រដ្ឋាភិបាលពង្រីកផ្ទៃដីដែនជម្រកសត្វព្រៃនៅតំបន់ចំនួន៣ ដើម្បីការពារសោភ័ណភាពធម្មជាតិ ប្រព័ន្ធអេកូឡូស៊ី និងជីវចម្រុះ ខណៈដែនជម្រកសត្វមួយចំនួនត្រូវបានកាត់ឲ្យអ្នកមានអំណាច និងក្រុមហ៊ុនរបស់អ្នកឧកញ៉ាដែលស្និទ្ធនឹងគ្រួសារលោក ហ៊ុន សែន ជាបន្តបន្ទាប់។
បើតាមអនុក្រឹត្យចំនួនបីដាច់ដោយឡែកពីគ្នាដែលចេញដោយលោក ហ៊ុន សែន កាលពីខែកក្កដា ឆ្នាំ២០២៣ នេះ បានសម្រេចកែប្រែដែនជម្រកសត្វចំនួន ៣ ដែលមានផ្ទៃដីជាង ២ម៉ឺនហិកតារ។ ដែនជម្រកសត្វព្រៃដែលរដ្ឋាភិបាលសម្រេចពង្រីកទំហំផ្ទៃដី ក្នុងនោះរួមមានដែនជម្រកសត្វព្រៃភ្នំសំកុស ដែនជម្រកសត្វព្រៃគូលែន-ព្រហ្មទេព និងដែនជម្រកសត្វព្រៃបឹងពែរ។
ប្រភពដដែលអះអាងថា ដែនជម្រកសត្វព្រៃភ្នំសំកុស ស្ថិតនៅក្នុងភូមិសាស្ត្រខេត្តពោធិ៍សាត់ ខេត្តបាត់ដំបង និងខេត្តកោះកុង ដែលត្រូវបានរដ្ឋាភិបាលបន្ថែមផ្ទៃដីជិត ៣ម៉ឺនហិកតារ (២៨៦៣៤ហិកតារ) ពីលើផ្ទៃដីដែលមានស្រាប់ចំនួនជាង ៣សែន ៣ម៉ឺនហិកតារ (៣៣៣៧៥០ហិកតារ) ដែលចំនួនផ្ទៃដីសរុបជាង ៣សែន ៦ម៉ឺនហិកតារ (៣៦២៣៨៤ហិកតារ)។
ចំណែកដែនជម្រកសត្វព្រៃគូលែន-ព្រហ្មទេព ត្រូវរដ្ឋាភិបាលសម្រេចបញ្ចូលដីផ្ទៃបន្ថែមទំហំជាង ២ម៉ឺន ៦ពាន់ហិកតារ (២៦៣៩៧ហិកតារ) បន្ថែមពីលើផ្ទៃដីដែលមានស្រាប់ចំនួនជាង ៤សែនហិកតារ (៤០២៥០០ហិកតារ) ដែលផ្ទៃសរុបបច្ចុប្បន្នមានចំនួនជាង ៤សែន ២ម៉ឺនហិកតារ (៤២៨៩៧១ហិកតារ) ស្ថិតនៅក្នុងភូមិសាស្ត្រខេត្តសៀមរាប ខេត្តព្រះវិហារ និងខេត្តឧត្តរមានជ័យ។
សម្រាប់ដែនជម្រកសត្វព្រៃបឹងពែរ ដែលមានភូមិសាស្ត្រស្ថិតនៅខេត្តសៀមរាប ខេត្តព្រះវិហារ និងខេត្តកំពង់ធំ វិញ ត្រូវបានរដ្ឋាភិបាលបន្ថែមផ្ទៃដីទំហំជាង ២ម៉ឺន ៣ពាន់ហិកតារ (២៣៣៨៣ហិកតារ) បញ្ចូលបន្ថែមពីលើផ្ទៃដីដែលមានស្រាប់ទំហំជាង ២សែន ៤ម៉ឺនហិកតារ (២៤២៥០០ហិកតារ) ដោយផ្ទៃដីសរុបបច្ចុប្បន្នមានចំនួនជាង ២សែន ៦ម៉ឺនហិកតារ (២៦៥៨៨៣ហិកតារ)។
អនុក្រឹត្យនេះថាការសម្រេចពង្រីកផ្ទៃដីនៅតំបន់ដែនជម្រកសត្វព្រៃទាំង ៣ នេះ ដើម្បីថែរក្សា និងការពារសោភ័ណភាពធម្មជាតិ ឬទេសភាព ប្រព័ន្ធអេកូឡូស៊ី និងជីវចម្រុះ ព្រមទាំងជំរុញការអភិវឌ្ឍសេដ្ឋកិច្ច សហគមន៍មូលដ្ឋាន រួមទាំងការលើកកម្ពស់ការអប់រំ ការសិក្សាស្រាវជ្រាវក្នុងតំបន់នោះ។
ក្រៅពីពង្រីកដែនជម្រកសត្វព្រៃខាងលើនេះ កាលពីពេលថ្មីៗនេះ រដ្ឋាភិបាលក៏សម្រេចកែទំហំដីឧទ្យានជាតិព្រះមុនីវង្ស «បូកគោ» ពីទំហំជាង ១សែន ៥ម៉ឺន ៤ពាន់ហិកតារ (១៥៤៤៥៨ហិកតារ) ទៅជាង ១សែន ៥ម៉ឺន ៦ពាន់ហិកតារដែរ (១៥៦១១៦ហិកតារ) ខណៈផ្ទៃដីចំនួនជាង ១១ហិកតារ (១១,១៧៧ហិកតារ) ក្នុងឧទ្យានជាតិបូកគោបានផ្តល់ទៅអ្នកឧកញ៉ា សុខ គង់។ ចំណែកឧទ្យានជាតិបុទុមសាគរ នៅខេត្តកោះកុង ជាង ៦ហិកតារ ត្រូវកាត់ទៅឲ្យកូនរបស់អ្នកឧកញ៉ា លី យ៉ុងផាត់ ផងដែរ។
ជាក់ស្ដែង តំបន់ការពារក្នុងឧទ្យានជាតិគិរីរម្យ និងដែនជម្រកសត្វព្រៃកែវសីមា កំពុងត្រូវបានធ្វើអនុបយោគទៅឱ្យក្រុមហ៊ុនដែលគ្រប់គ្រងដោយសមាជិកគ្រួសាររបស់ឧកញ៉ាដ៏ល្បីឈ្មោះ គឺអ្នកស្រី ជឹង សុភាព ព្រមទាំងភរិយារបស់រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ។
អនុក្រឹត្យមួយចុះថ្ងៃទី១៩ ខែកក្កដា កំណត់ផ្ទៃដី ៧០ហិកតារក្នុងដែនជម្រកសត្វព្រៃកែវសីមា សង្កាត់រមនា ក្រុងសែនមនោរម្យ ខេត្តមណ្ឌលគិរី ដោយចាត់ថ្នាក់ឡើងវិញពីទ្រព្យសម្បត្តិសាធារណៈទៅជាដីឯកជន ដើម្បីអភិវឌ្ឍដោយក្រុមហ៊ុន One Prosperity សម្រាប់ការវិនិយោគអេកូទេសចរណ៍។
យោងតាមបញ្ជីពាណិជ្ជកម្មរបស់ក្រសួងពាណិជ្ជកម្មក្រុមហ៊ុន One Prosperity ដឹកនាំដោយអ្នកស្រី អ៊ឹម ប៉ូលីកា ភរិយារបស់លោក អូន ព័ន្ធមុនីរ័ត្ន រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ។ ចំណែកនាយក ៤រូបទៀត រួមមានអ្នកស្រី ឡាវ សុខហ៊ុយ លោក ជឹង ធានគាត លោក ជឹង ធានសេង និងលោកស្រី ជឹង សុគន្ធាវី។ អ្នកស្រី ជឹង សុគន្ធាវី និងលោក ជឹង ធានសេង គឺជាកូនរបស់អ្នកស្រី ជឹង សុភាព អគ្គនាយកក្រុមហ៊ុន ភាពីម៉ិច (Pheapimex) ដែលត្រូវបានគេស្គាល់ថាជាយាយភូ។
លោក ជឹង ធានសេង និងលោក ជឹង ធានគាត គឺជានាយកក្រុមហ៊ុនមួយផ្សេងទៀតដែលបានទទួលដីទំហំ ៨៥,៧២ហិកតារនៃឧទ្យានជាតិគិរីរម្យ ក្នុងឃុំត្រែងត្រយឹង ស្រុកភ្នំស្រួច នៅក្នុងអនុក្រឹត្យចុងក្រោយបង្អស់។ ចំណែកអ្នកស្រី ជឹង សុគន្ធាវី បានទទួលដីទំហំ ២២២ហិកតារនៅគិរីរម្យ តាមរយៈក្រុមហ៊ុន One More របស់លោកស្រីនៅក្នុងអនុក្រឹត្យពីលើកមុន។
ក្រៅពីដែនជម្រកសត្វព្រៃ ដីគម្របព្រៃឈើឆ្នាំ២០០២ នៅខេត្តព្រះសីហនុ ក៏ត្រូវបានកាត់ឲ្យកូនៗរបស់លោក ហ៊ុន សែន និងមន្ត្រីជាន់ខ្ពស់ផ្សេងទៀតនៅក្នុងជួរគណបក្សប្រជាជនកម្ពុជាផងដែរ៕