28 C
Phnom Penh

លោក សម រង្ស៊ី ថា​ការ​រារាំង​បក្ស​ភ្លើង​ទៀន​ជា​ការ​រំលោភ​កិច្ចព្រមព្រៀង​សន្តិភាព​ទីក្រុង​ប៉ារីស

ដោយ ឌឹ ខេមបូឌា ដេលី

បទវិភាគ

អតីត​មេដឹកនាំ​បក្ស​ប្រឆាំង​លោក សម រង្ស៊ី លើកឡើង​ថា ការ​រារាំង​គណបក្ស​ភ្លើង​ទៀន មិន​ឲ្យ​ចូលរួម​ក្នុង​ការ​បោះឆ្នោត​ជាតិ​ឆ្នាំ​២០២៣ ពី​សំណាក់​មេដឹកនាំ​បក្ស​កាន់​អំណាច​លោក ហ៊ុន សែន គឺជា​ការ​រំលោភ​យ៉ាង​ងងើល​លើ​កិច្ចព្រមព្រៀង​សន្តិភាព​ទីក្រុង​ប៉ារីស ដែល​មាន​រដ្ឋាភិបាល​កុម្មុយនីស្ត​ចិន ជា​អ្នក​បញ្ជា​ពីក្រោយ​ខ្នង។

អតីត​មេដឹកនាំ​បក្ស​ប្រឆាំង​លោក សម រង្ស៊ី បាន​សរសេរ​លើ​ទំព័រ​ហ្វេសប៊ុក​របស់​ខ្លួន​កាលពី​ថ្ងៃទី​១៤ មិថុនា ថា កិច្ចព្រមព្រៀង​សន្តិភាព​ទីក្រុង​ប៉ារីស បាន​ចែង​យ៉ាង​ច្បាស់​ដែល​តម្រូវ​ឱ្យ​ប្រទេស​កម្ពុជា​រៀបចំ​ឲ្យ​មាន​ប្រព័ន្ធ​នយោបាយ​ប្រជាធិបតេយ្យ សេរី​ពហុបក្ស តាមរយៈ​នៃ​ការ​បោះឆ្នោត​ដោយ​សេរី និង​យុត្តិធម៌ ដោយ​ឈរ​លើ​ឯករាជភាព និង​អព្យាក្រឹតភាព។

លោក​បន្ថែម​ថា បើ​ផ្អែក​តាម​ស្មារតី​នេះ រដ្ឋាភិបាល​ឯក​បក្ស​របស់​លោក ហ៊ុន សែន មិន​ត្រូវ​បណ្តោយ​ឲ្យ​ចិន​កុម្មុយនីស្ត​ធ្វើ​អ្វីៗ​តាម​ចិត្ត​នៅ​កម្ពុជា​ដូច​សព្វថ្ងៃ​នេះ​ទេ។

អតីត​មេដឹកនាំ​បក្ស​ប្រឆាំង​រូប​នេះ​អះអាង​ថា ចិន​ជា​ប្រទេស​ផ្តល់​កម្ចី និង​ជា​អ្នក​វិនិយោគ​ធំ​ជាងគេ​របស់​កម្ពុជា ក្នុង​នោះ​រដ្ឋាភិបាល​ចិន​មិន​ត្រឹមតែ​មាន​បំណង​វិនិយោគ​នៅ​កម្ពុជា​ប៉ុណ្ណោះ​ទេ ប៉ុន្តែ​ពួកគេ​បាន​ជ្រៀត​ចូល​កិច្ចការ​ផ្ទៃក្នុង​របស់​កម្ពុជា​យ៉ាង​ស៊ីជម្រៅ​ថែម​ទៀត ព្រោះ​តែ​ចិន​ត្រូវការ​កម្ពុជា​ដើម្បី​ប្រែ​ក្លាយ​វា​ទៅ​ជា​បន្ទាយ​យោធា ដែល​ជា​ផ្នែក​មួយ​នៃ​យុទ្ធសាស្ត្រ​ភូមិសាស្ត្រ​នយោបាយ​របស់​ខ្លួន ហើយ​ចិន​ក៏​នឹង​មិន​ដោះលែង​កម្ពុជា​ឱ្យ​ចេញពី​ការ​កាន់កាប់​របស់​ខ្លួន​ដែរ។

លោក សម រង្ស៊ី បញ្ជាក់​ថា ចាប់តាំងពី​មាន​ទំនាក់ទំនង​រវាង​រដ្ឋាភិបាល​កុម្មុយនីស្ត​ចិន និង​រដ្ឋាភិបាល​ឯក​បក្ស​របស់​លោក ហ៊ុន សែន កាន់តែ​ស៊ីជម្រៅ ការ​បង្ក្រាប​លើ​អ្នក​ប្រជាធិបតេយ្យ​ការ​រំលោភ​រដ្ឋធម្មនុញ្ញ ការ​រំលោភ​លើ​កិច្ចព្រមព្រៀង​សន្តិភាព​ទីក្រុង​ប៉ារីស ការ​រំលោភ​សិទ្ធិមនុស្ស កាន់តែ​កើតមាន​ឡើង ជាពិសេស​ការ​ទប់ស្កាត់​មិន​ឱ្យ​បក្ស​ប្រឆាំង​ចូលរួម​បោះឆ្នោត​នៅ​ខែ​កក្កដា ឆ្នាំ​២០២៣ ខាងមុខ​នេះ។

លោក​បន្ថែម​ថា ការ​បង្ក្រាប​លើ​អ្នក​ប្រជាធិបតេយ្យ​បែប​នេះ គឺ​ដើម្បី​ឱ្យ​កម្ពុជា​នៅតែ​បន្ត​ដឹកនាំ​ដោយ​ឯក​បក្ស​បន្ត​ទៀត ដែល​ជា​ការ​ផ្តល់​ឱកាស​ឱ្យ​រដ្ឋាភិបាល​កុម្មុយនីស្ត​ចិន​អាច​បន្ត​ការ​ជ្រៀតជ្រែក​កិច្ចការ​ផ្ទៃក្នុង​របស់​កម្ពុជា​បន្ត​ទៀត ជាពិសេស​ការ​កសាង​បន្ទាយ​យោធា​លើ​ទឹកដី​របស់​ខ្មែរ​ទៅ​ថ្ងៃ​អនាគត​តែម្តង។

ការ​អះអាង​នេះ ធ្វើឡើង​ស្រប​ពេល​ដែល​មេដឹកនាំ​បក្ស​កាន់​អំណាច​លោក ហ៊ុន សែន បង្ក្រាប​ទៅ​លើ​ក្រុម​អ្នក​ប្រជាធិបតេយ្យ និង​ធ្វើ​ទុក្ខបុកម្នេញ​កាន់តែ​ខ្លាំង​ឡើងៗ​លើ​បក្ស​ក្រៅ​រដ្ឋាភិបាល​ចាប់តាំងពី​មេដឹកនាំ​ខ្មែរ​រូប​នេះ​មាន​ទំនាក់ទំនង​កាន់តែ​ខ្លាំង​ជាមួយ​រដ្ឋាភិបាល​ចិន​មក។

អតីត​អគ្គទីប្រឹក្សា​ស្ថានទូត​ខ្មែរ​ប្រចាំ​ប្រទេស​ឥណ្ឌូនេស៊ី បណ្ឌិត សូ ណារ៉ូ ធ្លាប់​បាន​លើកឡើង​ក្នុង​កម្មវិធី Idea Talk នៃ​សារព័ត៌មាន The Cambodia Daily មុន​ពេល​នឹង​លោក​វិលត្រឡប់​ទៅ​ចូលរួម​ជាមួយ​រដ្ឋាភិបាល​លោក ហ៊ុន សែន កាលពី​ពេល​កន្លងទៅ​ថា រដ្ឋាភិបាល​ចិន​បាន​លូក​ដៃ​យ៉ាង​ជ្រៅ​ចូល​ទៅ​ជ្រៀតជ្រែក​ប្រព័ន្ធ​ដឹកនាំ​របស់​ប្រទេស​កម្ពុជា ជាពិសេស​ការ​រំលាយ​គណបក្ស​សង្គ្រោះ​ជាតិ គឺជា​ចេតនា​របស់​ចិន ដែល​ធ្វើ​ឱ្យ​កម្ពុជា​កាន់តែ​ឃ្លាត​ឆ្ងាយ​ពី​របប​ប្រជាធិបតេយ្យ​ដែល​កម្ពុជា​កំពុង​ប្រកាន់​យក​សព្វថ្ងៃ​នេះ។

បណ្ឌិត សូ ណារ៉ូ បញ្ជាក់​ថា ការ​ជ្រៀតជ្រែក​របស់​រដ្ឋាភិបាល​កុម្មុយនីស្ត​ចិន ចូល​កិច្ចការ​ផ្ទៃក្នុង​របស់​កម្ពុជា បាន​ធ្វើ​ឱ្យ​ប្រព័ន្ធ​នយោបាយ​ប្រជាធិបតេយ្យ សេរី​ពហុបក្ស​នៅ​កម្ពុជា​តាមរយៈ​នៃ​ការ​បោះឆ្នោត​ដោយ​សេរី និង​យុត្តិធម៌ ដែល​ត្រូវ​ឈរ​លើ​ឯករាជភាព និង​អព្យាក្រឹតភាព កាន់តែ​ធ្លាក់​ចុះ​ខ្លាំង​ឡើងៗ​ទៅ​ថ្ងៃ​អនាគត។

កិច្ចព្រមព្រៀង​សន្តិភាព​ក្រុង​ប៉ារីស ឆ្នាំ​១៩៩១ មិនមែន​ជា​កិច្ចព្រមព្រៀង​តែ​មួយ​ទេ គឺ​មាន​កិច្ចព្រមព្រៀង​ពីរ និង​សេចក្តី​ថ្លែងការណ៍​មួយ។

កិច្ចព្រមព្រៀង​ទី​១ ស្តីអំពី​ការ​ដោះស្រាយ​ជម្លោះ​នៅ​កម្ពុជា ក្នុង​នោះ​តម្រូវ​ឱ្យ​កម្ពុជា​កំណត់​គោលការណ៍​នៃ​រដ្ឋធម្មនុញ្ញ​ថ្មី​របស់​កម្ពុជា ដូចជា​គោលការណ៍​ប្រជាធិបតេយ្យ​សេរី​ពហុបក្ស ការ​គោរព​សិទ្ធិ​សេរីភាព​ជា​មូលដ្ឋាន​របស់​ប្រជាជន និង​គោលការណ៍​នីតិរដ្ឋ ជាដើម។

ចំណែក​កិច្ចព្រមព្រៀង​ទី​២ អំពី​ការ​គោរព​ឯករាជ្យ អធិបតេយ្យ បូរណភាព និង​អព្យាក្រឹត​របស់​កម្ពុជា ព្រោះ​ថា​តាមរយៈ​កិច្ចព្រមព្រៀង​នេះ កម្ពុជា និង​ប្រទេស​ជា​ហត្ថលេខី​ផ្សេង​ទៀត​មាន​កាតព្វកិច្ច​គោរព​ឯករាជ្យ អធិបតេយ្យ បូរណភាព និង​អព្យាក្រឹត​គ្នា​ទៅវិញ​ទៅមក។

ដោយឡែក​សេចក្តី​ថ្លែងការណ៍ គឺ​បាន​លើកឡើង​ស្តីអំពី​ការ​កសាង​ប្រទេស​កម្ពុជា​ឡើងវិញ​ទៅ​ថ្ងៃ​មុខ។

មាត្រា​១ នៃ​រដ្ឋធម្មនុញ្ញ​របស់​កម្ពុជា ចែង​ថា ប្រទេស​កម្ពុជា​ប្រកាន់​យក​របប​ប្រជាធិបតេយ្យ​សេរី​ពហុបក្ស ជា​រដ្ឋ​ឯករាជ្យ អធិបតេយ្យ អព្យាក្រឹត អចិន្ត្រៃយ៍ មិន​ចូល​បក្ស​សម្ព័ន្ធ៕

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស