អភិបាលខេត្តកំពត អំពាវនាវឱ្យកងកម្លាំងដែលឈរជើងនៅតាមខ្សែបន្ទាត់ព្រំដែនកម្ពុជា-វៀតណាម ជួយដាំ និងថែទាំដើមត្នោតឲ្យបានល្អ ដើម្បីចូលរួមថែរក្សាការពារអត្តសញ្ញាណជាតិខ្មែរឲ្យគង់វង្ស ដើម្បីកុំឲ្យជនបរទេសមកឈ្លានពាន ឬបន្លំយកទឹកដីកំណើតរបស់ខ្មែរ។
កាលពីថ្ងៃទី៨ ខែសីហា ឆ្នាំ២០២៣ នៅចំណុចអន្លង់ថ្ងាន់ ស្ថិតនៅភូមិអន្លង់ថ្ងាន់ ឃុំឫស្សីស្រុកខាងកើត ស្រុកកំពង់ត្រាច ខេត្តកំពត អាជ្ញាធរមូលដ្ឋានដែលនៅតាមខ្សែបន្ទាត់ព្រំដែនបានសហការគ្នាដាំដើមត្នោតចំនួន ៧៥០ដើមនៅសងខាងផ្លូវខ្សែក្រវាត់ព្រំដែនកម្ពុជា-វៀតណាម ប្រវែង ៥គីឡូម៉ែត្រតាមការណែនាំរបស់អភិបាលខេត្តកំពត លោក ម៉ៅ ធនិន។
អភិបាលខេត្តកំពត លោក ម៉ៅ ធនិន បញ្ជាក់ថា រដ្ឋបាលខេត្តមានចក្ខុវិស័យធ្វើឱ្យតំបន់នៅតាមខ្សែបន្ទាត់ព្រំដែនកម្ពុជា-វៀតណាមក្លាយជាតំបន់ទាក់ទាញទេសចរតាមរយៈដើមត្នោត ស្ករត្នោត ទឹកឆ្នោត ផ្លែត្នោត និងផលិតផលត្នោតជាច្រើនទៀត ខណៈដើមត្នោតក៏ជាអត្តសញ្ញាណរបស់ជាតិខ្មែរដែរ។
ការដាំដើមត្នោតនេះ ធ្វើឡើងបន្ទាប់ពីអភិបាលខេត្តកំពត ជំរុញឱ្យពលរដ្ឋ អាជ្ញាធរ កងកម្លាំង ព្រះសង្ឃ សិស្សានុសិស្សរស់នៅតំបន់ខ្សែបន្ទាត់ព្រំដែនកម្ពុជា-វៀតណាម នាំគ្នាដាំដើមត្នោតឱ្យបានច្រើន ដើម្បីការពារទឹកដីរបស់ខ្លួនពីការឈ្លានពានកាលពីពេលថ្មីៗនេះ។
អ្នកប្រឹក្សាយោបល់ផ្នែកអភិវឌ្ឍន៍ផ្នត់គំនិត និងការស្រាវជ្រាវ លោក សេក សុជាតិ ប្រាប់សារព័ត៌មាន The Cambodia Daily នៅថ្ងៃទី៩ សីហា នេះថា ការដាំដើមត្នោត គឺគំនិតល្អមួយ ព្រោះដើមត្នោតជាប្រភេទរុក្ខជាតិដែលមានអាយុវែង ក្នុងនោះក៏ជាផ្នែកមួយក្នុងការសម្គាល់នូវអត្តសញ្ញាណជាតិរបស់ខ្មែរផងដែរ ប៉ុន្តែបើដាំដើមត្នោតដើម្បីការពារពីការឈ្លានពានរបស់បរទេសមិនមែនជាជម្រើសល្អទេ។
លោក សេក សុជាតិ លើកឡើងថា បើមន្ត្រីកម្ពុជាមានបំណងការពារទឹកដីពីការឈ្លានពាន រដ្ឋាភិបាលមានកាតព្វកិច្ចយ៉ាងសំខាន់ក្នុងការដាំបណ្ដុះធនធានមនុស្សឱ្យរឹងមាំ ដើម្បីប្រែក្លាយពួកគេឱ្យទៅជាមនុស្សមានសមត្ថភាពពេញលេញក្នុងការទ្រទ្រង់ប្រទេសជាតិរបស់ពួកគេទៅថ្ងៃមុខ ព្រោះថាធនធានដែលអាចថែរក្សាបូរណភាពទឹកដីពិតប្រាកដបាន គឺមានតែមនុស្សប៉ុណ្ណោះ ដូច្នេះយុវជនខ្មែរគឺត្រូវការការថែទាំ និងការយកចិត្តទុកដាក់បណ្តុះបណ្តាលខ្លាំងណាស់ពីរដ្ឋាភិបាល។
អ្នកប្រឹក្សាយោបល់ផ្នែកអភិវឌ្ឍន៍ផ្នត់គំនិតរូបនេះបញ្ជាក់ថា ប្រសិនបើធនធានមនុស្សរបស់កម្ពុជាទន់ខ្សោយ ទោះត្រូវដាំដើមត្នោតក្រវាត់ព្រំដែនពេញផ្ទៃប្រទេស ក៏មិនអាចការពារបូរណភាពទឹកដីរបស់ខ្លួនពីការឈ្លានពានរបស់បរទេសជិតខាង ដែលចិញ្ចឹមមហិច្ឆតារំលោភយកទឹកដីខ្មែរបានដែរ។ ផ្ទុយទៅវិញ បរទេសជិតខាងដែលតែងតែឈ្លានពានទឹកដីប្រទេសទន់ខ្សោយ ពួកគេមិនបានសំអាងទៅលើរុក្ខជាតិណាមួយយកមកការពារទឹកដីរបស់ពួកគេនោះទេ គឺគេពឹងតែទៅលើធនធានមនុស្សដែលគេបានបណ្តុះបណ្តាលតែប៉ុណ្ណោះ។
កាលពីអំឡុងខែឧសភា ឆ្នាំ២០២៣ កន្លងទៅ ស្នងការនគរបាលខេត្តកំពត លោក ម៉ៅ ច័ន្ទមធុរិទ្ធ ធ្លាប់បានអះអាងថា គណៈកម្មការព្រំដែនកំពុងបន្តធ្វើការជាមួយភាគីវៀតណាម ដើម្បីជំរុញបញ្ចប់ការបោះបង្គោលព្រំដែនដែលនៅសេសសល់ ដើម្បីធានាបានទាំងសន្តិសុខ និងកិច្ចការពារដល់បូរណភាពទឹកដី ខណៈការបោះបង្គោលព្រំដែនក្នុងខេត្តកំពត ជាមួយប្រទេសវៀតណាម នៅសល់ចំណុចមួយចំនួនមិនទាន់ឯកភាពគ្នានៅឡើយ។
ប្រទេសកម្ពុជាមានខេត្តចំនួន ៩ ដែលនៅជាប់ព្រំប្រទល់ជាមួយប្រទេសវៀតណាម ដូចជាខេត្តកំពត ខេត្តព្រៃវែង ខេត្តស្វាយរៀង ខេត្តកំពង់ចាម ខេត្តក្រចេះ ខេត្តមណ្ឌលគិរី ខេត្តរតនគិរី ខេត្តកណ្ដាល និងខេត្តតាកែវ ដែលមានព្រំដែនគោករួមគ្នាប្រវែង ១២៧០គីឡូម៉ែត្រ ក្នុងនោះខេត្តកំពត មានខ្សែបន្ទាត់ព្រំដែនជាប់ជាមួយប្រទេសវៀតណាម ប្រវែង ៤២,៣គីឡូម៉ែត្រ ខណៈបង្គោលព្រំដែននៃខេត្តនេះជាមួយប្រទេសវៀតណាម សព្វថ្ងៃនៅសល់ចំនួន ៥បង្គោលទៀតដែលនៅមិនទាន់ឯកភាពគ្នានៅឡើយ ដោយគិតចាប់ពីបង្គោលលេខ ២៩៦ ដល់បង្គោលលេខ ៣០០។
ទាក់ទិននឹងបញ្ហានេះ ក្រុមអ្នកសង្កេតការណ៍លើកឡើងថា ខេត្តដែលនៅជាប់ព្រំដែនជាមួយប្រទេសវៀតណាមទាំងអស់តែងតែរងនូវការរំលោភបំពានគ្រប់បែបយ៉ាងពីសំណាក់ប្រទេសវៀតណាម រាប់ចាប់តាំងពីការឆ្លងចូលទៅនេសាទដោយខុសច្បាប់ និងការលែងសត្វពាហនៈចូលទៅក្នុងទឹកដីខ្មែរ ដូចជានៅខេត្តស្វាយរៀង នាពេលកន្លងមក ជាដើម រហូតដល់ការរំលោភយកទឹកដីខ្មែរតាមវិធីផ្សេងៗថែមទៀត ខណៈរដ្ឋាភិបាលកម្ពុជាមិនមានវិធានការទប់ស្កាត់ការរំលោភបំពានទាំងនោះនៅឡើយទេ៕