32 C
Phnom Penh

ពលរដ្ឋ​រាប់​រយ​នាក់​អង្វរ​សុំ​ឱ្យ​លោក ហ៊ុន សែន ជួយ​ដោះស្រាយ​បញ្ហា​ដី​និង​ផ្ទះ​ដែល​ពួកគេ​បាន​ទិញ​ពី​ក្រុមហ៊ុន​បុរី VIP នៅ​ខេត្ត​ព្រះសីហនុ

ដោយ ឌឹ ខេមបូឌា ដេលី

បទវិភាគ

ពលរដ្ឋ​ដែល​មកពី​តាម​បណ្តា​ខេត្ត​នានា​រាប់​រយ​នាក់ បាន​នាំគ្នា​ចេញ​តវ៉ា​លើក​បដា​ជា​សាធារណៈ​អង្វរ​សុំ​ឱ្យ​ប្រមុខ​រដ្ឋាភិបាល​កម្ពុជា លោក ហ៊ុន សែន ជួយ​អន្តរាគមន៍​ឲ្យ​អភិបាល​ខេត្ត​ព្រះសីហនុ លោក គួច ចំរើន អនុវត្ត​វិធានការ​ច្បាប់​ចាប់​ខ្លួន​ម្ចាស់​ក្រុមហ៊ុន​បុរី VIP លោក ហម រ៉ន និង​លោក វ៉ន វណ្ណៈ ដែល​បាន​រំលោភ​កិច្ចសន្យា ឱ្យ​មក​ដោះស្រាយ​បញ្ហា​ដីធ្លី និង​ផ្ទះ​ដែល​ពលរដ្ឋ​បាន​ទិញ​ជា​លុយ​សុទ្ធ និង​បង់​រំលស់​តាំងពី​ឆ្នាំ​២០១៨ មក។

ពលរដ្ឋ​រាប់​រយ​នាក់​ដែល​បាន​ទិញ​ដី និង​ផ្ទះ​ពី​ក្រុមហ៊ុន​បុរី VIP បាន​ជួបជុំ​គ្នា​នៅ​ខាងមុខ​សាលា​ខេត្ត​ចាស់​ក្នុង​ខេត្ត​ព្រះសីហនុ។ ពួកគេ​កាន់​បដា​រូបថត​លោក ហ៊ុន សែន ដោយ​ស្រែក​ស្នើសុំ​ឲ្យ​អភិបាល​ខេត្ត​ព្រះសីហនុ លោក គួច ចំរើន ជួយ​រក​យុត្តិធម៌​ឲ្យ​ពួកគេ។

ពលរដ្ឋ​ទាំងនេះ​អះអាង​ថា ដី និង​ផ្ទះ​ដែល​ពួកគេ​បាន​ទិញ​បង់​ផ្តាច់​ជា​លុយ​សុទ្ធ​ពី​ក្រុមហ៊ុន​បុរី VIP ក្នុង​នោះ​មាន​ផ្ទះ​ខ្លះ​តម្លៃ​ជាង ៣​ម៉ឺន​ដុល្លារ និង​ផ្ទះ​ខ្លះ​ទៀត​មាន​តម្លៃ​រហូត​ដល់​ជិត ៦​ម៉ឺន​ដុល្លារ​ឯណោះ ប៉ុន្តែ​រហូត​ដល់​ពេលនេះ ពួកគេ​មិន​ទាន់​ទទួល​បាន​ប្លង់​កម្មសិទ្ធិ និង​ផ្ទះ​ពី​ម្ចាស់​បុរី​នេះ​នៅឡើយ​ទេ ខណៈ​បុរី​នេះ​ត្រូវ​គេ​ទុក​ចោល​គ្មាន​ការ​សាងសង់​អ្វី​ទាំងអស់​នៅ​ពេលនេះ។

អ្នកស្រី ជា សុធី ដែល​ជា​ជនរងគ្រោះ​ពី​ការ​ទិញ​ផ្ទះ​ពី​គម្រោង​បុរី​នេះ អះអាង​ថា អ្នកស្រី​គឺជា​អ្នក​រស់នៅ​ខេត្ត​ស្វាយរៀង បាន​ទិញ​ផ្ទះ​ពី​ក្រុមហ៊ុន​បុរី VIP ដោយ​បង់​លុយ​ផ្តាច់​កាលពី​ឆ្នាំ​២០១៨ ក្នុង​ទំហំ​ទឹកប្រាក់ ៥១៨៨០​ដុល្លារ​អាមេរិក ប៉ុន្តែ​រហូត​ដល់​ពេលនេះ អ្នកស្រី​មិន​ទាន់​ទទួល​បាន​ប្លង់​បញ្ជាក់​កម្មសិទ្ធិ​ទេ ហើយ​ក៏​មិន​ទាន់​ទទួល​បាន​ផ្ទះ​នៅឡើយ​ដែរ ខណៈ​ការ​សាងសង់​ត្រូវ​បាន​ម្ចាស់​បុរី​មួយ​នេះ​ផ្អាក​ចោល​ត្រឹម​ពាក់កណ្តាល​ដោយ​គ្មាន​មូលហេតុ ហើយ​គ្មាន​នរណា​ម្នាក់​ចេញ​មុខ​ទទួល​ខុសត្រូវ​ដោះស្រាយ​លើ​បញ្ហា​នេះ​ទាល់តែសោះ​នោះ។

ចំណែក​លោក ឃីន ស៊ីថា ជា​អតិថិជន​រងគ្រោះ​ពី​បុរី​នេះ​ដែរ បញ្ជាក់​ថា លោក​គឺជា​អតិថិជន​ម្នាក់​ដែល​បាន​ទិញ​ផ្ទះ​ពី​ក្រុមហ៊ុន​បុរី VIP នេះ ក្នុង​ចំណោម​អតិថិជន​ជាង ២​ពាន់​នាក់​ផ្សេង​ទៀត ហើយ​ក្នុង​ចំណោម​អ្នក​ដែល​ទិញ​ផ្ទះ​ពី​បុរី​នេះ មិនមែន​មាន​តែ​អ្នក​ដែល​រស់នៅ​ក្នុង​ខេត្ត​ព្រះសីហនុ នេះ​ទេ គឺ​មាន​មកពី​តាម​បណ្តា​ខេត្ត​ជាច្រើន​ទៀត។

លោក​បន្ថែម​ថា ការ​តវ៉ា​ទាមទារ​របស់​អតិថិជន គឺ​សុំ​ឲ្យ​តែ​ខាង​ក្រុមហ៊ុន​ចេញ​ប្លង់​កម្មសិទ្ធិ​ឲ្យ​ពួកគេ​ប៉ុណ្ណោះ ខណៈ​ផ្ទះ​ដែល​ក្រុមហ៊ុន​សាងសង់​មិន​ទាន់​រួច ពួកគេ​សុខចិត្ត​ចេញ​លុយ​ផ្ទាល់ខ្លួន​សាងសង់​បន្ត​ទៀត ប៉ុន្តែ​ការ​ទាមទារ​របស់​ពលរដ្ឋ​មិន​ត្រូវ​បាន​អាជ្ញាធរ​ខេត្ត​យក​ទៅ​ដោះស្រាយ​នោះ​ឡើយ បើ​ទោះជា​ពួកគាត់​បាន​តវ៉ា​ជាច្រើន​លើក​ច្រើនសា​នា​ពេល​កន្លងមក​ក៏ដោយ។

ការ​តវ៉ា​របស់​ពលរដ្ឋ​ទាំងនេះ​ធ្វើឡើង​បន្ទាប់ពី​ម្ចាស់​ក្រុមហ៊ុន​បុរី VIP បាន​រំលោភ​កិច្ចសន្យា​មិន​ប្រគល់​ប្លង់​កម្មសិទ្ធិ និង​មិន​សាងសង់​ផ្ទះ​ដូច​មាន​ចែង​ក្នុង​កិច្ចសន្យា​ដែល​ពួកគេ​បាន​ព្រមព្រៀង​គ្នា​តាំងពី​ឆ្នាំ​២០១៨ មក​នោះ។

បុរី VIP ដែល​ជា​កម្មសិទ្ធិ​របស់​លោក ហម រ៉ន និង​លោក វ៉ន វណ្ណៈ មាន​ទីតាំង​ស្ថិត​នៅ​ភូមិ​អូរតាសេក ឃុំ​ឧកញ៉ាហេង ស្រុក​ព្រៃនប់ ខេត្ត​ព្រះសីហនុ ប៉ុន្តែ​សព្វថ្ងៃ គម្រោង​បុរី​នេះ​ត្រូវ​ផ្អាក​ដំណើរការ​ទាំងស្រុង​ដោយ​បិទ​របង​ទុក​ចោល ខណៈ​ផ្ទះ​ខ្លះ​ទើប​តែ​បណ្ដុះ​សរសេរ​បាន ២​ទៅ ៣​ដើម​ប៉ុណ្ណោះ ហើយ​ផ្ទះ​ខ្លះ​ទៀត​សាងសង់​បាន​ពី ៣០ ទៅ ៤០% ចំណែក​កន្លែង​ខ្លះ​ក៏​មិន​ទាន់​ឃើញ​មាន​ការ​ចាក់​គ្រឹះ​ដើម្បី​សាងសង់​នៅឡើយ​ដែរ ស្រប​ពេល​ដែល​អតិថិជន​ខ្លះ​បាន​បង់​លុយ​ផ្តាច់​រួចរាល់ និង​ខ្លះ​ទៀត​បាន​បង់​រំលស់​អស់​រយៈពេល​ជាង ៥​ឆ្នាំ​ជិត​គ្រប់​ចំនួន​លុយ​ទៅ​ហើយ​នោះ។

ក្នុង​រយៈពេល​ចុងក្រោយ​នេះ ប្រជាពលរដ្ឋ​ដែល​ទិញ​ផ្ទះ និង​ដី​តាមរយៈ​ក្រុមហ៊ុន​អចលនទ្រព្យ​នៅ​កម្ពុជា បាន​រង​នូវ​ការ​ខាតបង់​ជា​បន្តបន្ទាប់ ដូចជា​ក្រុមហ៊ុន​របស់​ឧកញ៉ា ជា សារ៉ន ក្រុមហ៊ុន​បុរី VIP ក្រុមហ៊ុន​ឧកញ៉ា ឡេង ណាវ៉ាត្រា និង​ក្រុមហ៊ុន​អចលនទ្រព្យ​ជាច្រើន​ទៀត ខណៈ​ចំណាត់ការ និង​ការ​អន្តរាគមន៍​របស់​អាជ្ញាធរ ឬ​រដ្ឋាភិបាល​នៅ​មាន​កម្រិត​ទាប​នៅឡើយ។

ជាក់ស្តែង ដូចជា​ក្រុមហ៊ុន​អចលនទ្រព្យ​របស់​ឧកញ៉ា ឡេង ណាវ៉ាត្រា ជាដើម បាន​រំលោភ​កិច្ចសន្យា​អតិថិជន​មិន​សាងសង់​ផ្ទះ​ទៅ​តាម​ពេលវេលា​ដូច​មាន​ចែង​ក្នុង​កិច្ចព្រមព្រៀង​នោះ​ទេ ហើយ​អាជ្ញាធរ​ក៏​មិន​បាន​អនុវត្ត​វិធានការ​ច្បាប់​ដើម្បី​ទាមទារ​ឲ្យ​ម្ចាស់​ក្រុមហ៊ុន​អនុវត្ត​ការងារ​ទៅ​តាម​កិច្ចសន្យា​នោះ​ដែរ បើ​ទោះបីជា​ពលរដ្ឋ​នាំគ្នា​តវ៉ា​ហើយ​ក៏ដោយ។

ជាក់ស្តែង​គម្រោង​ដី​ឡូត៍​របស់​ឧកញ៉ា ឡេង ណាវ៉ាត្រា នៅ​ខេត្ត​បាត់ដំបង ស្ថិត​ក្នុង​ស្រុក​ថ្មគោល មិន​ទាន់​ចេញ​ប័ណ្ណ​កម្មសិទ្ធិ​ឲ្យ​អតិថិជន​នៅឡើយ​ទេ ខណៈ​ដី​ដែល​អតិថិជន​បាន​ទិញ ក៏​ភាគី​ក្រុមហ៊ុន​មិន​បាន​បញ្ជាក់​ប្រាប់​ថា​ស្ថិត​នៅ​ត្រង់​ចំណុច​ណា​នោះ​ដែរ ព្រោះ​ភាគី​ក្រុមហ៊ុន​មិន​ទាន់​បាន​កំណត់​ដី​ឡូត៍​ទាំងនោះ​ថា​ចំណុច​ឡូត៍​មួយ​ណា​ជា​របស់​អតិថិជន​មួយ​ណា​នៅឡើយ​ដែរ។

ក្រុម​អ្នក​ឃ្លាំមើល​ការ​អភិវឌ្ឍ​សង្គម លើកឡើង​ថា ក្រុមហ៊ុន​អចលនទ្រព្យ​នៅ​កម្ពុជា​ច្រើន​ណាស់​ដែល​ឆ្លៀត​ឱកាស​ប្រកប​អាជីវកម្ម​កេង​ចំណេញ​ពី​អតិថិជន​ដែល​ពួកគេ​ព្យាយាម​លាក់​កិច្ចសន្យា​មិន​បង្ហាញ​ឱ្យ​បាន​ច្បាស់លាស់​នៅ​ពេល​ដែល​អតិថិជន​ចាប់ផ្តើម​ទិញ​នៅ​ពេល​ដំបូង ខណៈ​អាជ្ញាធរ​មាន​សមត្ថកិច្ច​ក៏​មិន​មាន​ចំណាត់ការ​ការពារ​ពលរដ្ឋ​ពី​ការ​កេង​ចំណេញ​របស់​ក្រុមហ៊ុន​ទាំងនោះ​ដែរ។

ជាក់ស្តែង ពេល​អតិថិជន​មក​ទិញ​ផ្ទះ​របស់​ពួកគេ​ក្នុង​តម្លៃ​ណា​មួយ ពួកគេ​មិន​បាន​ប្រាប់​លម្អិត​ពី​កិច្ចសន្យា​របស់​ក្រុមហ៊ុន​នោះ​ទេ ប៉ុន្តែ​នៅ​ពេល​ដែល​អតិថិជន​បង់​លុយ​គ្រប់​ចំនួន ឬ​បង់​បាន​ពាក់កណ្តាល ហើយ​ទាមទារ​ប្លង់​កម្មសិទ្ធិ​នោះ ភាគី​ក្រុមហ៊ុន​បែរ​ជា​តម្រូវ​ឲ្យ​អតិថិជន​ចេញ​លុយ​លើ​ថ្លៃ​កាត់​ប្លង់​កម្មសិទ្ធិ​ទៅ​វិញ៕

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស