29 C
Phnom Penh

បេក្ខជន​នាយករដ្ឋមន្ត្រី​ថៃ​លោក Pita Limjaroenrat ប្រឈមមុខ​នឹង​បណ្ដឹង​នៅ​តុលាការ​ធម្មនុញ្ញ

ដោយ ឌឹ ខេមបូឌា ដេលី

បទវិភាគ

បេក្ខជន​នាយករដ្ឋមន្ត្រី​ថៃ លោក Pita Limjaroenrat ប្រឈមមុខ​នឹង​បណ្ដឹង​នៅ​តុលាការ​ធម្មនុញ្ញ ដែល​មេធាវី​ម្នាក់​ដ៏​មាន​ឥទ្ធិពល​បាន​ប្ដឹង​លោក​ពី​បទ​ប៉ុនប៉ង​ផ្ដួល​រំលំ​រដ្ឋាភិបាល​ប្រជាធិបតេយ្យ​ជ្រក​ក្រោម​ដំបូល​រដ្ឋធម្មនុញ្ញ។

ភ្នាក់ងារ​សារព័ត៌មាន Reuters បាន​ឲ្យ​ដឹង​ថា តុលាការ​ធម្មនុញ្ញ​ថៃ មិន​ត្រឹមតែ​ទទួលយក​បណ្ដឹង​របស់​មេធាវី​ម្នាក់​នោះ​មក​ពិចារណា​នោះ​ទេ គឺ​នៅ​ថ្ងៃទី​១២ កក្កដា នេះ តុលាការ​កំពូល​មួយ​នេះ​ក៏​បាន​ទទួល​សំណើ​ពី​គណៈកម្មការ​បោះឆ្នោត​ថៃ ដែល​ស្នើ​ឱ្យ​ផ្អាក​ជាបន្ទាន់​ការ​ប្រជុំ​សភា​ទាំង​ពីរ​ថ្នាក់​ក្នុង​ការ​ជ្រើសតាំង​លោក Pita Limjaroenrat មកពី​គណបក្ស​ចលនា​ឆ្ពោះ​ទៅ​មុខ​ជា​នាយករដ្ឋមន្ត្រី។

បើ​តាម​ប្រភព​ដដែល​នេះ សំណុំរឿង​ពីរ​នេះ​កំពុង​ធ្លាក់​ក្នុង​ដៃ​តុលាការ​ធម្មនុញ្ញ​ដែល​ត្រូវ​សិក្សា ដើម្បី​ឈាន​ទៅ​ដល់​ការ​ពិនិត្យ​នីតិវិធី​បើក​សវនាការ ឬ​ទម្លាក់​ចោល​សំណុំរឿង​ទាំង​ពីរ​នេះ។

យោង​តាម​សេចក្ដី​ជូនដំណឹង​របស់​តុលាការ​ធម្មនុញ្ញ ដែល​បញ្ជូន​ទៅ​សភា​ទាំង​ពីរ​ថ្នាក់ គឺ​រដ្ឋសភា និង​ព្រឹទ្ធសភា បាន​បង្គាប់​ឱ្យ​លើក​ពេល​ប្រជុំ​ដើម្បី​ជ្រើសតាំង​លោក Pita Limjaroenrat ដោយ​អនុញ្ញាត​ឱ្យ​បើក​សម័យ​ប្រជុំ​នៅ​ថ្ងៃទី​២៧ កក្កដា។

សេចក្ដី​បង្គាប់​របស់​តុលាការ​ធម្មនុញ្ញ​ថៃ បាន​ធ្វើឡើង​បន្ទាប់ពី​គណៈកម្មការ​រៀបចំ​ការ​បោះឆ្នោត​នៃ​ប្រទេស​ថៃ បាន​ផ្តល់​អនុសាសន៍​ទៅ​កាន់​តុលាការ​ជាន់ខ្ពស់​នេះ​ឱ្យ​ផ្អាក​សមាជិកភាព​សភា​របស់​មេដឹកនាំ​គណបក្ស Move Forward គឺ​លោក Pita Limjaroenrat ជា​បណ្ដោះអាសន្ន និង​ជាបន្ទាន់​ជុំវិញ​ការ​ចោទប្រកាន់​ថា​រូបលោក​បាន​បំពាន​ច្បាប់​បោះឆ្នោត។

គណបក្ស Move Forward បាន​ទទួល​ជ័យជម្នះ​ក្នុង​ការ​បោះឆ្នោត​សភា​កាលពី​ថ្ងៃទី​១៤ ខែ​ឧសភា ឆ្នាំ​២០២៣ ដោយ​ទទួល​បាន​អាសនៈ​ច្រើន​ជាងគេ គឺ ១៥១​អាសនៈ ហើយ​ជា​បក្ស​មាន​អាទិភាព​ជាងគេ​ក្នុង​ការ​បញ្ជូន​បេក្ខជន​នាយករដ្ឋមន្ត្រី​ម្នាក់​ទៅ​សុំ​ការ​ទុកចិត្ត​ពី​សមាជិក​សភា​ថៃ​ទាំង​ពីរ​ថ្នាក់​ដែល​មាន ៧៥០​រូប។

កាលពី​ខែ​មិថុនា គណៈកម្មការ​រៀបចំ​ការ​បោះឆ្នោត​ថៃ បាន​បង្កើត​គណៈកម្មាធិការ​ពិសេស​មួយ​ដើម្បី​បើក​ការ​ស៊ើបអង្កេត​ថា តើ​អ្នក​នយោបាយ​វ័យ​ក្មេង​រូប​នេះ​មាន​លក្ខណៈ​សម្បត្តិ​គ្រប់គ្រាន់​ដើម្បី​ធ្វើ​ជា​សមាជិក​សភា និង​ឈរឈ្មោះ​ជា​នាយករដ្ឋមន្ត្រី​ដែរ​ឬ​យ៉ាង​ណា ពាក់ព័ន្ធ​នឹង​ការ​ចោទ​ថា​លោក​កាន់កាប់​ភាគហ៊ុន​នៅ​ក្នុង​ក្រុមហ៊ុន​ប្រព័ន្ធ​ផ្សព្វផ្សាយ iTV នៅ​ក្រុង​បាងកក នៅ​ពេល​ដែល​ច្បាប់​បោះឆ្នោត​របស់​ប្រទេស​ថៃ​ហាម​ដាច់ខាត។

លោក Ittiporn Boonprakong ជា​ប្រធាន​ស្ថាប័ន​បោះឆ្នោត បាន​បញ្ជាក់​ថា គណៈកម្មការ​បោះឆ្នោត​បាន​ស្នើ​ទៅ​តុលាការ​ធម្មនុញ្ញ​ឱ្យ​ផ្អាក​សមាជិកភាព​តំណាងរាស្ត្រ​របស់​លោក Pita ស្រប​ពេល​ដែល​សភា​ថៃ នឹង​ត្រូវ​រៀបចំ​ការ​បោះឆ្នោត​ដើម្បី​ជ្រើសតាំង​នាយករដ្ឋមន្ត្រី​ថ្មី​នៅ​ថ្ងៃ​ព្រហស្បតិ៍ ទី​១៣ ខែ​កក្កដា។

នៅ​ក្រោម​ច្បាប់​បោះឆ្នោត​របស់​ប្រទេស​ថៃ ទោះជា​លោក Pita ត្រូវ​បាន​ផ្អាក​សមាជិកភាព​សភា​ក្តី ក៏​លោក​នៅតែ​អាច​ឈរឈ្មោះ​ជា​នាយករដ្ឋមន្ត្រី​បាន​ដែរ។ តែ​សេចក្ដី​បង្គាប់​របស់​តុលាការ​ថៃ បាន​ធ្វើ​ឱ្យ​សភា​ទាំង​ពីរ​នេះ​ពុំ​មាន​សិទ្ធិ​បើក​សម័យ​ប្រជុំ​របស់​ខ្លួន​នោះ​ទេ ជាពិសេស​ចំពោះ​ការ​បោះឆ្នោត​លើ​បេក្ខភាព​របស់​លោក Pita ដែល​ត្រៀម​ឡើង​កាន់​តំណែង​នាយករដ្ឋមន្ត្រី​ថៃ ទី​៣០។

កាលពី​ឆ្នាំ​២០១៩ លោក Thanathorn Juangroongruangkit ដែល​ជា​មេដឹកនាំ​អតីត​គណបក្ស Future Forward ត្រូវ​បាន​តុលាការ​ធម្មនុញ្ញ​ថៃ ដក​សមាជិកភាព​សភា និង​ហាម​ធ្វើ​សកម្មភាព​នយោបាយ​រយៈពេល ១០​ឆ្នាំ ដោយ​ចោទប្រកាន់​ថា​បាន​បំពាន​ច្បាប់​បោះឆ្នោត​ពាក់ព័ន្ធ​នឹង​ការ​កាន់កាប់​ភាគហ៊ុន​នៅ​ក្នុង​ក្រុមហ៊ុន​ប្រព័ន្ធ​ផ្សព្វផ្សាយ V-Luck Media ដែល​ជា​ការ​ចោទប្រកាន់​ដូច​គ្នា​នឹង​លោក Pita កំពុង​ប្រឈម​នា​ពេលនេះ។

គណបក្ស Future Forward ជា​គណបក្ស​ដើម​របស់​បក្ស​ចលនា​ឆ្ពោះ​ទៅ​មុខ Move Forward ដែល​ត្រូវ​បាន​តុលាការ​ធម្មនុញ្ញ​ថៃ រំលាយ​ក្នុង​ឆ្នាំ​២០២០។

យ៉ាងណា ប្រសិនបើ​លោក Pita មិន​អាច​ក្លាយ​ជា​នាយករដ្ឋមន្ត្រី​បាន​ទេ គឺ​បក្ស​របស់​លោក និង​បក្ស​សម្ព័ន្ធភាព​ត្រូវ​ផ្គូផ្គង​បេក្ខជន​ថ្មី​ម្នាក់​ទៀត​ទៅ​សុំ​សេចក្ដី​ទុកចិត្ត​សភា​ទាំង​ពីរ​ថ្នាក់​នេះ។ តែ​យ៉ាងណា នាយករដ្ឋមន្ត្រី​ចាំ​ផ្ទះ លោក ប្រាយុទ្ធ ចាន់អូចា នឹង​ត្រូវ​ដឹកនាំ​ប្រទេស​ជា​បណ្ដោះអាសន្ន​រហូត​ទាល់តែ​រដ្ឋាភិបាល​ថ្មី​ត្រូវ​បាន​បង្កើត​ឡើង។

ជាមួយ​គ្នា​នេះ កាលពី​ថ្ងៃ​ព្រហស្បតិ៍ ទី​១១ កក្កដា លោក ប្រាយុទ្ធ បាន​ប្រកាស​ពី​ការ​សម្រេច​ចិត្ត​ចូល​និវត្តន៍​ពី​នយោបាយ។

លោក ប្រាយុទ្ធ បាន​បញ្ជាក់​ក្នុង​សេចក្តី​ថ្លែងការណ៍​របស់​គណបក្ស​លោក​ថា៖ ចាប់ពី​ពេលនេះ​តទៅ លោក​លាឈប់​ពី​នយោបាយ និង​លាលែង​ពី​សមាជិក​នៃ​គណបក្ស​ថៃ​រួបរួម​ជាតិ។

លោក ប្រាយុទ្ធ បាន​ក្លាយ​ជា​មេដឹកនាំ​នៃ​រដ្ឋាភិបាល​ថៃ​ជា​លើកដំបូង កាលពី​ក្នុង​ឆ្នាំ​២០១៤ បន្ទាប់ពី​លោក​ដឹកនាំ​ការ​ធ្វើ​រដ្ឋប្រហារ​យោធា ដែល​នាំ​ទៅ​រក​ការ​ផ្តួល​រំលំ​រដ្ឋាភិបាល​ស៊ីវិល​របស់​អ្នកស្រី យីងឡាក់ ស៊ីណាវ៉ាត់។ ក្រោយ​មក លោក​ក៏​បាន​ក្លាយ​ជា​នាយករដ្ឋមន្ត្រី​ក្រោយ​ការ​បោះឆ្នោត​សភា​ថៃ នា​ឆ្នាំ​២០១៩។

តែ​ការ​បោះឆ្នោត​សភា​នៅ​ថ្ងៃទី​១៤ ខែ​ឧសភា ឆ្នាំ​២០២៣ នេះ គណបក្ស​របស់​លោក ប្រាយុទ្ធ បាន​ជួប​រឿង​បរាជ័យ​ធ្ងន់ធ្ងរ ដែល​បក្ស​ឈ្នះ​ឆ្នោត​ច្រើន​ជាងគេ គឺ​បក្ស​ចលនា​ឆ្ពោះ​ទៅ​មុខ​ដឹកនាំ​ដោយ​លោក Pita Limjaroenrat និង​បក្ស​ភឿថៃ របស់​អតីត​នាយករដ្ឋមន្ត្រី ថាក់ស៊ីន ស៊ីណាវ៉ាត់។

បើ​តាម​អ្នក​សង្កេតការណ៍ លោក Pita Limjaroenrat អាច​នឹង​បាត់បង់​សិទ្ធិ​ជា​បេក្ខជន​នាយករដ្ឋមន្ត្រី​បើ​តុលាការ​ធម្មនុញ្ញ​សម្រេច​សេចក្ដី​ថា លោក​ពិត​ជា​មាន​កំហុស ហើយ​លទ្ធភាព​អាច​ផ្ដល់​ទៅ​លើ​បក្ស​ភឿថៃ។ តែ​បើ​បក្ស​នេះ​អស់​លទ្ធភាព​ទៀត​នោះ វា​នឹង​ចូល​ទៅ​ដល់​ក្រុម​សម្ព័ន្ធភាព​នៃ​ពួក​យោធា​វិញ​ម្ដង។

ប្រការ​នេះ នាំ​ឱ្យ​មាន​ការ​ចោទ​សួរ​ថា តើ​លោក ប្រាយុទ្ធ មាន​ឱកាស​ម្ដង​ទៀត​ដែរ​ឬ​ទេ​ដើម្បី​តោង​អំណាច​ជា​ថ្មី។

យ៉ាងណា ក្រុម​យុវជន​ថៃ​នៅ​ទីក្រុង​បាងកក ដ៏​លើសលប់​ព្រមាន​ងើប​ឡើង​ប្រឆាំង​នឹង​ពួក​យោធា​ដែល​ព្យាយាម​បង្កើត​សម្ព័ន្ធភាព​ដើម្បី​បន្ត​ក្រាញ​អំណាច។

ក្រុម​យុវជន​ថៃ ដែល​មកពី​គណបក្ស​ចលនា​ឆ្ពោះ​ទៅ​មុខ និង​គណបក្ស​ភឿថៃ បាន​ព្រមាន​រួច​ស្រេច​ហើយ​ថា ពួកគេ​នឹង​ប្រមូល​កម្លាំង​យុវជន​នៅ​ទូទាំង​ក្រុង​បាងកក ធ្វើ​ការ​តវ៉ា​តាម​ដងផ្លូវ​ដាក់​សម្ពាធ​ទៅ​ព្រឹទ្ធសភា​ឱ្យ​គោរព​ឆន្ទៈ​របស់​ប្រជាជន ដោយ​មិន​ត្រូវ​រក​លេស​ដើម្បី​ឱ្យ​ពួក​យោធា​បន្ត​កាន់​អំណាច​ទៀត​នោះ​ទេ៕

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស