បុរសខ្លាំងក្រាញអំណាចតពូជនៅកម្ពុជាលោក ហ៊ុន សែន ថ្លែងថា កូនប្រុសច្បងរបស់លោក គឺលោក ហ៊ុន ម៉ាណែត អាចនឹងក្លាយជានាយករដ្ឋមន្ត្រីនៅ ៣-៤សប្ដាហ៍ខាងមុខនេះ បន្ទាប់ពីបញ្ចប់ដំណើរការបោះឆ្នោត និងលទ្ធផលបោះឆ្នោតត្រូវបានប្រកាសរួច។
ក្នុងបទសម្ភាសន៍ជាមួយសារព័ត៌មានចិន ដែលមានរយៈពេលជាង ៣នាទី លោក ហ៊ុន សែន បង្ហាញជំនឿថា លោក ហ៊ុន ម៉ាណែត មានលទ្ធភាពខ្ពស់ជាងលោកក្នុងការទទួលបានអ្នកគាំទ្រ ដែលអាចឈានក្លាយទៅជានាយករដ្ឋមន្ត្រី ខណៈបច្ចុប្បន្នបេក្ខជននាយករដ្ឋមន្ត្រីមាន ២នាក់ គឺរូបលោក និងកូនប្រុសរបស់លោក។
បុរសខ្លាំងក្រាញអំណាចជិត ៤០ឆ្នាំនៅកម្ពុជា អះអាងថា រូបលោកមិនខ្វល់ចំពោះការរិះគន់ និងទិតៀនពីបណ្ដាប្រទេសលោកសេរី និងបក្សប្រឆាំង ព្រមទាំងអង្គការសង្គមស៊ីវិលឡើយ អ្វីដែលសំខាន់នោះ ឲ្យតែការឡើងធ្វើជានាយករដ្ឋមន្ត្រីរបស់កូនប្រុសលោកស្របតាមរដ្ឋធម្មនុញ្ញកម្ពុជាបច្ចុប្បន្ន។
លោក ហ៊ុន សែន ថាគ្មានអ្នកណាម្នាក់ហ៊ានមកកាត់សិទ្ធិទាំងកូនប្រុសរបស់លោកមិនទោសនោះទេ ហើយក៏មិនមែនឲ្យតែកូននាយករដ្ឋមន្ត្រីគ្មានសិទ្ធិធ្វើនយោបាយដែរ។ លោកថានៅលើពិភពលោក ដូចជានៅសហរដ្ឋអាមេរិក ជប៉ុន និងសាំងហ្គាពួរ (សិង្ហបុរី) ក៏មានរឿងនេះកើតឡើងដែរ ប៉ុន្តែគ្រាន់តែបណ្ដាប្រទេសទាំងនោះបានកំណត់អាណត្តិរបស់មេដឹកនាំនីមួយៗ។
លោកថាគ្មានឪពុកណាម្នាក់បណ្ដុះបណ្ដាលឲ្យកូនរបស់ខ្លួនឲ្យធ្វើមេចោរនោះទេ ប៉ុន្តែបើលោក ហ៊ុន ម៉ាណែត មិនអាចធ្វើនាយករដ្ឋមន្ត្រីកម្ពុជា ក៏អាចធ្វើការងារអ្វីផ្សេងបានដែរ។
បច្ចុប្បន្ននេះ លោក ហ៊ុន សែន ថាលោកមានអំណាចពេញដៃ ប៉ុន្តែរយៈពេល ១ខែខាងមុខប្រហែលជាលោកគ្មានអំណាចចុះហត្ថលេខាបន្តទៀត ខណៈការលះបង់នេះ លោកថាមិនមែនដើម្បីតែកូនប្រុសរបស់លោកនោះទេ ផ្ទុយមកវិញ គឺលោកចង់ឱ្យលោក ហ៊ុន ម៉ាណែត រក្សាសន្តិភាពក្នុងនាមជាឈាមថ្មីបន្តវេនពីលោក។
បុរសខ្លាំងរូបនេះថាអ្នកដែលបានលះបង់ធំនោះ គឺរូបលោក ដោយលះបង់តំណែងជានាយករដ្ឋមន្ត្រី ប៉ុន្តែលោកបានក្លាយជាឪពុករបស់នាយករដ្ឋមន្ត្រីដែលបានអំណាចពីលោកវិញ។
កម្ពុជានឹងរៀបចំការបោះឆ្នោតជ្រើសតាំងតំណាងរាស្ត្រនៅថ្ងៃអាទិត្យ ទី២៣ ខែកក្កដា ឆ្នាំ២០២៣ នេះ ដោយមានគណបក្សចូលរួមប្រកួតប្រជែងចំនួន ១៨គណបក្សនយោបាយ។ ក្នុងចំណោម ១៨គណបក្សនយោបាយ គឺមានតែគណបក្សប្រជាជនកម្ពុជាដឹកនាំដោយលោក ហ៊ុន សែន ទេលេចធ្លោជាងគេនៅក្នុងយុទ្ធនាការឃោសនារយៈពេល ២១ថ្ងៃនេះ បន្ទាប់ពីគណៈកម្មាធិការជាតិរៀបចំការបោះឆ្នោត (គ.ជ.ប) ស្ថិតក្រោមបញ្ជាលោក ហ៊ុន សែន បានបិទគណបក្សភ្លើងទៀនមិនឲ្យចូលរួមការបោះឆ្នោតនៅថ្ងៃទី២៣ ខែកក្កដា ឆ្នាំ២០២៣ ឡើយ។
ការបិទគណបក្សប្រឆាំងមិនឲ្យចូលរួមប្រកួតប្រជែងការបោះឆ្នោតនេះ ដោយអ្នកឃ្លាំមើលថាដើម្បីបើកផ្លូវឲ្យលោក ហ៊ុន ម៉ាណែត ធ្វើជានាយករដ្ឋមន្ត្រីបន្តវេនពីឪពុក បន្ទាប់ពីលោក ហ៊ុន សែន បានកាន់អំណាចអស់រយៈពេលជិត ៤០ឆ្នាំមក។
តែយ៉ាងណា ការបោះឆ្នោតលើកនេះ បណ្ដាប្រទេសលោកសេរី ក្នុងនោះមានសហរដ្ឋអាមេរិក ជប៉ុន អូស្ត្រាលី និងបារាំង ជាដើម មិនបានបញ្ជូនអ្នកសង្កេតការណ៍ឲ្យមកឃ្លាំមើលការបោះឆ្នោតនៅកម្ពុជានោះទេ។
ការបោះឆ្នោតជ្រើសតាំងតំណាងរាស្ត្រនីតិកាលទី៧ នេះ ក៏រងការរិះគន់ពីសហគមន៍អន្តរជាតិខ្លាំង ខណៈប្រជាពលរដ្ឋខ្មែររស់នៅបណ្ដាប្រទេសផ្សេងៗ បាននាំគ្នាធ្វើយុទ្ធនាការលើបណ្ដាញសង្គម ដោយអំពាវនាវឲ្យប្រជាពលរដ្ឋគូសខ្វែងសន្លឹកឆ្នោតនៅពេលទៅបោះឆ្នោត។ លើសពីនេះ ពួកគេក៏បាននាំគ្នាធ្វើបាតុកម្មដើម្បីប្រឆាំង និងមិនទទួលស្គាល់លទ្ធផលបោះឆ្នោតនៅកម្ពុជាផងដែរ៕