32.1 C
Phnom Penh

ភរិយា​ដើម​ទាមទារ​ឱ្យ​ក្រសួង​យុត្តិធម៌​បកស្រាយ​ករណី​តែងតាំង​លោក ជា ពេជ្រ ជា​វីរ​ព្រះរាជអាជ្ញា​សាលា​ឧទ្ធរណ៍​ទាំង​ជាប់​ពិរុទ្ធ

ដោយ ឌឹ ខេមបូឌា ដេលី

បទវិភាគ

ភរិយា​របស់​អតីត​ព្រះរាជអាជ្ញា​សាលាដំបូង​ខេត្ត​រតនគិរី លោក ជា ពេជ្រ គឺ​អ្នកស្រី ហ៊ាន លក្ខិណា ទាមទារ​ឱ្យ​អ្នក​នាំពាក្យ​ក្រសួង​យុត្តិធម៌ លោក ជិន ម៉ាលីន បកស្រាយ​ជុំវិញ​ករណី​លោក ជា ពេជ្រ ត្រូវ​បាន​ដំឡើង​ទៅ​ជា​វីរព្រះរាជអាជ្ញា​នៃ​មហាអយ្យការ​សាលា​ឧទ្ធរណ៍​ក្រុង​ភ្នំពេញ ដោយ​ខកខាន​អនុវត្ត​ទោស​ដែល​ត្រូវ​បាន​ចោទប្រកាន់​ពី​បទ «ផិត​ក្បត់» កាលពី​ឆ្នាំ​២០១៩ កន្លងទៅ។

ម្ចាស់​គណនី​ហ្វេសប៊ុក​មួយ​ឈ្មោះ លក្ខិណា ហ៊ាន (Leakkhena Hean) បាន​ធ្វើ​ការ​ផ្សាយ​ផ្ទាល់​លើ​គណនី​ហ្វេសប៊ុក​របស់​ខ្លួន​កាលពី​ពេល​ថ្មីៗ​នេះ​ថា រហូត​ដល់​ពេលនេះ គឺ​មាន​រយៈពេល ៤​ឆ្នាំ​ហើយ​ដែល​អ្នក​នាំពាក្យ​ក្រសួង​យុត្តិធម៌ លោក ជិន ម៉ាលីន ប្រកាស​ដក​ព្រះរាជអាជ្ញា​លោក ជា ពេជ្រ ពី​ខេត្ត​រតនគិរី ដើម្បី​បញ្ឈរ​ជើង​នៅ​ក្រសួង​យុត្តិធម៌​រង់ចាំ​ការ​ផ្ដន្ទាទោស​ពី​តុលាការ បន្ទាប់ពី​រក​ឃើញ​ថា​មាន​ជាប់​ពាក់ព័ន្ធ​នឹង​បទល្មើស “ផិត​ក្បត់” កាលពី​អំឡុង​ឆ្នាំ​២០១៩ ដែល​អាច​ឈាន​ទៅ​ដល់​ការ​លុប​ឈ្មោះ​លោក ជា ពេជ្រ ចេញពី​ក្របខ័ណ្ឌ​ស្ថាប័ន​តុលាការ​ថែម​ទៀត។

អ្នកស្រី ហ៊ាន លក្ខិណា អះអាង​ថា លោក ជា ពេជ្រ បាន​ជាប់​ឈ្មោះ​ជា​ពិរុទ្ធជន​កាលពី​ថ្ងៃទី​២៤ ខែ​កក្កដា ឆ្នាំ​២០១៩ ពី​បទ “ផិត​ក្បត់” នៅ​ថ្ងៃទី​១៩ ខែ​សីហា ឆ្នាំ​២០២១ ប៉ុន្តែ​នៅ​ថ្ងៃទី​២៦ ខែ​វិច្ឆិកា ឆ្នាំ​២០២២ ជន​ជាប់ចោទ​ឈ្មោះ ជា ពេជ្រ បែរ​ជា​ទទួល​តំណែង​ជា​វីរព្រះរាជអាជ្ញា​នៃ​មហាអយ្យការ​សាលា​ឧទ្ធរណ៍​ក្រុង​ភ្នំពេញ​ទៅវិញ។

អ្នកស្រី ហ៊ាន លក្ខិណា លើក​ជា​សំណួរ​ថា ការ​ចោទប្រកាន់​ពី​បទ ផិត​ក្បត់ ក៏​ក្រសួង​យុត្តិធម៌​ជា​អ្នក​ចោទ ហើយ​ការ​ដំឡើង​តំណែង​ជា​វីរព្រះរាជអាជ្ញា​នៃ​មហាអយ្យការ​សាលា​ឧទ្ធរណ៍​ក្រុង​ភ្នំពេញ ក៏​ក្រសួង​យុត្តិធម៌​ជា​អ្នក​ដំឡើង​ដែរ តើ​នេះ​ឬ​ជា​ការ​អនុវត្ត​ច្បាប់​របស់​ក្រសួង​យុត្តិធម៌​កន្លងមក​នោះ?

ការ​អះអាង​នេះ ធ្វើឡើង​ដើម្បី​ទាមទារ​ឱ្យ​អ្នក​នាំពាក្យ​ក្រសួង​យុត្តិធម៌ លោក ជិន ម៉ាលីន ចេញ​មុខ​បកស្រាយ​លើ​ករណី​ដែល​លោក ជា ពេជ្រ ទទួល​តំណែង​ជា​វីរព្រះរាជអាជ្ញា​នៃ​មហាអយ្យការ​សាលា​ឧទ្ធរណ៍​ទាំង​ដែល​តុលាការ​បាន​កាត់​ឱ្យ​មាន​ទោស​ទៅ​ហើយ​នោះ។

កាលពី​ថ្ងៃទី​២២ ខែ​កុម្ភៈ ឆ្នាំ​២០១៩ អ្នកស្រី ហ៊ាន លក្ខិណា បាន​ដាក់​ពាក្យ​បណ្ដឹង​ទៅ​រដ្ឋមន្ត្រី​ក្រសួង​យុត្តិធម៌ ស្នើ​ឱ្យ​ជួយ​អន្តរាគមន៍​លើ​ព្រះរាជអាជ្ញា​លោក ជា ពេជ្រ ឱ្យ​ឈប់​ប្រើ​អំណាច​បុណ្យ​ស័ក្តិ និង​អំណាច​ប្រាក់​ធ្វើការ​គំរាមកំហែង​លើ​អ្នកស្រី​ដែល​ជា​ភរិយា​ស្រប​ច្បាប់ ហើយ​សូម​ឱ្យ​ព្រះរាជអាជ្ញា​រូប​នោះ​ចូល​ខ្លួន​មក​ដោះស្រាយ​បញ្ហា​ផ្ទៃក្នុង​គ្រួសារ​ដែល​គាត់​លួច​មាន​ប្រពន្ធចុង។

បន្ទាប់ពី​មាន​បណ្តឹង​របស់​ស្ត្រី​ដែល​ជា​ភរិយា រដ្ឋមន្ត្រី​ក្រសួង​យុត្តិធម៌ លោក អង្គវង្ស វឌ្ឍនា បាន​ចេញ​លិខិត​មួយ​កាលពី​ថ្ងៃទី​២៥ ខែ​កក្កដា ឆ្នាំ​២០១៩ ផ្អាក​មុខងារ​លោក ជា ពេជ្រ ពី​ព្រះរាជអាជ្ញា​អម​សាលាដំបូង​ខេត្ត​រតនគិរី ជា​បណ្ដោះអាសន្ន បន្ទាប់ពី​បុគ្គល​រូប​នេះ​រង​នូវ​ការ​ចោទប្រកាន់​ពី​បទ “ផិត​ក្បត់” ដែល​បាន​ប្រព្រឹត្ត​នៅ​ខេត្ត​រតនគិរី និង​នៅ​រាជធានី​ភ្នំពេញ​កាលពី​ឆ្នាំ​២០១៧ រហូត​ដល់​ឆ្នាំ​២០១៩។

ការ​ចោទប្រកាន់​ពី​បទល្មើស “ផិត​ក្បត់” នេះ ធ្វើឡើង​ដោយ​ផ្អែក​តាម​មាត្រា​៧ និង​អនុវត្ត​ទោស​តាម​មាត្រា​១០ នៃ​ច្បាប់​ស្ដីពី​ឯកពន្ធភាព ដូច្នេះ​យោង​តាម​មាត្រា​៥៨ និង​មាត្រា​១០ នៃ​ច្បាប់​ស្ដីពី​លក្ខន្តិកៈ​នៃ​ចៅក្រម និង​ព្រះរាជអាជ្ញា ក្រសួង​យុត្តិធម៌​តម្រូវ​ឱ្យ​ផ្អាក​មុខងារ​របស់​លោក ជា ពេជ្រ ជា​ព្រះរាជអាជ្ញា​នៃ​អយ្យការ​អម​សាលាដំបូង​ខេត្ត​រតនគិរី ជា​បណ្ដោះអាសន្ន​រហូត​ទាល់​តែ​មាន​សេចក្តី​សម្រេច​របស់​តុលាការ​អំពី​ទោស​ជា​ស្ថាពរ។

ចំណែក​លោក ជិន ម៉ាលីន អ្នក​នាំពាក្យ​ក្រសួង​យុត្តិធម៌ កាលពី​ថ្ងៃទី​២៦ ខែ​កក្កដា ឆ្នាំ​២០១៩ ធ្លាប់​បាន​អះអាង​ថា លោក ជា ពេជ្រ អាច​នឹង​ត្រូវ​លុប​ឈ្មោះ​ចេញពី​ក្របខ័ណ្ឌ ប្រសិនបើ​ដំណើរការ​នីតិវិធី​របស់​តុលាការ​រក​ឃើញ​ថា លោក​បាន​ប្រព្រឹត្ត​បទល្មើស “ផិត” ដូច​បណ្តឹង​របស់​ភរិយា​ដើម​ប្រាកដ​មែន។ ផ្ទុយទៅវិញ ប្រសិនបើ​រក​មិន​ឃើញ​កំហុស​ទេ នោះ​លោក ជា ពេជ្រ អាច​ចូល​បំពេញ​ការងារ​ជា​ធម្មតា​វិញ។

យ៉ាងណា​ក៏ដោយ កាលពី​ថ្ងៃទី​១៩ ខែ​សីហា ឆ្នាំ​២០២១ ចៅក្រម​ជំនុំជម្រះ​សាលាដំបូង​រាជធានី​ភ្នំពេញ លោក ញឹម ពិសាល បាន​ចេញ​សាលក្រម​ផ្ដន្ទាទោស​លោក ជា ពេជ្រ ដាក់​ពន្ធនាគារ​កំណត់​រយៈពេល ៦​ខែ តែ​ទោស​នេះ​ត្រូវ​បាន​ព្យួរ និង​ពិន័យ​ជា​ប្រាក់ ១​លាន​រៀល​ពី​បទ ”ផិត”។ ជាង​នេះ​ទៀត តុលាការ​ក៏​បាន​បង្គាប់​ឲ្យ​លោក ជា ពេជ្រ សង​សំណង​ជំងឺចិត្ត​ជា​ប្រាក់​ចំនួន ១០០​លាន​រៀល​ទៅ​ឱ្យ​ដើមបណ្ដឹង គឺ​អ្នកស្រី ហ៊ាន លក្ខិណា ជា​ភរិយា​ដើម​ថែម​ទៀត។

យ៉ាងណា​ក៏ដោយ អ្នកស្រី ហ៊ាន លក្ខិណា អះអាង​ថា បន្ទាប់ពី​សាលាដំបូង​រាជធានី​ភ្នំពេញ​កាត់ក្តី​ឱ្យ​លោក ជា ពេជ្រ មាន​ទោស​ពី​បទ «ផិត» ក៏ដោយ ក៏​លោក ជា ពេជ្រ នៅតែ​មិន​ត្រូវ​បាន​បណ្តេញ​ចេញពី​ក្របខ័ណ្ឌ​តុលាការ​នៅឡើយ ប៉ុន្តែ​បែរ​ជា​អាច​ទទួល​តំណែង​ជា​វីរព្រះរាជអាជ្ញា​នៃ​មហាអយ្យការ​សាលា​ឧទ្ធរណ៍​ភ្នំពេញ​ដោយ​ស្ងាត់ៗ​ទៅវិញ៕

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស