សកម្មជនគណបក្សសង្គ្រោះជាតិប្រចាំប្រទេសកូរ៉េខាងត្បូង ព្រមានទៅកាន់មេដឹកនាំបក្សកាន់អំណាចលោក ហ៊ុន សែន ថា ប្រទេសកម្ពុជាមិនមែនជាកម្មសិទ្ធិផ្ដាច់មុខរបស់គ្រួសារត្រកូលហ៊ុននោះទេ បើលោក ហ៊ុន សែន ហ៊ានកាត់ភូមិរបស់ប្រធានរដ្ឋសភាកម្ពុជាលោក ហេង សំរិន ដែលជាទឹកដីខ្មែរឱ្យទៅវៀតណាម គឺជាទង្វើខុសឆ្គងចំពោះជាតិកម្ពុជាយ៉ាងធ្ងន់ធ្ងរ។
សមាជិកចលនាយុវជនគណបក្សសង្គ្រោះជាតិប្រទេសកូរ៉េខាងត្បូង លោក យ៉ង់ ស៊ីណេត បានសរសេរលើគណនីហ្វេសប៊ុករបស់ខ្លួនកាលពីថ្ងៃទី១១ កក្កដា ថា សត្វស្រមោចពិតមែនតែតូច តែពួកវាចេះស្រឡាញ់ និងការពារសម្បុករបស់វាខ្លាំងណាស់នៅពេលដែលមានអ្នកចូលទៅបំផ្លាញ ប៉ុន្តែប្លែកអីតែពលរដ្ឋខ្មែរដែលគាំទ្របក្សកាន់អំណាចដែលមានភាសា ទឹកដី អរិយធម៌ វប្បធម៌ និងសម្បត្តិធនធានធម្មជាតិដ៏មហាសាល តែបែរជាបណ្តែតបណ្តោយឱ្យគណបក្សមួយនេះបំផ្លាញទ្រព្យសម្បត្តិជាតិខ្មែរដោយគ្មានការឈឺចាប់ទៅវិញ។
លោក យ៉ង់ ស៊ីណេត អះអាងថា ការលើកឡើងរបស់លោកមិនមែនគ្មានភស្តុតាង ឬគ្មានហេតុផលនោះទេ ព្រោះទឹកដីកម្ពុជាក្រោមបានបាត់បង់ កោះត្រល់ក៏បានបាត់បង់ ការបោះបង្គោលព្រំដែនធ្វើឡើងដោយស្ងាត់ៗ និងទឹកដីខ្មែរជាច្រើនលានហិកតារត្រូវរបបលោក ហ៊ុន សែន សម្បទានទៅឱ្យវៀតណាមរហូតដល់ ៩៩ឆ្នាំថែមទៀត ប៉ុន្តែអ្នកគាំទ្រគណបក្សនេះមិនដែលនាំគ្នាតវ៉ានោះទេ តែពួកគេបែរជាគាំទ្រផែនការរំលោភទឹកដីខ្មែររបស់បរទេសឈ្លានពានតាមរយៈទង្វើនានារបស់គណបក្សប្រជាជនកម្ពុជា ដែលកំពុងតែបំផ្លាញទឹកដីរបស់ខ្លួនទៅវិញ។
ប្រភពដដែលលើកជាសំណួរថា តើពលរដ្ឋខ្មែរគ្រប់រូបគួរនាំគ្នារស់នៅក្នុងប្រទេសដែលមានមេដឹកនាំខ្លួនឯងរំលោភច្បាប់ បំផ្លាញទ្រព្យសម្បត្តិជាតិ បង្កភាពអយុត្តិធម៌ពេញផ្ទៃប្រទេសកើតដែរទេ ហើយប្រសិនបើពលរដ្ឋខ្មែរដែលមានលក្ខណៈសម្បត្តិជាមនុស្សអាចបន្តរស់នៅបាន នោះមានន័យថា សត្វស្រមោចមានឧត្តមគតិជាងពួកគេពិតប្រាកដមិនអាចប្រកែកបានឡើយ។
ការអះអាងនេះ ធ្វើឡើងបន្ទាប់ពីមានវីដេអូមួយរបស់លោក ហ៊ុន សែន ដែលបានលើកឡើងពីការកំណត់ព្រំដែនរវាងកម្ពុជា និងវៀតណាម ដែលត្រូវបានគេផ្សព្វផ្សាយឡើងវិញលើបណ្ដាញសង្គមហ្វេសប៊ុកព្រោងព្រាតកាលពីពេលថ្មីៗនេះ។
កាលពីថ្ងៃទី១៦ ខែសីហា ឆ្នាំ២០២០ មេដឹកនាំបក្សកាន់អំណាចលោក ហ៊ុន សែន បានអះអាងថា ការកំណត់ព្រំដែនរវាងកម្ពុជា និងវៀតណាម បានរកឃើញថាភូមិខ្មែរមួយចំនួននៅក្នុងទឹកដីវៀតណាម ខណៈភូមិវៀតណាមខ្លះក៏ស្ថិតនៅក្នុងទឹកដីខ្មែរដែរ ក្នុងនោះគេរកឃើញដែរថា ភូមិរបស់លោក ហេង សំរិន នៅក្នុងស្រុកពញាក្រែក ខេត្តត្បូងឃ្មុំ ក៏បានស្ថិតនៅក្នុងទឹកដីវៀតណាម ដែរ។
លោក ហ៊ុន សែន បានលើកឡើងថា ដើម្បីដោះស្រាយព្រំដែនបែបនេះ គឺមានជម្រើស៣ ទី១ គឺត្រូវកាត់ភូមិលោក ហេង សំរិន ឱ្យទៅវៀតណាម ចំណែកជម្រើសទី២ គឺត្រូវរុះរើភូមិលោក ហេង សំរិន មកក្នុងទឹកដីខ្មែរវិញ តែត្រូវរកកន្លែងផ្សេងសម្រាប់ធ្វើជាភូមិរបស់គាត់ ដោយឡែកជម្រើសទី៣ គឺមានតែដោះដូរភូមិខ្មែរជាមួយភូមិវៀតណាមតែប៉ុណ្ណោះ។
មេដឹកនាំខ្មែរដែលវៀតណាមលើកបន្តុបលោក ហ៊ុន សែន បញ្ជាក់ថា បើដោះដូរភូមិជាមួយវៀតណាម គឺកម្ពុជានឹងចំណេញដីពីការដោះដូរនេះជាង ២ពាន់ហិកតារឯណោះ ហើយលោកក៏បានចុះហត្ថលេខាលើកិច្ចព្រមព្រៀងដោះដូរនេះដែរ ខណៈដីជាង ២ពាន់ហិកតារនោះគឺត្រូវប្រគល់ឱ្យកងទ័ពដែលរក្សាព្រំដែននៅទីនោះតែម្តង។
ទាក់ទិននឹងបញ្ហានេះ អនុប្រធានវេទិកាពលរដ្ឋ លោក ម៉ែន ណាត បានលើកឡើងថា វៀតណាមមិនល្ងង់ដល់ថ្នាក់ប្រគល់ដីរបស់ពួកគេឱ្យខ្មែរចំណេញដល់ទៅជាង ២ពាន់ហិកតារនោះទេ។ លោកបន្ថែមថា ជុំវិញករណីព្រំដែននេះ លោក ហ៊ុន សែន បានប្រព្រឹត្តកំហុសយ៉ាងធ្ងន់ធ្ងរចំពោះការចុះកិច្ចព្រមព្រៀងខ្សែបន្ទាត់ព្រំដែនជាមួយវៀតណាម ដោយផ្អែកទៅលើកិច្ចព្រមព្រៀងខុសច្បាប់ព្រំដែនទឹកប្រវត្តិសាស្ត្រឆ្នាំ១៩៨២ សន្ធិសញ្ញាខុសច្បាប់កំណត់ព្រំដែនរដ្ឋឆ្នាំ១៩៨៥ និងសន្ធិសញ្ញាខុសច្បាប់បំពេញបន្ថែមឆ្នាំ២០០៥ សម្រាប់ធ្វើជាមូលដ្ឋានក្នុងការកំណត់ព្រំដែនរវាងកម្ពុជា-វៀតណាម សព្វថ្ងៃនេះ។
លោក ម៉ែន ណាត អះអាងថា ជាងនេះទៀត ការចុះកិច្ចព្រមព្រៀងជាមួយវៀតណាមដោយកំណត់យកផែនទីបោនខ្នាត ១/២៥ពាន់ និងផែនទីបោនខ្នាត ១/៥០ពាន់ ជំនួសផែនទីបោនខ្នាត ១/១០០ពាន់ ដែលមានចែងក្នុងរដ្ឋធម្មនុញ្ញដើម្បីកំណត់ខ្សែបន្ទាត់ព្រំដែនរវាងកម្ពុជា និងវៀតណាមនោះ គឺរឹតតែខុសធ្ងន់ធ្ងរថែមទៀត ដែលនឹងធ្វើឱ្យកម្ពុជាបាត់បង់ទឹកដីទៅវៀតណាមកាន់តែច្រើន កុំថាឡើយដល់ទៅនិយាយរឿងកម្ពុជាចំណេញដីជាង ២ពាន់ហិកតារពីវៀតណាមនោះ។
រដ្ឋធម្មនុញ្ញកម្ពុជា មាត្រា២ ចែងថា បូរណភាពទឹកដីរបស់ព្រះរាជាណាចក្រកម្ពុជាមិនអាចរំលោភបានដាច់ខាតក្នុងព្រំដែនរបស់ខ្លួនដែលមានកំណត់ក្នុងផែនទីខ្នាត ១/១០០.០០០៕