មេដឹកនាំខ្មែរដែលតែងប្រើអំណាចរំលោភច្បាប់នៅកម្ពុជា លោក ហ៊ុន សែន ព្រមានថា សង្គមប្រជាធិបតេយ្យដែលគ្មានការគោរពច្បាប់ គឺជាសង្គមអនាធិបតេយ្យ ខណៈកម្ពុជានៅពេលនេះកំពុងអនុវត្តប្រជាធិបតេយ្យ និងនីតិរដ្ឋបានយ៉ាងល្អពីមួយដំណាក់ទៅមួយដំណាក់។
លោក ហ៊ុន សែន លើកឡើងក្នុងពិធីសម្ពោធអគារថ្មីនៃបណ្ឌិត្យសភាភូមិន្ទយុត្តិធម៌កម្ពុជា ស្ថិតក្នុងរាជធានីភ្នំពេញនៅថ្ងៃទី៦ ខែមិថុនា ឆ្នាំ២០២៣ នេះថា ពិភពលោកទាំងមូលត្រូវដឹកនាំដោយផ្អែកលើច្បាប់ និងនីតិរដ្ឋដូចគ្នាដែរ ព្រោះថាបើការដឹកនាំដែលមិនផ្អែកលើច្បាប់ ហើយបែរជាផ្អែកលើកម្លាំងវិញនោះ ច្បាស់ជាមានការប្រយុទ្ធគ្នានៅទូទាំងពិភពលោកជាមិនខាន។
មេដឹកនាំខ្មែរដែលគ្រប់គ្រងអំណាចផ្ដាច់មុខនៅកម្ពុជា លោក ហ៊ុន សែន អះអាងថា ប្រទេសនីមួយៗប្រសិនបើគ្មានច្បាប់គ្រប់គ្រងឲ្យច្បាស់លាស់ទេ ប្រាកដជាមានការឈ្លានពាន និងរំលោភបំពានគ្នា ដោយប្រទេសខ្លាំងរំលោភបំពានប្រទេសទន់ខ្សោយដោយចៀសមិនរួចនោះឡើយ។
បុរសខ្លាំងរូបនេះបញ្ជាក់ថា កម្ពុជាបានចាប់ផ្តើមក្នុងស្ថានភាពដ៏លំបាកទម្រាំបានល្អប្រសើរដូចសព្វថ្ងៃនេះ ដូច្នេះពលរដ្ឋខ្មែរទាំងអស់ត្រូវតែចូលរួមថែរក្សាសន្តិភាពឲ្យខាងតែបាន ទោះដើរដល់ដំណាក់កាលណាក៏ដោយ។
ការអះអាងនេះ ធ្វើឡើងស្របពេលដែលគេមើលឃើញថា លោក ហ៊ុន សែន ខ្លួនឯងមិនបានអនុវត្តទៅតាមច្បាប់ដែលមានចែងនោះទេ តែបែរជារំលោភច្បាប់បំបិទសិទ្ធិសេរីភាពរបស់ពលរដ្ឋយ៉ាងធ្ងន់ធ្ងរទៅវិញ។
អ្នកប្រឹក្សាយោបល់ផ្នែកអភិវឌ្ឍន៍ផ្នត់គំនិត និងការស្រាវជ្រាវ លោក សេក សុជាតិ ប្រាប់សារព័ត៌មាន The Cambodia Daily នៅថ្ងៃទី៦ មិថុនា នេះថា ការលើកឡើងរបស់លោក ហ៊ុន សែន គឺពិតជាត្រឹមត្រូវសម្រាប់ប្រទេសដែលប្រកាន់លទ្ធិប្រជាធិបតេយ្យ នីតិរដ្ឋ ប៉ុន្តែបញ្ហាគឺនៅត្រង់ថា ការអនុវត្តជាក់ស្តែងនៅកម្ពុជាកន្លងមករហូតដល់សព្វថ្ងៃនេះ គឺមិនបានឆ្លុះបញ្ចាំងពីការអះអាងរបស់ប្រមុខរាជរដ្ឋាភិបាលកម្ពុជានោះឡើយ។
លោក សេក សុជាតិ លើកឡើងថា ការអនុវត្តច្បាប់នៅកម្ពុជាកន្លងមកតែងមានការរិះគន់ជាបន្តបន្ទាប់ថាជាការអនុវត្តដែលមានស្តង់ដារពីរ ក្នុងនោះបក្សក្រៅរដ្ឋាភិបាល សារព័ត៌មានឯករាជ្យ និងមន្ត្រីបក្សក្រៅរដ្ឋាភិបាលខ្លះ ត្រូវបានគាបសង្កត់ និងបំបិទសិទ្ធិសេរីភាពយ៉ាងធ្ងន់ធ្ងរ ដែលមជ្ឈដ្ឋាននានារិះគន់ថា ការអនុវត្តច្បាប់របស់រដ្ឋាភិបាលឯកបក្សសព្វថ្ងៃនេះ គឺលម្អៀងទៅរកបក្សកាន់អំណាច ជាជាងការធានាបាននូវប្រព័ន្ធយុត្តិធម៌របស់ប្រទេសជាតិទាំងមូល។
អ្នកប្រឹក្សាយោបល់ផ្នែកអភិវឌ្ឍន៍ផ្នត់គំនិតរូបនេះបញ្ជាក់ថា បើការអនុវត្តច្បាប់ដូចដែលកម្ពុជាអនុវត្តកន្លងមកនោះ គឺពិតជាមិនអាចធានានូវប្រព័ន្ធយុត្តិធម៌របស់ខ្លួនក្នុងនាមជាប្រទេសដែលប្រកាន់យកលទ្ធិប្រជាធិបតេយ្យ និងនីតិរដ្ឋបានទេ ព្រោះថាការអនុវត្តច្បាប់របស់កម្ពុជាមិនត្រូវបានអនុវត្តដោយស្មើភាពគ្នាចំពោះបុគ្គលគ្រប់រូបនោះឡើយ។
មាត្រា៣១ នៃរដ្ឋធម្មនុញ្ញ ចែងថា ពលរដ្ឋមានភាពស្មើគ្នាចំពោះមុខច្បាប់ ប៉ុន្តែពលរដ្ឋខ្មែរស្ថិតក្រោមការដឹកនាំរបស់បក្សកាន់អំណាចសព្វថ្ងៃនេះ ត្រូវរងនូវការគាបសង្កត់ និងការគំរាមកំហែងយ៉ាងធ្ងន់ធ្ងរពីមេដឹកនាំបក្សកាន់អំណាចលោក ហ៊ុន សែន រហូតឈានដល់ការចាប់ខ្លួនដាក់ពន្ធនាគារថែមទៀត នៅពេលដែលពួកគេប្រើសិទ្ធិដែលចែងក្នុងរដ្ឋធម្មនុញ្ញ តវ៉ាទាមទាររកយុត្តិធម៌ពីការជិះជាន់របស់ពួកអ្នកមានអំណាច។
ក្រុមអ្នកសង្កេតការណ៍លើកឡើងថា កម្ពុជាក្រោមការដឹកនាំរបស់លោក ហ៊ុន សែន ពោរពេញទៅដោយការគំរាមកំហែង ដែលធ្វើឱ្យពលរដ្ឋខ្មែរភ័យខ្លាចគ្រប់ៗគ្នា ព្រោះថារដ្ឋាភិបាលឯកបក្សមួយនេះតែងតែរំលោភរដ្ឋធម្មនុញ្ញ រំលោភកិច្ចព្រមព្រៀងអន្តរជាតិ ជាន់ឈ្លីលទ្ធិប្រជាធិបតេយ្យ រំលោភសិទ្ធិមនុស្សជាអចិន្ត្រៃយ៍ទៅហើយ៕