ក្រសួងពាណិជ្ជកម្ម កំពុងផ្ទុះរឿងអំពើពុករលួយពេញស្ថាប័នជុំវិញការជ្រើសរើសមន្ត្រីក្របខ័ណ្ឌចំនួន ៦៦នាក់ជាសម្ងាត់ ដោយការសូកលុយក្នុងម្នាក់ៗចន្លោះពី ៣ម៉ឺន ៥ពាន់ដុល្លារទៅ ៤ម៉ឺនដុល្លារអាមេរិក ក្រោមរូបភាពកម្មសិក្សា។
ប្រភពច្បាស់ការណ៍ពីមន្ត្រីក្រសួងពាណិជ្ជកម្មជាច្រើននាក់ បានទម្លាយប្រាប់សារព័ត៌មាន The Cambodia Daily ក្នុងលក្ខខណ្ឌមិនបញ្ចេញឈ្មោះនៅថ្ងៃទី១ មិថុនា នេះថា ការប្រកាសជ្រើសមន្ត្រីចូលក្របខ័ណ្ឌដើម្បីបម្រើការនៅក្រសួងពាណិជ្ជកម្មចំនួន ៦៦នាក់នាពេលកន្លងមក គ្រាន់តែជាការប្រកាសឱ្យល្អមើលតែប៉ុណ្ណោះ ប៉ុន្តែធាតុពិត ក្រសួងពាណិជ្ជកម្មបានកំណត់អ្នកជាប់ចូលបម្រើការនៅក្នុងក្រសួងចំនួន ៦៦នាក់រួចជាស្រេចហើយ ដែលក្រសួងតម្រូវឱ្យអ្នកទាំងនោះសូកលុយក្នុងម្នាក់ចាប់ពី ៣ម៉ឺន ៥ពាន់ដុល្លារទៅ ៤ម៉ឺនដុល្លារអាមេរិក។
ប្រភពដដែលអះអាងថា មន្ត្រីដែលជ្រើសរើសជាសម្ងាត់ទាំង ៦៦នាក់នោះ បានចូលបម្រើការនៅក្រសួងពាណិជ្ជកម្មអស់ហើយ ក្រោមរូបភាពចុះកម្មសិក្សា ដែលទង្វើនេះគឺជាការបំផ្លាញការដឹកនាំរបស់រាជរដ្ឋាភិបាល បំផ្លាញធនធានមនុស្សរបស់ប្រទេសជាតិ និងជាការបំផ្លាញថវិកាជាតិដែលពលរដ្ឋបានបង់ពន្ធជូនរដ្ឋយ៉ាងធ្ងន់ធ្ងរផងដែរ។
កាលពីថ្ងៃទី៣ ខែឧសភា ឆ្នាំ២០២៣ ក្រសួងមុខងារសាធារណៈ បានចេញលិខិតអនុញ្ញាតឱ្យក្រសួងស្ថាប័នជាតិធ្វើការជ្រើសរើសមន្ត្រីរាជការស៊ីវិល មន្ត្រីជាប់កិច្ចសន្យាសម្រាប់ឆ្នាំ២០២៣ ដោយផ្អែកតាមការសម្រេចចិត្តរបស់ប្រមុខរាជរដ្ឋាភិបាលកម្ពុជាដែលបានអនុញ្ញាតកាលពីថ្ងៃទី២៦ ខែធ្នូ ឆ្នាំ២០២២ កន្លងទៅ ដោយការប្រឡងជ្រើសរើសទៅតាមលក្ខខណ្ឌច្បាប់ និងសមត្ថភាពរបស់បេក្ខជនម្នាក់ៗ។
ជុំវិញបញ្ហានេះ កាលពីថ្ងៃទី៥ ខែឧសភា ឆ្នាំ២០២៣ នេះ រដ្ឋមន្ត្រីក្រសួងពាណិជ្ជកម្ម លោក ប៉ាន សូរស័ក្តិ បានចេញសេចក្តីប្រកាសព័ត៌មានស្ដីពីការបញ្ជូនមន្ត្រីកម្មសិក្សាឱ្យចូលបម្រើការងារក្នុងក្របខ័ណ្ឌក្រសួងពាណិជ្ជកម្មសម្រាប់ឆ្នាំ២០២៣ ចំនួន ៦៦រូប ដែលត្រូវធ្វើកម្មសិក្សារយៈពេល ១ឆ្នាំ ដោយចាប់ផ្តើមពីថ្ងៃទី១៥ ខែឧសភា ឆ្នាំ២០២៣ ខាងមុខនេះតទៅ។
យ៉ាងណាក៏ដោយ មន្ត្រីដែលត្រូវធ្វើកម្មសិក្សាសម្រាប់ចូលបម្រើការងារក្នុងក្របខ័ណ្ឌក្រសួងពាណិជ្ជកម្មសម្រាប់ឆ្នាំ២០២៣ ចំនួន ៦៦រូបនោះ ត្រូវគេដឹងថាសុទ្ធតែជាប់ដោយសារតែការប្រព្រឹត្តអំពើពុករលួយទាំងអស់ ជាថ្នូរនឹងការទទួលបានក្របខ័ណ្ឌជាមន្ត្រីពេញច្បាប់ក្នុងក្រសួងនេះ។
ជុំវិញការប្រព្រឹត្តអំពើពុករលួយនៅក្នុងក្រសួងពាណិជ្ជកម្មនេះ កាលពីថ្ងៃទី៥ ខែសីហា ឆ្នាំ២០២១ រដ្ឋមន្ត្រីក្រសួងពាណិជ្ជកម្ម លោក ប៉ាន សូរស័ក្តិ ក៏ធ្លាប់ត្រូវបានគេរកឃើញអំពីការប្រព្រឹត្តអំពើពុករលួយម្តងរួចមកហើយជាមួយអគ្គនាយកនៃអគ្គនាយកដ្ឋានកាំកុងត្រូលនៃក្រសួងពាណិជ្ជកម្ម លោក ផាន អូន ដែលបានស៊ីដាច់លុយក្រសួងសម្រាប់អនុវត្តការងារដើម្បីរ៉ាប់រងការចំណាយរបស់អង្គភាពនានាក្នុងក្រសួងពាណិជ្ជកម្ម កន្លងមក។
ជាងនេះទៅទៀត រដ្ឋមន្ត្រីក្រសួងពាណិជ្ជកម្ម លោក ប៉ាន សូរស័ក្តិ ក៏ត្រូវគេរកឃើញផងដែរថា លោកបានទទួលសំណូកជាផ្ទះវីឡាដ៏ធំស្កឹមស្កៃនៅម្តុំមាត់ទន្លេ ស្ថិតក្នុងខណ្ឌឫស្សីកែវ ដែលមានតម្លៃជាង ១លានដុល្លារអាមេរិកពីក្រុមបក្ខពួករបស់លោក ផាន អូន ផងដែរ ជាថ្នូរនឹងការជួយការពារការប្រព្រឹត្តអំពើពុករលួយរបស់អគ្គនាយកនៃអគ្គនាយកដ្ឋានកាំកុងត្រូលនៃក្រសួងពាណិជ្ជកម្មរូបនេះ។
ក្រុមអ្នកឃ្លាំមើលសង្គមរិះគន់ថា អំពើពុករលួយនៅកម្ពុជាកំពុងតែចាក់ឫសយ៉ាងជ្រៅចូលទៅក្នុងស្ថាប័នជាតិ ដែលកំពុងទាញទម្លាក់កម្ពុជាចូលទៅក្នុងចំណោមប្រទេសក្រីក្រដែលងើបមុខមិនរួច ប្រសិនបើរដ្ឋាភិបាលកម្ពុជាមិនមានវិធានការច្បាប់ច្បាស់លាស់លើមន្ត្រីខិលខូចដែលកំពុងចងបណ្ដាញដើម្បីបំផ្លាញជាតិក្នុងស្ថាប័នរដ្ឋទេនោះ។
ប្រធានកម្មវិធីសុចរិតភាពធុរកិច្ច និងធនធានរ៉ែនៃអង្គការតម្លាភាពកម្ពុជា លោក តុង សុប្រាជ្ញ បានលើកឡើងក្នុងកម្មវិធី Idea Talk នៃសារព័ត៌មាន The Cambodia Daily កាលពីពេលកន្លងទៅថា បើទោះបីជាអំពើពុករលួយកើតមាននៅកម្ពុជារហូតសហគមន៍អន្តរជាតិដាក់ពិន្ទុឱ្យស្ថិតក្នុងលេខរៀងដ៏អាក្រក់ក៏ដោយ ក៏ស្ថាប័នពាក់ព័ន្ធ ដូចជាអង្គភាពប្រឆាំងអំពើពុករលួយ (ACU) ជាដើម មិនសូវឃើញមានវិធានការស៊ើបអង្កេតលើស្ថាប័ននានាដែលមន្ត្រីនៃស្ថាប័ននោះកំពុងសម្ងំកេងប្រវ័ញ្ចលុយជាតិនោះទេ។
មន្ត្រីអង្គការតម្លាភាពកម្ពុជារូបនេះបញ្ជាក់ថា នៅពេលដែលអំពើពុករលួយកាន់តែរីកដុះដាល និងកាន់តែចាក់ឫសចូលជ្រៅនៅកម្ពុជា អ្នកដែលរងនូវផលប៉ះពាល់ពីបញ្ហានេះ គឺមានតែមន្ត្រីរាជការដែលស្មោះត្រង់ និងពលរដ្ឋប៉ុណ្ណោះ។ ជាងនេះទៅទៀត វិបត្តិផ្សេងៗ ដូចជាអយុត្តិធម៌សង្គម គ្រឿងញៀន អំពើជួញដូរមនុស្ស និងការលាងលុយកខ្វក់ ជាដើម នឹងកើតមានយ៉ាងអនាធិបតេយ្យជាមិនខាន។
កាលពីថ្ងៃទី២៥ ខែមករា ឆ្នាំ២០២២ កន្លងទៅ អង្គការតម្លាភាពអន្តរជាតិ (Transparency International) បានលាតត្រដាងថា កម្ពុជាបានជាប់ចំណាត់ថ្នាក់លេខ១៥៧ ក្នុងចំណោមប្រទេសចំនួន ១៨០ នៅលើពិភពលោកជុំវិញនៃការប្រព្រឹត្តអំពើពុករលួយក្នុងឆ្នាំ២០២១។
កម្ពុជាត្រូវបានគេចាត់ថ្នាក់ចូលទៅក្នុងប្រទេសដែលប្រព្រឹត្តអំពើពុករលួយធ្ងន់ធ្ងរតាំងពីឆ្នាំ២០១២ មក ក្នុងនោះឆ្នាំ២០១៦ កម្ពុជាបានជាប់ចំណាត់ថ្នាក់លេខរៀងទី១៥៦ ឆ្នាំ២០១៧ និងឆ្នាំ២០១៨ ជាប់ចំណាត់ថ្នាក់លេខរៀងទី១៦១ ខណៈឆ្នាំ២០១៩ ជាប់លេខរៀងទី១៦២ ឆ្នាំ២០២០ ជាប់លេខរៀងទី១៦០ និងឆ្នាំ២០២១ ជាប់លេខរៀងទី១៥៧៕