31 C
Phnom Penh

មន្ត្រី​បក្ស​ប្រឆាំង​រិះគន់​លោក ហ៊ុន ម៉ាណែត ថា​មាន​ចរិត​ផ្ដាច់ការ​មិន​ខុស​ពី​លោក ហ៊ុន សែន

ដោយ ឌឹ ខេមបូឌា ដេលី

បទវិភាគ

មន្ត្រី​ជាន់ខ្ពស់​បក្ស​ប្រឆាំង​រិះគន់​លោក ហ៊ុន ម៉ាណែត ដែល​កំពុង​ត្រៀម​ឡើង​កាន់​អំណាច​ជា​នាយករដ្ឋមន្ត្រី​កម្ពុជា​ថា ពិត​ជា​មាន​ចរិត​ផ្ដាច់ការ​មិន​ខុស​ពី​ឪពុក ដោយសារ​មិនទាន់​ក្លាយ​ជា​នាយករដ្ឋមន្ត្រី​ស្រប​ច្បាប់​ផង បាន​ប្រើ​អំណាច​បញ្ជា​ឱ្យ​កម្លាំង​ក្រោម​បង្គាប់​ចាប់​ចង​ពលរដ្ឋ​ដែល​មាន​ជំងឺ​សរសៃប្រសាទ​ដែល​បាន​រិះគន់​លើ​ខ្លួន។

អតីត​តំណាងរាស្ត្រ​គណបក្ស​សង្គ្រោះ​ជាតិ​លោក អ៊ុំ សំអាន បាន​សរសេរ​លើ​ទំព័រ​ហ្វេសប៊ុក​របស់​លោក​កាលពី​ថ្ងៃទី​៣១ កក្កដា ថា មិនទាន់​បាន​កាន់​អំណាច​ពេញដៃ​ផង ចាប់ផ្តើម​ផ្ដាច់ការ​បណ្តើរៗ​ហើយ ចុះ​ទម្រាំ​បាន​ក្លាយ​ជា​នាយករដ្ឋមន្ត្រី​នៅ​ចុង​ខែ​សីហា នេះ​ទៀត តើ​កូនប្រុស​ច្បង​ស្នង​មរតក​អំណាច​បន្ត​ពូជ​នេះ នឹង​ចាប់​ឃុំ​ខ្លួន​ពលរដ្ឋ និង​មន្ត្រី​បក្ស​ប្រឆាំង​ប៉ុន្មាន​នាក់​ទៀត​យក​ទៅ​ដាក់​គុក។

លោក អ៊ុំ សំអាន លើកឡើង​ថា ស្លឹកឈើ​ពិត​ជា​ជ្រុះ​មិន​ឆ្ងាយ​ពី​គល់​មែន ឪពុក​ផ្ដាច់ការ កូន​ក៏​ផ្ដាច់ការ​ដែរ។

លោក​បន្ត​ថា បើ​តាម​ច្បាប់ គេ​មិន​អាច​ឃុំ​ខ្លួន ឬ​ដាក់​គុក​មនុស្ស​ឆ្កួត​បាន​ទេ ព្រោះ​ឪពុក​ម្តាយ​របស់​ស្ត្រី​ម្នាក់​នោះ​បាន​បញ្ជាក់​ហើយ​ថា កូន​របស់​គាត់ គឺ​មាន​ជំងឺ​ផ្លូវចិត្ត ឬ​សរសៃប្រសាទ​ធ្ងន់ធ្ងរ​យូរ​មក​ហើយ។ ជាង​នេះ​ទៀត សូម្បី​ការ​និយាយ​ស្តី​ក្នុង​វីដេអូ​នោះ​ក៏​គេ​ដឹង​ថា​ស្ត្រី​ម្នាក់​នោះ​មាន​ស្មារតី​មិន​ប្រក្រតី​ដែរ។

មន្ត្រី​ជាន់ខ្ពស់​បក្ស​ប្រឆាំង​រូប​នេះ​បញ្ជាក់​ថា សូម្បី​តុលាការ​ខ្មែរក្រហម​ក៏​ដោះលែង​អ្នកស្រី អៀង ធារិទ្ធ ដែល​ត្រូវ​ជា​ប្រពន្ធ​របស់​លោក អៀង សារី ឱ្យ​មាន​សេរីភាព​ដែរ ទោះបី​ជន​ជាប់ចោទ​រូប​នោះ​រង​នូវ​ការ​ចោទប្រកាន់​ថា​ធ្លាប់​បាន​ប្រព្រឹត្ត ឬ​ពាក់ព័ន្ធ​នឹង​អំពើ​ឧក្រិដ្ឋ​ប្រល័យ​ពូជសាសន៍​ក្នុង​របប​ខ្មែរក្រហម​ក៏ដោយ ព្រោះ​គេ​រក​ឃើញ​ថា​អ្នកស្រី អៀង ធារិទ្ធ មាន​ជំងឺ​ផ្លូវចិត្ត។

ការ​អះអាង​នេះ ធ្វើឡើង​បន្ទាប់ពី​ស្ត្រី​ម្នាក់​ដែល​គេ​អះអាង​ថា​មាន​ជំងឺ​សរសៃប្រសាទ​ត្រូវ​សមត្ថកិច្ច​ចាប់​ខ្លួន​ភ្លាមៗ​ក្រោយ​បង្ហោះ​វីដេអូ​លើ​បណ្ដាញ​សង្គម Tik Tok ដែល​និយាយ​ពាក់ព័ន្ធ​នឹង​លោក ហ៊ុន ម៉ាណែត កាលពី​ចុង​ខែ​កក្កដា កន្លងទៅ​នេះ។

កាលពី​ថ្ងៃទី​៣០ ខែ​កក្កដា ឆ្នាំ​២០២៣ ស្ត្រី​ម្នាក់​ឈ្មោះ ឌី សូរនាត រស់នៅ​ភូមិ​ត្រពាំងក្រសាំង សង្កាត់​ត្រពាំងក្រសាំង ខណ្ឌ​ពោធិ៍សែនជ័យ រាជធានី​ភ្នំពេញ បាន​បង្ហោះ​វីដេអូ​លើ​បណ្ដាញ​សង្គម Tik Tok ដោយ​អះអាង​ខ្លួន​ជា​ព្រះ​ម៉ែ​គង្គា និង​ជា​អ្នក​បង្កើត​លោក ហ៊ុន ម៉ាណែត មក​លើ​ផែនដី​នេះ​ដើម្បី​ឱ្យ​ធ្វើ​អំពើ​ល្អ។

ស្ត្រី​ដែល​មាន​ស្មារតី​មិន​ប្រក្រតី​ខាងលើ​លើកឡើង​ថា កន្លងមក​លោក ហ៊ុន ម៉ាណែត បាន​ប្រព្រឹត្ត​អំពើ​អាក្រក់​ច្រើន​ណាស់ ប៉ុន្តែ​បើ​នៅតែ​ប្រព្រឹត្ត​អំពើ​អាក្រក់​ទៀត រូប​នាង​នឹង​យក​លោក ហ៊ុន ម៉ាណែត ទៅ​ដុត​ជាមួយ​ពពួក​បិសាច​មិន​ឱ្យ​មក​រស់នៅ​ឋាន​មនុស្ស​ទៀត​ទេ។

ស្ត្រី​រូប​នេះ​បន្ត​ថា លោក ហ៊ុន ម៉ាណែត ត្រូវតែ​ប្រឹង​ធ្វើ​អំពើ​ល្អ​ឱ្យ​បាន​ច្រើន ព្រោះ​ថា​ដោយសារតែ​អំពើ​អាក្រក់​របស់​លោក​កន្លង​មក​នេះ​ហើយ​ដែល​សូម្បីតែ​ការ​បោះឆ្នោត​ឆ្នាំ​២០២៣ នេះ ក៏​ប្រទេស​ដទៃ​មិន​ទទួលស្គាល់​ដែរ ខណៈ​តំណែង​ជា​នាយករដ្ឋមន្ត្រី​របស់​លោក​ក៏​គេ​មិន​ទទួលស្គាល់​ថែម​ទៀត។

បន្ទាប់ពី​ស្ត្រី​មាន​សតិ​មិន​សូវ​ពេញលេញ​ខាងលើ​បង្ហោះ​វីដេអូ​បាន​ប៉ុន្មាន​ម៉ោង ស្រាប់តែ​នៅ​យប់​ថ្ងៃទី​៣១ ខែ​កក្កដា ដដែល​នោះ អាជ្ញាធរ​ក្រុង​ភ្នំពេញ​បាន​ដាក់​កម្លាំង​ចុះ​ចាប់​ខ្លួន​ស្ត្រី​ម្នាក់​នោះ​ភ្លាមៗ ដោយ​ចោទប្រកាន់​ថា នាង​បាន​បង្ក​ភាព​វឹកវរ​ដល់​សន្តិសុខ​សង្គម និង​បាន​ប្រមាថ​មន្ត្រី​រាជការ​សាធារណៈ។

ក្រោយ​សមត្ថកិច្ច​ចាប់​ខ្លួន ឪពុក​ម្តាយ​របស់​ស្ត្រី​រូប​នោះ​បាន​ចេញ​វីដេអូ​សូម​ការ​អភ័យ​ទោស​ពី​មេដឹកនាំ​បក្ស​កាន់​អំណាច​លោក ហ៊ុន សែន និង​លោក ហ៊ុន ម៉ាណែត ផង​ដែរ ដោយ​បញ្ជាក់​ថា កូនស្រី​របស់​គាត់​មាន​ជំងឺ​ផ្លូវចិត្ត​ធ្ងន់ធ្ងរ​រយៈពេល ២​ឆ្នាំ​មក​ហើយ។ ជាង​នេះ​ទៀត នាង​មិន​ដែល​រស់នៅ​ចុះសម្រុង​ជាមួយ​ឪពុក​ម្តាយ​ឡើយ។ ឪពុក​ម្តាយ​របស់​នាង​សន្យា​ថា​នឹង​ប្រដៅ​កូន​ឱ្យ​បាន​ល្អ មិន​ឱ្យ​ប្រព្រឹត្ត​ទង្វើ​ណា​ដែល​នាំ​ឱ្យ​ប៉ះពាល់​ដល់​កិត្តិយស​របស់​លោក ហ៊ុន សែន និង​លោក ហ៊ុន ម៉ាណែត ទៀត​ទេ។

មាត្រា​៣៥ នៃ​រដ្ឋធម្មនុញ្ញ ចែង​ថា ប្រជាពលរដ្ឋ​ខ្មែរ​មាន​សិទ្ធិ​ចូលរួម​យ៉ាង​សកម្ម​ក្នុង​ជីវភាព​នយោបាយ សេដ្ឋកិច្ច​សង្គម និង​វប្បធម៌​របស់​ប្រទេស​ជាតិ ខណៈ​សេចក្តី​ស្នើ​ទាំងឡាយ​របស់​ប្រជាពលរដ្ឋ​ត្រូវ​បាន​ដោះស្រាយ និង​ពិនិត្យ​យ៉ាង​ហ្មត់ចត់​ពី​អង្គការ​រដ្ឋ ប៉ុន្តែ​រដ្ឋាភិបាល​ក្រោម​ការ​គ្រប់គ្រង​របស់​បក្ស​កាន់​អំណាច​សព្វថ្ងៃ​នេះ ត្រូវ​គេ​មើល​ឃើញ​ថា បាន​អនុវត្ត​ផ្ទុយ​ពី​មាត្រា​ដែល​បាន​ចែង​ក្នុង​រដ្ឋធម្មនុញ្ញ​ទាំងស្រុង។

កាលពី​ចុង​ឆ្នាំ​២០២២ អ្នក​រាយការណ៍​ពិសេស​របស់​អង្គការ​សហប្រជាជាតិ​ទទួល​បន្ទុក​សិទ្ធិមនុស្ស​ប្រចាំ​នៅ​កម្ពុជា បាន​លើកឡើង​នៅ​ក្នុង​កិច្ចប្រជុំ​ក្រុមប្រឹក្សា​សិទ្ធិមនុស្ស​អង្គការ​សហប្រជាជាតិ​លើក​ទី​៤៩ នៅ​ទីក្រុង​ហ្សឺណែវ នៃ​ប្រទេស​ស្វីស ថា ទិដ្ឋភាព​សិទ្ធិមនុស្ស និង​លទ្ធិប្រជាធិបតេយ្យ​នៅ​ក្នុង​ប្រទេស​កម្ពុជា​នៅតែ​បង្ក​ការ​ព្រួយបារម្ភ​ធ្ងន់ធ្ងរ​ដដែល ព្រោះ​ថា​លំហ​សេរីភាព​របស់​ពលរដ្ឋ និង​នយោបាយ​នៅ​កម្ពុជា​កាន់តែ​រួម​តូច និង​កំពុង​ដើរ​ថយក្រោយ ដោយសារតែ​គ្រប់គ្រង​តាម​បែប​ឯក​បក្ស​សព្វថ្ងៃ​នេះ៕

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស