33.3 C
Phnom Penh

ប្រជាជន​ថៃ​ជិត ៧០% បង្ហាញ​ការ​គាំទ្រ​លោក ភីថា មេដឹកនាំ​បក្ស​ចលនា​ឆ្ពោះ​ទៅ​មុខ​កាន់​តំណែង​ជា​នាយករដ្ឋមន្ត្រី

ដោយ ឌឹ ខេមបូឌា ដេលី

បទវិភាគ

នៅ​ថ្ងៃទី​១៣ ខែ​កក្កដា ខាងមុខ​នេះ សភា​ថៃ​ទាំង​ពីរ​ថ្នាក់ គឺ​សមាជិក​ព្រឹទ្ធសភា និង​រដ្ឋសភា​ត្រូវ​ទៅ​អង្គុយ​ជុំ​គ្នា​នៅ​ក្នុង​មន្ទីរ​រដ្ឋសភា ដើម្បី​បោះឆ្នោត​ជ្រើសតាំង​បេក្ខជន​ម្នាក់​ឱ្យ​ឡើង​កាន់​តំណែង​ជា​នាយករដ្ឋមន្ត្រី​ទី​៣០ របស់​រាជាណាចក្រ​នៅ​អាស៊ី​អាគ្នេយ៍​មួយ​នេះ។

បេក្ខជន​ដែល​កំពុងតែ​ធ្វើការ​ផ្ទៀងផ្ទាត់​ដើម្បី​ចូល​កាន់​តំណែង​នេះ គឺជា​អ្នក​នយោបាយ​វ័យ​ក្មេង​ឈ្មោះ ភីថា លឹមចារឿរ៉ាត់ មកពី​គណបក្ស​ចលនា​ឆ្ពោះ​ទៅ​មុខ។ គណបក្ស​ចលនា​ឆ្ពោះ​ទៅ​មុខ ជា​គណបក្ស​ដែល​ទទួល​បាន​អាសនៈ​ច្រើន​ជាងគេ​ទាំងអស់​នៅ​ក្នុង​ការ​បោះឆ្នោត​សភា​កាលពី​ថ្ងៃទី​១៤ ឧសភា។

ការ​ប្រជុំ​សភា​របស់​ថៃ នៅ​ថ្ងៃទី​១៣ ខែ​កក្កដា គឺ​មាន​ការ​ប្រជុំ​រួម​គ្នា​រវាង​សមាជិក​សភា ៥០០​រូប និង​ព្រឹទ្ធសភា ២៥០​រូប។ សម្រាប់​បេក្ខជន​ដែល​យក​ទៅ​បង្ហាញ​ខ្លួន​ដើម្បី​ឱ្យ​សមាជិក​សភា​ទាំង​ពីរ​ថ្នាក់​បោះឆ្នោត​គាំទ្រ ឬ​ក៏​មិន​គាំទ្រ​នោះ មាន​តែ​លោក ភីថា លឹមចារឿរ៉ាត់ ប៉ុណ្ណោះ។

បុរស​វ័យ ៤២​ឆ្នាំ​រូប​នេះ​ជា​អ្នក​នយោបាយ​ប្រសូត​ចេញពី​ត្រកូល​អ្នកជំនួញ​អចលនទ្រព្យ និង​ប្រព័ន្ធ​ផ្សព្វផ្សាយ ប៉ុន្តែ​លោក ភីថា នៅ​ពេលនេះ​កំពុង​ស្ថិត​នៅ​ក្នុង​ភាព​ចម្រូងចម្រាស​យ៉ាង​ខ្លាំង​ដោយសារតែ​មាន​ការ​ប្ដឹង​ពី​អ្នក​នយោបាយ​ក្រុម​ប្រឆាំង និង​សមាជិក​ព្រឹទ្ធសភា​មួយ​ចំនួន​ដែល​ថា លោក ភីថា មាន​ភាគហ៊ុន​ក្នុង​មុខជំនួញ​ប្រព័ន្ធ​ផ្សព្វផ្សាយ​ដែល​ច្បាប់​បោះឆ្នោត​របស់​ថៃ​ហាម​បេក្ខជន​ដែល​ឈរឈ្មោះ​តំណាងរាស្ត្រ ឬ​បេក្ខជន​នាយករដ្ឋមន្ត្រី​មាន​មុខជំនួញ​ប្រភេទ​នេះ។

តែ​នៅ​ពេលនេះ វិទ្យាស្ថាន​ជាតិ​អភិវឌ្ឍន៍ ហៅ​កាត់​ថា នីដា បាន​ចុះ​ធ្វើ​ការ​ស្ទង់មតិ​ទៅ​លើ​ពលរដ្ឋ​ថៃ ចំនួន ១៣១០​នាក់ ដែល​មាន​អាយុ​ចាប់ពី ១៨​ឆ្នាំ​ឡើង​ទៅ ហើយ​មាន​ចំណេះដឹង​គ្រប់គ្រាន់​ដើម្បី​សាកសួរ​ពួកគេ​អំពី​ទឹកចិត្ត​ចង់​ឃើញ​បេក្ខជន​ណា​ដែល​ស័ក្ដិសម​ជា​នាយករដ្ឋមន្ត្រី​ថ្មី​ចុងក្រោយ​របស់​រាជាណាចក្រ​ថៃ។ ការ​ស្ទង់មតិ​របស់​វិទ្យាស្ថាន​នេះ ធ្វើឡើង​រយៈពេល ៣​ថ្ងៃ ពី​ថ្ងៃ​ទី​៥ ដល់​ទី​៧ កក្កដា ក្រោយពី​រដ្ឋសភា​មាន​ប្រធាន​រដ្ឋសភា និង​អនុប្រធាន​រដ្ឋសភា​ហើយ​នោះ។

យោង​តាម​ការ​ស្ទង់មតិ បាន​បង្ហាញ​ថា ប្រជាជន​ថៃ​រហូត​ដល់ ៦៥% ជឿ​ថា​គណបក្ស​ចម្រុះ​សម្ព័ន្ធភាព ៨​គណបក្ស នឹង​ឯកភាព​គ្នា​ទាំងស្រុង​សម្រេច​មិន​រុះរើ​បេក្ខភាព​របស់​លោក ភីថា នោះ​ទេ បើ​ទោះជា​រង​សម្ពាធ​ពី​អ្នក​នយោបាយ​ខាងក្រៅ​ក៏ដោយ រួម​ទាំង​សម្ពាធ​ពី​សមាជិក​ព្រឹទ្ធសភា។

ប្រជាជន​ថៃ​ទាំងនោះ​ទទូច​ថា គេ​ត្រូវតែ​ផ្ដល់​ឱកាស​ឱ្យ​លោក ភីថា ទទួល​បាន​តំណែង​នាយករដ្ឋមន្ត្រី​ថៃ ជាជាង​ប្រគល់​បេក្ខភាព​ណា​មួយ​ផ្សេង​ទៀត។

ចំពោះ​ការ​ឆ្លើយ​សំណួរ​មួយ​ទៀត ថា​តើ​ប្រធាន​រដ្ឋសភា​ថ្មី Wan Muhamad Noor Matha សម​នឹង​កាន់​មុខតំណែង​នេះ​ដែរ​ឬ​ទេ គឺ​ជិត ៦០% ឆ្លើយ​ថា​លោក Muhamad Noor សម​នឹង​ទទួល​បាន​តំណែង​នេះ ព្រោះ​បុរស​វ័យ ៧៩​ឆ្នាំ​រូប​នេះ​ជា​អ្នក​នយោបាយ​ឈរ​លើ​ចំណុច​កណ្ដាល និង​មាន​ភាព​អត់ធ្មត់​ក្នុង​វិស័យ​នយោបាយ និង​វិជ្ជាជីវៈ​របស់​ខ្លួន ដែល​ឲ្យ​គណបក្ស​ផ្សេងៗ​ទៀត​អាច​ទទួលយក​បាន​នូវ​តួនាទី​របស់​គាត់។

តែ​យ៉ាងណា អ្នកជំនាញ និង​អ្នក​សង្កេតការណ៍​អំពី​នយោបាយ​របស់​រាជាណាចក្រ​ថៃ យល់​ថា លោក ភីថា ទំនង​ពិបាក​ទទួល​បាន​ការ​ឯកភាព​ភាគច្រើន​ចេញពី​ព្រឹទ្ធសភា និង​សមាជិក​សភា​មកពី​គណបក្ស​ក្រៅពី​សម្ព័ន្ធភាព ព្រោះតែ​លោក ភីថា មាន​សំណុំរឿង​ប្ដឹង​លោក​ទៅ​កាន់​ស្ថាប័ន​បោះឆ្នោត គឺ​ករណី​លោក​មាន​ភាគហ៊ុន​ជាមួយ​ប្រព័ន្ធ​ផ្សព្វផ្សាយ និង​មួយ​ទៀត​ពាក់ព័ន្ធ​នឹង​ការ​ដែល​លោក​ព្យាយាម​រុះរើ​មាត្រា​១១២ ទាក់ទង​នឹង​ច្បាប់​ព្រហ្មទណ្ឌ​ដែល​ប្រឆាំង​ជន​ទាំងឡាយ​ណា​ដែល​ប្រមាថ​ចេស្ដា​ព្រះមហាក្សត្រ។

ចំណុច​ទី​២ នេះ​ហើយ​ដែល​លោក ភីថា ប៉ះទង្គិច​ជា​ខ្លាំង​ជាមួយ​នឹង​គណបក្ស​ដែល​មាន​និន្នាការ​ជាមួយ​នឹង​ពួក​យោធា និង​គណបក្ស​ដែល​មាន​ទំនោរ​ទោរទន់​ទៅ​រក​រាជបល្ល័ង្គ ជាពិសេស​ក្រុម​សមាជិក​ព្រឹទ្ធសភា​មួយ​ភាគ​ធំ។

ក្រុម​សម្ព័ន្ធភាព​ចម្រុះ​របស់​គណបក្ស​ចលនា​ឆ្ពោះ​ទៅ​មុខ​ដែល​មាន ៨​គណបក្ស មាន​អាសនៈ​នៅ​ក្នុង​ដៃ​ចំនួន ៣១២។ យោង​តាម​ច្បាប់ និង​រដ្ឋធម្មនុញ្ញ​ថៃ គឺ​បេក្ខជន​ត្រូវការ​សំឡេង​សរុប ៣៧៦ ឡើង​ទៅ។ ដូច្នេះ សម្ព័ន្ធភាព​នេះ​ត្រូវការ​យ៉ាងតិច ៦៤​សំឡេង​ថែម​ទៀត​ដែល​ចាំបាច់​ត្រូវការ​បំផុត​ពី​សមាជិក​ព្រឹទ្ធសភា។

អ្នក​សង្កេតការណ៍​ព្រមាន​ថា បើ​លោក ភីថា មិន​អាច​ក្លាយ​ជា​នាយករដ្ឋមន្ត្រី​បាន​នោះ គឺ​ប្រជាជន​ថៃ ជាពិសេស​យុវជន​ថៃ នឹង​ខកចិត្ត​ជា​ខ្លាំង ហើយ​ពួកគេ​អាច​នឹង​ចុះ​ដើរ​តាម​ផ្លូវ​តវ៉ា ព្រោះ​ពួកគេ​កំពុង​គាំទ្រ​ខ្លាំង​ទៅ​លើ​លោក ភីថា និង​គណបក្ស​ចលនា​ឆ្ពោះ​ទៅ​មុខ​ដែល​បក្ស​នេះ​ដណ្ដើម​បាន​អាសនៈ​ដល់​ទៅ ៣២ ក្នុង​អាសនៈ​សរុប ៣៣ នៅ​មណ្ឌល​បោះឆ្នោត​ក្រុង​បាងកក ហើយ​បើ​ពុំ​នោះ​ទេ ចលាចល​នយោបាយ​អាច​នឹង​ផ្ទុះ​ខ្លាំង​នៅ​ក្រុង​បាងកក ជា​ថ្មី​ម្ដង​ទៀត៕

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស