38.1 C
Phnom Penh

តើ​លោក Pita មេ​បក្ស​ចលនា​ឆ្ពោះ​ទៅ​មុខ អាច​ដើរ​ជាន់​វាសនា​លោក Thanathorn ឬ​ទេ?

ដោយ ឌឹ ខេមបូឌា ដេលី

បទវិភាគ

រាជាណាចក្រ​ថៃ នៅ​ពេលនេះ​កំពុង​រអិល​ធ្លាក់​ក្នុង​ការ​បែកបាក់​សង្គម​ហើយ។ កាលពី​ថ្ងៃ​អាទិត្យ ទី​១៦ ខែ​កក្កដា ការ​តវ៉ា​ធំ​មួយ​បាន​ផ្ទុះ​ឡើង​នៅ​កណ្ដាល​ក្រុង​បាងកក ដែល​មាន​ក្បួន​តវ៉ា​ជា​រថយន្ត និង​ទោចក្រយានយន្ត​ដល់​ទៅ​ជាង ៥០០​គ្រឿង។

ក្រុម​តវ៉ា​នេះ​ទៅ​ប្រមូលផ្ដុំ​គ្នា​នៅ​ក្នុង​សួន​វិមាន​ប្រជាធិបតេយ្យ​នៅ​ខាង​មុខ​ទីបញ្ជាការ​កងទ័ព​ជើងទឹក ទ័ព​ជើងគោក និង​ទីបញ្ជាការ​ប៉ូលិស។ ក្រុម​តវ៉ា​ទាំងនោះ​ជា​អ្នកគាំទ្រ និង​បោះឆ្នោត​ឱ្យ​គណបក្ស​ចលនា​ឆ្ពោះ​ទៅ​មុខ ដែល​មាន​លោក ភីថា លឹមចារឿនរ៉ាត់ ជា​បេក្ខជន​បក្ស​ដ៏​មាន​ប្រជាប្រិយ​បំផុត​នេះ។

ក្រុម​អ្នក​តវ៉ា​បាន​ស្រែក​អាក្រោធ​ថា សមាជិក​ព្រឹទ្ធសភា​ណា​ដែល​មិន​បាន​បោះឆ្នោត​គាំទ្រ​លោក ភីថា កាលពី​ក្នុង​កិច្ចប្រជុំ​សភា​ថ្ងៃទី​១៣ កក្កដា ត្រូវតែ​លាលែង​ពី​តំណែង។ ក្រុម​បាតុករ​បាន​ស្រែក​ទៀត​ថា ក្រុម​សមាជិក​សភា​ដែល​មាន​សិទ្ធិ​ចូល​ទៅ​អង្គុយ​ក្នុង​រដ្ឋសភា​ជាមួយ​នឹង​សមាជិក​សភា​ជាប់​ឆ្នោត​នៅ​ក្នុង​ការ​បោះឆ្នោត​កាលពី​ថ្ងៃទី​១៤ ឧសភា ពុំ​តំណាង​សំឡេង​របស់​ម្ចាស់​ឆ្នោត​នោះ​ទេ ព្រោះ​តែ​ក្រុម​នេះ​កើតឡើង​ដោយ​ការ​ធ្វើ​រដ្ឋប្រហារ​ឆ្នាំ​២០១៤។

ជាមួយ​គ្នា​នេះ ក្រុម​តវ៉ា​បាន​សន្យា​រួម​គ្នា​កេណ្ឌ​កម្លាំង​មកពី​ទូទាំង​ប្រទេស​ដែល​គាំទ្រ​គណបក្ស​ចលនា​ឆ្ពោះ​ទៅ​មុខ និង​គាំទ្រ​បក្ស​សម្ព័ន្ធភាព ៧​គណបក្ស​ទៀត រួម​ទាំង​បក្ស​ភឿថៃ ដែល​ជា​បក្ស​ធំ​ទី​២ ឱ្យ​មក​កាន់​ក្រុង​បាងកក ដើម្បី​គាបសង្កត់​ឱ្យ​សមាជិក​សភា​ដែល​គាំទ្រ​ប្រជាធិបតេយ្យ​ទទួល​យក​ញត្តិ​សុំ​កាត់បន្ថយ​អំណាច និង​សិទ្ធិ​សមាជិក​ព្រឹទ្ធសភា ដោយ​មិន​ត្រូវ​ឱ្យ​មក​ចូល​សម្រេច​ក្នុង​ការ​បោះឆ្នោត​ជ្រើសតាំង​នាយករដ្ឋមន្ត្រី​នោះ​ទេ។

មិន​តែប៉ុណ្ណោះ ក្រុម​បាតុករ​បាន​ប្រកាស​ប្រឆាំង​តុលាការ​ធម្មនុញ្ញ​ថៃ ប្រសិនបើ​កាត់​សេចក្ដី​ដកហូត​លោក ភីថា មិន​ឱ្យ​ជា​អ្នក​តំណាងរាស្ត្រ ឬ​ដក​បេក្ខភាព​ជា​នាយករដ្ឋមន្ត្រី។ ក្រុម​បាតុករ​ប្រកាស​ថា ពួកគេ​ទទួល​បាន​ការ​ឆ្លើយតប​ថា​ជាង ១០​ខេត្ត​ក្រុង​នៅ​ជុំវិញ​ក្រុង​បាងកក នឹង​ឡើង​មក​កាន់​រាជធានី​មួយ​នេះ​នៅ​ថ្ងៃ​ពុធ ទី​១៩ កក្កដា ដែល​សភា​ទាំង​ពីរ​ថ្នាក់​ត្រូវ​បោះឆ្នោត​លើ​បេក្ខភាព​នាយករដ្ឋមន្ត្រី​ម្ដង​ទៀត ដែល​គេ​រំពឹង​ថា​លោក ភីថា អាច​ត្រូវ​បាន​បក្ស​សម្ព័ន្ធភាព ៨​បក្ស​យល់ព្រម​ឱ្យ​លោក​ទៅ​បង្ហាញ​ខ្លួន​ជា​បេក្ខជន​នាយករដ្ឋមន្ត្រី​ម្ដង​ទៀត។

នៅ​ក្នុង​ការ​បោះឆ្នោត​សភា​កាលពី​ថ្ងៃទី​១៤ ឧសភា មាន​អ្នក​ចេញ​ទៅ​បោះឆ្នោត​ជាង ៧៥​ភាគរយ គឺ​ជិត ៣៨​លាន​នាក់។ ក្នុង​នោះ បក្ស​ចលនា​ឆ្ពោះ​ទៅ​មុខ បាន​សំឡេង​ច្រើន​ជាងគេ គឺ​ជាង ១៤​លាន ៤​សែន​នាក់ ហើយ​គណបក្ស​ភឿថៃ បាន​សន្លឹកឆ្នោត​ទី​២ បាន​ជិត ១១​លាន​នាក់។ នៅ​ទីក្រុង​បាងកក ដែល​ជា​មណ្ឌល​បោះឆ្នោត​ធំ​ជាងគេ​មាន​រហូត ៣៣​អាសនៈ គឺ​គណបក្ស​ចលនា​ឆ្ពោះ​ទៅ​មុខ ដណ្ដើម​ផ្ដាច់មុខ​គេ ដោយ​ទទួល​បាន ៣២​អាសនៈ ហើយ​បក្ស​ភឿថៃ បាន​មួយ​អាសនៈ។ ចំណែក​បក្ស​របស់​ពួក​យោធា​ដែល​មាន​លោក ប្រាយុទ្ធ ជា​មេខ្លោង​ធំ​ជាងគេ មិន​ទទួល​បាន​អាសនៈ​មួយ​ទេ​នៅ​មណ្ឌល​បោះឆ្នោត​ក្រុង​បាងកក។

អាសនៈ​រដ្ឋសភា​សរុប​ចំនួន ៥០០ បក្ស​សម្ព័ន្ធភាព ៨​បក្ស​មាន​អាសនៈ ៣១២។ ក្នុង​ចំណោម​បក្ស​ទាំង​៨ នៃ​ក្រុម​សម្ព័ន្ធភាព​ដឹកនាំ​ដោយ​បក្ស​ចលនា​ឆ្ពោះ​ទៅ​មុខ លោក ភីថា ជា​បេក្ខជន​អាទិភាព​ដែល​ត្រូវ​ក្លាយ​ជា​នាយករដ្ឋមន្ត្រី​នៃ​រាជាណាចក្រ​នេះ។ នៅ​ក្នុង​ការ​បោះឆ្នោត​កាល​ថ្ងៃទី​១៣ កក្កដា លោក ភីថា បាន​ជួប​រឿង​បរាជ័យ​ដោយ​លោក​ខ្វះ​សំឡេង​គាំទ្រ​ចំនួន ៥២​សំឡេង​ទៀត គឺ​ទទួល​បាន​តែ ៣២៤​សំឡេង។

យោង​តាម​រដ្ឋធម្មនុញ្ញ​ថៃ ឆ្នាំ​២០១៧ ដែល​ពួក​យោធា​តាក់តែង​ឡើង​តម្រូវ​ឱ្យ​បេក្ខជន​នាយករដ្ឋមន្ត្រី​ត្រូវ​ឆ្លងកាត់​ការ​បោះឆ្នោត​ក្នុង​សំឡេង​ទាំង​សមាជិក​រដ្ឋសភា និង​ព្រឹទ្ធសភា​ចំនួន ៧៥០​រូប ហើយ​បេក្ខជន​ត្រូវការ​សំឡេង​៣៧៦។ សម្រាប់​លោក ភីថា ទទួល​បាន ៣២៤​សំឡេង​នៅ​ក្នុង​ការ​បោះឆ្នោត​ជុំ​ទី​១។ តាម​ការ​ចុះផ្សាយ​ក្នុង​សារព័ត៌មាន​ថៃ​ជាច្រើន បក្ស​សម្ព័ន្ធភាព​កំពុងតែ​សាកល្បង​យក​លោក ភីថា ទៅ​កាន់​សភា​ម្ដង​ទៀត។ ប៉ុន្តែ​ក្រុម​សមាជិក​ព្រឹទ្ធសភា​មួយ​ក្រុម​បាន​ចេញ​មុខ​ប្រឆាំង​មិន​ឱ្យ​បក្ស​សម្ព័ន្ធភាព​នេះ​បញ្ជូន​លោក ភីថា ទៅ​កាន់​សភា​ម្ដង​ទៀត​នោះ​ទេ។ សមាជិក​ព្រឹទ្ធសភា Seri Suwannapanont បាន​និយាយ​ថា បេក្ខជន​ដែល​បរាជ័យ​ហើយ​នោះ មិន​គួរ​មាន​មុខ​ទៅ​កាន់​សម័យ​ប្រជុំ​សភា​ដើម្បី​ឱ្យ​មាន​បោះឆ្នោត​លើក​ទី​២ នោះ​ទេ។

ប៉ុន្តែ​ក្រុម​សម្ព័ន្ធភាព​របស់​បក្ស​ចលនា​ឆ្ពោះ​ទៅ​មុខ ទំនង​ជា​មិន​ទទួលយក​ការ​គាបសង្កត់​ពី​ក្រុម​ព្រឹទ្ធសភា​ខាង​លោក Seri Suwannapanont នោះ​ទេ។ ក្រុម​សម្ព័ន្ធភាព​ថា​គេ​ចង់​ដឹង​ថា​តើ​លោក ភីថា អាច​កើន​ការ​គាំទ្រ ឬ​ក៏​ថយ​ចុះ​ការ​គាំទ្រ​នៅ​ក្នុង​ការ​បោះឆ្នោត​នៃ​សមាជិក​សភា​ថ្ងៃ​ពុធ​ក្នុង​សប្ដាហ៍​នេះ។

ជាមួយ​គ្នា​នេះ ប្រធាន​ព្រឹទ្ធសភា លោក Pornpetch Wichitcholchai បាន​ទទូច​ទៅ​សមត្ថកិច្ច​ប៉ូលិស​ក្រុង​បាងកក ឱ្យ​ជួយ​ការពារ​សុវត្ថិភាព​របស់​គ្រួសារ​សមាជិក​ព្រឹទ្ធសភា ដែល​លោក​ថា​ពួក​បាតុករ​បាន​គំរាម​ដល់​គេហដ្ឋាន​របស់​ពួកគាត់។ លោក Pornpetch បាន​ថ្លែង​ថា សមាជិក​ព្រឹទ្ធសភា​មួយ​ចំនួន​បាន​បញ្ជូន​សារ​មក​លោក​ថា សមាជិក​គ្រួសារ​របស់​ពួកគាត់​កំពុង​ភ័យខ្លាច​បាតុករ​ប្រើ​ហិង្សា។

អ្នកវិភាគ និង​អ្នក​សង្កេតការណ៍​មើល​ឃើញ​ថា លោក ភីថា លឹមចារឿនរ៉ាត់ នៅ​ពេលនេះ​កំពុង​មាន​សត្រូវ​ដ៏​មាន​ឥទ្ធិពល​នៅ​ចំពោះ​មុខ គឺ​ដូច​នឹង​អតីត​មេ​របស់​លោក​ដែរ គឺ​លោក Thanathorn Juangroongruangkit អតីត​ប្រធាន​គណបក្ស​អនាគត​ទៅ​មុខ (FFP) ដែល​ត្រូវ​បាន​តុលាការ​ធម្មនុញ្ញ​រំលាយ​កាលពី​ក្រោយ​ការ​បោះឆ្នោត​សភា​នៅ​ឆ្នាំ​២០១៩ តាម​បណ្ដឹង​របស់​គណៈកម្មការ​បោះឆ្នោត​ដែល​ចោទ​លោក Thanathorn ថា​បាន​រំលោភ​ច្បាប់​បោះឆ្នោត ដោយសារ​លោក Thanathorn បាន​បញ្ចេញ​ប្រាក់​របស់​លោក​ហួស​ការ​កំណត់​របស់​ច្បាប់​បោះឆ្នោត​ទៅ​ប្រើប្រាស់​ក្នុង​ពេល​យុទ្ធនាការ​រក​សំឡេង​ឆ្នោត។

យោង​តាម​បណ្ដឹង​នេះ តុលាការ​ធម្មនុញ្ញ​ថៃ​បាន​សម្រេច​កាត់ទោស​លោក Thanathorn និង​មន្ត្រី​ជាន់ខ្ពស់​ក្នុង​បក្ស​លោក​ជាច្រើន​នាក់​ដែល​ជាប់​ឆ្នោត គឺ​ហាម​ធ្វើ​នយោបាយ​រយៈពេល ១០​ឆ្នាំ ហើយ​រំលាយ​គណបក្ស​អនាគត​ឆ្ពោះ​ទៅ​មុខ​ទៀត​ផង។ ចំណែក​គណបក្ស​ចលនា​ឆ្ពោះ​ទៅ​មុខ ជា​គណបក្ស​ជំនួស​ឲ្យ​គណបក្ស​អនាគត​ទៅ​មុខ។ លោក ភីថា លឹមចារឿនរ៉ាត់ កំពុង​ត្រូវ​បាន​អ្នក​សង្កេតការណ៍ និង​អ្នកវិភាគ​មើល​ឃើញ​ថា សំណុំរឿង​របស់​លោក​ចំនួន​២ ដែល​ថា​លោក​រំលោភ​ច្បាប់​បោះឆ្នោត ព្រោះ​មាន​ភាគហ៊ុន​ប្រព័ន្ធ​ផ្សព្វផ្សាយ​ដែល​ច្បាប់​បោះឆ្នោត​ហាម​ដាច់ខាត​សមាជិក​សភា​មិន​ឲ្យ​មាន​មុខជំនួញ​ដូចនេះ ហើយ​និង​បណ្ដឹង​របស់​មេធាវី​សកម្មជន​សង្គម​ប្ដឹង​លោក​ពី​បទ​ប៉ុនប៉ង​ផ្ដួល​រំលំ​រាជា​និយម​កំពុងតែ​ស្ថិត​នៅ​ក្នុង​ដៃ​របស់​តុលាការ​ធម្មនុញ្ញ។

គេ​រំពឹង​ថា តុលាការ​កំពូល​នេះ​នឹង​បើក​ជំនុំជម្រះ​ក្ដី​សំណុំរឿង​ពីរ​នេះ​នៅ​ពេល​ខាងមុខ ហើយ​បើ​តុលាការ​ជាន់ខ្ពស់​នេះ​សម្រេច​ឲ្យ​លោក ភីថា មាន​ទោស គឺ​ជៀស​ពុំ​រួច​ទេ គឺ​លោក ភីថា លឹមចារឿនរ៉ាត់ អាច​មាន​វាសនា​ដូច​នឹង​លោក Thanathorn អតីត​មេ​របស់​លោក៕

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស