ស្ថានភាពនយោបាយនៅរាជាណាចក្រថៃ កំពុងតែដើរលើវិថីមួយដែលមិនច្បាស់លាស់ ព្រោះថាបក្សដែលមិនមាននិន្នាការនឹងពួកយោធា លំបាកខ្លាំងដើម្បីចាប់យកឱកាសកាន់តំណែងនាយករដ្ឋមន្ត្រីថ្មីរបស់រាជាណាចក្រនេះ។
នៅថ្ងៃទី១៥ សីហា នេះ អ្នកសង្កេតការណ៍មានការភ្ញាក់ផ្អើលដែលបក្សប៉ាល្ល័ង្គប្រាចារ៉ាត់ ទម្លាយព័ត៌មានថា ឧត្តមសេនីយ៍ ប្រាវិត វង្សាវ៉ាត ជាឧបនាយករដ្ឋមន្ត្រីនៃរដ្ឋាភិបាលលោក ប្រាយុទ្ធ ចាន់អូចា កំពុងសម្លឹងទៅរកតំណែងជានាយករដ្ឋមន្ត្រីអាណត្តិសភាថ្មីនេះ ប្រសិនបើបេក្ខជនមកពីគណបក្សភឿថៃ ពុំទទួលបានសំឡេងគាំទ្រគ្រប់គ្រាន់ពីការបោះឆ្នោតសភារួមគ្នានៅក្នុងពេលប្រជុំខាងមុខនេះ។
កាលពីថ្ងៃទី១២ សីហា បក្សភឿថៃ បានឈានដល់កិច្ចព្រមព្រៀងជាមួយបក្សរបស់ពួកយោធា គឺបក្សប៉ាល្ល័ង្គប្រាចារ៉ាត់ ដឹកនាំដោយលោក ប្រាវិត វង្សាវ៉ាត និងបក្សថៃរួបរួមជាតិ ដឹកនាំដោយលោក ប្រាយុទ្ធ ចាន់អូចា ដែលជាមេរដ្ឋប្រហាររំលាយរដ្ឋាភិបាលរបស់បក្សភឿថៃ នៅឆ្នាំ២០១៤។
កិច្ចព្រមព្រៀងរបស់បក្សទាំងបីនេះ ធ្វើឡើងក្រោយពីបក្សភឿថៃ បានព្រមព្រៀងនឹងបក្សភូមិឆាតថៃ ដែលជាបក្សមាននិន្នាការនឹងពួកយោធា ក្នុងការស្វែងរកការបង្កើតរដ្ឋាភិបាលថ្មីដ៏ទូលំទូលាយ តែគ្មានទេបក្សចលនាឆ្ពោះទៅមុខរបស់លោក ភីថា លឹមចារឿនរ៉ាត់។
ក្រោយពីដើរចេញពីសម្ព័ន្ធភាព ៨គណបក្ស ដែលក្នុងនោះមានបក្សចលនាឆ្ពោះទៅមុខដែរនោះ បក្សភឿថៃ ដែលធ្លាប់ជាបក្សលម្អៀងខ្លាំងខាងប្រជាធិបតេយ្យ បានពង្រីកសម្ព័ន្ធភាពថ្មី។ ការបែកចេញពីបក្សចលនាឆ្ពោះទៅមុខនេះហើយ ដែលនាំឱ្យបក្សរបស់ពួកយោធាឈោងចាប់ដៃនឹងបក្សភឿថៃ ដែលមានលោក ថាក់ស៊ីន ស៊ីណាវ៉ាត់ អតីតនាយករដ្ឋមន្ត្រីនិរទេសខ្លួននៅពីក្រោយ។
នៅថ្ងៃអង្គារ ទី១៥ សីហា នេះ កាសែតបាងកកប៉ុស្តិ៍ចុះផ្សាយថា បេក្ខជននាយករដ្ឋមន្ត្រីមកពីបក្សភឿថៃ លោក Srettha Thavinsin ទំនងលំបាកខ្លាំងក្នុងការរកសំឡេងឆ្នោតឱ្យបានគ្រប់សំឡេង ៣៧៦ ក្នុងសំឡេងសរុប ៧៥០ ដែលក្នុងនោះសមាជិកព្រឹទ្ធសភាជាក្រុមចាត់តាំងដោយពួកយោធាមាន ២៥០រូប អាចជាឧបសគ្គរាំងខ្ទប់លោក Srettha ដែលគេថាអាចដូចនឹងលោក ភីថា មេដឹកនាំបក្សចលនាឆ្ពោះទៅមុខ ដែលបរាជ័យនៅក្នុងការបោះឆ្នោតរួមគ្នានៃសមាជិកសភា និងព្រឹទ្ធសភា បើទោះជាលោក ភីថា មានសំឡេងក្នុងដៃរបស់លោក ៣១១សំឡេងក៏ដោយនោះ។
ក្នុងការបោះឆ្នោតនៅថ្ងៃទី១៧ កក្កដា លោក ភីថា ទទួលបានការគាំទ្រពីសមាជិកព្រឹទ្ធសភាតែ ១៣សំឡេងប៉ុណ្ណោះ។ ឥឡូវនេះ ការទម្លាយព័ត៌មានបានឲ្យដឹងថា គណបក្សភឿថៃ កំពុងតែគិតថា តើបេក្ខភាពនាយករដ្ឋមន្ត្រីរបស់ខ្លួនអាចទទួលបានសំឡេងចេញពីសមាជិកព្រឹទ្ធសភាដែរឬទេ ហើយមានការគាំទ្រដោយសំឡេងលើសលប់ ឬក៏ដូចនឹងករណីលោក ភីថា?
កាសែតបាងកកប៉ុស្តិ៍បន្តចុះផ្សាយថា គណបក្សចលនាឆ្ពោះទៅមុខបានប្រជុំគ្នាសម្រេចមិនគាំទ្របេក្ខភាពនាយករដ្ឋមន្ត្រីរបស់គណបក្សភឿថៃ នោះទេ ដោយចោទថាបក្សនេះបានរត់ទៅឱបក្រសោបជាមួយនឹងពួកយោធាទៅហើយនោះ គឺខុសនឹងឆន្ទៈរបស់ប្រជាជន បើបក្សចលនាឆ្ពោះទៅមុខគាំទ្របក្សភឿថៃ។
ក្រោយពីបក្សចលនាឆ្ពោះទៅមុខ ចេញសេចក្ដីថ្លែងការណ៍ដូចនេះ ការផ្សព្វផ្សាយព័ត៌មានបានឲ្យដឹងថា បក្សប៉ាល្ល័ង្គប្រាចារ៉ាត់ ជាបក្សធំទី៤ ហើយមានបក្សថៃរួបរួមជាតិ គាំទ្ររួចស្រេចហើយនោះ នាំឲ្យលោក ប្រាវិត វង្សាវ៉ាត់ បង្ហើបព័ត៌មានថា លោកមិនបោះបង់ចោលឋានៈជាបេក្ខភាពនាយករដ្ឋមន្ត្រីរបស់គណបក្សប៉ាល្ល័ង្គប្រាចារ៉ាត់ នោះទេ។
ក្នុងស្ថានភាពបែបនេះដែលនាំឲ្យអ្នកសង្កេតការណ៍គិតថា លោក ប្រាវិត ទំនងចង់បានតំណែងនាយករដ្ឋមន្ត្រីឲ្យតែបក្សភឿថៃ ដើរដល់ក្រឡាទាល់ច្រក ព្រោះតែពុំអាចក្លាយជាបក្សដឹកនាំក្បាលម៉ាស៊ីនរដ្ឋាភិបាលបាននោះ។
អ្នកសង្កេតការណ៍មើលឃើញថា លោក ប្រាវិត ជាឧត្តមសេនីយ៍យោធាដែលបានចូលរួមចំណែកជាមួយលោក ប្រាយុទ្ធ ធ្វើរដ្ឋប្រហារទម្លាក់រដ្ឋាភិបាលភឿថៃ នៅឆ្នាំ២០១៤ រំពឹងថា សមាជិកព្រឹទ្ធសភាអាចនឹងមិនបោះឆ្នោតគាំទ្របេក្ខភាពនាយករដ្ឋមន្ត្រីមកពីគណបក្សភឿថៃ នោះទេ បើទោះជាខុសពីលោក Srettha Thavinsin ក៏ដោយនោះ។
តែអ្នកសង្កេតការណ៍ក៏មើលឃើញដែរថា ប្រធានគណបក្សភូមិឆាតថៃ លោក អានុទីន ចាន់វីរៈគុល ក៏អាចក្លាយជាបេក្ខជននាយករដ្ឋមន្ត្រីផងដែរ បើបក្សភឿថៃអស់ឱកាសជាបក្សដឹកនាំរដ្ឋាភិបាល។
ដូច្នេះ បេក្ខជននាយករដ្ឋមន្ត្រី គឺអាចមានលោក អានុទីន ចាន់វីរៈគុល និងលោកឧត្តមសេនីយ៍ ប្រាវិត វង្សាវ៉ាត់។ តែលោក ប្រាវិត វង្សាវ៉ាត់ ទំនងមានប្រៀបជាងលោក អានុទីន ព្រោះតែសមាជិកព្រឹទ្ធសភា ២៥០រូប នឹងគាំទ្របុរសវ័យជាង ៧០ឆ្នាំរូបនេះឲ្យកាន់តំណែងនាយករដ្ឋមន្ត្រីថៃទី៣០ ជំនួសលោក ប្រាយុទ្ធ ដែលបានសម្រេចឈប់ធ្វើនយោបាយហើយនោះ។
លោក ប្រាយុទ្ធ បានថ្លែងធានាពីការផ្ទេរអំណាចដោយសន្តិវិធីពីរដ្ឋាភិបាលចាំផ្ទះរបស់លោក ទៅឱ្យរដ្ឋាភិបាលថ្មី ឱ្យតែត្រូវបានបង្កើតចេញរូបរាងឡើងជាផ្លូវការហើយនោះ៕