37 C
Phnom Penh

រដ្ឋាភិបាល​អនុញ្ញាត​ឱ្យ​មន្ត្រី​រាជការ​និង​កម្មករ​ឈប់​សម្រាក​៣​ថ្ងៃ​អំឡុង​ពេល​បោះឆ្នោត​ជាតិ​ខែ​ក្រោយ​នេះ

ដោយ ឌឹ ខេមបូឌា ដេលី

បទវិភាគ

រដ្ឋាភិបាល​កម្ពុជា​បាន​សម្រេច​ឲ្យ​មន្ត្រី​រាជការ កម្មករ និយោជិត​ទូទាំង​ប្រទេស​ឈប់​សម្រាក ៣​ថ្ងៃ ដើម្បី​ឲ្យ​ពួកគេ​មាន​ពេល​គ្រប់គ្រាន់​សម្រាប់​ចូលរួម​បោះឆ្នោត​ជ្រើសតាំង​តំណាងរាស្ត្រ​នៅ​ថ្ងៃ​អាទិត្យ ទី​២៣ ខែ​កក្កដា ឆ្នាំ​២០២៣ ខាងមុខ​នេះ ដោយ​មិន​តម្រូវ​ឲ្យ​កាត់​ប្រាក់ឈ្នួល​ឡើយ។

ទីស្ដីការ​គណៈរដ្ឋមន្ត្រី​បាន​ចេញ​លិខិត​មួយ​កាលពី​ទី​៣ មិថុនា ដែល​ត្រូវ​បាន​ផ្សព្វផ្សាយ​នៅ​ថ្ងៃទី​៥ មិថុនា នេះ​ថា ដោយ​ផ្អែក​តាម​ការ​សម្រេច​របស់​ប្រមុខ​រាជរដ្ឋាភិបាល​កម្ពុជា លោក ហ៊ុន សែន បាន​អនុញ្ញាត​ឱ្យ​មន្ត្រី​រាជការ កម្មករ និយោជិត​ឈប់​សម្រាក​ពី​ការងារ​ចំនួន ៣​ថ្ងៃ​ដោយ​គិត​ចាប់ពី​ថ្ងៃទី​២២ ដល់​ថ្ងៃទី​២៤ ខែ​កក្កដា ឆ្នាំ​២០២៣ ដើម្បី​ឲ្យ​ពួកគេ​មាន​ពេល​គ្រប់គ្រាន់​សម្រាប់​ការ​ចូលរួម​បោះឆ្នោត​ជ្រើសតាំង​តំណាងរាស្ត្រ​នៅ​ថ្ងៃ​អាទិត្យ ទី​២៣ ខែ​កក្កដា ឆ្នាំ​២០២៣ ខាងមុខ​នេះ។

ដំណើរការ​នៃ​ការ​បោះឆ្នោត​ជាតិ​អាណត្តិ​ទី​៧ នឹង​ប្រព្រឹត្ត​ទៅ​នៅ​ថ្ងៃ​អាទិត្យ ទី​២៣ ខែ​កក្កដា ឆ្នាំ​២០២៣ ប៉ុន្តែ​ការ​បោះឆ្នោត​នេះ​មិន​មាន​ការ​ចូលរួម​ពី​អ្នក​សង្កេតការណ៍​អន្តរជាតិ​នោះ​ទេ ដោយសារ​តែ​ពួកគេ​ចាត់ទុក​ថា​ជា​ការ​បោះឆ្នោត​ដែល​មិន​ប្រកប​ដោយ​សេរី ត្រឹមត្រូវ និង​យុត្តិធម៌ ព្រមទាំង​គ្មាន​តម្លាភាព​ទៀត​ផង។

ក្នុង​ពិធី​ជួប​ជាមួយ​កម្មករ​និយោជិត​ក្នុង​ស្រុក​ពញាឮ ខេត្ត​កណ្ដាល កាលពី​ថ្ងៃទី​៣ ខែ​មិថុនា លោក ហ៊ុន សែន អះអាង​ថា ការ​បោះឆ្នោត​ជាតិ​នា​ពេល​ខាងមុខ​នេះ ទោះ​មិន​មាន​ការ​ចូលរួម​សង្កេត​ពី​សហគមន៍​អន្តរជាតិ​ក៏ដោយ ក៏​គ្មាន​បញ្ហា​ដែរ។

លោក ហ៊ុន សែន បញ្ជាក់​ថា អ្វី​ដែល​សំខាន់ គឺ​ឱ្យ​តែ​មាន​ពលរដ្ឋ​ទៅ​បោះឆ្នោត មាន​គណៈកម្មាធិការ​ជាតិ​រៀបចំ​ការ​បោះឆ្នោត មាន​ព្រះមហាក្សត្រ​កោះ​ប្រជុំ​សភា មាន​ការ​បង្កើត​រាជរដ្ឋាភិបាល និង​ការ​ឡាយ​ព្រះហស្តលេខា​របស់​ព្រះមហាក្សត្រ នោះ​រដ្ឋាភិបាល​ថ្មី​អាច​ដំណើរការ​បាន​ដោយ​ស្រប​ច្បាប់​ហើយ មិនមែន​ទាល់​តែ​មាន​សហគមន៍​អន្តរជាតិ​មក​សង្កេតការណ៍​បោះឆ្នោត ទើប​ធ្វើ​ឲ្យ​មាន​រដ្ឋាភិបាល​ស្រប​ច្បាប់​នោះ​ទេ។

យ៉ាងណា​ក៏ដោយ ស្ថានទូត​បារាំង​ប្រចាំ​នៅ​កម្ពុជា បាន​លើកឡើង​កាលពី​ពេល​ថ្មីៗ​នេះ​ថា សេចក្តី​ថ្លែងការណ៍​របស់​សហភាព​អឺរ៉ុប និង​បារាំង នៅតែ​បន្ត​អំពាវនាវ​ឱ្យ​កម្ពុជា​រៀបចំ​នូវ​ការ​បោះឆ្នោត​មួយ​ដោយ​សេរី តម្លាភាព និង​ពហុបក្ស ស្របតាម​ខ្លឹមសារ​នៃ​កិច្ចព្រមព្រៀង​ទីក្រុង​ប៉ារីស ឆ្នាំ​១៩៩១ និង​រដ្ឋធម្មនុញ្ញ​របស់​កម្ពុជា។

ចំណែក​មន្ត្រី​ជាន់ខ្ពស់​របស់​អង្គការ​ឃ្លាំមើល​សិទ្ធិមនុស្ស (Human Rights Watch) លោក ហ្វីល រ៉ូបឺសុន កាលពី​ពាក់កណ្តាល​ខែ​ឧសភា បាន​ចាត់ទុក​ការ​បោះឆ្នោត​ជាតិ​នៅ​កម្ពុជា​ដែល​គ្មាន​គណបក្ស​ប្រឆាំង​ចូលរួម​នៅ​ខែ​កក្កដា ឆ្នាំ​២០២៣ ខាងមុខ​នេះ ថា​គ្រាន់តែ​ជា​ការ​បោះឆ្នោត​បែប​កំប្លុកកំប្លែង​ដែល​លោក ហ៊ុន សែន កំពុង​ទាញ​ឱ្យ​ធ្លាក់​ទៅ​ក្នុង​ការ​ដឹកនាំ​ដូច​ប្រទេស​កូរ៉េខាងជើង​ប៉ុណ្ណោះ។

ទាក់ទិន​នឹង​បញ្ហា​នេះ កាលពី​អំឡុង​ខែ​មីនា ឆ្នាំ​២០២៣ ប្រធាន គ.ជ.ប លោក ប្រាជ្ញ ច័ន្ទ បាន​ស្នើ​មន្ត្រី​ជាន់ខ្ពស់​នៃ​ក្រសួង​ការបរទេស​បារាំង ឱ្យ​បញ្ជូន​អ្នក​សង្កេតការណ៍​របស់​ខ្លួន​មក​ពិនិត្យ និង​សង្កេត​មើល​ការ​បោះឆ្នោត​ជាតិ​នៅ​កម្ពុជា​ដែរ ប៉ុន្តែ​បារាំង​នៅ​មិនទាន់​ឆ្លើយតប​ថា តើ​នឹង​បញ្ជូន ឬ​មិន​បញ្ជូន​អ្នក​សង្កេតការណ៍​របស់​គេ​មក​កម្ពុជា​ដើម្បី​ចូលរួម​ការ​បោះឆ្នោត​ខាងមុខ​នេះ​នៅឡើយ​ទេ​រហូត​ដល់​ពេលនេះ។

ជាង​នេះ​ទៀត គ.ជ.ប ក៏​ធ្លាប់​បាន​បញ្ជាក់​កាលពី​ពេល​ថ្មីៗ​នេះ​ដែរ​ថា ក្រៅពី​ប្រទេស​បារាំង រដ្ឋាភិបាល​កម្ពុជា​ក៏​បាន​អញ្ជើញ​អ្នក​សង្កេតការណ៍​មកពី​ប្រទេស​អង់គ្លេស (U.K) អាល្លឺម៉ង់ (Germany) និង​ប៉ាឡេស្ទីន (Palestine) ផង​ដែរ ប៉ុន្តែ​ប្រទេស​ទាំងនោះ​ក៏​មិនទាន់​ឆ្លើយតប​មក​កម្ពុជា​វិញ​ថែម​ទៀត។

ចាប់តាំងពី​ឆ្នាំ​១៩៩៣ រហូត​ដល់​ឆ្នាំ​២០១៨ កន្លងទៅ កម្ពុជា​បាន​រៀបចំ​ឱ្យ​មាន​ការ​បោះឆ្នោត​ជាតិ​ចំនួន ៦​លើក​រួច​មក​ហើយ ប៉ុន្តែ​ការ​បោះឆ្នោត​ដែល​គេ​ចាត់ទុក​ថា​ត្រឹមត្រូវ​នោះ គឺ​មាន​តែ​ការ​បោះឆ្នោត​ដែល​រៀបចំ​ដោយ​អង្គការ​សហប្រជាជាតិ​នៅ​អាណត្តិ​ទី​១ ឆ្នាំ​១៩៩៣ តែប៉ុណ្ណោះ ក្រៅពី​នេះ ដូចជា​អាណត្តិ​ទី​២ ឆ្នាំ​១៩៩៨ អាណត្តិ​ទី​៣ ឆ្នាំ​២០០៣ អាណត្តិ​ទី​៤ ឆ្នាំ​២០០៨ អាណត្តិ​ទី​៥ ឆ្នាំ​២០១៣ និង​អាណត្តិ​ទី​៦ ឆ្នាំ​២០១៨ សុទ្ធសឹងតែ​ជា​ការ​បោះឆ្នោត​ដែល​រង​នូវ​ការ​ចោទប្រកាន់​ថា​ជា​ការ​បោះឆ្នោត​លួច​បន្លំ​របស់​បក្ស​ប្រជាជន​កម្ពុជា​តែប៉ុណ្ណោះ៕

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស