-16 ដើម្បីធ្វើឱ្យមានតុល្យភាពនៃការវាយប្រហាររបស់រុស្ស៊ី។
កាលពីយប់ថ្ងៃអាទិត្យចុងសប្តាហ៍មកនេះ រុស្ស៊ីបានវាយប្រហារដោយយន្តហោះដ្រូនដ៏ធំបំផុតមួយរបស់ទីក្រុងមូស្គូ ចំពេលដែលមនុស្សជាច្រើនជួបជុំគ្នាតាមដងផ្លូវ ដើម្បីប្រារព្ធខួបនៃការបង្កើតរដ្ឋធានីគៀវ។ ប៉ុន្តែកងទ័ពអ៊ុយក្រែន អះអាងថា ខ្លួនបានបាញ់ទម្លាក់យន្តហោះដ្រូនចំនួន ៥៨គ្រឿងក្នុងចំណោមយន្តហោះដ្រូន ៥៩គ្រឿងរបស់រុស្ស៊ី។
លោក វ៉ូឡូឌីមៀ ហ្សេឡេនស្គី ក៏បាននិយាយផងដែរថា យន្តហោះដ្រូនចំនួន ៣៦គ្រឿងដែលសំដៅមកកាន់ទីក្រុងគៀវ ត្រូវបានបំផ្លាញទាំងអស់។
ក្នុងសុន្ទរកថាតាមវីដេអូ លោក ហ្សេឡេនស្គី ប្រធានាធិបតីអ៊ុយក្រែន បានបញ្ជាក់ថា នេះជារបៀបដែលប្រទេសរុស្ស៊ី ចូលរួមប្រារព្ធទិវានៃទីក្រុងគៀវ ដែលជាទីក្រុងបុរាណ បែរជារុស្ស៊ីចាប់យកការវាយប្រហារទៅវិញ។
យ៉ាងណា ក្រសួងការពារជាតិរុស្ស៊ី បានអះអាងថា កងកម្លាំងរុស្ស៊ី បានស្ទាក់ចាប់បំផ្លាញមីស៊ីលរយៈចម្ងាយឆ្ងាយ Storm Shadow ចំនួន ២គ្រាប់ ដែលជាមីស៊ីលជំនួយរបស់ចក្រភពអង់គ្លេស ផ្គត់ផ្គង់ឱ្យអ៊ុយក្រែន។
ក្រសួងការពារជាតិរុស្ស៊ី បានអះអាងទៀតថា ប្រព័ន្ធការពារដែនអាកាសរបស់ខ្លួនបានស្ទាក់ចាប់បំផ្លាញមីស៊ីលរយៈចម្ងាយខ្លីដែលបាញ់ចេញពីប្រព័ន្ធរ៉ុក្កែត HIMARS របស់សហរដ្ឋអាមេរិកដែលផ្ដល់ឱ្យទីក្រុងគៀវ ហើយក៏បានបាញ់ទម្លាក់យន្តហោះចម្បាំងដ្រូន ១២គ្រឿងរបស់អ៊ុយក្រែនក្នុងរយៈពេល ២៤ម៉ោងគិតត្រឹមថ្ងៃទី៣០ ឧសភា។
នៅក្នុងការវាយប្រហារកាលពីថ្ងៃសៅរ៍ ចុងសប្ដាហ៍កន្លងមកនេះមានការវាយប្រហារដោយយន្តហោះដ្រូនចូលយ៉ាងជ្រៅក្នុងទឹកដីរុស្ស៊ី ដោយមានគោលដៅវាយទៅលើបំពង់បង្ហូរប្រេងដែលរុស្ស៊ីតែងតែចោទថា អ៊ុយក្រែន គឺជាអ្នកនៅពីក្រោយការវាយប្រហាររបៀបនេះ តែអ៊ុយក្រែនមិនដែលទទួលស្គាល់ជាស្នាដៃរបស់កងទ័ពអ៊ុយក្រែននោះទេ៕