31 C
Phnom Penh

លោក សម រង្ស៊ី ថា​ពលរដ្ឋ​ថៃ​ដែល​គាំទ្រ​បក្ស​ប្រឆាំង​ថៃ​មិន​ពេញ​ចិត្ត​នឹង​លោក ហ៊ុន សែន ចំពោះ​ការ​ដឹកនាំ​បែប​ផ្ដាច់ការ​ព្រៃផ្សៃ

ដោយ ឌឹ ខេមបូឌា ដេលី

បទវិភាគ

អតីត​មេដឹកនាំ​បក្ស​ប្រឆាំង​លោក សម រង្ស៊ី អះអាង​ថា ពលរដ្ឋ​ថៃ​គ្រប់​មជ្ឈដ្ឋាន​ដែល​គាំទ្រ​គណបក្ស​ប្រឆាំង​ថៃ​ទើប​នឹង​ឈ្នះ​ឆ្នោត​កាលពី​ពេល​ថ្មីៗ​នេះ បាន​សម្ដែង​ការ​មិន​ពេញចិត្ត​នឹង​នាយករដ្ឋមន្ត្រី​ខ្មែរ​លោក ហ៊ុន សែន ដោយសារតែ​ពួកគេ​បាន​ចាត់ទុក​ថា​លោក ហ៊ុន សែន ជា​មេដឹកនាំ​ដែល​ប្រព្រឹត្ត​អំពើ​ផ្ដាច់ការ និង​ព្រៃផ្សៃ​លើ​ពលរដ្ឋ​ខ្លួនឯង។

លោក សម រង្ស៊ី បាន​សរសេរ​លើ​ទំព័រ​ហ្វេសប៊ុក​របស់​លោក​កាលពី​ថ្ងៃទី​៤ មិថុនា ថា បណ្ដាញ​សង្គម​ព័ត៌មាន​របស់​ប្រទេស​ថៃ បាន​នាំគ្នា​ចុះផ្សាយ​ថា មេដឹកនាំ​ខ្មែរ​លោក ហ៊ុន សែន កំពុងតែ​ធ្វើ​រឿង​មិន​ត្រឹមត្រូវ​ក្នុង​ការ​ព្យាយាម​កម្ចាត់​រូបលោក​ដោយ​ប្រើ​កាំភ្លើង​ធុន BM-21 អំឡុង​ពេល​ដែល​លោក​មាន​វត្តមាន​ក្នុង​ប្រទេស​ម៉ាឡេស៊ី និង​បន្ត​ចូល​ទឹកដី​ថៃ ដើម្បី​ឆ្ពោះ​ទៅ​ប្រទេស​កម្ពុជា​កាលពី​ពេល​ថ្មីៗ​នេះ។

ការ​អះអាង​នេះ ធ្វើឡើង​បន្ទាប់ពី​មេដឹកនាំ​បក្ស​កាន់​អំណាច​លោក ហ៊ុន សែន គំរាម​បាញ់​លោក សម រង្ស៊ី ដោយ​គ្រាប់ BM-21 ប្រសិនបើ​លោក សម រង្ស៊ី ហ៊ាន​ឈាន​ជើង​ចូល​ទឹកដី​កម្ពុជា​មែន​នោះ។

បន្ទាប់ពី​ការ​គំរាម​នេះ សារព័ត៌មាន​ក្នុង​ប្រទេស​ថៃ បាន​នាំគ្នា​ចុះផ្សាយ​យ៉ាង​ព្រោងព្រាត​អំពី​ការ​គំរាម​ប្រហារ​ជីវិត​អ្នក​នយោបាយ​ប្រឆាំង​របស់​ប្រទេស​កម្ពុជា​ពេញ​ប្រទេស​ថៃ​តែម្តង។

ក្នុង​ពិធី​សម្ពោធ​ស្ពាន​អាកាស​ឫស្សីកែវ កាលពី​ថ្ងៃទី​៣១ ខែ​ឧសភា ឆ្នាំ​២០២៣ បុរស​ខ្លាំង​ក្រាញ​អំណាច​ត​ពូជ​នៅ​កម្ពុជា លោក ហ៊ុន សែន បាន​គំរាម​បាញ់​លោក សម រង្ស៊ី ដោយ​គ្រាប់ BM-21 ប្រសិនបើ​លោក សម រង្ស៊ី ហ៊ាន​ឈាន​ជើង​ចូល​ទឹកដី​កម្ពុជា​វិញ។

ក្រុម​អ្នក​សង្កេតការណ៍​លើកឡើង​ថា ល្បែង​នយោបាយ​របស់​លោក ហ៊ុន សែន និង​លោក សម រង្ស៊ី មិន​សូវ​ខុស​គ្នា​ប៉ុន្មាន​នោះ​ទេ។ ជាក់ស្តែង កាលពី​ថ្ងៃទី​៩ ខែ​វិច្ឆិកា ឆ្នាំ​២០១៩ ក្នុង​ផែនការ​មាតុភូមិ​និវត្តន៍​របស់​លោក សម រង្ស៊ី មេដឹកនាំ​បក្ស​ប្រឆាំង​រូប​នេះ​ក៏​បាន​អំពាវនាវ​ឱ្យ​ពលរដ្ឋ​ខ្មែរ និង​កងកម្លាំង​ប្រដាប់​អាវុធ​ងើប​ឡើង​ប្រើ​កាណុង​កាំភ្លើង​បែរ​សំដៅ​ទៅ​រក​មេដឹកនាំ​បក្ស​កាន់​អំណាច​លោក ហ៊ុន សែន ដើម្បី​ផ្តួល​រំលំ​រដ្ឋាភិបាល​ដែល​កំពុង​ដឹកនាំ​ដោយ​បក្ស​ប្រជាជន​កម្ពុជា​សព្វថ្ងៃ​នេះ​ដែរ។

ដោយសារតែ​បញ្ហា​នេះ លោក សម រង្ស៊ី បាន​រង​នូវ​ការ​ចោទប្រកាន់​ពី​បទ​ឧបឃាត និង​ត្រូវ​បាន​កាត់ទោស​ឲ្យ​ជាប់​ពន្ធនាគារ​រយៈពេល ២៥​ឆ្នាំ ព្រមទាំង​ដកហូត​សិទ្ធិ​បោះឆ្នោត និង​សិទ្ធិ​ឈរឈ្មោះ​ឲ្យ​គេ​បោះឆ្នោត​ឱ្យ​ថែម​ទៀត។

ការ​ធ្វើ​នយោបាយ​រវាង​អតីត​មេដឹកនាំ​បក្ស​ប្រឆាំង​លោក សម រង្ស៊ី និង​មេដឹកនាំ​បក្ស​កាន់​អំណាច​លោក ហ៊ុន សែន រយៈពេល​ជាង ៣០​ឆ្នាំ​មក​នេះ ត្រូវ​គេ​មើល​ឃើញ​ថា មាន​ពេល​ខ្លះ​ពួកគេ​ឈ្លោះ​គ្នា​ស៊ី​សាច់​ហុត​ឈាម ប៉ុន្តែ​មាន​ពេល​ខ្លះ​ពួកគេ​ក៏​ផ្អែមល្ហែម​ចាក់​ទឹក​មិន​លិច​ជាមួយ​គ្នា​ដែរ ប៉ុន្តែ​ទាំង​ជម្លោះ និង​ការ​សម្របសម្រួល​គ្នា​ខាង​នយោបាយ​របស់​មេដឹកនាំ​នយោបាយ​ទាំង​ពីរ​នាក់​នេះ មិន​ដែល​បាន​ផ្តល់​ផលប្រយោជន៍​ឲ្យ​ប្រទេស​ជាតិ​ម្តង​ណា​ឡើយ។

ជាក់ស្តែង នៅ​ពេល​ដែល​ពួកគេ​មាន​ជម្លោះ​នយោបាយ​ជាមួយ​គ្នា មេដឹកនាំ​បក្ស​កាន់​អំណាច​លោក ហ៊ុន សែន តែង​បញ្ជា​ឲ្យ​ចាប់​ខ្លួន​អ្នកគាំទ្រ​លោក សម រង្ស៊ី ដាក់​គុក​ជា​ហូរហែ ដូចជា​អំឡុង​ឆ្នាំ​២០១៩ ដែល​លោក សម រង្ស៊ី ប្រកាស​ធ្វើ​មាតុភូមិ​និវត្តន៍ និង​អំពាវនាវ​ឲ្យ​កងកម្លាំង​ប្រដាប់​អាវុធ​បះបោរ​ផ្តួល​រំលំ​រដ្ឋាភិបាល​កម្ពុជា លោក ហ៊ុន សែន បាន​បញ្ជា​ឲ្យ​សមត្ថកិច្ច​ចាប់​ខ្លួន​សកម្មជន​បក្ស​ប្រឆាំង​ដាក់​គុក​រាប់​រយ​នាក់ ក្នុង​នោះ​មាន​អ្នក​ខ្លះ​កំពុង​ត្រូវ​បាន​ឃុំ​ខ្លួន​ក្នុង​ពន្ធនាគារ​រហូត​ដល់​ពេលនេះ។

យ៉ាងណា​ក៏ដោយ នៅ​ពេល​ដែល​ពួកគេ​ត្រូវរ៉ូវ​គ្នា និង​មាន​ការ​សម្របសម្រួល​នយោបាយ​គ្នា​ហើយ​នោះ លោក សម រង្ស៊ី ត្រូវ​គេ​ដឹង​ថា​ជារឿយៗ​តែង​បំពេញ​មហិច្ឆតា​នយោបាយ​ឲ្យ​លោក ហ៊ុន សែន ជានិច្ច ដូចជា​ការ​ដក​ពាក្យ​បណ្តឹង​ពី​តុលាការ​ក្រុង​ញ៉ូវយ៉ក ដែល​គាត់​បាន​ប្តឹង​លោក ហ៊ុន សែន ពាក់ព័ន្ធ​នឹង​ការ​គប់​គ្រាប់បែកដៃ​លើ​ហ្វូង​បាតុករ​កាលពី​ថ្ងៃទី​៣០ ខែ​មីនា ឆ្នាំ​១៩៩៧ ជា​ថ្នូរ​នឹង​ការ​លើកលែង​ទោស​ពី​លោក ហ៊ុន សែន ដើម្បី​ឲ្យ​គាត់​អាច​វិលត្រឡប់​ទៅ​ប្រទេស​កម្ពុជា​វិញ។

ក្រៅពី​ដក​ពាក្យបណ្ដឹង​នៅ​តុលាការ​ក្រុង​ញ៉ូវយ៉ក លោក សម រង្ស៊ី ក៏​បាន​ជួយ​កែ​រដ្ឋធម្មនុញ្ញ​ពី ២​ភាគ​៣ ទៅ​ជា ៥០​ភាគរយ​បូក​១ ដែល​ជា​មូលហេតុ​ជួយ​ឲ្យ​លោក ហ៊ុន សែន កាន់តែ​ក្តោប​ក្តាប់​អំណាច​បាន​ទាំងស្រុង​រហូត​ដល់​សព្វថ្ងៃ​នេះ។

ក្រុម​អ្នក​រិះគន់​ខ្លះ​លើកឡើង​ថា ការ​ប្រើ​វោហារសាស្ត្រ​វាយប្រហារ​លោក ហ៊ុន សែន ពី​ចម្ងាយ​ដែល​លោក សម រង្ស៊ី តែងតែ​ធ្វើ​កន្លងមក មិន​គ្រាន់តែ​មិន​អាច​ដោះស្រាយ​បញ្ហា​ជាប់​គាំង​នយោបាយ​របស់​កម្ពុជា​បាន​ទេ ប៉ុន្តែ​វា​នឹង​រុញ​ស្ថានភាព​វិបត្តិ​នយោបាយ​សព្វថ្ងៃ​នេះ​ឲ្យ​កាន់តែ​ធ្ងន់ធ្ងរ​ឡើងៗ​ទៅវិញ​ប៉ុណ្ណោះ៕

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស