មេដឹកនាំខ្មែរកាងអំណាចផ្ដាច់មុខនៅកម្ពុជា លោក ហ៊ុន សែន ព្រមានពលរដ្ឋខ្មែរ ជាពិសេសអ្នកលេងបណ្ដាញសង្គមហ្វេសប៊ុកទាំងអស់ មិនឱ្យយករឿងសន្តិសុខជាតិមកបង្ហោះលេងសើចដាច់ខាត បើគ្មានការអនុញ្ញាតពីខាងកងកម្លាំងយោធា។
លោក ហ៊ុន សែន បានប្រកាសនៅក្នុងពិធីជួបជាមួយកម្មករក្នុងស្រុកអង្គស្នួល ខេត្តកណ្តាល នៅថ្ងៃព្រហស្បតិ៍ ទី២៩ មិថុនា នេះថា កាលពីយប់ថ្ងៃពុធ មិនមានដ្រូនដែលហោះមកចូលទឹកដីកម្ពុជាទៀតទេ បន្ទាប់ពីលោកបញ្ជាឱ្យពង្រាយអាវុធត្រៀមបាញ់ដ្រូនទាំងនោះ។
ការអះអាងនេះ ធ្វើឡើងបន្ទាប់ពីមានការផ្សព្វផ្សាយលើបណ្ដាញសង្គមហ្វេសប៊ុកថា នៅតែបន្តមានដ្រូនហោះចូលទឹកដីខេត្តមណ្ឌលគិរី បន្តទៀតកាលពីយប់ថ្ងៃពុធម្សិលមិញនេះ។
បន្ទាប់ពីមានការផ្សព្វផ្សាយថាមានដ្រូនហោះចូលក្នុងក្រុងបានលុង ខេត្តមណ្ឌលគិរី លោក ហ៊ុន សែន បានចេញបញ្ជាទាំងយប់កាលពីថ្ងៃទី២៨ ខែមិថុនា ឆ្នាំ២០២៣ ឱ្យអគ្គស្នងការនគរបាលជាតិ លោក នេត សាវឿន ស្រាវជ្រាវជាបន្ទាន់រកម្ចាស់គណនីហ្វេសប៊ុកណាដែលបានបង្ហោះព័ត៌មានក្លែងក្លាយថាមានដ្រូនហោះចូលទឹកដីកម្ពុជានោះ។
លោក ហ៊ុន សែន បានបញ្ចេញសារសំឡេងតាមប្រព័ន្ធទំនាក់ទំនងតេឡេក្រាមរបស់លោកទាំងយប់ថា គិតត្រឹមម៉ោង ១១យប់ថ្ងៃទី២៨ ខែមិថុនា នេះ មិនមានដ្រូនហោះចូលទឹកដីកម្ពុជាទៀតឡើយ គឺមានតែយន្តហោះពាណិជ្ជកម្ម ៣គ្រឿងប៉ុណ្ណោះដែលបានហោះឆ្លងកាត់ខេត្តមណ្ឌលគិរី ដូច្នេះប្រសិនបើបាញ់យន្តហោះពាណិជ្ជកម្មទាំងនោះ នឹងបង្កគ្រោះថ្នាក់យ៉ាងធំសម្រាប់កម្ពុជា។
កាលពីថ្ងៃទី២៨ ខែមិថុនា ឆ្នាំ២០២៣ លោក ហ៊ុន សែន បានបញ្ជាឱ្យកងកម្លាំងប្រដាប់អាវុធដំឡើងកាំជ្រួចសម្រាប់បាញ់យន្តហោះ និងអាវុធគ្រប់ធុនដើម្បីត្រៀមបាញ់ដ្រូន បន្ទាប់ពីដ្រូនទាំងនោះបានហោះចូលទឹកដីកម្ពុជាអស់រយៈពេលប្រមាណមួយសប្តាហ៍កន្លងមកនោះ។
លោក ហ៊ុន សែន សន្មតថា ដ្រូនទាំងនោះគឺជារបស់ក្រុមជនជាតិដើមភាគតិចវៀតណាម ប៉ុន្តែរហូតមកទល់នឹងពេលនេះ គ្មានដ្រូនណាមួយត្រូវបានបាញ់ទម្លាក់នោះទេ ខណៈមជ្ឈដ្ឋានខ្លះសង្ស័យថា ជាដ្រូនរបស់វៀតណាម ឬជាដ្រូនរបស់លោក ហ៊ុន សែន ប៉ុណ្ណោះ។
ទាក់ទិននឹងបញ្ហានេះ កាលពីថ្ងៃទី២៨ ខែមិថុនា ឆ្នាំ២០២៣ ក្រសួងការបរទេសបានចេញសេចក្តីថ្លែងការណ៍ថា ការហោះចូលដែនអាកាសកម្ពុជារបស់ដ្រូនគ្មានមនុស្សបើក គឺជាការរំលោភបំពានយ៉ាងគឃ្លើនលើអធិបតេយ្យ និងបូរណភាពទឹកដីរបស់កម្ពុជា ដែលមិនអាចអត់ឱនឱ្យបានដាច់ខាត។
ក្រសួងការបរទេសកម្ពុជា អះអាងថា រាជរដ្ឋាភិបាលកម្ពុជាបានតាមដានដោយយកចិត្តទុកដាក់បំផុតចំពោះហេតុការណ៍ដែលបានកើតឡើងក្នុងខេត្តដាក់ឡាក់ ប្រទេសវៀតណាម និងចាត់ទុកការវាយប្រហារដោយក្រុមប្រដាប់អាវុធខុសច្បាប់ទៅលើស្នាក់ការប៉ូលិសវៀតណាម គឺជាអំពើភេរវកម្មទាំងស្រុង។
ប្រភពដដែលបញ្ជាក់ថា បន្ទាប់ពីព្រឹត្តិការណ៍ហិង្សាទាំងនេះ កម្ពុជាក៏ទទួលបានព័ត៌មានពីអាជ្ញាធរ និងកម្លាំងមានសមត្ថកិច្ចនៅតាមបណ្ដោយខេត្តជាប់ព្រំដែនជាមួយនឹងវៀតណាម ពោលគឺខេត្តរតនគិរី និងខេត្តមណ្ឌលគិរី ថា មានយន្តហោះគ្មានមនុស្សបើកបរ (drones) ហោះចូលដែនអាកាសកម្ពុជាជាញឹកញាប់ ចាប់ពីថ្ងៃទី២៧ ខែមិថុនា ឆ្នាំ២០២៣ មក។
អ្នកតាមដានស្ថានការណ៍នយោបាយកម្ពុជា លោក សុខ សុគន្ធ បានលើកឡើងកាលពីថ្ងៃទី២៨ មិថុនា នេះថា ដ្រូនទាំងនោះប្រាកដជាមិនមែនដ្រូនរបស់ក្រុមជនជាតិដើមភាគតិចវៀតណាមនោះទេ ព្រោះពួកគេគ្មានលទ្ធភាព ឬសមត្ថភាពប្រើដ្រូនទាំងនោះឡើយ ហើយក៏មិនដឹងថាប្រើដើម្បីប្រយោជន៍អ្វីដែរ ប៉ុន្តែដ្រូនទាំងនោះអាចជាដ្រូនរបស់វៀតណាម និងជាដ្រូនរបស់លោក ហ៊ុន សែន ប៉ុណ្ណោះដែលជារឿងគួរឱ្យសង្ស័យជាង។
លោក សុខ សុគន្ធ អះអាងថា ការសង្ស័យរបស់លោកថាជាដ្រូនរបស់វៀតណាម និងជាដ្រូនរបស់លោក ហ៊ុន សែន នោះ គឺដោយសារតែប្រយោជន៍របស់វៀតណាមនឹងទទួលបានតាមរយៈដ្រូនទាំងនោះជុំវិញការស៊ើបការណ៍នានាលើទឹកដីកម្ពុជា ខណៈប្រយោជន៍នយោបាយរបស់លោក ហ៊ុន សែន ក៏នឹងទទួលបានតាមរយៈនៃព្រឹត្តិការណ៍បង្ហោះដ្រូននេះដែរដែលទាក់ទងនឹងការគ្រប់គ្រងស្ថានការណ៍នយោបាយរបស់កម្ពុជានៅពេលនេះ៕