27.1 C
Phnom Penh

ថៃ​មាន​ប្រធាន​រដ្ឋសភា​ហើយ តែ​បេក្ខជន​នាយករដ្ឋមន្ត្រី​នៅតែ​ប្រឈម​មុខ​នឹង​ឧបសគ្គ

ដោយ ឌឹ ខេមបូឌា ដេលី

បទវិភាគ

កាលពី​ថ្ងៃ​ចន្ទ ទី​៣ ខែ​កក្កដា រដ្ឋសភា​ថៃ បាន​បើក​កិច្ចប្រជុំ​ដំបូង​របស់​ខ្លួន​នៃ​អាណត្តិ​ថ្មី​ក្រោម​ព្រះ​អធិបតីភាព​ព្រះមហាក្សត្រ។ សមាជិក​សភា​ដែល​ជាប់​ឆ្នោត​ទាំងអស់ ៥០០​រូប ត្រូវ​មក​បង្ហាញ​ខ្លួន​ដើម្បី​ទទួលយក​សុពលភាព​ជា​សមាជិក​សភា​ដែល​ជាប់​ឆ្នោត​កើត​ចេញពី​ការ​បោះឆ្នោត​កាលពី​ថ្ងៃទី​១៤ ឧសភា។

នៅ​ថ្ងៃ​អង្គារ ទី​៤ ខែ​កក្កដា នេះ រដ្ឋសភា​ថៃ បាន​ប្រជុំ​ជា​លើក​ទី​២ របស់​ខ្លួន តែ​កិច្ចប្រជុំ​លើក​នេះ​ដើម្បី​ជ្រើសតាំង​ប្រធាន​រដ្ឋសភា និង​អនុប្រធាន ២​រូប។ យោង​តាម​សារព័ត៌មាន Bloomberg ចុះផ្សាយ​ថា ប្រធាន​សមាជិក​រដ្ឋសភា​ថ្មី​នៃ​រដ្ឋសភា​ដែល​ត្រូវ​បាន​គណបក្ស​ធំ​ពីរ គឺ​គណបក្ស​ឆ្ពោះ​ទៅ​មុខ និង​គណបក្ស​ភឿថៃ ព្រមព្រៀង​គ្នា​នោះ គឺ​លោក Wan Muhamad Noor Matha អាយុ ៧៩​ឆ្នាំ​ជា​មេដឹកនាំ​នៃ​គណបក្ស​ប្រាឆារ៉ាត។

តាម​ប្រភព​ដដែល​នេះ សមាជិក​សភា​លើសលប់​បាន​បោះឆ្នោត​គាំទ្រ​អតីត​អ្នក​នយោបាយ​ជើងចាស់​រូប​នេះ​ដែល​ធ្លាប់​ជា​ប្រធាន​រដ្ឋសភា​ម្ដង​រួច​មក​ហើយ។ ការ​ជ្រើសរើស​បុរស​វ័យ​ជិត ៨០​ឆ្នាំ​រូប​នេះ ដោយ​សំឡេង​មតិ​ដាច់​ណាត់​ពី​ក្រុម​ចម្រុះ​នៃ ៨​គណបក្ស។

ក្រុម​ចម្រុះ​នេះ​ហើយ​ដែល​កំពុង​រៀបចំ​ខ្លួន​ដើម្បី​បង្កើត​រដ្ឋាភិបាល​ចម្រុះ​ដែល​លោក ភីថា លឹមចារឿរ៉ាត់ ជា​បេក្ខជន​នាយករដ្ឋមន្ត្រី។ ចំណែកឯ​អនុប្រធាន ២​រូប​ទៀត​នៃ​រដ្ឋសភា គឺ​ម្នាក់​មកពី​គណបក្ស​ឆ្ពោះ​ទៅ​មុខ និង​ម្នាក់​ទៀត​មកពី​គណបក្ស​ភឿថៃ។

ការ​បោះឆ្នោត​ជ្រើសរើស​ថ្នាក់​ដឹកនាំ​រដ្ឋសភា​នៅ​ពេលនេះ ត្រូវ​បាន​គេ​មើល​ឃើញ​ថា គឺជា​ការ​បំបែក​ភាព​ជាប់​គាំង​រវាង​គណបក្ស​ឆ្ពោះ​ទៅ​មុខ និង​គណបក្ស​ភឿថៃ។ តែ​យ៉ាងណា ចំពោះ​លោក ភីថា លឹមចារឿរ៉ាត់ ដែល​ជា​បេក្ខជន​នាយករដ្ឋមន្ត្រី​អាទិភាព​ជាងគេ​នៅតែ​ប្រឈមមុខ​នឹង​ឧបសគ្គ​នៅឡើយ​នោះ​ទេ ដែល​គេ​ថា​ពេលវេលា​សម្រាប់​លោក លឹមចារឿរ៉ាត់ ជិត​អស់​ហើយ។

នៅ​ថ្ងៃទី​១៣ កក្កដា សប្ដាហ៍​ក្រោយ​នេះ សភា​ថៃ​ទាំង​ពីរ​ថ្នាក់ គឺ​សមាជិក​សភា ៥០០​រូប បូក​នឹង​សមាជិក​ព្រឹទ្ធសភា ២៥០​រូប ត្រូវ​អង្គុយ​រួម​គ្នា​ដើម្បី​បោះឆ្នោត​ជ្រើសតាំង​នាយករដ្ឋមន្ត្រី​ថ្មី។ ចំពោះ​លោក ភីថា លឹមចារឿរ៉ាត់ នៅតែ​ស្ថិត​នៅ​ក្នុង​ភាព​មិន​ច្បាស់លាស់ ដោយសារ​តែ​សំណុំរឿង​ជាច្រើន​បាន​ប្ដឹង​លោក​ទៅ​កាន់​គណៈកម្មាធិការ​បោះឆ្នោត ដោយ​ចោទ​ថា​អ្នក​នយោបាយ​វ័យក្មេង​មកពី​គណបក្ស​ចលនា​ឆ្ពោះ​ទៅ​មុខ​នេះ​មាន​ភាគហ៊ុន​នៅ​ក្នុង​ប្រព័ន្ធ​ផ្សព្វផ្សាយ​របស់​ថៃ ដែល​ច្បាប់​របស់​រាជាណាចក្រ​នេះ​ហាម​ដាច់ខាត​បុគ្គល​ទាំងឡាយ​ណា​ដែល​ឈរ​ជា​បេក្ខជន​នាយករដ្ឋមន្ត្រី​ក្ដី ឬ​សមាជិក​សភា​ក្ដី មិន​ត្រូវ​មាន​មុខជំនួញ​ដូចនេះ​ទេ។

លោក ភីថា លឹមចារឿរ៉ាត់ អាយុ ៤២​ឆ្នាំ នៅ​ពេលនេះ​ក៏​កំពុង​មាន​ភាព​តានតឹង​ជាមួយ​នឹង​ពួក​យោធា ជាមួយ​នឹង​សមាជិក​ព្រឹទ្ធសភា និង​បក្ស​ដែល​មាន​និន្នាការ​ទៅ​រក​ពួក​យោធា ព្រោះតែ​អ្នក​នយោបាយ​វ័យ ៤២​ឆ្នាំ​រូប​នេះ​នៅតែ​ប្រកាន់​ជំហរ​រុះរើ​មាត្រា​១១២ នៃ​ក្រមព្រហ្មទណ្ឌ​ដែល​ចែង​ពី​ការ​ដាក់​ទោស​ធ្ងន់ធ្ងរ​ទៅ​លើ​ជន​ណា​ដែល​ប្រមាថ​ព្រះមហាក្សត្រ។

សមាជិក​ព្រឹទ្ធសភា​មួយ​ភាគ​ធំ​ព្រមាន​មិន​បោះឆ្នោត​គាំទ្រ​លោក ភីថា លឹមចារឿរ៉ាត់ នោះ​ទេ បើ​ទោះជា​បុរស​នេះ​ទម្លាក់​ចោល​នូវ​ជំហរ​របស់​ខ្លួន​ក៏ដោយ នៅ​ខណៈ​ដែល​គណបក្ស​ផ្សេងៗ​ទៀត​ក៏​ប្រឆាំង​នឹង​លោក ភីថា ដែល​ចង់​លុប​ចោល​មាត្រា​១១២ នេះ។

កាសែត​បាងកក​ប៉ុស្តិ៍​បាន​ចុះផ្សាយ​ថា លោក ភីថា កំពុងតែ​បញ្ចុះបញ្ចូល​សមាជិក​ព្រឹទ្ធសភា និង​សមាជិក​សភា​មកពី​គណបក្ស​ផ្សេងៗ​ទៀត​ឲ្យ​ទទួលយក​ការ​ពន្យល់​របស់​លោក ដែល​លោក​ចង់​កាត់បន្ថយ​អំណាច​របស់​រាជា និង​ពួក​យោធា។

ប៉ុន្តែ​ជាមួយ​គ្នា​នេះ មេដឹកនាំ​គណបក្ស​ជំនាន់​ថ្មី​ដ៏​មាន​ប្រជាប្រិយភាព​រូប​នេះ​ព្រមាន​ព្រឹទ្ធសភា​ថា ការ​ដែល​ពួក​ព្រឹទ្ធសភា​មិន​គាំទ្រ​រូបលោក​ជា​នាយករដ្ឋមន្ត្រី មាន​ន័យ​ថា​ជា​ការ​បំផ្លាញ​ទឹកចិត្ត និង​ឆន្ទៈ​របស់​ប្រជាជន​ថៃ យុវជន​ថៃ ដែល​បាន​បោះឆ្នោត​ប្រគល់​សិទ្ធិ​អំណាច​មក​ឱ្យ​រូបលោក។

យ៉ាងណា អ្នក​សង្កេតការណ៍​មើល​ឃើញ​ថា បើ​លោក ភីថា មិន​ត្រូវ​បាន​ជ្រើសតាំង​ជា​នាយករដ្ឋមន្ត្រី​ថ្មី​នោះ​ទេ គឺ​ត្រូវតែ​ទម្លាក់​បេក្ខភាព​នាយករដ្ឋមន្ត្រី​នេះ​ទៅ​ឲ្យ​អ្នក​ផ្សេង​ទៀត​ក្នុង​គណបក្ស​របស់​លោក ឬ​ទៅ​ឲ្យ​អ្នក​នយោបាយ​មកពី​គណបក្ស​ភឿថៃ ដែល​គេ​រំពឹង​ថា​អ្នកស្រី ភៃថោងថាន ស៊ីណាវ៉ាត់ នឹង​ក្លាយ​ជា​បេក្ខភាព​នាយករដ្ឋមន្ត្រី​ដែល​មាន​អាទិភាព​ជាងគេ។

តែ​ជាមួយ​គ្នា​នេះ អ្នក​សង្កេតការណ៍​ខ្លះ​ព្រមាន​ថា បើ​មិន​អាច​បង្កើត​រដ្ឋាភិបាល​បាន​ក្នុង​អំឡុង ៦០​ថ្ងៃ​ក្រោយ​ការ​បោះឆ្នោត​ទេ នឹង​នាំ​ឱ្យ​សភា​ថៃ​គាំង ហើយ​ឈាន​ទៅ​ដល់​ការ​រំលាយ​សភា ហើយ​បោះឆ្នោត​ជា​ថ្មី​ម្ដង​ទៀត តែ​ក៏​ផ្ដល់​ឱកាស​ឱ្យ​គណបក្ស​ដែល​លម្អៀង​ទៅ​ពួក​យោធា​អាច​បន្ត​បង្កើត​រដ្ឋាភិបាល​ថ្មី​ឡើងវិញ ព្រោះតែ​សមាជិក​ព្រឹទ្ធសភា ២៥០​រូប​នោះ​ជា​របស់​ពួក​យោធា​ភាគច្រើន​ទៅ​ហើយ​នោះ។ យ៉ាងណា​ក៏ដោយ រលក​កំហឹង​របស់​យុវជន​ថៃ នឹង​ផ្ទុះ​កម្រើក​ជា​ថ្មី​ពាសពេញ​ក្រុង​បាងកក ប្រឆាំង​នឹង​ពួក​យោធា៕

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស