ក្រសួងមហាផ្ទៃ បិទសមាគមសម្ព័ន្ធសហគមន៍កសិករកម្ពុជា (CCFC) ដោយផ្អាកមិនឲ្យធ្វើសកម្មភាពជាបណ្ដោះអាសន្នរហូតដល់តុលាការបញ្ចប់នីតិវិធីជាស្ថាពរ ទោះបីប្រធានសមាគមលោក ថេង សាវឿន និងសហការី ២រូបទៀតត្រូវតុលាការដោះលែងឲ្យនៅក្រៅឃុំ បន្ទាប់ពីសុំទោសលោក ហ៊ុន សែន ដោយទម្លាក់កំហុសលើខ្លួនឯងក៏ដោយ។
សេចក្ដីសម្រេចរបស់ក្រសួងមហាផ្ទៃ នាខែមិថុនា ឆ្នាំ២០២៣ ឲ្យដឹងថា ការផ្អាកសមាគមសម្ព័ន្ធសហគមន៍កសិករកម្ពុជាដែលមានទីស្នាក់ការកណ្ដាលនៅភូមិភ្នំពេញថ្មី សង្កាត់ភ្នំពេញថ្មី ខណ្ឌសែនសុខ ជាបណ្ដោះអាសន្ន រហូតដល់តុលាការបញ្ចប់នីតិវិធីជាស្ថាពរក្នុងសំណុំរឿងព្រហ្មទណ្ឌចុះថ្ងៃទី២០ ខែឧសភា ឆ្នាំ២០២៣ របស់អយ្យការអមសាលាដំបូងខេត្តរតនគិរី។ ក្រសួងបញ្ជាក់ថា សេចក្ដីសម្រេចផ្អាក CCFC នឹងត្រូវអនុវត្តចាប់ពីថ្ងៃចុះហត្ថលេខានេះតទៅ។
ការផ្អាក ឬបិទសមាគមសម្ព័ន្ធសហគមន៍កសិករកម្ពុជា (CCFC) នេះ បន្ទាប់ពីតុលាការខេត្តរតនគិរី ចោទប្រកាន់លើប្រធានសមាគម លោក ថេង សាវឿន និងសហការី ២រូបកាលពីថ្ងៃទី១៨ ខែឧសភា កន្លងទៅពីបទ «ញុះញង់ និងរួមគំនិតក្បត់» ក្រោមហេតុផលថា ញុះញង់ដល់កសិករឲ្យងើបបះបោរ និងឈានទៅផ្ដួលរំលំរដ្ឋាភិបាលដែលដឹកនាំដោយលោក ហ៊ុន សែន នាពេលបច្ចុប្បន្ន។
តែយ៉ាងណា អ្នកទាំង ៣នាក់ត្រូវបានតុលាការដោះលែងឲ្យនៅក្រៅឃុំបណ្ដោះអាសន្នកាលពីចុងខែឧសភា ឆ្នាំ២០២៣ បន្ទាប់ពីបានសុំទោសលោក ហ៊ុន សែន និងប្រកាសផ្ដាច់ខ្លួនពីផ្ទះសាមគ្គី។ លើសពីនេះ ពួកគេបានទម្លាក់កំហុសលើខ្លួនឯងថា ពួកគេជឿតាមការចង្អុលរបស់បរទេសមួយចំនួន និងក្រុមអ្នកនយោបាយប្រឆាំងមួយចំនួនក្នុងរូបភាពញុះញង់បង្កចលាចលធ្វើឲ្យបាត់បង់ និងប៉ះពាល់សណ្ដាប់ធ្នាប់សង្គម និងសាធារណៈ ប្រមូលផ្ដុំសមាជិកក្នុងគោលបំណងផ្ដួលរំលំរដ្ឋាភិបាលដោយមិនដឹងខ្លួន។
ការចេញសុំទោសរបស់លោក ថេង សាវឿន និងសហការីនេះ បន្ទាប់ពីលោក ហ៊ុន សែន បានគំរាមថា លោកនឹងមិនលើកលែងដាច់ខាតចំពោះបុគ្គល ឬក្រុមណាដែលមានបំណងធ្វើបដិវត្តន៍ដើម្បីដណ្ដើមអំណាចពីគ្រួសាររបស់លោក។ ក្រៅពីគំរាមហើយ នៅថ្ងៃទី២៧ ខែឧសភា ដដែល បុរសខ្លាំងក្រាញអំណាចនៅកម្ពុជា ស្នើទៅបណ្ដាប្រទេសនានាឲ្យឈប់ផ្ដល់ថវិកាដល់អង្គការសង្គមស៊ីវិលនៅកម្ពុជាផងដែរ។
រដ្ឋលេខាធិការ និងជាអ្នកនាំពាក្យក្រសួងមហាផ្ទៃ លោក ខៀវ សុភ័គ បញ្ជាក់ប្រាប់សារព័ត៌មានក្នុងស្រុកថា ក្រសួងនឹងពិចារណាជាថ្មីលើរឿងផ្អាកសមាគម CCFC នៅពេលតុលាការខេត្តរតនគិរី បញ្ចប់សំណុំរឿងរបស់ថ្នាក់ដឹកនាំ និងមន្ត្រីរបស់សមាគមនេះ។
អ្នកនាំពាក្យសាលាដំបូងខេត្តរតនគិរី លោក កែវ ពិសុទ្ធ មិនទាន់បញ្ជាក់បានថាតើតុលាការនឹងជំនុំជម្រះសំណុំរឿងរបស់ថ្នាក់ដឹកនាំ និងមន្ត្រីសមាគម CCFC ពេលណានោះទេ ព្រោះតុលាការត្រូវការពេលពិនិត្យឯកសារពាក់ព័ន្ធមួយចំនួនទៀត។
គួរបញ្ជាក់ថា សមាគមសម្ព័ន្ធសហគមន៍កសិករកម្ពុជាដែលលោក ថេង សាវឿន បង្កើតឡើង ជាស្ថាប័នសមាជិកភាពសហគមន៍កសិករមូលដ្ឋានរងគ្រោះដោយធ្វើការរួមគ្នា ក្នុងគោលបំណងដោះស្រាយបញ្ហាដីធ្លី ធនធានធម្មជាតិ និងការបណ្ដេញដោយបង្ខំដែលកើតចេញពីគម្រោងអភិវឌ្ឍន៍នានា។
សមាគមនេះចុះបញ្ជីនៅក្រសួងមហាផ្ទៃ កាលពីឆ្នាំ២០១៥ មានទស្សនវិស័យចង់ឃើញប្រជាកសិកររស់នៅសមរម្យ ថ្លៃថ្នូរ មានសិទ្ធិសេរីភាពពេញលេញក្នុងការចូលរួមកែលំអឲ្យមានអភិបាលកិច្ចមូលដ្ឋាន៕