27.6 C
Phnom Penh

ក្រុម​ឃ្លាំមើល​ថា​ការ​រារាំង​បក្ស​ភ្លើង​ទៀន​ចូលរួម​បោះឆ្នោត​ជា​ល្បិច​វ័ណ្ឌក​របស់​លោក ហ៊ុន សែន ខ្លួន​ឯង

ដោយ ឌឹ ខេមបូឌា ដេលី

បទវិភាគ

ក្រុម​អ្នក​ឃ្លាំមើល​សង្គម ព្រមាន​ទៅ​កាន់​មេដឹកនាំ​បក្ស​កាន់​អំណាច​លោក ហ៊ុន សែន ថា​ការ​រៀបចំ​ល្បិច​នយោបាយ​រារាំង​មិន​ឲ្យ​បក្ស​ភ្លើង​ទៀន​ចូលរួម​ការ​បោះឆ្នោត គឺជា​ល្បិចកល​នយោបាយ​វ័ណ្ឌក​ខ្លួនឯង​របស់​លោក ហ៊ុន សែន តែប៉ុណ្ណោះ ព្រោះ​ការ​បដិសេធ​នូវ​លិខិត​របស់​ក្រសួង​មហាផ្ទៃ គឺជា​បញ្ហា​ដ៏​ធំ​ចំពោះ​រដ្ឋាភិបាល​របស់​លោក ហ៊ុន សែន។

អ្នកវិភាគ​ឯករាជ្យ និង​ជា​ប្រធាន​វេទិកា​ពលរដ្ឋ លោក គឹម សុខ បាន​លើកឡើង​ក្នុង​កម្មវិធី Idea Talk នៃ​សារព័ត៌មាន The Cambodia Daily កាលពី​រាត្រី​ថ្ងៃទី​៣០ ឧសភា ថា នៅ​ពេល​ដែល​ក្រុមប្រឹក្សា​ធម្មនុញ្ញ និង គ.ជ.ប បដិសេធ​នូវ​លិខិត​នានា​របស់​បក្ស​ភ្លើង​ទៀន​ដែល​ចេញ​ដោយ​ក្រសួង​មហាផ្ទៃ គឺ​ស្មើ​នឹង​ស្ថាប័ន​ទាំង​ពីរ​នេះ​ចាត់ទុក​ឯកសារ​របស់​ក្រសួង​មហាផ្ទៃ​ជា​ឯកសារ​ខុស​ច្បាប់ ដែល​មាន​ន័យ​ថា ពួកគេ​បាន​ចាត់ទុក​ក្រសួង​មហាផ្ទៃ​ទាំងមូល​ជា​ស្ថាប័ន​ខុស​ច្បាប់​ដែរ។

លោក គឹម សុខ បញ្ជាក់​ថា នៅ​ពេល​ដែល​ក្រសួង​មហាផ្ទៃ​ដែល​ស្ថិត​ក្នុង​រដ្ឋាភិបាល​របស់​លោក ហ៊ុន សែន ត្រូវ​ស្ថាប័ន​ទាំង​ពីរ​ខាងលើ​នេះ​ចាត់ទុក​ជា​ស្ថាប័ន​ខុស​ច្បាប់ នោះ​គឺ​មាន​ន័យ​ថា​រដ្ឋាភិបាល​របស់​លោក ហ៊ុន សែន ក៏​ខុស​ច្បាប់​ដែរ ហើយ​ក្រុមប្រឹក្សា​ធម្មនុញ្ញ និង​គណៈកម្មាធិការ​ជាតិ​រៀបចំ​ការ​បោះឆ្នោត​ខ្លួនឯង​ក៏​ជា​ស្ថាប័ន​ខុស​ច្បាប់​ដូច​គ្នា​ដែរ។

ការ​អះអាង​នេះ ធ្វើឡើង​បន្ទាប់ពី​ក្រុមប្រឹក្សា​ធម្មនុញ្ញ និង​គណៈកម្មាធិការ​ជាតិ​រៀបចំ​ការ​បោះឆ្នោត​បាន​បដិសេធ​នូវ​លិខិត​នានា​របស់​គណបក្ស​ភ្លើង​ទៀន​ដែល​ចេញ​ដោយ​ក្រសួង​មហាផ្ទៃ ដើម្បី​រារាំង​បក្ស​នេះ​មិន​ឲ្យ​ចូលរួម​ការ​បោះឆ្នោត​នៅ​ខែ​កក្កដា ខាងមុខ​នេះ។

កាលពី​ថ្ងៃទី​១៥ ខែ​ឧសភា ឆ្នាំ​២០២៣ គណៈកម្មាធិការ​ជាតិ​រៀបចំ​ការ​បោះឆ្នោត បាន​បដិសេធ​ការ​ចុះបញ្ជី​គណបក្ស​នយោបាយ​ឈរឈ្មោះ​បោះឆ្នោត​តំណាងរាស្ត្រ​របស់​គណបក្ស​ភ្លើង​ទៀន​ជា​ផ្លូវការ ក្រោម​ហេតុផល​ថា គណបក្ស​នេះ​មិន​បាន​ភ្ជាប់​មក​ជាមួយ​នូវ​ប្រកាស​ស្ដីពី​ការ​ចុះបញ្ជី​គណបក្ស​នយោបាយ​ច្បាប់​ដើម​នៅ​ក្រសួង​មហាផ្ទៃ សម្រាប់​បញ្ជាក់​នីត្យានុកូលកម្ម បើ​ទោះបីជា​គណបក្ស​ភ្លើង​ទៀន​មាន​ឯកសារ​ថត​ចម្លង​របស់​ក្រសួង​មហាផ្ទៃ និង​លិខិត​បញ្ជាក់​ពី​ក្រសួង​មហាផ្ទៃ​ទទួលស្គាល់​ភាព​ស្រប​ច្បាប់​របស់​គណបក្ស​នេះ​ក៏ដោយ។

ក្រោយ​ការ​បដិសេធ​របស់ គ.ជ.ប គណបក្ស​ភ្លើង​ទៀន​បាន​ប្តឹង​ទៅ​ក្រុមប្រឹក្សា​ធម្មនុញ្ញ ប៉ុន្តែ​នៅ​ថ្ងៃទី​២៥ ខែ​ឧសភា ឆ្នាំ​២០២៣ ក្រុមប្រឹក្សា​ធម្មនុញ្ញ​បាន​បដិសេធ​ចោល​បណ្តឹង​របស់​គណបក្ស​ភ្លើង​ទៀន ដែល​ធ្វើ​ឲ្យ​គណបក្ស​នេះ​មិន​អាច​ចូលរួម​ការ​បោះឆ្នោត​ជាតិ​នៅ​ចុង​ខែ​កក្កដា ខាងមុខ​នេះ។

ទាក់ទិន​នឹង​បញ្ហា​នេះ មេដឹកនាំ​បក្ស​កាន់​អំណាច​លោក ហ៊ុន សែន លើកឡើង​កាលពី​ពេល​ថ្មីៗ​នេះ​ថា លិខិត​ស្ដីពី​ការ​ចុះបញ្ជី​គណបក្ស​នយោបាយ​ច្បាប់​ដើម​នៅ​ក្រសួង​មហាផ្ទៃ មិន​បាន​បាត់​ទៅ​ណា​ទេ ប៉ុន្តែ​លិខិត​នោះ​ប្រាកដជា​រក្សា​ទុក​នៅ​នឹង​អតីត​មេដឹកនាំ​បក្ស​ប្រឆាំង លោក សម រង្ស៊ី ជាមិនខាន។

លោក​នាយករដ្ឋមន្ត្រី ហ៊ុន សែន អះអាង​ថា ពួកគេ​មិន​បញ្ចេញ​លិខិត​នោះ ព្រោះ​គេ​មាន​ចេតនា​មិន​ឲ្យ​គណបក្ស​ភ្លើង​ទៀន​ចូលរួម​ការ​បោះឆ្នោត ដែល​ជា​ល្បិច​រុញ​ឲ្យ​សហគមន៍​អន្តរជាតិ​ដាក់​សម្ពាធ​លើ​រដ្ឋាភិបាល​របស់​លោក។

យ៉ាងណា​ក៏ដោយ ប្រធាន​វេទិកា​ពលរដ្ឋ លោក គឹម សុខ លើកឡើង​ថា បើ​មន្ត្រី​ជាន់ខ្ពស់​បក្ស​ប្រឆាំង​ណា​ម្នាក់​លាក់​ឯកសារ​នោះ ក្រសួង​មហាផ្ទៃ​នៅតែ​អាច​ចេញ​លិខិត​បញ្ជាក់​ពី​ការ​ចុះបញ្ជី​គណបក្ស​នយោបាយ​នៅ​ក្រសួង​មហាផ្ទៃ​ច្បាប់​ដើម​ឲ្យ​គណបក្ស​ភ្លើង​ទៀន​បាន​ដដែល ដើម្បី​កុំ​ឲ្យ​ផែនការ​របស់​មន្ត្រី​បក្ស​ប្រឆាំង​ដែល​មាន​ចេតនា​ទាមទារ​ឲ្យ​សហគមន៍​អន្តរជាតិ​ដាក់​សម្ពាធ​លើ​រដ្ឋាភិបាល​កម្ពុជា ដូច​ការ​ព្រួយបារម្ភ​របស់​លោក ហ៊ុន សែន នោះ។

អ្នកវិភាគ​ឯករាជ្យ​រូប​នេះ​បញ្ជាក់​ថា តាម​ការពិត​នៅ​ពេល​ដែល​ក្រសួង​មហាផ្ទៃ​មិន​ចេញ​លិខិត​បញ្ជាក់​ពី​ការ​ចុះបញ្ជី​គណបក្ស​នយោបាយ​នៅ​ក្រសួង​មហាផ្ទៃ​ច្បាប់​ដើម​ឲ្យ​គណបក្ស​ភ្លើង​ទៀន​បែប​នេះ គឺ​អាច​បញ្ជាក់​យ៉ាង​ច្បាស់​ថា ការ​លើកឡើង​របស់​លោក ហ៊ុន សែន គឺជា​ល្បិច​ចោរ​ស្រែក​ឲ្យ​ចាប់​ចោរ​ប៉ុណ្ណោះ ព្រោះ​ថា​គាត់​ជា​អ្នក​រារាំង​មិន​ឲ្យ​គណបក្ស​ភ្លើង​ទៀន​ចូលរួម​ការ​បោះឆ្នោត ប៉ុន្តែ​គាត់​បែរ​ជា​ចោទ​ថា​មន្ត្រី​បក្ស​នេះ​មាន​ចេតនា​លាក់​ឯកសារ​ដើម្បី​កុំ​ឱ្យ​បក្ស​ភ្លើង​ទៀន​ចូលរួម​ការ​បោះឆ្នោត​បាន​ទៅ​វិញ។

ច្បាប់​ស្ដីពី​ការ​បោះឆ្នោត​ជ្រើសរើស​តំណាងរាស្ត្រ​មាត្រា​២៧ ចែង​ថា ដើម្បី​ចុះបញ្ជី​គណបក្ស​នយោបាយ​ឈរឈ្មោះ​តំណាងរាស្ត្រ​ជា​ផ្លូវការ គណបក្ស​នយោបាយ​ត្រូវ​ភ្ជាប់​មក​ជាមួយ​នូវ​សេចក្តី​ចម្លង​លិខិត​បញ្ជាក់​ការ​ចុះបញ្ជី​គណបក្ស​នយោបាយ​នៅ​ក្រសួង​មហាផ្ទៃ ១​ច្បាប់៕

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស