30 C
Phnom Penh

សមាគម​ខ្មែរ​ក្រៅ​ស្រុក​ប្រកាស​ប្រមូលផ្ដុំ​ពលរដ្ឋ​ខ្មែរ​ជុំវិញ​ពិភពលោក​ប្រារព្ធ​វេទិកា​លទ្ធិប្រជាធិបតេយ្យ​នៅ​កម្ពុជា​មុន​ការ​បោះឆ្នោត​ជាតិ

ដោយ ឌឹ ខេមបូឌា ដេលី

បទវិភាគ

សមាគម​ខ្មែរ​ទូទាំង​ពិភពលោក ប្រកាស​ប្រមូលផ្ដុំ​ប្រជាពលរដ្ឋ​ខ្មែរ​នៅ​ជុំវិញ​ពិភពលោក ឱ្យ​ចូលរួម​វេទិកា​ដើម្បី​លទ្ធិប្រជាធិបតេយ្យ​នៅ​កម្ពុជា «ក្រោម​ប្រធានបទ ពេល​នេះ​ទៅ​មុខ គោលដៅ​ខ្មែរ​អ្នក​ស្រឡាញ់​ប្រជាធិបតេយ្យ​ត្រូវ​ធ្វើ​អ្វី​បន្ត​ទៀត» ដើម្បី​លើកស្ទួយ​លទ្ធិប្រជាធិបតេយ្យ និង​សិទ្ធិ​អំណាច​របស់​ប្រជាពលរដ្ឋ​ខ្មែរ​នៅ​មុន​ការ​បោះឆ្នោត​ជាតិ​នៅ​កម្ពុជា នា​ខែ​កក្កដា ឆ្នាំ​២០២៣ នេះ។

សមាគម​ខ្មែរ​ទូទាំង​ពិភពលោក ចេញ​សេចក្តី​ជូនដំណឹង​នៅ​ថ្ងៃទី​៦ កក្កដា នេះ​ថា ពួកគេ​នឹង​ជួបជុំ​ជា​ទ្រង់ទ្រាយ​ធំ​មួយ​នៅ​ថ្ងៃ​សៅរ៍ ទី​១៥ ខែ​កក្កដា ឆ្នាំ​២០២៣ ខាងមុខ​នេះ​នៅ Long Beach City College, Dyer Hall ក្នុង​ទីក្រុង​ឡុងប៊ិច នៃ​រដ្ឋ​កាលីហ្វ័រញ៉ា សហរដ្ឋ​អាមេរិក ដូច្នេះ​សម្រាប់​អ្នក​ដែល​ចង់​ចូលរួម អាច​ចុះឈ្មោះ​តាមរយៈ​វេបសាយ​ដែល​មាន​ឈ្មោះ​ថា SAVECAMBODIA.ORG/EVENTS

សមាគម​ខ្មែរ​ខាងលើ​បញ្ជាក់​ថា សម្រាប់​អ្នក​ដែល​មាន​បំណង​ចូលរួម​វេទិកា​នេះ ក៏​អាច​ទាក់ទង​ទៅ​អ្នក​ទទួល​ខុសត្រូវ​ក្នុង​ការ​រៀបចំ​កម្មវិធី​ជួបជុំ​នេះ​ផង​ដែរ គឺ​មាន​ដូចជា លោក រ៉េត សម្បត្តិ លេខ​ទំនាក់ទំនង ៧០២ ៨០៨ ០៣៣៧ និង​លោក អ៊ុង បូរ៉ាមី លេខ​ទំនាក់ទំនង ៧៨៦ ៥៤៨ ០០៩២ ចំណែក​លោក យ៉ាប់ គឹមទឹង លេខ​ទំនាក់ទំនង ៧០៣ ៦៧៥ ៣៩៩៧។

ការ​ប្រកាស​ធ្វើ​កម្មវិធី​ប្រមូលផ្ដុំ​ប្រជាពលរដ្ឋ​ខ្មែរ​អ្នក​ស្នេហា​លទ្ធិប្រជាធិបតេយ្យ​នេះ ក្នុង​គោលបំណង​ដើម្បី​ទាមទារ​ឲ្យ​រដ្ឋាភិបាល​កម្ពុជា​ងាក​ទៅ​រក​ការ​គោរព​លទ្ធិប្រជាធិបតេយ្យ ជាពិសេស​ជុំវិញ​ដំណើរការ​បោះឆ្នោត​នៅ​ចុងខែ​កក្កដា ឆ្នាំ​២០២៣ នេះ។

កាលពី​ថ្ងៃទី​៤ ខែ​កក្កដា ឆ្នាំ​២០២៣ អ្នក​នាំពាក្យ​ក្រុម​សង្គម​ស៊ីវិល​ខ្មែរ​ឯ​នាយ​សមុទ្រ លោក សោម កុលវឌ្ឍន៍ បាន​អំពាវនាវ​ក្នុង​កម្មវិធី Idea Talk នៃ​សារព័ត៌មាន The Cambodia Daily ឱ្យ​ប្រជាពលរដ្ឋ​ខ្មែរ​នៅ​ជុំវិញ​ពិភពលោក​ចូលរួម​វេទិកា​នេះ​ដោយ​ផ្ទាល់ និង​តាម​ប្រព័ន្ធ​ហ្សូម​ផង​ដែរ សម្រាប់​ប្រជាពលរដ្ឋ​ខ្មែរ​ដែល​នៅ​តាម​បណ្តា​ប្រទេស​នានា​នៅ​លើ​សកលលោក ដើម្បី​ចូលរួម​ពិភាក្សា​រក​ដំណោះស្រាយ​ធ្វើ​ឲ្យ​ប្រទេស​កម្ពុជា​វិល​ទៅ​រក​ការ​ដឹកនាំ​តាម​គន្លង​លទ្ធិប្រជាធិបតេយ្យ​ដូច​មាន​ចែង​ក្នុង​រដ្ឋធម្មនុញ្ញ​វិញ។

លោក សោម កុលវឌ្ឍន៍ អះអាង​ថា វេទិកា​នេះ​មិនមែន​បង្កើត​ដោយ​គណបក្ស​នយោបាយ​ណា​មួយ​នោះ​ទេ គឺ​ធ្វើ​ឡើង​ដោយ​ប្រជាពលរដ្ឋ​ខ្មែរ​ដែល​ស្រឡាញ់ គាំទ្រ ការពារ​លទ្ធិប្រជាធិបតេយ្យ​ប៉ុណ្ណោះ។ លោក​បន្ថែម​ថា វេទិកា​ពិភាក្សា​នេះ​គឺជា​វិធីសាស្ត្រ​មួយ​ក្នុង​ការ​ស្នើ​ឱ្យ​សហគមន៍​អន្តរជាតិ​ជួយ​រុញច្រាន​រដ្ឋាភិបាល​កម្ពុជា ឲ្យ​ងាក​ទៅ​ការ​អនុវត្ត​ការ​ដឹកនាំ​តាម​ខ្លឹមសារ​នៃ​កិច្ចព្រមព្រៀង​សន្តិភាព​ទីក្រុង​ប៉ារីស ឆ្នាំ​១៩៩១ វិញ ដើម្បី​ធានា​នូវ​ការ​គោរព​ច្បាប់ និង​ធានា​នូវ​ស្ថិរភាព​នយោបាយ​របស់​កម្ពុជា​ឲ្យ​បាន​ពេញលេញ​ផង​ដែរ។

មាត្រា​១ នៃ​រដ្ឋធម្មនុញ្ញ ចែង​ថា ប្រទេស​កម្ពុជា​ជា​ព្រះរាជាណាចក្រ​ប្រកាន់​យក​របប​ប្រជាធិបតេយ្យ​សេរី​ពហុបក្ស ប៉ុន្តែ​ប្រជាធិបតេយ្យ​នៅ​កម្ពុជា​ត្រូវ​គេ​មើល​ឃើញ​ថា​បាន​ធ្លាក់​ចុះ​ធ្ងន់ធ្ងរ​សព្វថ្ងៃ​នេះ ដោយសារតែ​ការ​បង្ក្រាប​របស់​មេដឹកនាំ​បក្ស​កាន់​អំណាច​លោក ហ៊ុន សែន ទៅ​លើ​ក្រុម​អ្នក​ប្រជាធិបតេយ្យ លើ​សារព័ត៌មាន​ឯករាជ្យ លើ​អង្គការ​សង្គម​ស៊ីវិល​ដែល​មិន​ចំណុះ​ឲ្យ​រដ្ឋាភិបាល ដោយ​ការ​ចាប់​ឃុំ​ខ្លួន ការ​ប្រើប្រាស់​ប្រព័ន្ធ​តុលាការ​ដើម្បី​ចោទ​ប្តឹង និង​ការ​ប្រើប្រាស់​អំពើ​ហិង្សា​នានា​ក្រៅ​ប្រព័ន្ធ​ច្បាប់ ជាដើម។

ទាក់ទិន​នឹង​បញ្ហា​នេះ កាលពី​ថ្ងៃទី​១៦ ខែ​មិថុនា ឆ្នាំ​២០២៣ ឧត្តម​ស្នងការ​ទទួល​បន្ទុក​សិទ្ធិមនុស្ស​របស់​អង្គការ​សហប្រជាជាតិ លោក Volker Turk បាន​លើកឡើង​ថា លោក​មាន​ការ​ព្រួយបារម្ភ​យ៉ាង​ខ្លាំង​ចំពោះ​ការ​កាត់បន្ថយ​លំហ​ពលរដ្ឋ​មុន​ពេល​ការ​បោះឆ្នោត​ជាតិ​នៅ​កម្ពុជា ក្នុង​ឆ្នាំ​២០២៣ នេះ ដែល​មាន​ការ​រឹតត្បិត​លើ​សិទ្ធិ​សេរីភាព​នៃ​ការ​បញ្ចេញមតិ​របស់​ពលរដ្ឋ​ដែល​ធានា​ដោយ​រដ្ឋធម្មនុញ្ញ​នៃ​ប្រទេស​កម្ពុជា និង​ឧបករណ៍​សិទ្ធិមនុស្ស​អន្តរជាតិ​ដទៃ​ទៀត។

ឧត្តម​ស្នងការ​ទទួល​បន្ទុក​សិទ្ធិមនុស្ស​របស់​អង្គការ​សហប្រជាជាតិ​រូប​នេះ​អះអាង​ថា មុន​ការ​បោះឆ្នោត ត្រូវតែ​មាន​បរិយាកាស​បើក​ចំហ និង​ពហុ​និយម ដែល​ធានា​សិទ្ធិ​សេរីភាព​នៃ​ការ​បញ្ចេញមតិ និង​ការ​បញ្ចេញមតិ​ដោយ​សេរី ប៉ុន្តែ​អ្នក​ការពារ​សិទ្ធិមនុស្ស សហជីព និង​សកម្មជន​នយោបាយ​ត្រូវ​បាន​គេ​រាយការណ៍​ថា​ប្រឈមមុខ​នឹង​ការ​ដាក់​ទណ្ឌកម្ម​ផ្លូវច្បាប់​ចំពោះ​ការ​អនុវត្ត​សិទ្ធិ​របស់​ពួកគេ ដោយ​ការ​ប្រើ​សេរីភាព​នៃ​ការ​បញ្ចេញមតិ និង​ការ​ជួប​ប្រជុំ​ដោយ​សន្តិវិធី ជាដើម។

លោក Volker Turk ជំរុញ​ឲ្យ​រដ្ឋាភិបាល​កម្ពុជា​អនុវត្ត​តាម​ខ្លឹមសារ​ដែល​មាន​ចែង​ក្នុង​កិច្ចព្រមព្រៀង​សន្តិភាព​ទីក្រុង​ប៉ារីស និង​សន្ធិសញ្ញា​សិទ្ធិមនុស្ស​អន្តរជាតិ​ផ្សេង​ទៀត ដើម្បី​ធានា​នូវ​សន្តិភាព វិបុលភាព និង​អនាគត​ដ៏​ល្អ​ប្រសើរ​សម្រាប់​ប្រទេស​កម្ពុជា​ទៅ​ថ្ងៃ​មុខ៕

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស