ក្រុមអ្នកឃ្លាំមើលចាត់ទុកសកម្មភាពលួចកាប់ឈើក្នុងតំបន់ការពារនៃរមណីយដ្ឋានអង្គរ បង្ហាញពីទង្វើមិនទទួលខុសត្រូវរបស់អាជ្ញាធរពាក់ព័ន្ធលើសមត្ថកិច្ចរបស់ខ្លួន។
អ្នកប្រឹក្សាយោបល់ផ្នែកអភិវឌ្ឍន៍ផ្នត់គំនិត និងការស្រាវជ្រាវលោក សេក សុជាតិ ប្រាប់សារព័ត៌មាន The Cambodia Daily នៅថ្ងៃទី២២ សីហា នេះថា ប្រសិនបើមន្ត្រីរាជការរកឃើញអំពើល្មើសច្បាប់កើតមាននៅតំបន់ការពាររបស់ខ្លួនហើយ តែមិនអនុវត្តវិធានការច្បាប់ ដោយសំអាងថាបញ្ហាដែលកើតឡើងនោះជារឿងតូចតាច នោះមានន័យថាពួកគេក៏កំពុងចូលរួមជួយគាំទ្រអំពើល្មើសនោះដែរ ត្បិតអំពើល្មើសច្បាប់មិនត្រូវបានកំណត់ថា តូច ឬធំនោះទេ ឱ្យតែល្មើសនឹងច្បាប់ គឺត្រូវតែអនុវត្តច្បាប់ជាដាច់ខាត ដើម្បីទប់ស្កាត់កុំឱ្យអំពើល្មើសបែបនេះកើតមានបន្តទៀត។
លោក សេក សុជាតិ លើកឡើងថា អំពើល្មើសច្បាប់នានាតែងកើតមានក្នុងសង្គម ដោយសារតែការអនុវត្តនៅមានចន្លោះប្រហោង ឬនៅមានភាពទន់ខ្សោយ ឬដោយសារតែសំអាងថាជារឿងតូចតាច ដូច្នេះមូលហេតុទាំងនេះគឺជាកត្តាលើកទឹកចិត្តឱ្យជនល្មើសកាន់តែប្រព្រឹត្តអំពើល្មើសច្បាប់កាន់តែខ្លាំងឡើង រហូតរាលដាលក្លាយទៅជាបញ្ហាធំមិនអាចទប់ស្កាត់នៅថ្ងៃមុខ។
អ្នកប្រឹក្សាយោបល់ផ្នែកអភិវឌ្ឍន៍ផ្នត់គំនិតរូបនេះបញ្ជាក់ថា ដោយផ្អែកលើស្មារតីផ្លូវច្បាប់ មន្ត្រីដែលទទួលខុសត្រូវក្នុងដែនសមត្ថកិច្ចរបស់ខ្លួនដែលបណ្តែតបណ្តោយឱ្យមានអំពើល្មើសកើតឡើង ពួកគេត្រូវតែទទួលខុសត្រូវចំពោះមុខច្បាប់ មិនមែនគ្រាន់តែឆ្លើយដោះសាថាមិនដឹង ឬចាត់ទុកជារឿងតូចតាច ហើយរួចខ្លួននោះទេ។
កាលពីថ្ងៃទី២១ ខែសីហា ឆ្នាំ២០២៣ ដើមគ្រញូងដ៏ធំមួយដើមនៅក្នុងតំបន់អង្គរ ស្ថិតនៅភូមិមណ្ឌុល៣ ជាប់ផ្លូវក្រវាត់ឧទ្យានអង្គរ ត្រូវចោរលួចកាប់យកទៅបាត់ដោយសុវត្ថិភាព ខណៈសកម្មភាពនៃការកាប់បំផ្លាញបែបនេះបានកើតឡើងជាហូរហែតាំងពីមុនមករហូតដល់សព្វថ្ងៃនេះ។
ជុំវិញបញ្ហានេះ អ្នកនាំពាក្យអាជ្ញាធរជាតិអប្សរា លោក ឡុង កុសល បានលើកឡើងកាលពីថ្ងៃចន្ទ ទី២១ សីហា ថា អាជ្ញាធរជាតិអប្សរា នគរបាលការពារបេតិកភណ្ឌ ក្រសួងបរិស្ថាន និងអាជ្ញាធរមូលដ្ឋានបានខិតខំការពារដើរល្បាតទាំងយប់ ទាំងថ្ងៃក្នុងតំបន់ការពាររបស់ខ្លួន ប៉ុន្តែដោយសារតំបន់ដែលខ្លួនការពារមានទំហំធំ ដូច្នេះមានការឆកល្វែងតិចតួចពីការលួចកាប់ដើមឈើក្នុងតំបន់អភិរក្សនេះ គឺចៀសមិនផុតនោះទេ។
អ្នកនាំពាក្យអាជ្ញាធរជាតិអប្សរារូបនេះលើកឡើងថា បើព្រៃឈើក្នុងតំបន់អង្គរត្រូវគេកាប់បំផ្លាញដឹកចេញទាំងឡានៗ ក៏លោកមិនជំទាស់ដែរ ប៉ុន្តែនេះគ្រាន់តែគេកាប់ដើមគ្រញូងមួយដើមប៉ុណ្ណោះ មិនគួរធ្វើឱ្យទៅជារឿងធំនោះទេ។ ជាងនេះទៀត ដើមគ្រញូងដែលគេកាប់យកទៅនោះ ក៏មិនមានតម្លៃថ្លៃនោះដែរ ខណៈអាជ្ញាធរជាតិអប្សរាបានដាំដើមឈើរាប់រយដើមឯណោះនៅក្នុងតំបន់ការពាររបស់ខ្លួនក្នុងមួយឆ្នាំៗ។
ទាក់ទិននឹងបញ្ហានេះ សកម្មជនបរិស្ថាននៃសមាគមបណ្ដាញយុវជនកម្ពុជា (CYN) លោក សាន់ ម៉ាឡា អះអាងកាលពីពេលកន្លងទៅថា ការបាត់បង់ព្រៃឈើប្រភេទកម្រនៅតំបន់រមណីយដ្ឋានអង្គរ បានបញ្ជាក់ពីភាពខ្វះចន្លោះនៃការទប់ស្កាត់បទល្មើសពីសំណាក់អាជ្ញាធរ និងអ្នកពាក់ព័ន្ធយ៉ាងធ្ងន់ធ្ងរ។
លោក សាន់ ម៉ាឡា បញ្ជាក់ថា ប្រសិនបើអាជ្ញាធរនៅតែបន្តព្រងើយកន្តើយមិនអាចរកឱ្យឃើញជនប្រព្រឹត្តបទល្មើសទេ នោះព្រៃឈើ និងធនធានធម្មជាតិដទៃទៀតនឹងបន្តបាត់បង់កាន់តែខ្លាំងទៅថ្ងៃមុខ។
ទាក់ទិននឹងការលួចកាប់ឈើប្រណិតនៅក្នុងតំបន់អង្គរ មិនមែនទើបតែលើកទី១ ទេ គឺធ្លាប់បានកើតជាច្រើនករណីរួចមកហើយ ប៉ុន្តែគេមិនដែលឃើញអាជ្ញាធរជាតិអប្សរាចាត់វិធានការច្បាប់ណាមួយទប់ស្កាត់អំពើល្មើសបែបនេះឱ្យមានប្រសិទ្ធភាពនៅឡើយទេ។
ជាក់ស្តែង ដើមគ្រញូងចំនួន ៤ដើមដែលមានអាយុកាលប្រមាណ ៥០ឆ្នាំ ត្រូវបានគេលួចកាប់ក្នុងចម្ការពូជឈើគ្រញូងដែលមានទំហំជិត ២ពាន់ហិកតារ (១៨៨០ហិកតារ) ស្ថិតនៅភូមិខ្នាតពោធិ៍ និងភូមិវត្ត ឃុំស្រែពោធិ៍ ស្រុកវ៉ារិន និងភូមិខ្នារក្រៅ ឃុំកន្ទួត ស្រុកស្វាយលើ និងឃុំឃុនរាម ស្រុកបន្ទាយស្រី ខេត្តសៀមរាប កាលពីពាក់កណ្ដាលខែមិថុនា ឆ្នាំ២០២២ កន្លងទៅនោះ។
របាយការណ៍របស់មន្ត្រីបរិស្ថានខេត្តសៀមរាប ធ្លាប់បានអះអាងថា គិតចាប់ពីឆ្នាំ២០២០ មក បទល្មើសលួចកាប់ដើមគ្រញូងក្នុងតំបន់អង្គរមានប្រមាណជាង ១០ករណីទៅហើយ ក្នុងនោះក៏មានករណីមួយចំនួនត្រូវបានមន្ត្រីបរិស្ថានរឹបអូសវត្ថុតាង និងកសាងសំណុំរឿងទៅតុលាការផងដែរ៕