32 C
Phnom Penh

UN ប្រជុំ​គ្នា​បន្ទាន់​អំពី​មហន្តរាយ​នៃ​ការ​បាក់​ទំនប់​វារីអគ្គិសនី Kakhovka ប្រទេស​អ៊ុយក្រែន

ដោយ ឌឹ ខេមបូឌា ដេលី

បទវិភាគ

ក្រុមប្រឹក្សា​សន្តិសុខ​អង្គការ​សហប្រជាជាតិ​ដែល​មាន ១៥​ប្រទេស បាន​បើក​ប្រជុំ​បន្ទាន់​មួយ​តាម​សំណើ​ប្រទេស​អ៊ុយក្រែន ដើម្បី​ពិនិត្យ​មើល​ទំហំ​ប៉ះពាល់ និង​ការ​បង្ក​វិនាសកម្ម​មនុស្ស​ជាតិ​ទៅ​លើ​ប្រជាជន​អ៊ុយក្រែន ដែល​រងគ្រោះ​ដោយសារ​ទឹក​ជន់​លិច​ស្រុក​ភូមិ​ពី​ការ​បាក់​ទំនប់​វារីអគ្គិសនី Kakhovka នៅ​ក្នុង​តំបន់ Kherson នៃ​ភាគ​ខាងត្បូង​នៃ​ទឹកដី​អ៊ុយក្រែន។

តាម​សារព័ត៌មាន​នៃ​ប្រទេស​អ៊ុយក្រែន Kyiv Post បាន​ឱ្យ​ដឹង​ថា ក្រសួង​ការបរទេស​អ៊ុយក្រែន បាន​បញ្ជូន​សំណើ​របស់​លោក ហ្សេឡេនស្គី ដោយ​ស្នើ​បើក​កិច្ចប្រជុំ​ជាបន្ទាន់​របស់​ក្រុមប្រឹក្សា​សន្តិសុខ​អង្គការ​សហប្រជាជាតិ ដើម្បី​ថ្កោលទោស​រុស្ស៊ី ដែល​ក្រុង​គៀវ ចោទ​ថា​ជា​អ្នក​បង្ក​ឱ្យ​បាក់​ទំនប់​វារីអគ្គិសនី Kakhovka ដោយ​ការ​វាយប្រហារ​កម្ទេច​ទំនប់​ទប់​ទឹក​ដ៏​សំខាន់​មួយ​នេះ។

ក្នុង​សេចក្ដី​ថ្លែងការណ៍​របស់​ក្រសួង​ការបរទេស​អ៊ុយក្រែន បាន​ហៅ​រុស្ស៊ី ជា​រដ្ឋ​ភេរវកម្ម​ដែល​បំផ្លាញ​ទំនប់​វារីអគ្គិសនី​ដ៏​ធំ​មួយ ធ្វើ​ឱ្យ​ប៉ះពាល់​ដល់​ប្រជាជន​អ៊ុយក្រែន​រាប់​ម៉ឺន​នាក់។

តាម​ប្រភព​ព័ត៌មាន​ដដែល​នេះ ប្រតិភូ​ដែល​មក​ចូលរួម​ប្រជុំ​មិន​មែន​មាន​តែ​ប្រទេស​សមាជិក ១៥​រូប​នៃ​ក្រុមប្រឹក្សា​សន្តិសុខ​នោះ​ទេ គឺ​មាន​ប្រតិភូ​តំណាង​នៃ​ទីភ្នាក់ងារ​មនុស្សធម៌​របស់​អង្គការ​សហប្រជាជាតិ និង​ទីភ្នាក់ងារ​ថាមពល​អាតូមិច​អន្តរជាតិ ក៏​ត្រូវ​បាន​អនុញ្ញាត​ចូលរួម​ប្រជុំ​ផង​ដែរ។

តាម​រូបភាព​ដែល​ថត​បាន​ដោយ​ផ្កាយរណប​របស់​ក្រុមហ៊ុន Maxar បាន​បង្ហាញ​ពី​កម្លាំង​ទឹក​វាយ​បុក​យ៉ាង​ខ្លាំង​ជន់​លិច​សហគមន៍​ជាច្រើន​ក្នុង​តំបន់ Kherson ដែល​លិចលង់​ស្រុក​ភូមិ​ដល់ ២៥០០​គីឡូម៉ែត្រ​ក្រឡា​នៅ​ជាប់​នឹង​ទន្លេ Dnipro ហើយ​ប្រជាជន​ជិត ៥​ម៉ឺន​នាក់​រង​ផលវិបាក​ធ្ងន់ធ្ងរ។ ចំណែក​រោងចក្រ​អគ្គិសនី​ក្នុង​តំបន់ Kherson រង​ការ​ជន់​លិច​ជា​ខ្លាំង។ អង្គការ​សហប្រជាជាតិ​បាន​ហៅ​ទឹក​ជន់​លិច​ដ៏​ខ្លាំង​នេះ​ថា​ជា​វិនាសកម្ម​ដ៏​ធ្ងន់ធ្ងរ​ទៅ​លើ​អាយុ​ជីវិត​មនុស្ស​ជាតិ។

ករណី​នេះ ទាំង​រុស្ស៊ី និង​អ៊ុយក្រែន ចោទ​គ្នា​ទៅវិញ​ទៅមក

ទំនប់​វារីអគ្គិសនី Kakhovka ក្នុង​តំបន់ Kherson ជា​ផ្នែក​មួយ​ក្រោម​ការ​កាន់កាប់​ដោយ​កងទ័ព​រុស្ស៊ី ត្រូវ​ខូចខាត​ដោយសារ​ការ​បំផ្ទុះ​គ្រាប់។ ភាគី​រុស្ស៊ី និង​អ៊ុយក្រែន បាន​ចោទ​ទម្លាក់​កំហុស​ដាក់​គ្នា​ទៅវិញ​ទៅមក​ចំពោះ​ការ​បង្ក​ឱ្យ​មាន​ទឹក​ជំនន់​ជន់​លិច​តំបន់ Kherson។

តាម​អភិបាល​ក្រុង Nova Kakhovka ដែល​លើក​បន្តុប​ដោយ​កងទ័ព​រុស្ស៊ី នៅ​តំបន់ Kherson ថា​កងទ័ព​អ៊ុយក្រែន បាន​បាញ់​គ្រាប់កាំភ្លើង​ធំ​សំដៅ​ទៅ​លើ​ទំនប់​នេះ​តាំងពី​យប់​ថ្ងៃ​ចន្ទ ទី​៥ មិថុនា ហើយ​ទីបំផុត គ្រាប់កាំភ្លើង​ធំ​ទាំងនោះ​ធ្លាក់​ចំ​ខ្នង​ទំនប់​វារីអគ្គិសនី​នោះ​តែម្ដង។ រុស្ស៊ី​ក៏​បាន​ថ្កោលទោស​អ៊ុយក្រែន ដោយ​ចាត់ទុក​អ៊ុយក្រែន ថា​មាន​ចេតនា​ធ្វើ​ឱ្យ​ជន់​លិច​តំបន់​ដែល​ស្ថិត​ក្រោម​ការ​កាន់កាប់​ដោយ​កងទ័ព​រុស្ស៊ី។

តែ​បែប​នេះ​ក្ដី ភាគី​អ៊ុយក្រែន បាន​ច្រានចោល ហើយ​វាយបក​វិញ​ថា អ៊ុយក្រែន​មិន​មាន​ផែនការ​កម្ទេច​សេចក្ដី​សុខ​របស់​ប្រជាជន​ខ្លួនឯង​នោះ​ទេ។

មេបញ្ជាការ​កងទ័ព​អ៊ុយក្រែន ប្រចាំ​តំបន់​ខាងត្បូង​បាន​និយាយ​ថា កងទ័ព​រុស្ស៊ី​នៅ​ក្នុង​តំបន់ Kherson ជាប់​ព្រំដែន​អ៊ុយក្រែន-រុស្ស៊ី ជា​អ្នក​បំផ្ទុះ​គ្រាប់ ធ្វើ​ឲ្យ​ខ្នង​ទំនប់​មួយ​ផ្នែក​ត្រូវ​បំផ្លាញ និង​បាក់​ស្រុត បង្ក​ឱ្យ​ធ្លាយ​ទឹក​ជន់​លិច​ជា​ខ្លាំង។ រដ្ឋាភិបាល​អ៊ុយក្រែន ថា​ការ​បំផ្ទុះ​គ្រាប់​បំផ្លាញ​ទំនប់​វារីអគ្គិសនី Kakhovka នៅ​ពេលនេះ ដើម្បី​បង្ក​ឲ្យ​មាន​គ្រោះ​ទឹកជំនន់ គឺជា​ផែនការ​របស់​រុស្ស៊ី សំដៅ​ទប់ស្កាត់​ការ​វាយប្រហារ​ទ្រង់ទ្រាយ​ធំ​របស់​អ៊ុយក្រែន នៅ​តំបន់​ភាគ​ខាងត្បូង​នេះ។

ក្រុម​អ្នក​ជំនាញ​មួយ​ចំនួន​យល់ស្រប​នឹង​ការ​បកស្រាយ​របស់​ភាគី​អ៊ុយក្រែន ដែល​ថា​រុស្ស៊ី​គិត​ថា​កងទ័ព​អ៊ុយក្រែន​អាច​ប្រើ​ទំនប់​វារីអគ្គិសនី Kakhovka ជា​ផ្លូវ​ឆ្លង​ទន្លេ Dnipro ចូល​ទៅ​ខាង​ក្នុង​ដែនដី​ដែល​រុស្ស៊ី កំពុង​កាន់កាប់​នៅ​ក្នុង​តំបន់ Kherson ព្រោះ​ពេល​នេះ​អ៊ុយក្រែន ចាប់ផ្ដើម​វាយបក​ដើម្បី​រំដោះ​ទឹកដី​ពី​រុស្ស៊ី មក​វិញ។

ប្រទេស​អ៊ុយក្រែន មាន​ទំនប់​វារីអគ្គិសនី​សរុប​ចំនួន ៦ ដែល​សាងសង់​ឡើង​នៅ​លើ​ដង​ទន្លេ Dnipro ប្រវែង​ជាង ២​ពាន់​គីឡូម៉ែត្រ​ដែល​ហូរ​កាត់​ប្រទេស​អ៊ុយក្រែន ពី​ព្រំដែន​ប្រទេស​ជិតខាង គឺ​ប្រទេស​បេឡារុស រហូត​ដល់​សមុទ្រ​ខ្មៅ។

ដោយឡែក​ទំនប់​វារីអគ្គិសនី Kakhovka ដែល​មាន​កម្ពស់ ៣០​ម៉ែត្រ និង​ប្រវែង​បណ្តោយ​ជាង ៣​គីឡូម៉ែត្រ បាន​កាត់​ផ្ទៃ​ទឹកទន្លេ Dnipro។ វារីអគ្គិសនី Kakhovka ត្រូវ​បាន​សាងសង់​ឡើង​នៅ​ឆ្នាំ​១៩៥៦ ក្នុង​សម័យ​សហភាព​សូវៀត។

ទំនប់ទឹក Kakhovka ដើរ​តួនាទី​ទប់​ទឹក​ទន្លេ បង្កើត​ជា​អាង​ស្តុក​ទឹក​ដ៏​ធំ​ដើម្បី​ផលិត​អគ្គិសនី​សម្រាប់​ប្រជាជន​អ៊ុយក្រែន នៅ​ក្នុង​តំបន់ Kherson ទាំងមូល។

ទំនប់​វារីអគ្គិសនី Kakhovka បាន​ធ្លាក់​ទៅ​ក្នុង​ដៃ​កងទ័ព​រុស្ស៊ី នៅ​ក្នុង​វគ្គ​ដំបូង​នៃ​សង្គ្រាម​រុស្ស៊ី ឈ្លានពាន​អ៊ុយក្រែន។ តែ​ក្នុង​អំឡុង​ខែ​តុលា ឆ្នាំ​២០២២ តំបន់ Kherson មួយ​ភាគ​ធំ​បាន​ធ្លាក់​មក​ក្នុង​ដៃ​កងទ័ព​អ៊ុយក្រែន វិញ ដោយ​ទ័ព​អ៊ុយក្រែន​វាយ​ទ័ព​រុស្ស៊ី​រត់​ចោល​ក្រុង Kherson ហើយ​ធ្លាក់​ទឹក​ទន្លេ Dnipro។

អ្នកជំនាញ​មើល​ឃើញ​ថា ការ​បំផ្ទុះ​គ្រាប់​វាយបំបាក់​ខ្នង​ទំនប់​វារីអគ្គិសនី Kakhovka នៅ​តំបន់ Kherson នឹង​នាំ​ទៅ​រក​ការ​ប្រែប្រួល​សង្គ្រាម​ដែល​រុស្ស៊ី​ឈ្លានពាន​អ៊ុយក្រែន ចូល​ដល់​ខែ​ទី​១៦ នៅ​ពេលនេះ៕

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស