ភរិយារបស់មេបញ្ជាការរងកងពលតូចលេខ៧០ អ្នកស្រី សាយ សោភា ត្រូវបានលោក ហ៊ុន សែន ទូលថ្វាយទៅព្រះមហាក្សត្រឲ្យផ្ដល់គោរមងារជា «ឧកញ៉ា» ដែលកំពុងដឹកនាំក្រុមហ៊ុនជំនួសអ្នកស្រី ពេជ ចន្ទមុន្នី ដែលជាភរិយារបស់លោក ហ៊ុន ម៉ាណែត។
ក្នុងព្រះរាជក្រឹត្យដែលឡាយព្រះហស្តលេខាដោយព្រះមហាក្សត្រខ្មែរកាលពីថ្ងៃទី៧ ខែតុលា ឆ្នាំ២០២២ បានត្រាស់បង្គាប់ផ្ដល់គោរមងារដល់អ្នកស្រី សាយ សោភា ជា «ឧកញ៉ា» ចាប់ពីពេលនេះតទៅ។
លោក ហ៊ុន សែន បានទូលថ្វាយទៅព្រះមហាក្សត្រ ដើម្បីស្នើសុំផ្ដល់ងារកិត្តិយសផ្តល់ជូនដល់អ្នកស្រី សាយ សោភា បន្ទាប់ពីស្ត្រីអ្នកជំនួញរូបនេះបានបរិច្ចាគថវិកាជូនរដ្ឋយ៉ាងតិច ៥០ម៉ឺនដុល្លារ។
ក្រសួងពាណិជ្ជកម្មកម្ពុជា បានចុះបញ្ជីអ្នកស្រី សាយ សោភា ជាប្រធានក្រុមហ៊ុនចំនួន៧ រួមទាំងក្រុមហ៊ុន ភឺន ផល្លា គ្រុប ឌីវេឡុបមេន (Phoeun Phalla Group Development) ក្រុមហ៊ុន សាយ សោភា អេឌ្យូខេសិន (Say Sorphea Education) និងក្រុមហ៊ុន អ៊ែកធីវ ប្រព្វផឹធី (Active Properties) ដែលកំពុងដំណើរការនាពេលបច្ចុប្បន្ន។ បើតាមព័ត៌មានរបស់ក្រសួងពាណិជ្ជកម្ម បញ្ជាក់ថា ក្រុមហ៊ុន Active Properties ពីមុនត្រូវបានដឹកនាំដោយលោកស្រី ពេជ ចន្ទមុន្នី ដែលជាភរិយារបស់លោក ហ៊ុន ម៉ាណែត។
លើសពីនេះ អ្នកស្រី សាយ សោភា ដែលកំពុងដឹកនាំក្រុមហ៊ុនជំនួសភរិយាលោក ហ៊ុន ម៉ាណែត ក៏ទទួលបានដីជាច្រើនហិកតារពីលោក ហ៊ុន សែន ផងដែរ។
ជាក់ស្ដែងខែធ្នូ ឆ្នាំ២០២១ លោកនាយករដ្ឋមន្ត្រី ហ៊ុន សែន បានកាត់ដីផ្ទៃបឹងតាមោកចំនួន ៧៥ហិកតារដែលនៅទីតាំងចំនួន៤ ស្ថិតក្នុងសង្កាត់សំរោង សង្កាត់ពញាពន់ និងសង្កាត់គោករកា ខណ្ឌព្រែកព្នៅ រាជធានីភ្នំពេញ ប្រគល់ទៅឱ្យលោកស្រី សាយ សោភា ដើម្បីធ្វើជាកម្មសិទ្ធិ។
គិតចាប់ពីឆ្នាំ២០២១ ដល់ដើមឆ្នាំ២០២៣ អ្នកស្រី សាយ សោភា ដែលជាអគ្គនាយិកាសាលាអន្តរជាតិ វើលដ៍កម្ពុជា និងជាភរិយារបស់ឧត្ដមសេនីយ៍ផ្កាយពីរនៅអង្គភាព “ង៧០” លោក ភឿន ផល្លា ទទួលបានផ្ទៃដីបឹងតាមោកសរុបជាង ១០០ហិកតារ។
ស្វាមីរបស់អ្នកស្រី គឺលោក ភឿន ផល្លា ជាមេបញ្ជាការរងកងពលតូចលេខ៧០ និងធ្លាប់ជាអង្គភាពអង្គរក្សផ្ទាល់របស់លោកនាយករដ្ឋមន្ត្រី ហ៊ុន សែន ដែលរងការចោទប្រកាន់ថាជាប់ពាក់ព័ន្ធនឹងការសម្លាប់ដែលមានលក្ខណៈនយោបាយផងដែរ។
ក្រៅពីពាក់ព័ន្ធនឹងការសម្លាប់មនុស្សហើយ កាលពីថ្ងៃទី១២ ខែតុលា ឆ្នាំ២០២២ លោក ភឿន ផល្លា មេបញ្ជាការរងកងពលតូចង៧០ រូបនេះក៏ត្រូវបានពលរដ្ឋនៅសង្កាត់១ ក្រុងព្រះសីហនុ ចោទប្រកាន់ថាប្រើប្រាស់តួនាទីចូលទៅបំផ្លាញទ្រព្យសម្បត្តិ និងទន្ទ្រានរំលោភដីធ្លីរបស់ពួកគេ បើទោះជាពួកគេដែលជាពលរដ្ឋបានកាន់កាប់អាស្រ័យផលមកយូរឆ្នាំក៏ដោយ៕