31 C
Phnom Penh

ក្រុមប្រឹក្សា «២៣​តុលា​១៩៩១» នៅ​បារាំង​ប្រកាស​បដិសេធ​លទ្ធផល​បោះឆ្នោត​នៅ​កម្ពុជា​នា​ខែ​កក្កដា​ខាងមុខ​នេះ

ដោយ ឌឹ ខេមបូឌា ដេលី

បទវិភាគ

ក្រុមប្រឹក្សា ២៣ តុលា ១៩៩១ ដែល​មាន​មូលដ្ឋាន​នៅ​ប្រទេស​បារាំង ប្រកាស​បដិសេធ​លទ្ធផល​នៃ​ការ​បោះឆ្នោត​នៅ​កម្ពុជា នា​ថ្ងៃទី​២៣ ខែ​កក្កដា ឆ្នាំ​២០២៣ ខាងមុខ​នេះ​ជាដាច់ខាត និង​អំពាវនាវ​ឱ្យ​អង្គការ​សហប្រជាជាតិ និង​សហប្រធាន​សន្និសីទ​អន្តរជាតិ​ក្រុង​ប៉ារីស ថ្ងៃទី​២៣ ខែ​តុលា ឆ្នាំ​១៩៩១ ចាត់​វិធានការ​ដ៏​សមស្រប​ជាបន្ទាន់​បំផុត ដើម្បី​ឲ្យ​មាន​ការ​អនុវត្ត​ឱ្យ​បាន​ត្រឹមត្រូវ​តាម​ស្មារតី «កិច្ចព្រមព្រៀង​សន្តិភាព​ទីក្រុង​ប៉ារីស ឆ្នាំ​១៩៩១»។

ក្រុមប្រឹក្សា ២៣ តុលា ១៩៩១ បាន​ចេញ​សេចក្តី​ថ្លែងការណ៍​របស់​ខ្លួន​ដែល​សារព័ត៌មាន The Cambodia Daily ទទួល​បាន​នៅ​ថ្ងៃទី​២៣ មិថុនា នេះ​ថា ការ​បោះឆ្នោត​ជាតិ​ពី​មួយ​អាណត្តិ​ទៅ​មួយ​អាណត្តិ គឺ​បក្ស​កាន់​អំណាច​តែង​ប្រើ​មធ្យោបាយ​ទុច្ចរិត​គ្រប់​រូបភាព ដូចជា​ការ​ទិញ​ទឹកចិត្ត​ប្រជាពលរដ្ឋ ការ​គំរាមកំហែង​ដោយ​ផ្ទាល់​ផង និង​ដោយ​ប្រយោល​ផង ការ​លួច​បន្លំ​សន្លឹកឆ្នោត រហូត​ឈាន​ដល់​បិទ​ទ្វារ​ការិយាល័យ​រាប់​សន្លឹកឆ្នោត​កាលពី​បោះឆ្នោត​ជ្រើសរើស​ក្រុមប្រឹក្សា​ឃុំ-សង្កាត់​កន្លងទៅ​នេះ​ថែម​ទៀត។

ប្រភព​ដដែល​អះអាង​ថា ខ្លួន​បាន​តាមដាន​ស្ថានការណ៍​នយោបាយ​ប្រទេស​កម្ពុជា​ដោយ​យកចិត្ត​ទុកដាក់​ជាទីបំផុត ហើយ​ក៏​អាច​យល់​បាន​យ៉ាង​ច្បាស់​ថា ចាប់តាំងពី​ព្រឹត្តិការណ៍​រដ្ឋប្រហារ​នៅ​ថ្ងៃទី​៥ និង​ទី​៦ ខែ​កក្កដា ឆ្នាំ​១៩៩៧ មក របប​ផ្ដាច់ការ​ដែល​បាន​គ្រប់គ្រង និង​ដឹកនាំ​ដោយ​លោក ហ៊ុន សែន គឺ​ធ្វើ​ឡើង​តាមតែ​ខ្សែ​ញាក់​របស់​វៀតណាម​កុម្មុយនីស្ត​ក្រុង​ហាណូយ រហូត​មក។

ក្រុមប្រឹក្សា ២៣ តុលា ១៩៩១ បញ្ជាក់​ថា បើ​បក្ស​កាន់​អំណាច​ដែល​លោក ហ៊ុន សែន កំពុង​គ្រប់គ្រង​សព្វថ្ងៃ​នេះ​ចាញ់​ឆ្នោត នោះ​វៀតណាម​គ្មាន​លេស​ណា​មួយ​នឹង​លូក​ដៃ​ជ្រៀតជ្រែក​កិច្ចការ​ផ្ទៃក្នុង​របស់​ប្រទេស​កម្ពុជា​ដោយ​សមរម្យ​នោះ​ទេ ដូច្នេះ​ទោះ​ជា​ក្នុង​តម្លៃ​ណា​ក៏ដោយ វៀតណាម​ត្រូវតែ​ប្រើ​គ្រប់​មធ្យោបាយ​ដើម្បី​ឲ្យ​មេដឹកនាំ​ខ្មែរ​ដែល​ខ្លួន​បាន​លើក​បន្តុប​ឈ្នះ​ឆ្នោត​ជា​រៀង​រហូត។

ប្រភព​ដដែល​គូស​បញ្ជាក់​ថា ដើម្បី​សម្រេច​ផែនការ​របស់​ខ្លួន លោក ហ៊ុន សែន ត្រូវតែ​ទិញ​ទឹកចិត្ត​ខ្មែរ​គ្រប់​រូបភាព ដូចជា​ការ​ផ្តល់​នូវ​បុណ្យស័ក្តិ លាភ​សក្ការៈ​ផ្សេងៗ ដើម្បី​ឲ្យ​អ្នក​ទាំងនោះ​បង្កើត​គណបក្ស​នយោបាយ​ជួយ​លំអ​ឆាកល្ខោន​បោះឆ្នោត​បោកប្រាស់​បន្លំ​ភ្នែក​សហគមន៍​អន្តរជាតិ​បន្ត​ទៀត។

នៅ​សល់​ត្រឹមតែ ៣០​ថ្ងៃ​ទៀត​ប៉ុណ្ណោះ ដំណើរការ​នៃ​ការ​បោះឆ្នោត​ជាតិ​អាណត្តិ​ទី​៧ នឹង​បាន​មក​ដល់​ហើយ ដែល​នឹង​ធ្វើឡើង​នៅ​អាទិត្យ ទី​២៣ ខែ​កក្កដា ឆ្នាំ​២០២៣ ខាងមុខ​នេះ ប៉ុន្តែ​ការ​បោះឆ្នោត​នេះ​មិន​មាន​ការ​ចូលរួម​សង្កេតការណ៍​ពី​សហគមន៍​អន្តរជាតិ​ទេ ដោយសារតែ​ពួកគេ​ចាត់ទុក​ថា​ការ​បោះឆ្នោត​ដែល​មិន​ប្រកប​ដោយ​សេរី ត្រឹមត្រូវ និង​យុត្តិធម៌ ដែល​គ្មាន​តម្លាភាព។

ទាក់ទិន​នឹង​បញ្ហា​នេះ កាលពី​អំឡុង​ខែ​មីនា ឆ្នាំ​២០២៣ ប្រធាន​គណៈកម្មាធិការ​ជាតិ​រៀបចំ​ការ​បោះឆ្នោត (គ.ជ.ប) លោក ប្រាជ្ញ ចន្ទ បាន​ស្នើ​មន្ត្រី​ជាន់ខ្ពស់​នៃ​ក្រសួង​ការបរទេស​បារាំង ឱ្យ​បញ្ជូន​អ្នក​សង្កេតការណ៍​បារាំង​មក​ពិនិត្យ និង​សង្កេត​មើល​ការ​បោះឆ្នោត​ជាតិ​នៅ​កម្ពុជា​ដែរ ប៉ុន្តែ​បារាំង​នៅ​មិន​ទាន់​ឆ្លើយតប ថា​តើ​នឹង​បញ្ជូន ឬ​មិន​បញ្ជូន​អ្នក​សង្កេតការណ៍​បោះឆ្នោត​មក​កម្ពុជា ដើម្បី​ចូលរួម​ការ​បោះឆ្នោត​ខាងមុខ​នេះ​នៅឡើយ​ទេ​រហូត​ដល់​ពេលនេះ។

ជាង​នេះ​ទៀត គណៈកម្មាធិការ​ជាតិ​រៀបចំ​ការ​បោះឆ្នោត (គ.ជ.ប) ក៏​ធ្លាប់​បាន​បញ្ជាក់​កាលពី​ពេល​ថ្មីៗ​នេះ​ថា ក្រៅពី​ប្រទេស​បារាំង រដ្ឋាភិបាល​កម្ពុជា​ក៏​បាន​អញ្ជើញ​អ្នក​សង្កេតការណ៍​មកពី​ប្រទេស​អង់គ្លេស (U.K) អាល្លឺម៉ង់ (Germany) និង​ប៉ាឡេស្ទីន (Palestine) ផង​ដែរ ប៉ុន្តែ​ប្រទេស​ទាំងនោះ​ក៏​មិន​ទាន់​ឆ្លើយតប​មក​កម្ពុជា​វិញ​ដែរ។

ទាក់ទិន​នឹង​បញ្ហា​នេះ កាលពី​ថ្ងៃទី​១៥ ខែ​ឧសភា ឆ្នាំ​២០២៣ បណ្ដាញ​សហគមន៍​ខ្មែរ​នៅ​ក្រៅ​ប្រទេស​បាន​ចាប់ផ្តើម​ធ្វើ​យុទ្ធនាការ​ស្វែងរក​ហត្ថលេខា​អ្នក​គាំទ្រ​តាម​ប្រព័ន្ធ​អនឡាញ​លើ​ញត្តិ​របស់​ពួកគេ ដើម្បី​ទាមទារ​ឲ្យ​ផ្អាក​ការ​បោះឆ្នោត​ជាតិ​នៅ​កម្ពុជា​ឆ្នាំ​២០២៣ នេះ ក្នុង​នោះ​ពួកគេ​អំពាវនាវ​ឲ្យ​ពលរដ្ឋ​ខ្មែរ​ម្ចាស់​ឆ្នោត​ទាំងអស់ ពហិការ​មិន​ចូលរួម​ការ​បោះឆ្នោត​នៅ​ចុង​ខែ​កក្កដា ខាងមុខ​នេះ៕

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស