28.3 C
Phnom Penh

រដ្ឋសភា​គ្រោង​បើក​កិច្ចប្រជុំ​ពេញ​អង្គ​អនុម័ត​កែ​ច្បាប់​បោះឆ្នោត​នៅ​ចុង​សប្ដាហ៍​នេះ

ដោយ ឌឹ ខេមបូឌា ដេលី

បទវិភាគ

រដ្ឋសភា​ឯក​បក្ស​គ្រោង​បើក​កិច្ចប្រជុំ​ពេញ​អង្គ​នៅ​ចុង​សប្ដាហ៍​នេះ ដើម្បី​ពិនិត្យ និង​អនុម័ត​សេចក្តី​ព្រាង​វិសោធនកម្ម​ច្បាប់​ស្ដីពី​ការ​បោះឆ្នោត បន្ទាប់ពី​លោក ហ៊ុន សែន បាន​បញ្ជា​កាលពី​ពេល​ថ្មីៗ​នេះ។

សេចក្ដី​ប្រកាស​ព័ត៌មាន​ស្ដីពី​លទ្ធផល​នៃ​កិច្ចប្រជុំ​គណៈកម្មាធិការ​អចិន្ត្រៃយ៍​នៃ​រដ្ឋសភា​នា​ថ្ងៃទី​២១ ខែ​មិថុនា នេះ ឲ្យ​ដឹង​ថា អង្គប្រជុំ​បាន​កំណត់​បន្ត​បើក​កិច្ចប្រជុំ​រដ្ឋសភា​លើក​ទី​៩ នីតិកាល​ទី​៦ នា​ថ្ងៃទី​២៣ ខែ​មិថុនា ឆ្នាំ​២០២៣ នៅ​វេលា​ម៉ោង ៨​ព្រឹក ដឹកនាំ​កិច្ចប្រជុំ​ដោយ​លោក ហេង សំរិន ប្រធាន​រដ្ឋសភា ដើម្បី​ពិនិត្យ និង​អនុម័ត​សេចក្តី​ព្រាង​វិសោធនកម្ម​ច្បាប់​ស្ដីពី​ការ​បោះឆ្នោត។

ការ​ប្រកាស​កំណត់​ថ្ងៃ​អនុម័ត​ដើម្បី​កែ​ច្បាប់​បោះឆ្នោត​ភ្លាមៗ​របស់​រដ្ឋសភា​នេះ បន្ទាប់ពី​បុរស​ខ្លាំង​កាន់​អំណាច​ជិត ៤០​ឆ្នាំ​នៅ​កម្ពុជា លោក ហ៊ុន សែន បាន​បញ្ជា​ទៅ​រដ្ឋមន្ត្រី​ក្រសួង​យុត្តិធម៌ លោក កើត រិទ្ធ រដ្ឋមន្ត្រី​ក្រសួង​មហាផ្ទៃ និង​រដ្ឋសភា ពន្លឿន​កែ​ច្បាប់​បោះឆ្នោត​នេះ​ឲ្យ​បាន​មុន​ការ​បោះឆ្នោត​ជ្រើសតាំង​តំណាងរាស្ត្រ​នៅ​ខែ​កក្កដា ឆ្នាំ​២០២៣ នេះ។

ការ​កែ​ច្បាប់​បោះឆ្នោត​ភ្លាមៗ​នេះ ដោយ​លោក ហ៊ុន សែន ថា​ដើម្បី​ដក​សិទ្ធិ​ពលរដ្ឋ និង​បិទ​ផ្លូវ​អ្នក​នយោបាយ​ប្រឆាំង​មិន​អាច​ចូលរួម​ឈរឈ្មោះ​បោះឆ្នោត បន្ទាប់ពី​ថ្នាក់​ដឹកនាំ និង​សកម្មជន​បក្ស​ប្រឆាំង​នៅ​ក្រៅ​ប្រទេស​បាន​នាំគ្នា​ធ្វើ​យុទ្ធនាការ​អំពាវនាវ​ឲ្យ​ពលរដ្ឋ​ដែល​ទៅ​បោះឆ្នោត​ដោយ​បង្ខំ​ទាំងអស់ គូស​ខ្វែង​លើ​សន្លឹកឆ្នោត​ចោល ដោយសារ​មិន​មាន​គណបក្ស​នយោបាយ​ណា​មួយ​ដែល​ពួកគេ​ពេញចិត្ត។

ការ​ធ្វើ​យុទ្ធនាការ​នេះ បន្ទាប់ពី​គណៈកម្មាធិការ​ជាតិ​រៀបចំ​ការ​បោះឆ្នោត​ក្រោម​បញ្ជា​លោក ហ៊ុន សែន មិន​អនុញ្ញាត​ឲ្យ​គណបក្ស​ភ្លើង​ទៀន​ចូលរួម​ការ​បោះឆ្នោត។

បើ​តាម​ខ្លឹមសារ​សេចក្ដី​ព្រាង​នៃ​ច្បាប់​ស្ដីពី​ការ​បោះឆ្នោត​ជ្រើសតាំង​តំណាងរាស្ត្រ ដែល​រដ្ឋសភា​គ្រោង​នឹង​អនុម័ត​ចុង​សប្ដាហ៍​នេះ នៅ​មាត្រា​១៤២​(ថ្មី) បាន​ចែង​បើក​ផ្លូវ​ឲ្យ គ.ជ.ប ផាក​ពិន័យ​ចំពោះ​ជន​ណា​ដែល​ប្រើ​គ្រប់​មធ្យោបាយ​ទុច្ចរិត​ក្នុង​ការ​រារាំង​ពលរដ្ឋ​ជា​ប្រាក់​ពី ៥.០០០.០០០ (ប្រាំ​លាន) រៀល​ទៅ ២០.០០០.០០០ (ម្ភៃ​លាន) រៀល។

ចេតនា​ទុច្ចរិត ដែល​ចែង​ក្នុង​ខ្លឹមសារ​មាត្រា​១៤២​(ថ្មី) ក្នុង​នោះ ការ​រារាំង ឬ​ញុះញង់​ប្រជាពលរដ្ឋ​ដែល​មាន​សិទ្ធិ​បោះឆ្នោត មិន​ឲ្យ​ទៅ​ចុះឈ្មោះ​បោះឆ្នោត ឬ​រារាំង​មិន​ឲ្យ​ចុះឈ្មោះ​ប្រជាពលរដ្ឋ​ដែល​មាន​សិទ្ធិ​បោះឆ្នោត​ក្នុង​បញ្ជី​បោះឆ្នោត និង​សៀវភៅ​បញ្ជី​បោះឆ្នោត។ លើស​ពី​នេះ ការ​បង្ក​ការ​អុកឡុក ឬ​រារាំង​សកម្មភាព​ជា​ប្រក្រតី​ក្នុង​ទីកន្លែង​សម្រាប់​ការ​ពិនិត្យ​បញ្ជី​ឈ្មោះ និង​ការ​ចុះឈ្មោះ​បោះឆ្នោត នៅ​ក្នុង​អំឡុង​ពេល​នៃ​ការ​ពិនិត្យ​បញ្ជី និង​ចុះឈ្មោះ​បោះឆ្នោត និង​ការ​រារាំង​ពលរដ្ឋ​ដែល​មាន​សិទ្ធិ​បោះឆ្នោត​មិន​ឲ្យ​ទៅ​បោះឆ្នោត រួម​ទាំង​បង្ក​ការ​រំខាន​មិន​ឲ្យ​រាប់​សន្លឹកឆ្នោត​បាន ជាដើម។

ចំណែក​មាត្រា ១៤៣ (ថ្មី) ក៏​បាន​បើក​ផ្លូវ​ឲ្យ​គណៈកម្មាធិការ​ជាតិ​រៀបចំ​ការ​បោះឆ្នោត​លុប​បេក្ខភាព​ឈរឈ្មោះ​របស់​គណបក្ស​នយោបាយ ឬ/ផាក​ពិន័យ​ប្រាក់​ពី ១០​លាន​រៀល​ទៅ ៣០​លាន​រៀល ព្រមទាំង​ដក​សិទ្ធិ​មិន​ឲ្យ​ចូលរួម​បោះឆ្នោត​រយៈពេល ៥​ឆ្នាំ​យ៉ាងតិច ប្រសិនបើ​ល្មើស​នឹង​មាត្រា ១៤២ (ថ្មី)។

ក្រុម​ឃ្លាំមើល​ចាត់ទុក​ការ​កែ​ច្បាប់​បោះឆ្នោត​តាម​បញ្ជា​របស់​មេដឹកនាំ​បក្ស​កាន់​អំណាច​លោក ហ៊ុន សែន ដើម្បី​គាបសង្កត់​មន្ត្រី​បក្ស​ក្រៅ​រដ្ឋាភិបាល​ឲ្យ​ទៅ​បោះឆ្នោត ទាំង​ដែល​មិន​ឲ្យ​គណបក្ស​របស់​ពួកគេ​ឈរឈ្មោះ​បោះឆ្នោត​នោះ ថា​ជា​អំពើ​ឧក្រិដ្ឋកម្ម​លើ​រដ្ឋធម្មនុញ្ញ​កម្ពុជា​យ៉ាង​ធ្ងន់ធ្ងរ៕

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស