35 C
Phnom Penh

លោក ហ៊ុន សែន ថា​ការ​ផ្ទេរ​អំណាច​ឱ្យ​កូនប្រុស​លោក​គឺ​ជា​ផែនការ​រៀបចំ​ទុក​ជា​មុន​ដើម្បី​ស្ថិរភាព​យូរ​អង្វែង

ដោយ ឌឹ ខេមបូឌា ដេលី

បទវិភាគ

បុរស​ខ្លាំង​ក្រាញ​អំណាច លោក ហ៊ុន សែន អះអាង​ថា ក្នុង​រយៈពេល​ដ៏​ខ្លី​ខាងមុខ​នេះ កម្ពុជា​នឹង​មាន​នាយករដ្ឋមន្ត្រី​ថ្មី គឺ​លោក ហ៊ុន ម៉ាណែត ដែល​នឹង​ត្រូវ​បន្ត​ដឹកនាំ​ប្រទេស​កម្ពុជា​ជំនួស​រូបលោក ដើម្បី​បម្រើ​ផល​ប្រយោជន៍​ពលរដ្ឋ​ខ្មែរ ហើយ​គណបក្ស​នយោបាយ​នានា​ក៏​អាច​រួម​រស់​ក្រោម​ម្លប់​សន្តិភាព​ទាំងអស់​គ្នា​បាន​ដែរ។

លោក ហ៊ុន សែន សរសេរ​លើ​ប្រព័ន្ធ​ទំនាក់ទំនង​តេឡេក្រាម​របស់​ខ្លួន​នៅ​ថ្ងៃទី​២៨ កក្កដា នេះ​ថា ការ​ដែល​លោក​ប្រញាប់ប្រញាល់​លាឈប់​ពី​តំណែង​ជា​នាយករដ្ឋមន្ត្រី ហើយ​ផ្ទេរ​ឱ្យ​កូនប្រុស​របស់​លោក​បែប​នេះ គឺជា​ផែនការ​រៀបចំ​ទុក​ជា​មុន​សម្រាប់​ការ​រក្សា​ស្ថិរភាព​រយៈពេល​វែង ដែល​ជា​មូលដ្ឋានគ្រឹះ​សម្រាប់​ការ​អភិវឌ្ឍ​របស់​កម្ពុជា ប៉ុន្តែ​ការ​ចូល​កាន់​តំណែង​របស់​លោក ហ៊ុន ម៉ាណែត ជា​នាយករដ្ឋមន្ត្រី ក៏​មិន​បាន​រំលង​នីតិវិធី​ច្បាប់​របស់​កម្ពុជា​ដែរ។

បុរស​ខ្លាំង​ក្រាញ​អំណាច​តំណ​ពូជ​លោក ហ៊ុន សែន បាន​ថ្លែង​អំណរគុណ​ដល់​ពលរដ្ឋ​ដែល​បាន​ផ្តល់​នូវ​សេចក្តី​ស្រឡាញ់ ការ​គាំទ្រ និង​ទំនុកចិត្ត​ចំពោះ​រូបលោក និង​កូនប្រុស​របស់​គាត់ គឺ​លោក ហ៊ុន ម៉ាណែត ជា​នាយករដ្ឋមន្ត្រី ដើម្បី​ដឹកនាំ​រាជរដ្ឋាភិបាល​កម្ពុជា​សម្រាប់​អាណត្តិ​ទី​៧ ឆ្នាំ​២០២៣ បន្ត​ទៅ​មុខ​ទៀត ខណៈ​រូបលោក​ក៏​នឹង​ត្រូវ​ក្លាយ​ទៅ​ជា​ប្រធាន​ព្រឹទ្ធសភា​ក្រោយ​ការ​បោះឆ្នោត​ព្រឹទ្ធសភា​នា​ថ្ងៃទី​២៥ ខែ​កុម្ភៈ ឆ្នាំ​២០២៤ ផង​ដែរ។

កាលពី​ថ្ងៃទី​២៧ ខែ​កក្កដា លោក ហ៊ុន សែន បាន​ប្រកាស​លាលែង​តំណែង​ជា​នាយករដ្ឋមន្ត្រី​កម្ពុជា​ចាប់ពី​ថ្ងៃទី​២២ ខែ​សីហា ឆ្នាំ​២០២៣ នេះ​តទៅ ដែល​នឹង​ត្រូវ​ជំនួស​ដោយ​កូនប្រុស​របស់​លោក គឺ​លោក ហ៊ុន ម៉ាណែត។

ក្នុង​ពេល​ផ្សាយ​ផ្ទាល់​លើ​ប្រព័ន្ធ​ផ្សព្វផ្សាយ​ក្នុង​ការ​ប្រកាស​ផ្ទេរ​អំណាច លោក ហ៊ុន សែន បាន​ផ្តាំផ្ញើ​ទៅ​លោក ហ៊ុន ម៉ាណែត ថា​ត្រូវតែ​លុប​បំបាត់​ក្រុម​ជ្រុល​និយម​ឱ្យ​អស់​ពី​កម្ពុជា ទោះ​លោក​ត្រូវ​លាលែង​តំណែង​ពី​នាយករដ្ឋមន្ត្រី​ក៏ដោយ ព្រោះ​ច្បាប់​កម្ពុជា​មាន​ស្រាប់​ដើម្បី​អនុវត្ត​បោស​សម្អាត​អ្នក​ទាំងនោះ។

ទាក់ទិន​នឹង​បញ្ហា​នេះ អតីត​មេដឹកនាំ​បក្ស​ប្រឆាំង​លោក សម រង្ស៊ី លើកឡើង​នៅ​ថ្ងៃទី​២៨ កក្កដា នេះ​ដែរ​ថា កម្រិត​នៃ​ការ​រៀនសូត្រ​របស់​លោក ហ៊ុន ម៉ាណែត ក្នុង​វិស័យ​យោធា តម្រូវ​ឲ្យ​គាត់​ទទួល​បាន​ឋានន្តរសក្តិ​ត្រឹមតែ​សក្តិ​មួយ​ប៉ុណ្ណោះ តែ​នៅ​កម្ពុជា ដោយសារតែ​គាត់​ត្រូវ​បាន​លើក​បន្តុប​ដោយ​ឪពុក​របស់​គាត់ លោក ហ៊ុន ម៉ាណែត អាច​ឡើង​ពី​សក្តិ​មួយ​ដល់​ផ្កាយ​៤ យ៉ាង​ឆាប់​រហ័ស​ជាទីបំផុត ដូច​អ្វី​ដែល​ពួក​ខ្មែរក្រហម​ហៅថា «មហា​លោត​ផ្លោះ មហា​អស្ចារ្យ»។

លោក សម រង្ស៊ី លើកឡើង​បែប​ចំអក​ថា ប្រទេស​ខ្មែរ​ពិត​ជា​មាន​មោទនភាព​ណាស់​ដែល​មាន​នាយករដ្ឋមន្ត្រី​ថ្មី​ដោយ​ការ​លើក​បន្តុប​របស់​ឪពុក​បែប​នេះ ហើយ​កាន់តែ​មោទនភាព​ទៀត​នោះ គឺ​ការ​ផ្ទេរ​អំណាច​នេះ​ធ្វើឡើង​ដោយ​ខុស​ច្បាប់​យ៉ាង​ធ្ងន់ធ្ងរ និង​ជា​ការ​អនុវត្ត​ដោយ​ប្រាសចាក​ពី​គន្លង​ប្រជាធិបតេយ្យ​ផង​ដែរ។

ទាក់ទិន​នឹង​បញ្ហា​នេះ បើ​ទោះបីជា​សមាសភាព​រដ្ឋាភិបាល​ថ្មី​ដែល​នឹង​ដឹកនាំ​ដោយ​លោក ហ៊ុន ម៉ាណែត មិន​ទាន់​ត្រូវ​បាន​ប្រកាស​ក៏ដោយ ក៏​មាន​ការ​ទម្លាយ​ពី​រចនាសម្ព័ន្ធ​ដែល​គណបក្ស​ប្រជាជន​កម្ពុជា​បាន​រៀបចំ​ទុក​សម្រាប់​រដ្ឋាភិបាល​ថ្មី​របស់​លោក ហ៊ុន ម៉ាណែត កាលពី​ថ្ងៃទី​១៩ ខែ​កក្កដា ឆ្នាំ​២០២៣ កន្លងទៅ​ផង​ដែរ ក្នុង​នោះ​លោក ម៉ាណែត នឹង​កាន់​តំណែង​ជា​នាយករដ្ឋមន្ត្រី​ជំនួស​លោក ហ៊ុន សែន លោក ស សុខា នឹង​កាន់​តំណែង​ជា​រដ្ឋមន្ត្រី​ក្រសួង​មហាផ្ទៃ​ជំនួស​លោក ស ខេង ខណៈ​លោក ទៀ សីហា នឹង​កាន់​តំណែង​រដ្ឋមន្ត្រី​ក្រសួង​ការពារ​ជាតិ​ជំនួស​លោក ទៀ បាញ់ ផង​ដែរ៕

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស